Pab Cov Kawm Vajlugkub Los Ntseeg Yehauvas

1-2. (1) Vim li cas ib txhia kawm Vajlugkub ho ua xyem xyav es tsis tau kam ntseeg Yehauvas? (2) Nyob rau hauv zaj kawm yuav tham txog dab tsi?

PUAS muaj tej yam dab tsi twg uas khuam koj kom txhob ua Yehauvas ib tug Tim Khawv? Puas yog tej zaum koj ntshai tsam cov tib neeg uas koj ua hauj lwm nrog, koj tej phooj ywg los sis koj tsev neeg tawm tsam koj? Los sis puas yog koj xav hais tias koj coj tsis tau Vajtswv tej kev cai hauv koj lub neej? Yog koj tau xav li no, tsis yog koj ib leeg xwb thiaj xav li ntawd. Muaj lwm tus uas kawm Vajlugkub yeej xav tib yam nkaus li koj thiab, lawv thiaj tsis tau ua Yehauvas ib tug Tim Khawv.

² Yexus paub hais tias yog peb muaj txoj kev xav no ces yuav ua rau peb tsis kam teev tiam Yehauvas. (Mathais 13:20-22) Txawm li ntawd los nws kuj muaj lub siab xav pab cov uas tseem pheej ua xyem xyav. Nws qhia rau nws cov thwj tim kom txawj pab tej tug zoo li no kom lawv (1) ua zoo saib seb pheej muaj dab tsi khuam lawv, (2) paub ua li cas xwv lawv txoj kev hlub rau Yehauvas thiaj loj zuj zus, (3) muab Yehauvas tso ua ntej hauv lawv lub neej, thiab (4) paub ua li cas thaum muaj neeg tawm tsam lawv. Peb yuav xyaum kom txawj qhia li Yexus li cas thaum peb siv phau ntawv Nyob Kaj Siab Lug Mus Ib Txhis xwv tus uas kawm Vajlugkub thiaj muaj lub siab xav los ntseeg Yehauvas?

PAB SEB TSEEM MUAJ DAB TSI KHUAM NWS

3. Muaj dab tsi khuam Nikhaudemaus kom tsis txhob los ua Yexus ib tug thwj tim?

³ Muaj dab tsi khuam Nikhaudemaus uas yog cov Yudais ib tug thawj coj, nws thiaj tsis tau kam ua Yexus ib tug thwj tim. Yexus tshaj tawm txoj xov zoo tau rau lub hlis xwb, Nikhaudemaus twb paub tias Yexus yog tus uas Vajtswv txib los. (Yauhas 3:1, 2) Txawm li ntawd los Nikhaudemaus haj tseem ua twj ywm tuaj cuag Yexus vim nws “ntshai cov Yudais.” (Yauhas 7:13; 12:42) Tej zaud nws ntshai tsam nws lub meej mom ho poob yog nws los ua Yexus ib tug thwj tim.a

4. Yexus tau pab Nikhaudemaus li cas kom nws thiaj paub seb Yehauvas xav kom nws ua dab tsi?

⁴ Nikhaudemaus paub Mauxes Txoj Kev Cai tiam sis nws xav tau kev pab kom nws paub seb Yehauvas xav kom nws ua dab tsi. Yexus ho tau pab nws li cas? Txawm ib tag hmo lawm los Yexus txaus siab hlo lauj nws lub sij hawm los pab Nikhaudemaus. Tsis tas li ntawd, Yexus qhia rau Nikhaudemaus tias yog Nikhaudemaus xav ua ib tug thwj tim ces nws yuav tau hloov dua siab tshiab, ua kev cai raus dej, thiab yuav tsum ntseeg Vajtswv tus Tub.​—Yauhas 3:5, 14-21.

5. Yuav ua li cas koj thiaj paub tias muaj dab tsi khuam cheem tus kawm Vajlugkub nrog koj kom tsis txhob rawm ntseeg Yehauvas?

