Tso Siab Tias Yehauvas Yuav Pab Koj Rau Lub Sij Hawm Nyuaj Siab

1-2. (1) Peb thiab cov Yudais raug tib co teeb meem twg? (2) Cov Yudais raug tej teeb meem zoo li cas? (Saib lub ntsiab “Lub Caij Hakais, Xakhaliyas, Thiab Exalas Nyob.”)

TEJ thaud koj puas txhawj txog lub neej yav tom hauv ntej? Yog koj poob hauj lwm, tej zaum koj yuav txhawj tias koj yuav ua li cas thiaj khwv tau txaus noj txaus haus rau koj tsev neeg. Tej zaum koj kuj txhawj txog koj tsev neeg vim tej nom tej tsw ua ywj fab ywj fwj, nej raug kev tsim txom, los sis Yehauvas tes hauj lwm raug tawm tsam. Ua li, koj puas raug cov teeb meem no niaj hnub nim no? Yog koj raug ces yuav txhawb tau koj lub zog heev thaum koj pom tias Yehauvas tau pab cov Ixayees txheej thaum ub li cas thaum lawv raug tej teeb meem uas nyuam qhuav hais tas los no.

² Cov neeg Yudais uas ib txwm nyob hauv lub nroog Npanpiloos yuav tsum muaj kev ntseeg thiaj kam tso lawv lub neej uas muaj txhua tsav txhua yam tseg rov mus nyob ib lub teb chaws uas lawv twb tsis paub txog li. Thaum lawv mus txog, lawv ntsib ntau yam kev nyuaj siab, lub teb chaws los nyob tsis tiaj tsis tus. Tsis tas li ntawd xwb, cov teb chaws uas nyob ib ncig lawv los tseem tuaj tawm tsam lawv thiab. Vim li no thiaj nyuaj heev rau lawv tau hau ntsoov kho Yehauvas lub tuam tsev. Yog li ntawd, thaum kwv lam xyoo 520 ua ntej Yexus, Yehauvas thiaj txib ob tug cev nws lus uas yog Hakais thiab Xakhaliyas mus txhawb kom cov tib neeg rov kub siab ua Yehauvas tes hauj lwm. (Hakais 1:1; Xakhaliyas 1:1) Peb yuav pom tias ob tug uas cev Vajtswv lus ntawd yeej txhawb tau cov tib neeg kawg li tiag. Kwv lam li 50 xyoo tom qab ntawd, cov Yudais uas rov tim Npanpiloos los rov qaug zog heev. Exalas thiaj tau mus ntawm Npanpiloos mus rau hauv Yeluxalees mus txhawb Vajtswv cov tib neeg kom muab Yehauvas txoj kev pe hawm tso ua ntej hauv lawv lub neej.​—Exalas 7:1, 6.

3. Peb yuav tham txog cov lus nug twg? (Pajlug 22:19)

³ Hakais thiab Xakhaliyas nkawd cov lus faj lem yeej pab tau Vajtswv cov tib neeg txheej thaud tso siab rau Yehauvas thaum lawv raug kev tawm tsam. Yog li ntawd, cov lus ntawd yeej pab tau peb tso siab tias Yehauvas yuav pab peb thaum peb raug kev nyuaj siab hauv peb lub neej. (Nyeem Pajlug 22:19.) Thaum peb mus soj ntsuam cov lus uas Hakais thiab Xakhaliyas nkawd cev thiab Exalas tus qauv, peb yuav teb cov lus nug no: Cov Yudais uas rov mus rau Yeluxalees raug tej kev nyuaj siab twg? Txawm peb ntsib kev nyuaj siab hauv peb lub neej los, vim li cas ho zoo rau peb muab Yehauvas tes hauj lwm tso ua ntej? Yuav ua li cas peb thiaj tso siab rau Yehauvas thaum peb ntsib kev nyuaj siab?

KEV NYUAJ SIAB UA RAU COV YUDAIS QAUG ZOG

4-5. Vim li cas cov Yudais thiaj tsis kub siab kho lub tuam tsev lawm?

