ZAJ KAWM 5
ZAJ NKAUJ 108 Vajtswv Kev Hlub Nplua Mias
Peb Tau Tej Yam Zoo Vim Yehauvas Hlub Peb
“Yexus Khetos los hauv ntiajteb no yog nws los pab cov neeg uas muaj txim kom lawv dim lawv lub txim.”—1 TIMAUTES 1:15.
LUB NTSIAB RAU ZAJ NO
Zaj no yuav pab kom peb to taub tias tus nqi txhiv pab tau peb li cas thiab yuav ua li cas peb thiaj paub ris Yehauvas txiaj ntsig.
1. Yuav ua li cas peb thiaj ua tau rau Yehauvas zoo siab?
MUAB xav tias koj muab ib qho khoom zoo zoo rau ib tug neeg koj hlub. Yog tus neeg ntawd muab koj qhov khoom coj mus zais cia xwb, ntshe koj yuav tu siab heev. Tiam sis yog tus tib neeg ntawd ris koj txiaj ntsig thiab muab qhov khoom ntawd coj los siv ntshe koj yuav zoo siab heev. Tus nru lus rau zaj no yog li cas tiag? Yehauvas hlub peb heev nws thiaj tso nws tus Tub los tuag theej peb. Yehauvas yuav zoo siab heev yog peb ris nws txiaj ntsig!—Yauhas 3:16; Loos 5:7, 8.
2. Nyob rau hauv zaj kawm no yuav tham txog dab tsi?
2 Tej zaud ib xyoos tag ib xyoos tuaj, peb tsis tshua ris txiaj ntsig rau tus nqi txhiv ua luaj twg lawm. Yog zoo li no ces yam li peb muab Vajtswv qhov khoom uas nws muab pub rau peb ntawd coj mus zais cia lawm xwb. Peb zoo siab hais tias muaj qhov khoom ntawd tiam sis peb muab tso rau ib qho chaw nraim nraim. Yuav kom peb tsis txhob ua li ntawd, peb yuav tau xav txog tej yam uas Vajtswv thiab Khetos nkawd tau ua rau peb tsis so. Zaj kawm no yuav pab kom peb nco ntsoov ris nkawd txiaj ntsig, seb tus nqi txhiv pab tau peb tam sim no thiab yav tom ntej li cas. Tsis tas li ntawd, haj tseem yuav tham ntxiv seb peb yuav ua li cas thiaj qhia tau tias peb ris Yehauvas txiaj ntsig rau nws txoj kev hlub, qhov tshwj xeeb tshaj yog thaum lub caij ua kev cai nco txog Yexus.
TUS NQI TXHIV PAB TAU PEB TAM SIM NO
3. Niaj hnub nim no tus nqi txhiv pab tau peb li cas?
3 Niaj hnub nim no Khetos tus nqi txhiv twb pab tau peb lawm. Xws li muaj tus nqi txhiv, Yehauvas thiaj zam tau peb lub txim txhaum. Yehauvas tuaj yeem zam peb lub txim tab txawm tsis tsim nyog rau nws zam peb. Tus uas sau phau ntawv nkauj ris Yehauvas tus txiaj tus ntsig kawg li nws thiaj li hu ib zaj nkauj hais tias: “Koj yeej ua zoo rau peb thiab [npaj siab zim] zam peb lub txim.”—Phau Ntawv Nkauj 86:5; 103:3, 10-13.
4. Yehauvas muab tus nqi txhiv los pab leej twg? (Lukas 5:32; 1 Timautes 1:15)
4 Muaj ib txhia xav hais tias tsis tsim nyog rau Yehauvas zam lawv lub txim. Peb txhua tus yeej tsis tsim nyog rau Yehauvas zam txim. Tus tub txib Povlauj kuj xav hais tias nws “tsis tsim nyog muab hu ua tub txib.” Txawm li ntawd los nws hais li no ntxiv tias: “Twb yog muaj Vajtswv txoj kev hlub nplua mias kuv thiaj tau los ua ib tug tub txib.” (1 Kauleethaus 15:9, 10) Thaum peb hloov dua siab tshiab, Yehauvas kuj zam peb lub txim lawm. Tos nws ua li no los tsis yog peb tsim nyog tau txoj kev zam txim tiam sis yog nws hlub peb. Yog koj muaj ib pluaj siab tias tsis tsim nyog Yehauvas zam koj lub txim, cia li nco ntsoov tias Yehauvas tsis yog muab tus nqi txhiv los them tej tib neeg tsis muaj txhaum tiam sis nws muab los them cov uas hloov dua siab tshiab.—Nyeem Lukas 5:32; 1 Timautes 1:15.
