Vajtswv Puas Paub Koj?

TEJ UAS VAJTSWV TSIM QHIA LI CAS?

Ob tug menyuam ntxaib yeej sib raug zoo heev. Nkawd sib raug zoo dua ob kwvtij lossis ob viv ncaus. Neexi Xinkau (Nancy Segal) khiav haujlwm rau ib lub koom haum tshawb nrhiav txog tej menyuam ntxaib (Twin Studies Center). Nws kuj yog ib tug ntxaib thiab, nws hais tias cov uas muaj ib tug ntxaib, lawv ib txhia pom tias thaum nrog lawv tus ntxaib tham, lawv twb hais tsis tau tas los tus ntxaib twb paub lawm. Muaj ib tug pojniam hais tias: “Kuv tus ntxaib paub txhua yam txog kuv, thiab kuv paub txhua yam txog nws.”

Vim li cas tej menyuam ntxaib ho sib paub zoo ua luaj? Cov neeg tshawb fawb pom tias nkawd loj hlob ua ke, niam txiv cob qhia nkawd ib yam nkaus ces nkawd tus cwj pwm thiaj zoo sib xws. Tiamsis tshwj xeeb tshaj, nkawd tej noob ntsha xeeb tau los zoo ib yam nkaus nkawd thiaj sib paub zoo dua lwm tus.

XAV LI NO: Peb tus Tswv Tsim yeej paub tias peb xeeb los li cas. Davi sau tias: “Koj muab kuv txuas rau hauv kuv niam lub plab. Thaum kuv raug tsim nyob hauv qhov nraim nkoos, thiab muab kuv tej pob txha sib txuas ua ke. . . . Koj lub qhov muag pom kuv rau thaum tsis tau xeeb rau hauv nruab thiab.” (Ntawv Nkauj 139:13, 15, 16) Yog li, Vajtswv tib leeg xwb thiaj paub peb zoo. Nws paub tias peb yeej ib txwm xeeb los li cas. Nws paub txhua yam uas los raug peb. Vajtswv paub peb zoo npaum li no ces peb yeej tso siab tau tias Vajtswv to taub peb.

PHAU VAJLUGKUB QHIA TIAS VAJTSWV TO TAUB PEB

Davi thov tias: “Au [Yehauvas], koj twb tshuaj saib kuv, thiab paub kuv zoo. Thaum kuv zaum thiab sawv ntsug, los koj kuj paub. Txawm yog koj nyob deb koj yeej paub tej uas kuv xav. Au [Yehauvas], ua ntej uas kuv tus nplaig tsis tau hais, koj twb paub tag huvsi lawm.” (Ntawv Nkauj 139:1, 2, 4) Yehauvas kuj paub peb lub siab thiab. Nws “nkag siab txhua yam uas [peb] npaj yuav ua thiab tej uas [peb] xav huvsi.” (1 Vaj Keeb Kwm 28:9; 1 Xamuyee 16:6, 7) Cov nqe Vajlugkub no qhia li cas rau peb txog Vajtswv?

Txawm peb tsis qhia tej kev txhawj xeeb rau Vajtswv los, Nws yeej pom tej uas peb ua thiab paub tej uas peb lub siab ntshaw. Nws paub tias vim li cas peb ho coj li ntawd, thiab paub tias peb yeej xav ua ntau yam zoo tiamsis peb ua tsis tau xwb. Vajtswv yog tus tsim kom peb muaj lub siab zoo, Vajtswv yeej pom qhov zoo ntawm peb xwb.​—1 Yauhas 4:7-10.

Phau Vajlugkub cog tseg tias

• ‘Yehauvas lub qhov muag yeej ntsia ntsoov cov uas ncaj ncees, thiab nws lub qhov ntsej mloog ntsoov lawv tej lus quaj thov.’​—1 PETUS 3:12.

• Vajtswv cog lus tias: “Kuv yuav coj thiab qhia koj txog txojkev uas tsim nyog koj taug. Kuv yuav ntsia ntsoov koj taw qhia koj.”​—NTAWV NKAUJ 32:8.

VAJTSWV KHUVLEEJ KOJ

Yog Vajtswv to taub peb zoo, puas yuav pab peb nyiaj taus kev txom nyem? Nyeem seb tau muaj li cas rau Ana uas nyob tebchaws Nai Ntsa Lia (Nigeria). Nws hais tias: “Kuv xav tias xyov puas tsim nyog ua neej nyob li lawm. Kuv muaj kev nyuaj siab ntau yam. Kuv yog ib tug poj ntsuam thiab kuv tus mentxhais tseem mus pw tsev kho mob vim nws lub hlwb muaj dej. Tib lub caij ntawd kws kho mob txawm hais rau kuv tias kuv mob kheeb xawm mis lawm thiab. Lawv thiaj muab kuv phais thiab muab tshuaj tua thiab tso fais fab hlawv mas nyuaj kawg nkaus li. Tu siab kawg uas wb ob niam tub thooj txhij mus pw tsev kho mob.”

Dabtsi thiaj pab tau Ana xwb? Nws hais tias: “Kuv ua tib zoo xav txog tej nqe Vajlugkub li Filipi 4:6, 7 uas hais tias, ‘Vajtswv txojkev siab tus uas ntau dhau li neeg nkag siab tau yuav tsom kwm nej lub siab thiab nej tej kev xav.’ Txhua zaus kuv xav txog nqe Vajlugkub no, zoo li Yehauvas nrog nraim kuv. Kuv paub tias nws paub kuv zoo dua li kuv paub kuv tus kheej. Cov kwvtij viv ncaus hauv lub koom txoos kuj txhawb tau kuv kawg li thiab.

“Txawm kuv niaj hnub mob ntsuav los kuv thiab kuv tus ntxhais wb tsis sab npaum li thaud lawm. Wb paub tias Yehauvas yeej pab wb. Thaum wb ntsib kev nyuaj siab los wb tseem muaj kev vam. Yakaunpau 5:11 hais tias: ‘Peb suav tias cov uas ua siab ntev thev kuj tau nyob kaj siab lug. Nej twb hnov txog qhov uas Yauj ua siab ntev thev, thiab pom tej uas [Yehauvas] ua rau nws thaum kawg, vim [Yehauvas] muaj kev tab ncuab thiab kev khuvleej.’” Vajtswv twb paub tej uas Yauj raug. Yog li ntawd, txawm peb raug kev txom nyem li cas los Nws yeej paub thiab khuvleej peb.