⁴ Thaum cov Yudais rov los rau Yeluxalees, lawv muaj hauj lwm ntau heev ua. Lawv kho Yehauvas lub thaj thiab kho lub tuam tsev tej taw. (Exalas 3:1-3, 10) Tiam sis tsis ntev xwb lawv cia li qaug zog rau qhov lawv yuav tau kho lub tuam tsev, ua vaj ua tsev, ua liaj ua teb, thiab khwv rau lawv tsev neeg noj thiab haus. (Exalas 2:68, 70) Tsis tas li ntawd xwb, lawv tej yeeb ncuab kuj tuaj tawm tsam lawv, tsis pub lawv kho lub tuam tsev.​—Exalas 4:1-5.

⁵ Cov Yudais uas rov tim Npanpiloos los kuj nyuaj siab txog nyiaj txiag thiab kev nom kev tswv tsis ruaj khov. Cov Pawxias kuj yog cov kav lawv lub teb chaws. Tom qab Pawxias tus Vaj Ntxwv Xailas tuag xyoo 530 ua ntej Yexus, vaj ntxwv Kanpexes (Cambyses) sawv los kav thiab xav mus txeeb teb chaws Iyiv. Thaum vaj ntxwv Kanpexes tab tom mus rau teb chaws Iyiv, nws cov tub rog thiaj mus yuam kom cov Ixayees muab zaub mov rau lawv noj, muab dej rau lawv haus, thiab muab chaw rau lawv so. Qhov no thiaj ua rau cov Ixayees nyuaj siab heev. Thaum vaj ntxwv Dali-us tus 1 pib sawv los kav, muaj ntau yam teeb meem hauv Pawxias. Tib neeg sawv tawm tsam nom tswv thiab teb chaws nyob tsis tiaj tsis tus. Tej teeb meem no ua rau coob tus Yudais txhawj tias xyov lawv yuav ua li cas es thiaj yug tau lawv lub cuab lub yig. Vim tej kev nyuaj siab no, cov Yudais ib txhia thiaj xav tias lub sij hawm ntawd tsis yog lub sij hawm los kho Yehauvas lub tuam tsev.​—Hakais 1:2.

6. Raws li Xakhaliyas 4:6, 7, cov Yudais ntsib lwm yam teeb meem twg, thiab Xakhaliyas tau cog lus li cas rau lawv?

⁶ Nyeem Xakhaliyas 4:6,7. Cov Yudais tsis yog raug kev txom nyem nyiaj txiag thiab kev nom kev tswv tsis ruaj khov xwb tiam sis lawv kuj ntsib kev tsim txom thiab. Nyob rau xyoo 522 ua ntej Yexus, lawv cov yeeb ncuab ntxias tau cov Pawxias tej nom tswv txwv tsis pub cov Yudais kho Yehauvas lub tuam tsev. Tiam sis Xakhaliyas cog lus rau cov Yudais tias Yehauvas yeej yuav siv Nws lub hwj huam los tshem tej teeb meem uas lawv ntsib ntawd. Yog li ntawd, xyoo 520 ua ntej Yexus, Vaj Ntxwv Dali-us thiaj rov qhib kev rau cov Yudais kho Yehauvas lub tuam tsev thiab tseem pab nyiaj txiag rau lawv. Nws kuj sam hwm kom tej nom tswv uas nyob ib ncig pab lawv thiab.​—Exalas 6:1, 6-10.

7. Thaum cov Yudais muab Yehauvas tes hauj lwm tso ua ntej hauv lawv lub neej, Yehauvas tau foom koob hmoov li cas rau lawv?

⁷ Yehauvas txib Hakais thiab Xakhaliyas mus qhia nws cov tib neeg tias nws yuav pab lawv yog lawv muab tes hauj lwm kho lub tuam tsev tso ua ntej. (Hakais 1:8, 13, 14; Xakhaliyas 1:3, 16) Hakais thiab Xakhaliyas tej lus thiaj txhawb tau cov Yudais rov kho lub tuam tsev rau xyoo 520 ua ntej Yexus. Ces yuav luag tsib lub xyoos xwb, lawv txawm kho tiav lub tuam tsev. Vim cov Yudais muab Vajtswv tes hauj lwm tso ua ntej, Yehauvas thiaj pab kom lawv muaj noj muaj haus thiab muaj kev sib raug zoo nrog nws. Thaum kawg, lawv thiaj pe hawm Yehauvas xyiv fab hlo.​—Exalas 6:14-16, 22.

