Cov Tuag Yuav Sawv Rov Los​—Ua Cas Peb Thiaj Paub Tseeb Li Ntawd?

Puas yog cov neeg ruam thiaj ntseeg tias cov tuag yuav sawv tau rov qab los xwb? Tus tubtxib Povlauj tsis xav li ntawd. Vajtswv tshoov nws sau li no: “Yog peb muaj siab vam rau hauv Khetos rau sim neej no xwb, peb kuj yog cov uas ntxim khuvleej dua ib tsoom sawvdaws. Tiamsis nimno Khetos twb raug tsa hauv qhov tuag rov los lawm, yog thawj tug hauv cov uas tsaug zog lawm.” (1 Khaulee 15:19, 20) Povlauj ntseeg tias muaj ib hnub Vajtswv yuav tsa cov tuag sawv rov qab los tiag tiag li. Vim li cas? Vim Vajtswv twb tsa Yexus sawv lawm tiag.a (Tubtxib Tes Haujlwm 17:31) Povlauj thiaj muab Yexus hu ua “thawj tug hauv cov uas tsaug zog lawm” rau qhov Yexus yog thawj tug uas Vajtswv tsa sawv los txais txojsia mus ib txhis. Nqe ntawd hais tias Yexus yog thawj tug, ces yuav tsum muaj cov uas ua nws qab thiab.

Peb vam thiab cia siab tau tias Vajtswv yeej yuav tsa cov tuag sawv rov qab los tiag, vim Vajtswv “tsis txawj dag.” (Titau 1:2) Vajtswv Yehauvas yeej tsis tau dag leejtwg ib zaug li. Nws yeej yuav tsis dag peb thiab. Phau Vajlugkub qhia tias Vajtswv twb tsa ib txhia sawv ciaj rov qab los lawm. Puas yog nws lam tsa kom peb cia siab qhuav xwb? Tsis yog, Vajtswv yeej tsis lam dag peb li ntawd ib zaug li.

Rau qhov Vajtswv hlub tibneeg heev, nws thiaj cog lus tias yav tom hauv ntej nws yuav tsa cov tuag sawv rov qab los. Yauj nug li no: “Yog neeg tuag lawm nws yuav rov muaj txojsia lov?” Ces Yauj rov hais tias: “Koj yuav hu thiab kuv yuav teb koj, koj yuav xav tau tus uas koj txhais tes tsim.” (Yauj 14:14, 15) Yauj ntseeg tias Yehauvas hlub nws heev, thiab Yehauvas yeej xav pom Yauj rov muaj txojsia dua. Ua li Vajtswv puas tseem hlub tibneeg li ntawd tiag? Nws yeej hlub rau qhov phau Vajlugkub qhia tias Vajtswv “tsis txawj txawv txav.” (Malakhi 3:6) Xav seb yog muaj ob niam txiv tus menyuam tuag lawm, nkawd puas nco thiab tshua tus menyuam ntawd? Vajtswv muaj lub siab xav pom cov uas tuag lawd ib yam li ntawd. Nws xav kom lawv sawv rov qab los muaj zog npho ua neej nyob hauv ntiajteb no. Tibneeg tsis muaj hwjchim tsa cov tuag sawv, tiamsis Vajtswv muaj hwjchim ua raws li nws lub siab xav.​—Ntawv Nkauj 135:6.

Yehauvas yuav pub hwjchim rau nws tus Tub Yexus tsa cov tuag sawv rov los. Cov uas quaj ntsuag yuav xyiv fab rau qhov lawv yuav rov pom cov uas lawv hlub tshua. Yexus yeej xav tsa cov tuag sawv rov qab los tiag. Yav thaum ub, Yexus tus kwvluag Laxalau tuag lawm. Yexus pom Laxalau 2 tug muam thiab cov phoojywg quaj heev, Yexus thiaj nrog lawv “quaj.” (Yauhas 11:35) Muaj dua ib zaug Yexus mus hauv lub moos Na-i. Nws pom neeg tabtom kwv ib tug tuag tawm tuaj. Yog ib tug poj ntsuam tib leeg tub uas tuag lawm. Phau Vajlugkub qhia tias Yexus khuvleej tus poj ntsuam ntawd heev nws thiaj hais tias: “Tsis txhob quaj.” Ces nws txawm tsa tus tub ntawd sawv tamsid. (Luka 7:13) Ob tug qauv no qhia tseeb tias kev ploj kev tuag yeej ua rau Yexus mob siab kawg li. Nws tos ntsoov hnub uas nws yuav tshem tawm kev ploj kev tuag kom neeg thoob ntiajteb muaj kev zoo siab xyiv fab kawg li!

Koj puas tau raug dua tej kev nyuaj siab li no? Tej zaum koj xav tias tsis muaj leejtwg yuav tshem tau kev ploj kev tuag mus. Tiamsis nco ntsoov tias Vajtswv yuav txib nws tus Tub Yexus los tsa cov tuag tiag tiag li. Vajtswv xav kom koj pom hnub ntawd. Nws yuav tsa cov neeg uas koj hlub tshua sawv rov qab los muaj txojsia nyob dua. Nws xav kom koj ua tus tos txais lawv ntag! Xav seb thaum ntawd koj yuav xyiv fab npaum li cas. Sawvdaws yuav npaj lub neej mus ntxiv, tsis muaj ib hnub yuav sib ncaim li lawm!

Lionel hais tias: “Kuv kawm tias Vajtswv yuav tsa cov tuag sawv rov qab los. Nyuaj heev rau kuv ntseeg li no. Kuv tsis tso siab rau tus uas qhia kuv. Kuv thiaj tshawb nrhiav hauv phau Vajlugkub, ua ciav muaj li ntawd tiag! Nimno kuv tos ntsoov hnub uas kuv yuav rov qab pom kuv yawm txiv dua.”

Koj puas xav paub ntxiv? Yehauvas Cov Timkhawv ntseeg tias muaj ib hnub Vajtswv yuav tsa cov tuag sawv rov los tiag tiag li. Yog koj xav paub ntxiv, lawv yuav zoo siab pab koj tshawb nrhiav txog tej no.b