Cia Li Zoo Siab Xyiv Fab Ua Kevcai Nco Txog Yexus Xyoo No
1. Yuav ua li cas koj thiaj muaj kev zoo siab xyiv fab rau lub caij ua kevcai nco txog Yexus?
1 Koj puas xav muaj kev zoo siab xyiv fab rau lub 3 Hlis, 4 Hlis, thiab 5 Hlis uas yuav los no? Yog koj xav, koj kuj npaj kom mus qhia tau Vajlugkub ntau dua qhov qub lossis npaj ua ib tug pab tho kev rau 3 lub hlis ntawd. Yog koj ua li no, koj yuav muaj kev zoo siab xyiv fab heev.
2. Vim li cas peb yuav yim huab muaj kev zoo siab xyiv fab yog peb mus qhia Vajlugkub ntau dua qhov qub?
2 Yim Huab Muaj Kev Zoo Siab Xyiv Fab: Yehauvas tsim peb los pe hawm nws. Yog peb ua li ntawd, peb yuav muaj kev zoo siab xyiv fab. (Nt.Nk. 144:15) Thiab Yehauvas kuj tsim kom peb muaj kev zoo siab thaum peb pub rau luag. (Ttx. 20:35) Lub sijhawm peb mus qhia Vajlugkub, kuj yog peb mus pe hawm Vajtswv thiab mus pab tibneeg. Yog li ntawd, yog peb nquag mus qhia Vajlugkub, peb yuav muaj kev zoo siab xyiv fab. Tsis tas li ntawd xwb, yog peb yim huab mus qhia Vajlugkub, peb yuav yim huab paub qhia. Thaum peb paub qhia Vajlugkub zoo lawd, peb yuav tso siab lug tsis ntshai mus qhia tibneeg. Thiab peb yuav muaj cuab kav qhia Vajlugkub rau txhua leej txhua tus uas peb ntsib, ces peb yuav kawm tau Vajlugkub nrog coob tus. Tej no yuav pab tau peb muaj kev zoo siab xyiv fab heev.
3. Ua li cas lub 3 Hlis thiab 4 Hlis yog 2 lub hlis uas zoo ua ib tug pab tho kev?
3 Lub 3 Hlis thiab 4 Hlis yuav yog 2 lub hlis uas zoo rau peb ua ib tug pab tho kev, rau qhov 2 lub hlis ntawd peb xav qhia 30 teev xwb los tau.Tsis tas li ntawd xwb, pib lub 3 Hlis tim 22 mus txog rau Hnub 1 (Monday), lub 4 Hlis tim 14, peb yuav mus caw tibneeg tuaj koom ua kevcai nco txog Yexus. Nyob rau lub caij ntawd, cov koom txoos yuav muaj kev zoo siab heev vim tias coob tus yuav koom “ua ib lub siab” mus caw tibneeg thoob plaws txhua koog huvsi.—Xfny. 3:9.
4. Peb yuav tsum ua li cas peb thiaj ua tau ib tug pab tho kev?
4 Npaj Tamsim No: Yog tias koj tseem tsis tau npaj, ua zoo xav seb koj puas hloov tau koj lub sijhawm kom qhia tau Vajlugkub ntau hnub ntxiv rau lub 3 Hlis thiab 4 Hlis. Thov Yehauvas pab koj. (Yknp. 1:5) Kuj nrog koj tsev neeg thiab lwm tus hauv lub koom txoos tham seb lawv puas pab tau koj thiab. (P.L. 15:22) Txawm tias koj muaj mob muaj nkeeg thiab tsis khoom kiag li los, koj yeej yuav muaj kev zoo siab xyiv fab heev, yog koj ua tau ib tug pab tho kev rau 2 lub hlis ntawd.
5. Yog peb mus qhia tau Vajlugkub ntau hnub ntxiv rau lub caij ua kevcai nco txog Yexus, pab tau peb li cas?
5 Yehauvas xav kom cov uas teev tiam nws muaj kev zoo siab xyiv fab. (Nt.Nk. 32:11) Yog li ntawd, peb yuav zoo siab xyiv fab heev yog peb kub siab lug ua Yehauvas tes num rau 2 lub hlis uas ua kevcai nco txog Yexus. Tsis tas li ntawd xwb, peb Leej Txiv Yehauvas yuav zoo siab xyiv fab heev thiab.—P.L. 23:24; 27:11.