5. Piav seb puas tsim nyog Yehauvas zam peb lub txim.
5 Txawm peb yuav teev tiam Yehauvas ntev thiab luv los, peb yuav tau tsis txhob xav tias tsim nyog rau Yehauvas zam peb lub txim. Yehauvas yeej nco ntsoov tej peb tau ua rau nws tiam sis nws tsis yog muab nws tus Tub los them tej peb ua rau nws. (Henplais 6:10) Tsis zoo rau peb xav tias peb twb ua ntau ntau yam rau Yehauvas lawm ces nws yuav tau zam peb lub txim. Yog tias peb xav li ntawd ces zoo yam li peb hais tias Yexus tsis tas tuag theej peb lub txhoj.—Muab piv rau Kalatias 2:21.
6. Vim li cas Povlauj yuav sib zog ua hauj lwm pub rau Yehauvas ua luaj?
6 Povlauj paub hais tias txawm nws ua ntau npaum li cas los yog Yehauvas tsis xav zam nws lub txim los yeej tau. Ua li cas nws ho ua ntau tag npaum li rau Yehauvas? Tos nws ua ntau los nws xav qhia tias nws ris Yehauvas txiaj ntsig. (Efexus 3:7) Zoo ib yam li Povlauj, cia peb kub siab lug ua npaum li peb ua tau los ris Yehauvas tus txiaj tus ntsig, tsis yog kom Yehauvas zam peb lub txim.
7. Muaj ib qho ntxiv uas tus nqi txhiv pab tau peb niaj hnub no yog dab tsi? (Loos 5:1; Yakaunpaus 2:23)
7 Ib qho uas tus nqi txhiv pab tau peb ntxiv yog peb muaj kev sib raug zoo nrog Yehauvas.a Raws li zaj kawm tag los lawm, thaum peb yug los peb tsis muaj kev sib raug zoo dab tsi nrog Yehauvas. Vim muaj tus nqi txhiv peb thiaj li “nrog Vajtswv sib raug zoo.”—Nyeem Loos 5:1; Yakaunpaus 2:23.
8. Vim li cas peb ris Yehauvas txiaj ntsig tias peb muaj qhov txiaj ntsig thov tau rau nws?
8 Vim peb nrog Yehauvas sib raug zoo, peb thiaj muaj qhov txiaj ntsig thov rau nws. Nws tsis yog hnov thaum nws cov tib neeg tuaj nyob coob coob ua ke xwb tiam sis nws kuj mloog peb ib tug dhau ib tug tej lus thov. Txoj kev thov tsis yog ua kom peb muaj siab tus xwb tiam sis kuj yuav tsav tau peb txoj kev sib raug zoo nrog Vajtswv. (Phau Ntawv Nkauj 65:2; Yakaunpaus 4:8; 1 Yauhas 5:14) Thaum Yexus tseem nyob hauv ntiaj teb no nws thov Yehauvas tsis tseg tsis tu vim nws paub ntsoov tias nws Txiv yeej mloog nws tej lus thov thiab yuav txhawb tau kom nws txoj kev sib raug zoo loj zuj zus ntxiv nrog nws Txiv. (Lukas 5:16) Peb ris txiaj ntsig tias muaj tus nqi txhiv, peb thiaj tau los ua Yehauvas cov phooj ywg thiab thov rau nws!
TUS NQI TXHIV PAB TAU PEB YAV TOM NTEJ
9. Tus nqi txhiv yuav pab Yehauvas cov tib neeg li cas rau yav tom ntej?
9 Tus nqi txhiv pab tau Yehauvas cov tib neeg kom muaj txoj sia nyob mus ib txhis yav tom ntej. Muaj coob leej ntau tus xav tias ntshe yuav nyob tsis tau vim tib neeg yeej ib txwm tuag puag txheej thaum ub los lawm. Nco ntsoov tias Yehauvas lub hom phiaj rau tib neeg yog nyob mus ib txhis. Yog Adas tsis poob kev txhaum ces yeej tsis muaj leej twg xav tias nyob mus ib txhis ntawd yog lam hais xwb. Txawm tias txoj sia nyob mus ib txhis tsis khuab qhov muag los peb paub tias Yehauvas twb cia nws tus Tub los tuag them tag lawm kom peb muaj rab peev xwm nyob tau mus ib txhis.—Loos 8:32.
