Cov Kwv Tij​—Koj Puas Kam Ua Ib Tug Txwj Laus?

1-2. Cov txwj laus “ua tes haujlwm uas zoo kawg nkaus” twg?

YOG tias koj twb ua ib tug tub leg num ib nyuag ntu lawm, tej zaum koj twb muaj tej yeeb yam uas yuav ua tau ib tug txwj laus lawm. Koj puas kam “ua tes haujlwm uas zoo kawg nkaus” thiab?​—1 Timautes 3:1.

² Cov txwj laus ua hauj lwm li cas rau li cas? Lawv ntaus thawj hlo mus tshaj tawm txoj xov zoo, mus txhawb thiab siv Vajtswv Txoj Lus los cob qhia cov kwv tij nkauj muam. Tsis tas li ntawd, tej lawv hais thiab tej uas lawv ua txhawb tau lub koom txoos. Nyob hauv phau Vajlugkub thiaj hais tias cov txwj laus uas sib zog ntsos khiav tej hauj lwm no yog Vajtswv “pub.”​—Efexus 4:8.

3. Yuav ua li cas ib tug kwv tij thiaj ua tau ib tug txwj laus? (1 Timautes 3:1-7; Titus 1:5-9)

³ Yuav ua li cas koj thiaj ua tau ib tug txwj laus? Ua tau ib tug txwj laus zoo tsis thooj li koj nrhiav ib txoj hauj lwm ua. Muaj ntau zaus yog koj mus nrhiav hauj lwm es koj txawj tes hauj lwm ces tus los pav yeej yuav txais koj. Tiam sis ua ib tug txwj laus koj yuav tau ua ntau dua li qhov uas txawj mus qhia txoj xov zoo los sis txawj cev lus qhuab qhia. Koj yuav tau muaj tej yeeb yam uas hais nyob rau hauv 1 Timautes 3:1-7 thiab Titus 1:5-9. (Nyeem.) Nyob rau hauv zaj kawm no yuav tham txog peb yam uas thiaj ua tau ib tug txwj laus: cov ntseeg thiab cov tsis ntseeg Vajtswv los puav leej hwm, ua ib tug txiv tsev zoo, thiab txaus siab hlo pab lub koom txoos.

COV NTSEEG THIAB COV TSIS NTSEEG VAJTSWV LOS PUAV LEEJ HWM

4. “Tus uas tsis muaj chaw thuam li” yog li cas tiag?

⁴ Yuav kom koj ua tau ib tug txwj laus, koj yuav tsum yog “tus uas tsis muaj chaw thuam li.” Qhov no qhia tau tias cov uas nyob hauv lub koom txoos pom koj coj cwj pwm zoo thiab tsis muaj neeg yuav thuam tau koj. Tsis tas li ntawd, koj yuav tsum yog “tus uas cov tsis ntseeg Vajtswv los puavleej hwm.” Qhov no qhia tau tias tab txawm cov tsis ntseeg thuam koj txoj kev ntseeg los lawv yeej thuam tsis tau qhov uas koj coj ncaj thiab coj zoo. (Daniyees 6:4, 5) Zaum tsaws xav li no, ‘Kuv puas yog ib tug uas cov ntseeg thiab cov tsis ntseeg Vajtswv hwm?’

5. “Nyiam qhov zoo” yog li cas tiag?

⁵ Yog koj “nyiam qhov zoo” ces koj yuav nrhiav qhov zoo ntawm lwm tus thiab qhuas lawv thaum lawv ua tau tej yam zoo. Tsis tas li ntawd, koj tseem txaus siab hlo ua tej yam zoo tshaj pub rau lwm tus. Txawm lawv twb tsis ras txog los koj twb ua pub rau lawv lawm. (1 Thexalaunikes 2:8) Zoo rau cov txwj laus “nyiam qhov zoo” vim lawv yuav siv sij hawm ntau heev los mus saib xyuas cov kwv tij nkauj muam hauv lub koom txoos thiab ua tej hauj lwm uas muab tso rau lawv ua. (1 Petus 5:1-3) Txawm tej hauj lwm no yuav hnyav los lawv yeej phwb tes tsog ua kom tiav vim tej no yuav ua rau lawv muaj kev kaj siab heev.​—Tes Hauj Lwm 20:35.

6. “Nyiam qhua” yog li cas tiag? (Henplais 13:2, 16; saib daim duab.)