TAU HAU NTSOOV UA VAJTSWV TES HAUJ LWM

8. Hakais 2:4 pab tau peb tau hau ntsoov rau Yehauvas tes hauj lwm li cas?

⁸ Vim lub caij muaj kev txom nyem loj kawg nkaus los ze zuj zus, thiaj tseem ceeb heev rau peb mus tshaj tawm txoj xov zoo. (Malakaus 13:10) Tiam sis tej thaud kuj nyuaj heev rau peb tau hau ntsoov mus qhia txoj xov zoo vim peb txom nyem nyiaj txiag los sis raug kev tawm tsam. Yog li, dab tsi thiaj yuav pab tau peb muab Vajtswv tes hauj lwm tso ua ntej? Peb yuav tau nco ntsoov tias Yehauvas yeej nrog nraim peb. Yehauvas yeej yuav cuab peb lub zog yog peb muab nws tes hauj lwm tso ua ntej hauv peb lub neej. Yog li, peb yeej tsis txhawj tsis ntshai.​—Nyeem Hakais 2:4.

9-10. Ib nkawm niam txiv pom tias Yexus cov lus nyob hauv Mathais 6:33 muaj tseeb li cas?

⁹ Cia peb tham txog Ntsuab Leejb thiab nws tus poj niam nkawd tus qauv. Nkawd yog ob tug tho kev. Tom qab nkawd tsiv mus pab ib lub koom txoos, nkawd ob txoj hauj lwm txawm poob tas vim lub teb lub chaw muaj teeb meem nyiaj txiag. Txawm nkawd nrhiav tsis tau ib txoj hauj lwm zoo ua los nkawd pom tias Yehauvas yeej pab nkawd, thiab tej thaud cov kwv tij nkauj muam kuj pab thiab. Thaum nkawd muaj kev nyuaj siab, dab tsi pab tau nkawd xwb? Ntsuab Leej hais tias, “Tau hau ntsoov mus tshaj tawm txoj xov zoo yog ib qho uas pab tau wb pom tias yam twg yog yam tseem ceeb tshaj hauv wb lub neej.” Lub sij hawm nkawd nrhiav hauj lwm, nkawd yeej rau siab ntso mus tshaj tawm txoj xov zoo.

¹⁰ Muaj ib hnub thaum nkawd mus qhia Vajlugkub rov los txog tsev, muaj ib tug qhia rau nkawd tias nkawd ib tug phooj ywg uas nyob deb li 100 mais (160 kilumev) nqa tau ob hnab zaub mov tuaj rau nkawd. Ntsuab Leej hais tias: “Hnub ntawd wb pom tias Yehauvas thiab lub koom txoos hlub wb heev. Wb ntseeg tias Yehauvas yeej nco ntsoov cov uas teev tiam nws tsis hais lub sij hawm uas lawv twb tag kev cia siab lawd.”​—Mathais 6:33.

11. Yog peb tau hau ntsoov ua Vajtswv tes hauj lwm ces peb yuav tau dab tsi?

¹¹ Yehauvas xav kom peb tau hau ntsoov rau tes hauj lwm mus coj tib neeg los ua Yexus cov thwj tim kom lawv thiaj tau txoj sia. Zoo li hais nyob rau hauv nqe 7, Hakais txhawb kom Yehauvas cov tib neeg rov kho lub tuam tsev. Yog lawv mloog Yehauvas hais ces nws cog lus tias nws “yuav foom koob hmoov” rau lawv. (Hakais 2:18, 19) Yog peb muab Yehauvas tes hauj lwm tso ua ntej ces Yehauvas yeej yuav foom koob hmoov rau peb thiab.

YUAV UA LI CAS PEB THIAJ HAJ YAM TSO SIAB RAU YEHAUVAS

12. Vim li cas Exalas thiab cov Yudais yuav tau muaj kev ntseeg tiag tiag?

¹² Nyob rau xyoo 468 ua ntej Yexus, Exalas thiab ib pab Yudais rov tim Npanpiloos los rau Yeluxalees. Exalas thiab cov uas nrog nws yuav tsum muaj kev ntseeg rau qhov txoj kev uas lawv taug phom sij heev. Vim lawv nqa cov nyiaj thiab cov kub uas tus vaj ntxwv muab pub rau lub tuam tsev, lawv kuj ntshai tsam tub sab ho tuaj huab lawv. (Exalas 7:12-16; 8:31) Tsis tas li ntawd xwb, hauv Yeluxalees los yeej phom sij heev thiab, vim tsis muaj neeg coob nyob rau hauv thiab lub ntsa yeej thiab tej rooj vag los tseem tsis tau kho. Exalas tso siab rau Yehauvas heev. Ua li, qhov no ho pab tau peb li cas?