⁵ Txawm tus kawm Vajlugkub ntawd paub Vajtswv Txoj lus zoo heev los koj yuav tau ua tib zoo pab seb tseem tshuav dab tsi khuam cheem nws, nws thiaj tsis tau kam los ntseeg Yehauvas. Xws li tej zaum nws txoj hauj lwm kuj muab nws lub sij hawm noj tag lawm los sis nws kuj raug nws tsev neeg txwv nws tsis pub nws ua Yehauvas ib tug Tim Khawv. Tsis txhob ua siab deb, kav tsij pab tus uas kawm Vajlugkub nrog koj ib yam li Yexus. Tej zaud koj kuj caw kom nws nrog koj mus taug kev ua si los sis mus noj me ntsis mov ua ke. Yog koj ua li no tej zaum nws kuj yuav qhib siab qhia rau koj seb muaj li cas rau li cas hauv nws lub neej. Yog nws ho qhib siab rau koj, ua tib zoo txhawb kom nws txawj hloov nws lub neej los ua raws li Yehauvas lub siab nyiam, tsis yog raws li koj lub siab nyiam.

6. Yuav ua li cas koj thiaj pab tau ib tug kawm Vajlugkub tso siab hlo muab tej uas nws kawm siv rau hauv nws lub neej? (1 Kauleethaus 16:13)

⁶ Thaum tus uas kawm Vajlugkub nrog koj tso siab tias Yehauvas yuav pab kom nws txawj coj Yehauvas tej kev cai ces nws yuav paub muab tej uas nws coj los siv rau hauv nws lub neej. (Nyeem 1 Kauleethaus 16:13.) Muab piv txwv tias thaum koj tseem yau es koj mus kawm ntawv, koj nyiam tus xib hwb uas coj zoo li cas? Tej zaud koj yuav nyiam tus uas ua siab ntev thiab txhawb koj lub zog tias koj yeej kawm tau tej uas koj kawm ntawd. Zoo ib yam li ntawd thaum koj qhia ib tug uas kawm Vajlugkub, koj yeej pab kom nws paub seb Vajtswv xav kom nws ua dab tsi tiam sis koj yuav tau pab kom nws xam pom tias yeej muaj Yehauvas pab kom nws hloov tau nws lub neej. Yuav ua li cas koj thiaj li txawj qhia yam li no?

PAB KOM NWS TXOJ KEV HLUB LOJ ZUJ ZUS RAU YEHAUVAS

7. Yexus pab kom tib neeg txoj kev hlub loj zuj zus rau Yehauvas li cas?

⁷ Yexus paub hais tias yog nws cov thwj tim hlub Vajtswv ces lawv yuav ua raws li tej uas lawv tau kawm. Yexus thiaj li qhia ntau yam kom lawv txoj kev hlub rau Vajtswv thiaj loj zuj zus. Xws li nws muab Yehauvas piv rau ib tug txiv neej uas muab ntau yam zoo pub rau nws cov me nyuam. (Mathais 7:9-11) Tej zaud cov uas mloog Yexus qhia kuj tsis muaj txiv hlub lawv pes tsawg. Zaum tsaws xav seb lawv ho xav li cas thaum Yexus piav zaj lus piv txwv uas leej txiv muaj kev hmov tshua heev thaum nws pom nws tus tub loj leeb thim xav thiab rov qab los cuag nws. Yexus pab kom lawv xam pom tias Yehauvas hlub lawv heev thiab xav pab lawv.​—Lukas 15:20-24.

8. Yuav ua li cas koj thiaj pab tau ib tug kawm Vajlugkub kom muaj kev hlub rau Yehauvas ntxiv?

⁸ Yog koj piav txog Vajtswv tej cwj pwm zoo kom tshab tshab rau tus kawm Vajlugkub ces nws txoj kev hlub rau Yehauvas yeej yuav loj zuj zus ntxiv. Txhua zaus neb kawm Vajlugkub, pab kom tus kawm Vajlugkub ntawd xam pom Yehauvas txoj kev hlub. Thaum tham txog tus nqi txhiv, piav rau nws seb ho pab tau nws li cas rau li cas. (Loos 5:8; 1 Yauhas 4:10) Yog tias tus uas kawm Vajlugkub ntawd paub hais tias Yehauvas hlub nws npaum li cas ces yuav pab tau kom nws hlub Yehauvas zuj zus ntxiv thiab.​—Kalatias 2:20.