⁶ Koj “nyiam qhua” yog koj ua zoo rau lwm tus, tab txawm lawv yuav yog thiab tsis yog koj tej phooj ywg kwv luag. (1 Petus 4:9) Muaj ib phau ntawv hais li no txog tus txiv neej uas nyiam tos txais qhua tias: “Nws lub qhov rooj thiab lub siab yeej qhib lug tos cov neeg uas nws tsis paub.” Rov tshuaj koj lub siab li no tias, ‘Lwm tus puas pom tias kuv yog ib tug neeg nyiam tos txais qhua?’ (Nyeem Henplais 13:2, 16.) Tus neeg nyiam qhua yeej ua zoo rau txhua tus uas tuaj xyuas nws. Xws li cov neeg txom nyem, cov tuaj cev lus qhuab qhia uas tuaj lwm qhov tuaj, cov saib xyuas thaj tsam, thiab lwm cov uas sib zog ntsos ua hauj lwm pub rau Yehauvas.​—Chivkeeb 18:2-8; Pajlug 3:27; Lukas 14:13, 14; Tes Hauj Lwm 16:15; Loos 12:13.

7. “Tsis ntshaw nyiaj txiag” yog li cas tiag?

⁷ “Tsis ntshaw nyiaj txiag.” Qhov no qhia tias koj tsis muab nyiaj thiab tej khoom ub khoom no saib hlob. Txawm yuav muaj yuav pluag los txoj kev teev tiam Yehauvas tseem ceeb tshaj hauv koj lub neej. (Mathais 6:33) Koj siv koj tej sij hawm, dag zog, thiab tej koj muaj los teev tiam Yehauvas, saib xyuas koj tsev neeg, thiab pab cov nyob hauv lub koom txoos. (Mathais 6:24; 1 Yauhas 2:15-17) Zaum tsaws xav li no tias: ‘Nyiaj txiag tseem ceeb npaum li cas rau kuv? Kuv puas txaus siab rau tej uas kuv muaj? Los sis kuv xav ua kom tau nyiaj txiag ntau thiab muaj ub muaj no?’​—1 Timautes 6:6, 17-19.

8. “Xyuam xim” thiab “xyaum ua lub neej zoo” yog li cas tiag?

⁸ Yog koj “xyuam xim” thiab “xyaum ua lub neej zoo” ces koj yuav txawj tswj koj lub neej. Xws li koj yuav tsis noj ntau haus ntau, tej ris tsho thiab plaub hau los raug ntsej muag, thiab txawj xaiv tias yam twg zoo mus ua si. Koj tsis xyaum lub qab ntuj neeg lub neej. (Lukas 21:34; Yakaunpaus 4:4) Txawm lwm tus ua phem los koj tswj tau koj lub siab. Koj “tsis yog neeg quav cawv,” thiab luag tsis suav tias koj yog ib tug neeg haus cawv ntau ntau. Zaum tsaws xav li no tias, ‘Kuv lub neej puas qhia tias kuv xyuam xim thiab xyaum ua lub neej zoo?’

9. “Tswj tau nws lub siab” thiab “paub cai” yog li cas tiag?

⁹ “Tswj tau nws lub siab” yog koj siv phau Vajlugkub tej hauv paus ntsiab lus los pab koj txiav txim rau qhov yog. Koj muab tej hauv paus ntsiab lus ntawd ua zoo xav xwv koj thiaj nkag siab thiab paub pab lwm tus li cas. Koj tsis yog lam hnov dheev ces txawm siv txiav txim siab tiam sis koj tos kom paub tshab tshab ua ntej tso. (Pajlug 18:13) Yog koj coj li no koj thiaj xav li Yehauvas xav. Yog koj “paub cai,” koj yuav txawj npaj thiab ua txhua yam kom raws caij raws nyoog. Luag tso siab tau rau koj thiab koj ua raws li Yehauvas lub koom haum qhia. Thaum koj coj yam li no ces lwm tus yuav saib taus koj. Cia peb mus tham txog tej yeeb yam hauv phau Vajlugkub seb ib tug txwj laus yuav tau coj li cas nws thiaj ua tau ib tug txiv tsev zoo.

UA IB TUG TXIV TSEV ZOO

10. Tus txiv tsev yuav tau “txawj tswjhwm nws tsev neeg thiab qhuab ntuas nws tej menyuam” li cas?

¹⁰ Yog koj yog ib tug txiv tsev thiab koj xav ua ib tug txwj laus, koj tsev neeg yuav tau coj zoo rau sawv daws xyaum. Koj yuav tau “txawj tswjhwm [koj] tsev neeg thiab qhuab ntuas [koj] tej menyuam.” Qhov no qhia tias koj yuav tau saib xyuas koj tsev neeg thiab hlub lawv. Koj tsev neeg kawm Vajlugkub ua ke, mus kev sib txoos, thiab mus tshaj tawm txoj xov zoo. Tej no puav leej tseem ceeb vim tus tub txib Povlauj hais tias: “Yog leejtwg tswj tsis tau nws tsev neeg, ces nws yuav ua li cas saib tau cov ntseeg Vajtswv.”​—1 Timautes 3:5.