10. Cov xaiv tseg thiab lwm pab yaj tos ntsoov dab tsi?
10 Yehauvas xav kom peb cim txoj sia nyob mus ib txhis tam sim no rau nruab siab tab txawm tej ntawd tsuas zoo rau peb yav tom ntej. Cov xaiv tseg tos nrhw yuav mus nrog Khetos kav saum ntuj ceeb tsheej. (Tshwmsim 20:6) Hos lwm pab yaj tos ntsoov yuav nyob kaj siab lug tso siab plhuav hauv lub ntiaj teb no uas tsis muaj mob muaj nkeeg thiab kev quaj ntsuag. (Tshwmsim 21:3, 4) Koj puas yog ib tug ntawm lwm pab yaj uas muaj txoj kev vam kev cia siab nyob mus ib txhis hauv ntiaj teb? Qhov uas koj tau no tsis yog qis dua qhov uas mus nyob rau saum ntuj! Yehauvas yeej tsim tib neeg nyob rau hauv ntiaj teb no ces peb yeej yuav muaj kev kaj siab nyob mus ib txhis.
11-12. Tej yam peb tos ntsoov hauv lub Vaj Kaj Siab yog dab tsi? (Saib cov duab.)
11 Nyob rau hauv koj lub zeem muag koj puas pom lub Vaj Kaj Siab zoo li cas rau li cas? Koj tsis tas txhawj txog kev mob kev nkeeg los sis kev ploj kev tuag. (Yaxayas 25:8; 33:24) Yehauvas yuav muab txhua yam uas koj lub siab ntshaw rau koj. Koj puas xav xyaum raj, ncas, kos duab, los sis kawm kom txawj ua vaj ua tsev? Peb yeej xav tau ib co tib neeg uas txawj ua vaj ua tsev. Tsis tas li ntawd, yuav tau muaj ib co tib neeg los mus ua zaub ua mov, ntaus hlau, thiab cog tej ub tej no kom zoo nkauj zoo saib. (Yaxayas 35:1; 65:21) Nyob tau mus ib txhis lawm ces koj yeej muaj sij hawm ua txhua yam uas koj lub siab ntshaw.
12 Ntshe koj yuav zoo siab tiag tiag li uas tau tos txais cov uas tag sim neej lawm rov muaj sia dua! (Tes Hauj Lwm 24:15) Koj yuav muaj rab peev xwm kawm txog ntau yam uas Yehauvas tau tsim. (Phau Ntawv Nkauj 104:24; Yaxayas 11:9) Qhov uas zoo tshaj yog teev tiam Yehauvas es koj tsis muaj ib lub siab rov qab nkaug koj! Koj puas kam muab lub neej yav tom ntej hloov tej yam “uas nyob ib nyuag ntu xwb”? (Henplais 11:25) Koj yeej yuav tsis ua li ntawd ib zaug li! Lub neej zoo zoo uas peb yuav tau yuav zoo tshaj tej yam uas peb tau niaj hnub nim no. Nco ntsoov tias tsis yog peb lam cia siab qhuav xwb, ib hnub twg yeej yuav muaj tiag tiag. Txhua yam hais no yuav muaj vim Yehauvas hlub peb heev, nws thiaj tso nws tus Tub los tuag theej peb lub txhoj!
Tej koob hmoov uas koj tos rawv hauv lub Vaj Kaj Siab yog dab tsi? (Saib nqe 11-12)
RIS YEHAUVAS TXIAJ NTSIG RAU NWS TXOJ KEV HLUB
13. Peb yuav ris Yehauvas txiaj ntsig rau nws txoj kev hlub li cas? (2 Kauleethaus 6:1)
13 Qhov uas peb muab Yehauvas tes hauj lwm tso ua ntej hauv peb lub neej qhia tau tias peb ris Yehauvas tus txiaj tus ntsig rau tus nqi txhiv. (Mathais 6:33) Yexus tuag “kom cov neeg uas tseem ua neej nyob lawv tsis txhob ua lawv lub neej raws li lawv lub siab nyiam.” (2 Kauleethaus 5:15) Yehauvas zoo kawg nkaus li nws thiaj zam peb lub txim. Qhov uas peb ua npaum li peb ua tau los teev tiam nws qhia tau tias peb paub txog tej uas nws tau ua rau peb thiab peb yeej ris nws tus txiaj tus ntsig.—Nyeem 2 Kauleethaus 6:1.
14. Peb yuav tso siab rau Yehauvas thiab ua raws li nws hais li cas?
14 Qhov uas peb tso siab rau Yehauvas thiab ua raws li nws hais qhia tau tias peb txais yuav nws txoj kev hlub. Thaum peb txiav txim siab ua ib yam twg xws li mus kawm ntawv qeb siab los sis xaiv ib txoj hauj lwm twg, peb yuav tau ua zoo xav seb Yehauvas pom zoo kom peb ua li cas rau li cas. (1 Kauleethaus 10:31; 2 Kauleethaus 5:7) Yog peb txiav txim siab raws li Yehauvas pom zoo ces peb txoj kev ntseeg thiab peb txoj kev sib raug zoo nrog nws yuav tawg paj txi txiv. Tsis tas li ntawd, peb txoj kev vam kev cia siab uas nyob mus ib txhis los yuav sawv nraim rau ntawm peb lub zeem muag.—Loos 5:3-5; Yakaunpaus 2:21, 22.