9. Dab tsi pab tau Maikaum hloov nws lub neej?

⁹ Cia peb mus tham txog ib tug npe hu ua Maikaum (Michael) uas nyob rau teb chaws Idaunixias (Indonesia). Nws niam thiab nws txiv yeej tu nws loj hlob paub Yehauvas tiam sis nws tsis ua kev cai raus dej. Thaum nws muaj 18 xyoo, nws txawm tsiv mus nyob lwm lub teb chaws thiab mus ua hauj lwm tsav cov tsheb thauj khoom. Tom qab no nws kuj yuav poj niam thiab muaj me nyuam lawm los nws haj tseem mus ua hauj lwm txawv teb chaws. Nws tus poj niam thiab tus ntxhais txawm pib kawm Vajlugkub. Tom qab Maikaum niam tuag lawd, nws thiaj li rov qab los tsev los saib xyuas nws txiv thiab nws kuj kam kawm Vajlugkub. Thaum Maikaum kawm txog ntu “Kawm Ntxiv” uas nyob zaj kawm 27 hauv phau Nyob Kaj Siab Lug Mus Ib Txhis mas raug nws siab heev. Maikaum thiaj li xav mus xav los tias ntshe mob Yehauvas siab heev thaum Yehauvas pom nws tus Tub tuag txom nyem ntsuav. Qhov no thiaj ua rau Maikaum los los kua muag. Maikaum ris txiaj ntsig tias muaj tus nqi txhiv, nws thiaj li hloov nws lub neej thiab ua kev cai raus dej.

PAB NWS MUAB YEHAUVAS TSO UA NTEJ HAUV NWS LUB NEEJ

10. Yexus tau ua dab tsi los mus pab nws cov thwj tim kom ua ntau yam ntxiv rau Yehauvas? (Lukas 5:5-11) (Saib daim duab.)

¹⁰ Cov thwj tim zeem tau sai sai tias Yexus yog tus Mexiyas tiam sis lawv tsis paub tias mus tshaj tawm txoj xov zoo tseem ceeb npaum li cas. Thaum Yexus caw kom Petus thiab Anrus nkawd raws nws qab, nkawd twb yeej ua thwj tim tau ib ntus lawm. (Mathais 4:18, 19) Nkawd kuj nrog Yakaunpaus thiab Yauhas nkawd ua luam ntses mas tau nqi kawg li. (Malakaus 1:16-20) Thaum Petus thiab Anrus “tso plhuav nkawd ob lub vas tseg” kom thiaj tau raws Yexus, nkawd kuj nrhiav kev los mus pab kom yug tau nkawd lub cuab lub yig. Vim li cas nkawd ho txaus siab tso nkawd txoj lag luam ntaus ntses tseg? Nyob rau hauv phau Lukas qhia tias Yexus tau ua ib qho txuj ci los mus txhawb nkawd lub zog tias Yehauvas yeej yuav saib xyuas nkawd.​—Nyeem Lukas 5:5-11.

11. Qhov uas peb piav txog peb txoj kev ntseeg rau tus kawm Vajlugkub yuav txhawb tau nws txoj kev ntseeg li cas?

¹¹ Peb ua tsis tau txuj ci yam li Yexus tiam sis peb kuj piav tau rau tus uas kawm Vajlugkub txog tej yam Yehauvas tau ua los pab cov uas muab Yehauvas tso ua ntej hauv lawv lub neej. Xws li koj puas nco qab Yehauvas tau pab koj thaum koj nyuam qhuav pib tuaj kev sib txoos? Tej zaud koj yuav tau mus cuag koj tus los pav thiab qhia rau nws tias vim li cas koj ua tsis tau hauj lwm ntau thiab koj tsis xav kom txoj hauj lwm cuam tshuam koj tej kev sib txoos. Nco ntsoov piav qhia rau tus uas kawm Vajlugkub nrog koj tias yeej txhawb koj lub zog kawg li thaum koj pom Yehauvas pab koj vim koj muab Yehauvas tso ua ntej hauv koj lub neej.