11-12. Yog tias ib tug kwv tij xav ua ib tug txwj laus, vim li cas nws tsev neeg yuav tsum tau coj zoo? (Saib daim duab.)

¹¹ Yog koj yog ib leej txiv, koj cov me nyuam yuav tsum “hwm thiab mloog [koj] lus.” Koj yuav tau ua tib zoo cob qhia lawv. Koj yeej xav kom koj cov me nyuam nyob dhia rhees thiab muaj kev zoo siab. Txawm li ntawd los koj yuav tau cob qhia kom lawv mloog koj lus, paub cai, thiab coj cwj pwm zoo. Tsis tas li ntawd, koj yuav tau pab kom koj cov me nyuam muaj ib txoj kev sib raug zoo nrog Yehauvas, coj lub neej raws li phau Vajlugkub tej hauv paus ntsiab lus, thiab muaj hom phiaj ua kev cai raus dej.

¹² “Nws cov menyuam yuav tsum yog cov uas ntseeg Vajtswv thiab yog cov uas tsis muaj leejtwg thuam hais tias yog neeg lojleeb thiab tawv ncauj.” Qhov no qhia tias yog ib tug kwv tij ib tug me nyuam ua kev cai raus dej los sis tseem yuav ua kev cai raus dej es tau ua ib qho txhaum loj ces cov txwj laus yuav tau sab laj seb tus kwv tij ntawd puas tsim nyog ua ib tug tub leg num los sis txwj laus mus ntxiv. Yog hais tias leej txiv tsis cob qhia thiab qhuab ntuas nws tus me nyuam ces tej zaum nws yuav ua tsis tau ib tug txwj laus.​—Saib Phau Tsom Faj lub 10 Hli tim 15 xyoo 1996, sab 21, nqe 6-7 ua lus Askiv.

PAB LUB KOOM TXOOS

13. Tus neeg uas muaj “lub siab zam xeeb” thiab “tsis khavtheeb” coj zoo li cas?

¹³ Cov kwv tij uas muaj cwj pwm zoo mas pab tau lub koom txoos kawg li. Tus neeg uas muaj “lub siab zam xeeb” nyiam kom muaj kev sib haum xeeb. Yog tias koj xav kom koj yog ib tug neeg ntawd, nco ntsoov mloog lwm tus hais thiab muab lawv tej lus coj los ua tib zoo xav. Xws li yog cov txwj laus feem coob txiav txim siab ua ib yam dab tsi uas tsis hla phau Vajlugkub tej hauv paus ntsiab lus, koj puas txhawb nqa tab txawm koj tsis xav ib yam li lawv xav? Tus neeg uas “tsis khavtheeb” tsis yuam qees kom ua raws li nws hais xwb. Nws yeej khaws luag lwm tus lub tswv yim cia. (Chivkeeb 13:8, 9; Pajlug 15:22) Tus neeg ‘tsis nyiam sib cav sib ceg’ los sis “tsis chim sai” yeej tsis cam yeej cam swb thiab ua tsis raug ntsej muag tiam sis nws mam xav mam hais thiab ua siab dawb siab zoo. Tus neeg tsis ntau ncauj yeej ntaus thawj hlo ua kom muaj kev sib haum xeeb tab txawm yuav nyuaj npaum twg. (Yakaunpaus 3:17, 18) Nws tej lus mos lus muag yuav rub tau lwm tus lub siab kom ntev, tsis hais cov neeg uas tawm tsam nws txoj kev ntseeg.​—Cov Thawjtswj 8:1-3; Pajlug 20:3; 25:15; Mathais 5:23, 24.

14. Qhov uas “tsis txhob muab tus uas nyuam qhuav los ntseeg tshiab” thiab “ua lub neej dawbhuv” yog li cas tiag?

¹⁴ “Tsis txhob muab tus uas nyuam qhuav los ntseeg tshiab” ua ib tug txwj laus. Koj tsis tas yuav ua kev cai raus dej tau ntau ntau xyoo tiam sis koj yuav tau tsav koj txoj kev sib raug zoo nrog Yehauvas thiab txawj siv phau Vajlugkub thaum koj yuav txiav txim siab ua ib yam dab tsi. Ua ntej koj yuav ua ib tug txwj laus, koj yuav tau xyaum Yexus tus yam ntxwv uas txo hwj chim thiab muaj lub siab ntev tos Yehauvas muab hauj lwm hauv lub koom txoos rau koj ua. (Mathais 20:23; Filipis 2:5-8) Koj yuav tau “ua lub neej dawbhuv” es muab siab npuab Yehauvas, coj raws li nws tej kev cai, thiab ua raws li nws lub koom haum qhia.​—1 Timautes 4:15.

