Yehauvas Xav Kom Lub Koom Txoos Coj Li Cas Rau Cov Tau Ua Txhaum Loj?

1. Yehauvas xav kom txhua tus tau dab tsi?

YEHAUVAS tsim tib neeg kom nyias txawj txiav txim siab rau nyias tus kheej. Txhua txhua hnub peb yeej txiav txim siab ua ub ua no. Txoj kev txiav txim siab uas tseem ceeb tshaj plaws yog qhov uas ib tug twg muab nws tus kheej cob rau Yehauvas thiab los nrog Yehauvas tsev neeg teev tiam nws. Yehauvas yeej xav kom txhua leej txhua tus muaj lub siab ua li no vim nws hlub tib neeg thiab tsuas xav kom lawv tau qhov zoo xwb. Nws xav kom lawv los nrog nws sib raug zoo thiab ua neej nyob mus ib txhis.​—2 Kevcai 30:19, 20; Kalatias 6:7, 8.

2. Yehauvas xav li cas rau cov ua txhaum loj es tsis tau hloov dua siab tshiab? (1 Yauhas 2:1)

² Yehauvas tsis yuam ib tug twg teev tiam nws. Nws cia nyias txiav txim siab rau nyias tus kheej. Yog tias ib tug Khixatias uas twb ua kev cai raus dej lawm mus ua ib qho txhaum loj yuav muaj li cas rau nws xwb? Yog nws tsis hloov dua siab tshiab ces yuav tau muab nws tshem tawm hauv lub koom txoos mus. (1 Kauleethaus 5:13) Txawm tus neeg ua txhaum ntawd raug tshem tawm lawm los Yehauvas yeej cia siab ntsoov tias nws yuav hloov dua siab tshiab thiab rov los nrog Yehauvas sib raug zoo dua. Yehauvas twb pub kom muaj tus nqi txhiv xwv thiaj qhib tau txoj hau kev rau nws zam cov uas hloov dua siab tshiab lawm. (Nyeem 1 Yauhas 2:1.) Yehauvas yog ib tug Vajtswv uas muaj kev hlub heev nws thiaj li txhib kom cov ua txhaum loj hloov dua siab tshiab.​—Xakhaliyas 1:3; Loos 2:4; Yakaunpaus 4:8.

3. Nyob rau hauv zaj kawm no peb yuav tham txog dab tsi?

³ Yehauvas qhia rau peb seb nws xav li cas rau li cas txog kev txhaum thiab cov uas tau ua kev txhaum loj. Nws kuj xav kom peb xav tib yam li nws xav txog tej no. Nyob rau hauv zaj kawm no yuav pab kom peb muaj nws txoj kev xav. Thaum koj nyeem zaj no, koj yuav pom tias (1) nyob rau thawj 100 xyoo, lub koom txoos hauv Kauleethaus coj li cas rau ib tug uas tau ua txhaum loj, (2) seb tus tub txib Povlauj sam hwm kom ua li cas thaum ib tug uas tau ua txhaum loj hloov dua siab tshiab, thiab (3) seb Yehauvas xav li cas txog cov ua txhaum loj.

LUB KOOM TXOOS COJ LI CAS RAU IB TUG UAS TAU UA TXHAUM LOJ

4. Muaj dab tsi tshwm rau lub koom txoos hauv Kauleethaus? (1 Kauleethaus 5:1, 2)

⁴ Nyeem 1 Kauleethaus 5:1, 2. Thaum Povlauj mus ncig tshaj tawm txoj xov zoo zaum peb, nws hnov ib tsab xov tsis zoo txog lub koom txoos nyob rau hauv Kauleethaus tias muaj ib tug kwv tij deev nws niam tshiab. Txawm cov neeg tsis teev tiam Yehauvas los yeej paub hais tias tej no tsis raws kev raws cai lawm! Tiam sis cov nyob hauv lub koom txoos tsis ua ntab ntws dab tsi thiab tseem xav tias cia nws ua nws es tsis ua li cas. Tej zaud muaj ib txhia haj tseem xav hais tias lawv khuv leej tus kwv tij no ib yam li Yehauvas khuv leej noob txaug neeg txhaum thiab. Tiam sis Yehauvas tsis tau tso cai rau nws cov tib neeg ua txhaum loj li no. Vim tus kwv tij ntawd coj cwj pwm li no ua rau tej neeg ob cag thuam Yehauvas cov tib neeg heev. Tej zaud qhov no kuj ua rau lwm tus mus yoog nws tus cwj pwm. Ua li Povlauj ho yuav kho qhov teeb meem no li cas?