12. (1) Vim li cas zoo rau koj caw cov kwv tij nkauj muam nrog koj mus qhia tus uas kawm Vajlugkub nrog koj? (2) Piav seb koj yuav siv cov yeeb yaj kiab los qhia tus uas kawm Vajlugkub li cas.

¹² Yog ib qho zoo uas cov kwv tij nkauj muam piav rau tus uas kawm Vajlugkub nrog koj seb lawv tau hloov lawv lub neej li cas xwv lawv thiaj muab tau Yehauvas tso ua ntej hauv lawv lub neej. Yog li ntawd tsis txhob ua siab deb, kav tsij caw cov kwv tij nkauj muam nrog koj mus qhia Vajlugkub rau nws. Hais kom cov kwv tij nkauj muam piav seb lawv los paub Yehauvas li cas thiab lawv ho tau ua li cas lawv thiaj muab Yehauvas tes hauj lwm tso ua ntej hauv lawv lub neej. Tsis tas li ntawd, tso cov yeeb yaj kiab ntawm ntu “Kawm Ntxiv” los sis “Tshawb Ntxiv” hauv phau Nyob Kaj Siab Lug Mus Ib Txhis rau nws. Xws li thaum kawm txog zaj kawm 37, saib zaj yeeb yaj kiab Yehauvas Yuav Tsom Kwm Peb ces tom qab ntawd pab kom tus kawm Vajlugkub nrog koj xam pom tias Yehauvas yeej yuav pab nws yog nws muab Yehauvas tso ua ntej hauv nws lub neej.

PAB KOM NWS PAUB UA LI CAS THAUM MUAJ NEEG TAWM TSAM

13. Yexus npaj nws cov thwj tim rau lub sij hawm uas raug kev tawm tsam li cas?

¹³ Yexus qhia tag los rov qhia dua rau nws cov thwj tim tias lawv yuav raug tawm tsam, tsis hais los ntawm tej nruab ze los xij peem. (Mathais 5:11; 10:22, 36) Tsis ntev ua ntej Yexus tuag, nws qhia rau nws cov thwj tim tias tej zaum lawv kuj yuav raug tua vim lawv teev tiam Yehauvas. (Mathais 24:9; Yauhas 15:20; 16:2) Nws thiaj li txhawb kom lawv ceev faj thaum lawv mus tshaj tawm txoj xov zoo. Nws qhia kom tsis txhob nrog cov uas tawm tsam sib cav sib ceg, thiab nws qhia kom lawv mam xav mam hais mam xav mam ua xwv lawv thiaj qhia tau txoj xov zoo.

14. Peb yuav npaj ib tug kawm Vajlugkub li cas ua ntej nws raug tawm tsam? (2 Timautes 3:12)

¹⁴ Zoo ib yam li Yexus, peb kuj npaj tus kawm Vajlugkub kom nws paub tej kev tawm tsam nws yuav raug vim nws kawm Vajlugkub. Zoo rau koj piav rau nws paub txog tej yam nws yuav hnov los ntawm cov nws ua hauj lwm nrog, nws tej phooj ywg, thiab tej nruab ze vim nws kawm Vajlugkub. (Nyeem 2 Timautes 3:12.) Tej zaum tej tug uas nws ua hauj lwm nrog yuav thuam luag nws vim nws tsis coj lub neej li qub lawm. Hos tej zaum tej nruab ze kuj yuav thuam nws txoj kev ntseeg. Yog peb ntxov npaj nws ua ntej ces thaum nws raug tawm tsam, nws thiaj paub tias nws yuav tau ua li cas.