13. Vim li cas Exalas thiaj tso tau siab rau Yehauvas? (Saib cov taw ntawv.)

¹³ Exalas pom thaum Yehauvas pab Nws cov tib neeg thaum lawv raug sim. Xyoo 484 ua ntej Yexus, tej zaum Exalas tseem nyob hauv Npanpiloos thaum Vaj Ntxwv Xawxes sam hwm muab cov Yudais tua kom tu noob. (Exethaws 3:7, 13-15) Yog ib lub sij hawm uas phom sij heev rau Exalas thiab cov Yudais. Thaum lawv hnov vaj ntxwv sam hwm li ntawd mas lawv nyuaj siab heev. Lawv noj tsis taus mov thiab quaj thov Yehauvas pab. (Exethaws 4:3) Ntshe Exalas thiab cov Yudais zoo siab kawg li thaum cov uas yuav muab lawv tua raug tua tag! (Exethaws 9:1, 2) Qhov uas Exalas lawv raug no pab tau nws haj yam tso siab rau Yehauvas rau yav tom hauv ntej.c

14. Ib tug muam kawm tau li cas thaum Yehauvas tau pab nws rau lub sij hawm nws nyuaj siab?

¹⁴ Thaum Yehauvas pab peb rau lub sij hawm nyuaj siab, haj yam ua rau peb tso siab rau nws. Cia peb mus tham txog tus muam Kab Xia uas nyob tim Yus Luv sab hnub tuaj tus qauv. Nws tso nws txoj hauj lwm tseg thaum cov nws nrog ua hauj lwm yuam kom nws xaiv nom xaiv tswv. Nws hais tias: “Zaum no yog thawj zaug uas kuv txom nyem nyiaj txiag tiag tiag li. Kuv thov Yehauvas thiab pom nws pab kuv. Vim li no, yav tom ntej, txawm kuv yuav poob hauj lwm los kuv yeej tsis txhawj. Yog kuv Leej Txiv uas nyob saum ntuj twb pab kuv hnub no ces nws yeej yuav pab kuv tag kis thiab.”

15. Dab tsi pab tau Exalas tso siab rau Yehauvas tsis tseg? (Exalas 7:27, 28)

¹⁵ Exalas pom tias Yehauvas tau pab nws. Thaum Exalas xav txog tej lub sij hawm uas Yehauvas tau pab nws mas pab tau nws tso siab rau Yehauvas heev. Nws thiaj hais tias: “[Yehauvas] uas yog kuv tus Vajtswv txhawb kuv zog kawg nkaus li.” (Nyeem Exalas 7:27, 28.) Exalas tau hais zoo li no rau zaus nyob rau hauv phau ntawv uas nws sau.​—Exalas 7:6, 9; 8:18, 22, 31.

16. Peb pom Yehauvas txoj kev pab rau lub sij hawm twg? (Saib daim duab.)

¹⁶ Yehauvas yeej pab tau peb thaum peb ntsib teeb meem. Xws li, thaum peb thov peb tus los pav kom cia ob peb hnub rau peb mus lub rooj sib txoos los sis kom hloov peb lub sij hawm xwv peb thiaj mus tau txhua txoj kev sib txoos. Yog peb cia Yehauvas pab peb ces thaum kawg Yehauvas tseem pab ntau tshaj li peb xav. Ces qhov no yuav ua rau peb haj yam tso siab rau Yehauvas.

17. Exalas txo hwj chim li cas rau lub sij hawm muaj kev nyuaj siab? (Saib daim duab ntawm lub khaum.)

¹⁷ Exalas txo hwj chim thov Yehauvas pab. Thaum Exalas nyuaj siab heev txog nws tej hauj lwm, nws txo hwj chim thov Yehauvas pab. (Exalas 8:21-23; 9:3-5) Vim Exalas tso siab rau Yehauvas, qhov no kuj pab tau lwm tus los txhawb nws thiab xyaum nws txoj kev ntseeg. (Exalas 10:1-4) Thaum peb txhawj txog tej uas peb cheem tsum los sis txhawj txog peb tsev neeg txoj kev noj qab nyob zoo, peb yuav tau tso siab rau Yehauvas es thov nws pab.