5. Povlauj qhia kom cov uas nyob hauv lub koom txoos coj li cas? (1 Kauleethaus 5:13) (Saib daim duab.)

⁵ Nyeem 1 Kauleethaus 5:13.a Yehauvas tshoov kom Povlauj sau ib tsab ntawv mus rau lub koom txoos hauv Kauleethaus kom muab tus ua txhaum loj uas tsis kam hloov dua siab tshiab tshem tawm hauv lub koom txoos mus. Ua li cov uas nyob hauv lub koom txoos yuav coj li cas rau tus ua txhaum loj ntawd? Povlauj hais kom lawv “tsis txhob mus koom” nws, “txawm yog noj mov los [lawv] tsis txhob nrog tus neeg uas zoo li ntawd koom tsum” hlo li. (1 Kauleethaus 5:11) Qhov uas koom tsum nrog ib tug twg ces yuav ua rau yus xav lauj sij hawm ntau ntxiv nrog tus ntawd tas zaj tas zog. Povlauj thiaj ntuas kom tseg tsis txhob nrog tej tug neeg zoo li ntawd ua ke. Ua li no yuav tiv thaiv tau cov uas nyob hauv lub koom txoos kom tsis txhob xyaum coj li nws tus cwj pwm uas tsis zoo. (1 Kauleethaus 5:5-7) Qhov uas cais li no yuav ua rau tus neeg ua txhaum loj ntawd thim xav, txaj muag rau tej nws tau ua, thiab ua rau nws xav hloov dua siab tshiab.

6. Cov uas nyob hauv lub koom txoos xav li cas txog Povlauj tsab ntawv thiab tus ua txhaum loj ho coj li cas tom qab ntawd?

⁶ Tom qab Povlauj xa nws tsab ntawv mus rau cov Khixatias nyob hauv Kauleethaus, nws tos ntsoov seb lawv xav li cas txog tej nws tau hais. Tom qab no, Titus mam li qhia rau Povlauj tias lawv mloog nws hais es muab tus ua txhaum loj ntawd tshem tawm hauv lub koom txoos mus lawm. Qhov uas Povlauj hnov no ua rau nws kaj siab lawm hov ntau. (2 Kauleethaus 7:6, 7) Tau tsis ntev tom qab Povlauj xa nws tsab ntawv rau lub koom txoos, tus ua txhaum loj ntawd txawm hloov dua siab tshiab! Nws kuj hloov nws tus cwj pwm thiab coj raws li Yehauvas tej kev cai. (2 Kauleethaus 7:8-11) Ua li zaum no Povlauj ho xav kom cov uas nyob hauv lub koom txoos ua li cas ntxiv?

LUB KOOM TXOOS YUAV COJ LI CAS?

7. Tus ua txhaum loj ua dab tsi tom qab nws raug tshem tawm tag? (2 Kauleethaus 2:5-8)

⁷ Nyeem 2 Kauleethaus 2:5-8. Povlauj hais tias “nej cov uas rau txim rau tus ntawd nej twb rau txaus lawm.” Povlauj cov lus no qhia tau tias tom qab tus ua txhaum loj ntawd raug tshem tawm tag ces nws mam pom tseeb tias nws yuav tau hloov dua siab tshiab. Thaum nws hloov dua siab tshiab ces tsis txhob tsub txim ntxiv rau nws lawm.​—Henplais 12:11.

8. Povlauj hais kom cov nyob hauv lub koom txoos ua dab tsi?

⁸ Vim tus ua txhaum loj ntawd hloov dua siab tshiab lawm, Povlauj thiaj hais kom cov txwj laus cia tus ntawd rov qab los rau hauv lub koom txoos. Povlauj kuj hais tias lawv “yuav tsum zam txim rau tus ntawd” thiab “ua tib zoo hais rau nws paub hais tias [lawv] hlub nws.” Povlauj xav kom cov nyob hauv lub koom txoos zam txim thiab hlub tus ntawd, tsis yog ntawm lub ncauj xwb tiam sis ntawm tej lawv ua huv tib si. Yog lawv ua tau li no ces tus ntawd yuav pom tau hais tias lawv yeej zoo siab tos txais nws rov qab los rau hauv lub koom txoos.

