Xyaum Cov Uas Cev Vajtswv Lus Tus Qauv—Yauna
1. Yauna yog ib tug neeg zoo li cas?
1 Yauna yog ib tug uas cev Vajtswv lus. Nws yog ib tug neeg zoo li cas? Ib txhia xav tias nws yog ib tug neeg tawv ncauj thiab tais caus heev. Tiamsis, tsis muaj tseeb li ntawd. Yauna yeej yog ib tug neeg txo hwjchim, muaj siab tuab siab tawv thiab xam pom lwm leej lwm tus. Cia peb kawm seb peb yuav xyaum Yauna “tus qauv” li cas.—Yknp. 5:10.
2. Yauna puas yog ib tug neeg txo hwjchim? Thiab peb yuav xyaum nws li cas?
2 Txo Hwjchim: Thaum Yehauvas txib kom Yauna mus ceeb toom lub nroog Ninave, nws tsis kam mus. Nws txawm khiav mus rau lwm qhov lawm. Yog vim li cas? Vim tias cov neeg Axilia yog neeg limhiam heev thiab lub nroog Ninave yog ib “lub nroog uas lo ntshav.” (Nh. 3:1-3) Vim Yauna khiav li ntawd, Yehauvas thiaj qhuab ntuas nws, thiab txib kom nws rov qab mus qhia lawv. (P.L. 24:32; Yn. 3:1-3) Txawm tias thaum xub thawj nws tsis kam mus los, thaum kawg nws kuj ua raws li Yehauvas siab nyiam lawm thiab. (Mth. 21:28-31) Tej no yeej qhia tau tias Yauna yog ib tug neeg txo hwjchim. Niaj hnub no yog Yehauvas qhuab ntuas peb, peb puas yuav txo hwjchim li Yauna? Yog peb qhia Vajlugkub rau hauv ib koog uas nyuaj qhia heev, peb puas yuav kub siab qhia? Cia peb xyaum Yauna tus qauv.
3. Hauv koj koog, koj yuav tau ua siab tawv thiab xam pom lwm tus li cas?
3 Muaj Siab Tawv Thiab Xam Pom Lwm Tus: Twb yog tim Yauna khiav, thiaj muaj cua daj cua dub ua rau cov neeg tsav nkoj yuav luag tuag. Yauna hais kom lawv muab nws pov rau hauv hiavtxwv, thiaj cawm tau lawv txojsia. (Yn. 1:3, 4, 12) Tom qab no thaum Yauna mus rau hauv lub nroog Ninave, nws mus kiag rau hauv plawv nroog mus tshaj tawm Yehauvas txojkev txiav txim. Tej no yeej ua pov thawj tias Yauna tsis yog ib tug neeg tais caus, tiamsis nws yog ib tug uas muaj siab tawv cev Vajtswv lus. (Yn. 3:3, 4) Niaj hnub no los, thaum tibneeg tawm tsam peb, peb yuav tau ua siab tawv tshaj tawm txoj xov zoo thiab. (Ttx. 4:29, 31) Tsis tas li ntawd, yog peb xam pom lwm tus, peb yeej yuav siv peb lub sijhawm thiab peb tej qhov txhia chaw los ua Yehauvas tes num.—Ttx. 20:24.
4. Vim li cas peb yuav tsum siv sijhawm los xav txog cov uas cev Vajtswv lus tej qauv zoo?
4 Txhua zaus koj nyeem txog cov uas cev Vajtswv lus, ua tib zoo xav txog cov lus nug no: ‘Yog kuv raug tej xwm txheej uas lawv raug, kuv yuav txiav txim li cas? Kuv yuav xyaum lawv tus qauv li cas?’ (Hnpl. 6:11, 12) Yog koj ua li ntawd ces lawv tus qauv thiaj pab tau koj. Nyob rau lwm daim Tes Num uas yuav muaj tom ntej no, peb tseem yuav kawm ib zag zuj zus txog cov uas cev Vajtswv lus.