Npaj Siab Ua Koj Tes Num Ntxiv
1. Lub caij ua kevcai nco txog Yexus txojkev tuag, zoo rau peb ua dabtsi, thiab peb yuav npaj li cas tamsim no?
1 Lub caij uas peb ua kevcai nco txog Yexus txojkev tuag, yog ib lub sijhawm zoo heev rau peb “tsa ncauj ua [Yehauvas] tsaug.” (Nt.Nk. 109:30) Koj yeej nco Yehauvas txiaj ntsig rau qhov nws tau txib nws tus Tub los tuag txhiv peb. Yog li ntawd, koj puas yuav qhia Vajlugkub ntxiv rau lub Peb Hlis Ntuj no? Zoo rau koj npaj siab ua li ntawd tamsim no.—P.L. 21:5.
2. Tsaib no, thaum lub koom haum txo cov sijhawm ua ib tug pab tho kev, koj thiab koj lub koom txoos xav li cas xwb?
2 Tus Pab Tho Kev: Cov uas pab tho kev qhia Vajlugkub ib hlis 50 teev. Tiamsis tsaib no, lub koom haum muab cov sijhawm txo los ua 30 teev, rau lub Plaub Hlis nkaus xwb. Sawvdaws zoo siab kawg li. Ib txhia tau hais li cas xwb? Ib tug kwvtij sau tias: “Kuv tseem kawm ntawv, kuv tsis muaj sijhawm ua ib tug tho kev. Tiamsis lub Plaub Hlis Ntuj no kuv yuav rau npe qhia li 30 teev, kuv mam li rau siab tiag seb kuv puas tau 50 teev.” Ib tug muam uas khwv heev, ho sau li no: “Peb caug teev, mas yeej ua tau xwb!” Thiab ib tug muam, muaj 80 tawm xyoo, nws yog ib tug tho kev yav tas los, tau hais tias: “Kuv tos ntsoov seb thaum twg mam li txo cov sijhawm li no! Yehauvas yeej paub tias yav tas los thaum kuv ua ib tug tho kev, kuv muaj kev xyiv fab tshaj plaws!” Txawm cov uas tsis rau npe ua ib tug pab tho kev los, lawv kuj nrhiav kev qhia Vajlugkub ntau ntxiv thiab.
3. Vim li cas zoo rau peb rau npe ua ib tug pab tho kev rau lub Peb Hlis, Plaub Hlis, thiab Tsib Hlis Ntuj?
3 Lub Peb Hlis Ntuj no lub koom haum yuav rov qab txo cov sijhawm li tsaib no thiab. Yog tias koj xav rau npe ua ib tug pab tho kev, qhia 50 teev lossis 30 teev los tau. Tsis tas li ntawd xwb, pib Hnub Rau (Saturday), lub Peb Hlis, tim 17, peb yuav pib caw tibneeg tuaj ua kevcai nco txog Yexus txojkev tuag rau lub Plaub Hlis, tim 5. Cov uas npaj siab qhia Vajlugkub ntxiv yuav tau txais koob hmoov ntau kawg li, tej zaum lawv tseem yuav rau npe ntxiv ua ib tug pab tho kev 50 teev rau lub Plaub Hlis thiab lub Tsib Hlis Ntuj.
4. Peb yuav npaj li cas peb thiaj ua tau haujlwm ntxiv rau Vajtswv, thiab thaum kawg yuav zoo li cas?
4 Hmo uas koj tsev neeg pe hawm Vajtswv ua ke, zoo rau nej tham seb yuav npaj li cas, sawvdaws thiaj muaj feem qhia Vajlugkub ntxiv rau lub caij ua kevcai nco txog Yexus. (P.L. 15:22) Nej yuav tsum thov kom Vajtswv foom koob hmoov rau tej uas nej yuav npaj siab ua. (1Yh. 3:22) Cia li npaj ua haujlwm ntxiv rau Yehauvas. Yog koj ua li ntawd, koj yuav qhuas tau Yehauvas thiab hajyam muaj kev zoo siab.—2Khl. 9:6.