9. Vim li cas ho nyuaj rau ib txhia zam txim rau tus kwv tij uas hloov dua siab tshiab?

⁹ Tej zaud yuav muaj ib txhia nyob hauv lub koom txoos tsis txaus siab tias tus kwv tij ntawd rov qab los rau hauv lub koom txoos dua lawm. Tos peb hais li no los vim muaj ib txhia tej zaum tseem chim rau tej teeb meem uas nws tsim rau hauv lub koom txoos. Hos tej zaud ib txhia kuj tsis txaus siab vim tus kwv tij ntawd ua rau lawv mob siab mob ntsws yav tas lawm. Hos muaj dua ib txhia xav hais tias lawv yeej ib txwm coj Yehauvas tej kev cai ces tsis tsim nyog rau lawv tos txais ib tug uas tsis mloog lus rov qab los. (Muab piv rau Lukas 15:28-30.) Tiam sis vim li cas ho tseem ceeb rau cov nyob hauv lub koom txoos qhia lawv txoj kev hlub rau tus kwv tij uas hloov dua siab tshiab lawm?

10-11. Tej zaud yuav muaj li cas xwb yog cov txwj laus tsis kam zam tus uas twb hloov dua siab tshiab lawd lub txim?

¹⁰ Tus kwv tij ntawd yuav xav li cas xwb yog hais tias cov txwj laus tsis cia nws rov qab los rau hauv lub koom txoos tom qab nws hloov dua siab tshiab? Los sis nws yuav xav li cas xwb yog tias cov kwv tij nkauj muam ua dub nciab rau nws? Tej zaud yuav ua rau nws “nyuaj siab” heev thiab puas siab puas ntsws tag, nws tag kev cia siab tias yuav nrog tsis tau sawv daws teev tiam Yehauvas ua ke, los sis nws yuav tseg zuj zus tsis nrog Yehauvas sib raug zoo ntxiv lawm.

¹¹ Yog cov kwv tij nkauj muam cuaj kaum los tsis kam zam tus kwv tij uas twb hloov dua siab tshiab lawd ces lawv txoj kev sib raug zoo nrog Yehauvas kuj yuav plam thiab. Vim li cas ho hais li ntawd? Tos hais li no los vim lawv tsis kam yoog Yehauvas txoj kev zam txim rau cov uas twb hloov dua siab tshiab lawm. Tiam sis lawv mus yoog Xatas tus uas tsis khuv leej ib tug twg hlo li. Tsis tas li ntawd, lawv yuav cia Xatas siv lawv los txo kom tus kwv tij ntawd tsis txhob teev tiam Yehauvas ntxiv.​—2 Kauleethaus 2:10, 11; Efexus 4:27.

12. Cov uas nyob hauv lub koom txoos yuav yoog Yehauvas li cas?

¹² Cov uas nyob hauv lub koom txoos hauv Kauleethaus yoog tau Yehauvas yog tias lawv zam cov uas hloov dua siab tshiab. Muaj ib co uas sau phau Vajlugkub tau hais li no txog Yehauvas. Daviv hais tias Yehauvas tos tsis hnyu yuav “zam peb lub txim.” (Phau Ntawv Nkauj 86:5) Mikhas hais tias: “Yeej tsis muaj ib tug vajtswv zoo npaum li koj, koj zam txim rau koj haivneeg uas seem rov los.” (Mikhas 7:18) Thiab Yaxayas hais tias: “Cia cov neeg siab phem tso lawv txojkev phem tseg, thiab cia cov neeg tsis ncaj tso lawv txojkev xav phem tseg. Cia lawv tig los cuag [Yehauvas], Vajtswv thiaj yuav hlub lawv; los cuag peb tus Vajtswv, nws thiaj yuav zam lawv lub txim.”​—Yaxayas 55:7.

13. Vim li cas ho tsim nyog cia tus hloov dua siab tshiab rov qab los rau hauv lub koom txoos? (Saib lub ntsiab “Thaum Twg Twb Cia Tus Ua Txhaum Rov Qab Los Lawm?”)