15. Muaj dab tsi thiaj pab tau tus kawm Vajlugkub thaum raug nws tsev neeg tawm tsam?

¹⁵ Yog tias tus koj qhia Vajlugkub rau raug nws tsev neeg tawm tsam ces koj yuav tau ua tib zoo piav rau nws kom nws nkag siab vim li cas lawv thiaj tsis txaus siab. Tej zaud lawv kuj qhia rau nws tias nws raug Yehauvas Cov Tim Khawv dag ntxias los sis lawv kuj xib tim ntxub Yehauvas Cov Tim Khawv. Txawm Yexus tsev neeg kiag los lawv yeej tsis txaus siab rau tej yam nws ua. (Malakaus 3:21; Yauhas 7:5) Cob qhia kom nws ua siab ntev thiab hais lus zoo rau nws tsev neeg thiab lwm tus.

16. Yuav ua li cas tus uas kawm Vajlugkub nrog peb thiaj txawj piav tej uas nws kawm rau lwm tus?

¹⁶ Koj yuav tau qhia rau tus kawm Vajlugkub nrog koj paub tias yog nws muaj tej txheeb ze xav paub txog phau Vajlugkub, kom nws tsis txhob teb txhua yam rau lawv. Yog nws piav ntau dhau ces yuav ua rau lawv tsis xav nrog nws tham ntxiv lawm. Tiam sis yog nws piav me ntsis xwb ces yuav muaj lus tham rau lwm zaus ntxiv. (Kaulauxais 4:6) Qhia kom nws paub piav lub vej xaij jw.org rau tej nruab ze xwv yog lawv xav paub tias Yehauvas Cov Tim Khawv yog leej twg ces thaum twg lawv xav mus saib los thiaj tau.

17. Koj yuav cob qhia tus uas kawm Vajlugkub li cas kom txawj teb cov uas nug seb Yehauvas Cov Tim Khawv ntseeg li cas? (Saib daim duab.)

¹⁷ Tej zaud koj kuj siv tau ntu “Tej Uas Coob Tus Nug Txog” hauv lub vej xaij jw.org los pab tus uas kawm Vajlugkub kom nws paub npaj nws cov lus teb yog tias nws tej nruab ze los sis tej neeg nws nrog ua hauj lwm ua ke nug nws txog dab tsi nws thiaj txawj teb. (2 Timautes 2:24, 25) Nco ntsoov mus tham txog ntu “Ib Txhia Hais Tias” hauv phau Nyob Kaj Siab Lug Mus Ib Txhis xwv nws thiaj paub. Txhawb kom tus uas kawm Vajlugkub xyaum mus xyaum los kom nws thiaj txawj teb thaum muaj neeg nug txog ib yam dab tsi. Yog qhov twg nws tseem teb tsis tshua tau zoo pes tsawg los qhia rau nws. Yog nws xyaum li no ua ntej ces nws yuav tsis ntshai piav nws txoj kev ntseeg.

18. Yuav ua li cas koj thiaj yaum tau tus kawm Vajlugkub nrog koj kom ua ib tug tshaj tawm uas tsis tau raus dej? (Mathais 10:27)

¹⁸ Yexus txhawb nws cov thwj tim kom mus tshaj tawm txoj xov zoo rau ib zej tsoom hnov. (Nyeem Mathais 10:27.) Thaum tus kawm Vajlugkub pib nrog lub koom txoos mus tshaj tawm ces nws yuav pom hais tias Yehauvas pab nws thiab nws los kuj yuav tso siab rau Yehauvas ntxiv zuj zus. Yuav ua li cas koj thiaj pab tau tus kawm Vajlugkub kom nws muaj hom phiaj ua ib tug tshaj tawm uas tsis tau raus dej? Thaum muaj ib lub hlis twg uas nqua hu kom sawv daws pab tshaj tawm txoj xov zoo ces yaum seb tus kawm Vajlugkub puas xav ua ib tug tshaj tawm thiab. Qhia rau nws vim li cas ho yooj yim mus qhia rau tej lub hlis zoo li ntawd. Ib qho ntxiv uas yuav pab tau nws yog rau npe mus ua yeeb yam piav saum sam thiaj rau txoj Kev Sib Txoos 1. Yog nws ua li no ces nws yuav tsis muaj qhov ntshai piav nws txoj kev ntseeg rau lwm tus.