18. Dab tsi pab tau peb haj yam tso siab rau Yehauvas?

¹⁸ Yog peb txo hwj chim es cia Yehauvas thiab cov kwv tij nkauj muam pab peb ces peb yuav yim huab tso siab rau Yehauvas. Maiv Kaus uas muaj peb tug me nyuam yeej ib txwm tso siab tias Yehauvas yuav saib xyuas nws thaum nws ntsib kev nyuaj siab. Muaj ib zaug, nws tus me nyuam uas nws suab hauv plab cia li poob lawm. Tsis tas li ntawd xwb, nws tus txiv los kuj cia li tuag lawm thiab. Txawm li ntawd los nws hais tias: “Yus yeej tsis paub tias Yehauvas yuav pab yus li cas. Tej uas Yehauvas pab mas yus yeej xav tsis txog li. Ntau zaus kuv pom tias Yehauvas siv kuv cov phooj ywg los teb kuv tej lus thov, tsis hais tej lawv hais los sis ua. Yog kuv qhia kuv cov phooj ywg txog tej kuv raug hauv kuv lub neej ces lawv yeej pab tau kuv.”

TSO SIAB RAU YEHAUVAS MUS TXOG THAUM KAWG

19-20. Peb kawm tau li cas ntawm cov Yudais uas rov tsis tau mus rau Yeluxalees?

¹⁹ Peb yeej kawm tau ib yam zoo heev ntawm cov Yudais uas rov tsis tau mus rau Yeluxalees. Ib txhia tsis rov mus vim lawv laus, mob, los sis lawv tsev neeg muaj lwm yam cuam tshuam es mus tsis tau. Txawm li ntawd los lawv yeej zoo siab hlo muab ub muab no mus pab ua lub tuam tsev. (Exalas 1:5, 6) Kwv lam li 19 lub xyoos tom qab no, cov Yudais uas tseem nyob tim Npanpiloos yeej tseem tas zog xa ub xa no mus rau hauv Yeluxalees.​—Xakhaliyas 6:10.

²⁰ Txawm peb ua tsis tau ntau npaum li peb xav ua rau Yehauvas los peb ntseeg tias Yehauvas yeej pom txhua yam uas peb ua rau nws. Ua cas peb ho paub li ntawd? Nyob rau Xakhaliyas lub caij, Yehauvas hais kom tus cev nws lus ua ib lub kaus mom yeeb koob uas yog muab cov nyiaj thiab kub uas cov Yudais uas tseem nyob tim Npanpiloos xa los ua. (Xakhaliyas 6:11) “Lub kausmom yeebkoob” ntawd yuav ua ib “lub cim” txog cov Yudais uas tseem nyob tim Npanpiloos lub siab dawb siab zoo. (Xakhaliyas 6:14) Peb yeej tso siab tias Yehauvas yuav nco ntsoov lub dag lub zog uas peb siv los teev tiam nws rau lub sij hawm nyuaj siab ntxhov plawv.​—Henplais 6:10.

21. Dab tsi yuav pab tau peb tso siab rau Yehauvas txawm yav tom ntej yuav zoo li cas?

²¹ Peb yeej paub tias nyob rau tiam kawg no, peb yeej yuav ntsib kev nyuaj siab ntxhov plawv thiab yav tom ntej los yuav huab yam nyuaj. (2 Timautes 3:1, 13) Tiam sis peb tsis tas yuav cia tej ntawd ua rau peb txhawj dhau. Cia peb nco ntsoov cov lus uas Yehauvas hais rau nws cov tib neeg uas nyob rau Hakais lub caij. Nws hais rau lawv tias: “Kuv nrog nraim nej nyob . . . nej tsis txhob ntshai.” (Hakais 2:4, 5) Peb ntseeg tias Yehauvas yeej yuav nrog nraim peb thiab yog peb kub siab ua nws tes hauj lwm li peb ua tau. Yog peb ua raws li cov faj lem uas Hakais thiab Xakhaliyas sau thiab xyaum coj raws li Exalas tus qauv ces yuav pab tau peb tso siab tias Yehauvas yeej yuav nrog nraim peb txawm peb yuav raug kev nyuaj siab dab tsi yav tom hauv ntej.