¹³ Yuav kom lub koom txoos hauv Kauleethaus yoog tau Yehauvas, lawv yuav tau ua qhia rau tus uas hloov dua siab tshiab tias lawv hlub nws thiab zoo siab hlo tos txais nws. Povlauj hais rau lawv tias yog lawv zam tus hloov dua siab tshiab ntawd tiag ces twb yog lawv “mloog” lus. (2 Kauleethaus 2:9) Txawm nws nyuam qhuav raug tshem tawm hauv lub koom txoos mus tau ob peb lub hlis xwb los nws twb hloov dua siab tshiab lawm ces tsis tas cov txwj laus yuav ncua sij hawm ntev ntev mam li cia nws rov qab los rau hauv lub koom txoos.

XYAUM YEHAUVAS TXOJ KEV NCAJ NCEES THIAB KHUV LEEJ

14-15. Zaj uas hais nyob rau hauv Kauleethaus qhia li cas rau peb? (2 Petus 3:9) (Saib daim duab.)

¹⁴ Zaj uas sau rau cov nyob hauv Kauleethaus yog sau los mus “qhuab qhia peb.” (Loos 15:4) Nyob rau zaj no qhia tias Yehauvas tsis tseg cov uas ua txhaum loj thiab tsis hloov dua siab tshiab nyob rau hauv lub koom txoos. Muaj ib txhia xav hais tias Yehauvas khuv leej tib neeg heev ces nws yuav tseg cov uas tsis hloov dua tshiab nyob rau hauv lub koom txoos tiam sis Yehauvas txoj kev khuv leej tsis zoo li ntawd. Txawm yog Yehauvas muaj kev khuv leej heev los nws tsis cia txhua tus ua ywj siab. Nws tej kev cai yeej tsis hloov. (Yudas 4) Yog hais tias Yehauvas tseg ib tug uas tsis hloov dua siab tshiab nyob rau hauv lub koom txoos ces cuag li nws twb tsis khuv leej cov uas nyob rau hauv hlo li.​—Pajlug 13:20; 1 Kauleethaus 15:33.

¹⁵ Yehauvas tsis xav kom ib tug twg raug puas tsuaj. Nws xav cawm kom txhua leej txhua tus dim huv tib si. Nws khuv leej cov tib neeg uas kam hloov dua siab tshiab thiab xav kho lawv txoj kev sib raug zoo nrog nws. (Exekees 33:11; nyeem 2 Petus 3:9.) Yog li ntawd thaum tus ua txhaum loj nyob rau hauv Kauleethaus hloov dua siab tshiab, Yehauvas thiaj siv Povlauj los mus qhia rau lub koom txoos kom zam tus ua txhaum ntawd lub txim thiab tos txais nws rov qab los rau hauv lub koom txoos dua.

16. Koj xav li cas txog Yehauvas tom qab koj kawm txog zaj uas hais nyob rau hauv Kauleethaus?

¹⁶ Zaj uas hais txog lub koom txoos hauv Kauleethaus qhia tau rau peb tias Yehauvas muaj kev hlub thiab kev ncaj ncees heev. (Phau Ntawv Nkauj 33:5) Thaum peb paub tej no zoo zoo lawd ua rau peb yim huab qhuas Yehauvas ntxiv. Peb yeej ris Yehauvas txiaj ntsig tias nws muaj kev khuv leej vim peb yog noob txaug neeg txhaum thiab tos nrhw nws zam peb lub txim xwb. Tsis tas li ntawd, peb kuj zoo siab heev uas nws pub muaj tus nqi txhiv kom thiaj zam tau peb lub txim txhaum. Tej no qhia tias Yehauvas yeej hlub nws cov tib neeg tiag tiag thiab xav kom lawv tau txais qhov zoo nkaus nkaus xwb!

17. Nyob rau zaj kawm txuas ntxiv tom ntej yuav tham txog dab tsi?

¹⁷ Nyob rau zaj kawm txuas ntxiv tom ntej peb yuav tham txog ob lo lus nug no: Yog muaj ib tug ua txhaum loj niaj hnub nim no, cov txwj laus yuav xyaum Yehauvas txoj kev hlub thiab pab tus tib neeg ntawd hloov dua siab tshiab li cas? Cov uas nyob hauv lub koom txoos coj li cas thaum cov txwj laus muab ib tug uas ua txhaum loj ntawd tshem tawm los sis cia nws rov qab los ua Yehauvas ib tug Tim Khawv?