TSO SIAB TIAS NWS YUAV UA HAUM YEHAUVAS SIAB

19. Yexus tso siab li cas rau nws cov thwj tim, thiab peb yuav xyaum nws tus yam ntxwv li cas?

¹⁹ Ua ntej Yexus mus saum ntuj ceeb tsheej, nws qhia rau nws cov thwj tim tias muaj ib hnub twg lawv yuav tau rov qab nyob ua ke dua. Lawv tsis nkag siab Yexus cov lus uas qhia tias lawv yuav tau mus saum ntuj. Txawm li ntawd los Yexus tsis xav txog qhov uas vim li cas lawv tsis to taub nws tiam sis Yexus paub tias lawv muaj siab kub lug xav ua haum Yehauvas siab. (Yauhas 14:1-5, 8) Yexus paub hais tias yuav tau sej me ntsis sij hawm lawv thiaj li nkag siab qho yam, xws li qhov uas lawv yuav tau mus nyob saum ntuj ceeb tsheej. (Yauhas 16:12) Zoo ib yam li Yexus, peb los yuav tau tso siab tias tus kawm Vajlugkub ntawd yeej muaj lub siab xav ua haum Yehauvas siab.

20. Ib tug muam nyob hauv Malavim tso siab rau tus kawm Vajlugkub nrog nws li cas?

²⁰ Peb tso siab tias tus uas kawm Vajlugkub nrog peb yuav xav ua qhov zoo qhov yog. Xws li nyob rau teb chaws Malavim (Malawi) muaj ib tug muam npe hu ua Tshifadaus (Chifundo) kawm Vajlugkub nrog ib tug poj niam uas yog cov Kav Tos Liv npe hu ua Alinafe hauv phau Nyob Kaj Siab Lug Mus Ib Txhis. Tom qab ob tug kawm tag zaj kawm 14, Tshifadaus nug Alinafe tias nws xav li cas txog qhov uas siv moj zeej los teev tiam. Alinafe chim thiab nws hais tias, “Yog kuv xav siv moj zeej los nyob ntawm kuv, koj tsis muaj cai hais!” Tshifadaus xav tias ntshe Alinafe yuav tsis kam kawm Vajlugkub nrog nws ntxiv lawm. Tiam sis nws kuj ua siab ntev qhia Vajlugkub rau Alinafe thiab cia siab tias muaj ib hnub twg Alinafe yuav hloov. Tau ob peb lub hlis tom qab ntawd, Tshifadaus nug Alinafe lo lus nug uas nyob rau zaj kawm 34 tias: “Tej uas koj kawm hauv phau Vajlugkub thiab kawm txog Vajtswv Yehauvas pab tau koj li cas?” Tshifadaus piav li no txog Alinafe tias, “Nws teb ntau yam zoo kawg li xws li muaj ib qho nws hais tias cov Tim Khawv tsis kam ua ib yam dab tsi uas phau Vajlugkub txwv.” Tsis ntev tom qab ntawd, Alinafe txawm tsis siv tej moj zeej thiab nws kuj ua kev cai raus dej lawm.

21. Peb yuav txhawb tus kawm Vajlugkub li cas kom nws teev tiam Yehauvas?

²¹ Txawm tias Yehauvas yog “tus ua kom loj hlob” los peb kuj muaj ib feem pab tus kawm Vajlugkub ntawd thiab. (1 Kauleethaus 3:7) Tsis yog peb qhia kom nws paub tias Vajtswv xav kom nws ua dab tsi xwb tiam sis peb kuj pab nws kom nws muaj lub siab hlub Yehauvas. Tsis tas li ntawd, peb kuj txhawb kom nws muab Yehauvas tso ua ntej rau hauv nws lub neej. Thaum nws raug kev tawm tsam los peb qhia kom nws paub tso siab rau Yehauvas. Thaum peb qhia tus uas kawm Vajlugkub tias peb tso siab tias nws yeej yuav ua haum Yehauvas siab ces nws yuav xam pom tias nws yeej coj tau Yehauvas tej kev cai thiab teev tiam tau Yehauvas.