15. Thaum ua kev cai nco txog Yexus, peb ua li cas los qhia tias peb ris Yehauvas txiaj ntsig?
15 Ib qho ntxiv uas peb ua tau yog siv lub caij ua kev cai nco txog Yexus los qhia tias peb ris Yehauvas tus txiaj tus ntsig rau tus nqi txhiv. Nco ntsoov tias tsis yog peb mus koom xwb ces zoo txaus lawm tiam sis caw lwm tus tuaj nrog peb koom thiab. (1 Timautes 2:4) Ua tib zoo qhia rau cov uas koj caw tuaj koom ntawd tias yuav muaj li cas rau li cas rau hmo ua kev cai nco txog Yexus. Ib qho ntxiv uas yuav pab tau lawv yog muab ob zaj yeeb yaj kiab hauv jw.org/hmn hu ua Vim Li Cas Yexus Thiaj Tuag? thiab Ua Kev Cai Nco Txog Yexus Txoj Kev Tuag rau lawv saib. Cov txwj laus yuav tau nco ntsoov mus caw cov uas tsis tau tuaj kev sib txoos thiab tsis tau mus tshaj tawm tau ntev loo lawm. Yog Yehauvas cov yaj uas poob zoo lawm rov qab los poo npoj mas cov uas nyob saum ntuj thiab cov uas nyob hauv ntiaj teb no yuav zoo siab heev! (Lukas 15:4-7) Thaum mus ua kev cai nco txog Yexus, cia peb txhua tus hu cov uas tuaj tshiab thiab cov uas tsis tau tuaj kev sib txoos tau ntev loo lawm. Peb xav kom lawv paub tias peb zoo siab heev uas lawv tuaj!—Loos 12:13.
16. Vim li cas peb ho ua ntau npaum li ntau tau pub rau Yehauvas rau thaum lub caij ua kev cai nco txog Yexus?
16 Thaum txog lub caij ua kev cai nco txog Yexus, koj puas kam ua kom ntau zog pub rau Yehauvas? Yog koj ua kom ntau li ntau tau ces yuav qhia tau tias koj ris Vajtswv thiab Khetos nkawd txiaj ntsig. Yog koj yim ua Yehauvas tes hauj lwm ces koj yuav yim pom Yehauvas txoj kev pab thiab koj txoj kev tso siab rau nws yuav loj zuj zus tuaj. (1 Kauleethaus 3:9) Tsis tas li ntawd, nco ntsoov nyeem cov nqe Vajlugkub uas muab kom tseg rau lub caij ua kev cai nco txog Yexus nyob rau hauv phau Niaj Hnub Tshawb Nrhiav Phau Vajlugkub los sis kuj muaj nyob rau Lub Neej Thiab Tes Hauj Lwm Khixatia—Phau Kawm. Koj kuj siv tau cov nqe Vajlugkub no los kawm Vajlugkub rau koj tus kheej.
17. Dab tsi ua rau Yehauvas txaus siab? (Saib lub ntsiab “Tej Yam Uas Qhia Tias Koj Ris Yehauvas Txiaj Ntsig.”)
17 Tej zaum koj lub neej hloov lawm ntau, koj thiaj ua tsis tau ntau li siab xav pub rau Yehauvas. Nco ntsoov tias Yehauvas tsis muab tej koj ua tam sim no piv rau lwm tus. Nws yeej paub tias nyob hauv koj siab, koj yeej xav ua ntau yam pub rau nws. Nws yeej txaus siab thaum nws pom koj ris nws txiaj ntsig rau tus nqi txhiv.—1 Xamuyees 16:7; Malakaus 12:41-44.
18. Vim li cas peb ho ris Vajtswv Yehauvas thiab Yexus Khetos nkawd txiaj ntsig?
18 Vim muaj tus nqi txhiv, Vajtswv thiaj zam tau peb lub txim, peb thiaj li nrog tau Vajtswv sib raug zoo, thiab muaj rab peev xwm nyob tau mus ib txhis. Cia peb ris Yehauvas txiaj ntsig rau nws txoj kev hlub xwv peb thiaj li tau txais tej koob hmoov no. (1 Yauhas 4:19) Tsis tas li ntawd, cia peb ris Yexus tus txiaj tus ntsig uas nws hlub peb kawg nkaus li nws thiaj li los tuag theej peb lub txhoj!—Yauhas 15:13.
ZAJ NKAUJ 154 Txojkev Hlub Nyob Mus Ib Txhis