15. Piav seb puas yog ib tug txwj laus yuav tsum yog ib tug txawj txawj cev lus qhuab qhia.

¹⁵ Nyob rau hauv phau Vajlugkub qhia meej meej tias cov uas saib xyuas yuav tsum “txawj qhuab qhia.” Qhov no puas yog qhia tias koj yuav tau txawj txawj cev lus qhuab qhia? Tsis yog qhia li ntawd. Muaj coob tus txwj laus tsis yog cov uas txawj txawj cev lus qhuab qhia tiam sis thaum lawv mus tshaj tawm txoj xov zoo thiab mus txhawb cov kwv tij nkauj muam, lawv txawj siv phau Vajlugkub heev. (Muab piv rau 1 Kauleethaus 12:28, 29 thiab Efexus 4:11.) Txawm li ntawd los koj yuav tau yim huab xyaum tiag kom koj txawj qhia. Ua li koj yuav ua tau li ntawd li cas?

16. Yuav ua li cas koj thiaj txawj qhia? (Saib daim duab.)

¹⁶ “Muab siab npuab Vajtswv tej lus.” Yuav kom ua tau ib tug uas txawj txawj qhia, koj yuav tau siv Vajtswv Txoj Lus thaum ntuas los sis qhia lwm tus. Koj yuav tau nquag kawm phau Vajlugkub thiab tej ntaub ntawv uas Yehauvas lub koom haum luam tawm. (Pajlug 15:28; 16:23) Thaum koj tab tom kawm cov ntaub ntawv ntawd, ua tib zoo saib seb tau muab cov nqe Vajlugkub coj los piav li cas rau li cas xwv koj thiaj paub muab siv. Nco ntsoov thaum koj qhia, yuav tau qhia kom raug tus mloog lub siab. Tsis tas li ntawd, koj yuav tau nug cov txwj laus seb qhov twg koj tseem ua tsis tau tau zoo ces ua raws li lawv qhia. (1 Timautes 5:17) Cov txwj laus yuav tsum “txhawb tau cov uas mloog lub zog” tiam sis muaj qee lub sij hawm lawv yuav tau ntuas cov kwv tij nkauj muam. Thaum muaj li no cov txwj laus yuav tau ua tib zoo hais, hlub, thiab siv Vajtswv Txoj Lus. Thaum lawv ua li no twb yog lawv xyaum qhia li Yexus.​—Mathais 11:28-30; 2 Timautes 2:24.

KAM TIAG KOM UA TAU IB TUG TXWJ LAUS

17. (1) Dab tsi pab tau ib tug tub leg num kom muaj siab xav ua ib tug txwj laus? (2) Cov txwj laus yuav tau nco ntsoov li cas thaum xav tsa ib tug kwv tij ua ib tug txwj laus? (Saib lub ntsiab “Tshuaj Lwm Tus Li Tsim Nyog Xwb.”)

¹⁷ Tej zaud muaj ib txhia tub leg num xav hais tias lawv yeej yuav ua tsis tau ib tug txwj laus vim tseem tshuav ntau qhov yeeb yam lawv yuav tau xyaum. Tiam sis nco ntsoov tias Yehauvas los sis nws lub koom haum tsis tseev kom koj coj tau tej yeeb yam kom tau zoo zoo. (1 Petus 2:21) Qhov uas koj coj tau yog yuav tsum muaj Yehauvas lub hwj huam dawb huv pab koj. (Filipis 2:13) Tseem tshuav qhov yeeb yam twg koj xav kom koj ua tau zoo? Thov Yehauvas pab, tshawb nrhiav txog qhov yeeb yam ntawd, thiab nug cov txwj laus ib tug seb koj yuav ua li cas koj thiaj ua tau zoo.

18. Cov tub leg num yuav tau rau siab ntso ua dab tsi?

¹⁸ Peb txhua tus, tsis hais cov txwj laus, yuav tau xyaum tej yeeb yam uas hais nyob rau hauv zaj kawm no. (Filipis 3:16) Ua li koj puas yog ib tug tub leg num? Rau siab kam tiag kom ua tau ib tug txwj laus! Thov Yehauvas pab kom koj txawj ua nws tes hauj lwm xwv koj thiaj ua tau ntau yam rau nws thiab rau lub koom txoos. (Yaxayas 64:8) Thov Yehauvas foom koob hmoov rau koj nplua mias uas koj muaj lub siab xav ua ib tug txwj laus.