ZAJ KAWM 26
ZAJ NKAUJ 126 Ceev Faj Zov, Sawv Ruaj Nreeg, Ruaj Khov
Txo Hwj Chim Yog Tsis Paub Tseeb
“Tus uas muaj hwj chim loj kawg nkaus mas peb yeej paub nws tsis tag.”—YAUJ 37:23.
LUB NTSIAB RAU ZAJ NO
Txawm tias peb tsis paub txhua yam uas yuav muaj tshwm sim yav tom ntej los peb yeej thev taus yog tias peb tau hau ntsoov xav txog tej yam peb paub thiab tso siab rau Yehauvas.
1. Yehauvas tsim kom peb muaj rab peev xwm ua tau dab tsi, thiab vim li cas?
YEHAUVAS tsim tau peb lub cev ntaj ntsug zoo heev peb thiaj li muaj tswv yim kom txawj xav, kawm tej yam tshiab, txawj nkag siab, thiab muaj tswv yim ua neej. Tos Yehauvas tsim peb yam li no los twb yog nws xav kom peb txawj nrhiav qhov tseeb txog nws xwv peb thiaj xav teev tiam nws mus li.—Pajlug 2:1-5; Loos 12:1.
2. (1) Peb yuav tsum nkag siab li cas txog peb tus kheej? (Yauj 37:23, 24) (Saib daim duab.) (2) Vim li cas ho tseem ceeb rau peb to taub tias peb tsis tas yuav paub txhua yam?
2 Txawm Yehauvas tsim kom peb muaj rab peev xwm kawm kom txawj ua ntau tsav ntau yam los tseem tshuav ntau yam uas peb tseem tsis tau paub thiab. (Nyeem Yauj 37:23, 24.a) Cia peb mus tham me ntsis txog Yauj. Yehauvas tau nug Yauj ntau yam uas Yauj teb tsis tau. Qhov no qhia tias tseem tshuav ntau yam Yauj tsis tau paub. Thaum Yehauvas nug li no ua rau Yauj txo hwj chim thiab hloov nws tej kev xav. (Yauj 42:3-6) Zoo tib yam li ntawd, peb yuav tau ua neeg txo hwj chim thiab lees tias peb tsis paub txhua yam. Yog peb nco ntsoov li no ces yuav pab tau kom peb tso siab rau Yehauvas tias nws mam li ua tus qhia peb txog tej yam uas tsim nyog rau peb paub xwv peb thiaj txiav txim siab ua qhov zoo qhov yog.—Pajlug 2:6.
Yog peb lees hlo tias peb tsis paub ces yuav pab tau peb ib yam li Yauj (Saib nqe 2)
3. Nyob rau hauv zaj kawm no peb yuav tham txog dab tsi?
3 Nyob rau hauv zaj kawm no peb yuav tham txog tej yam uas peb tseem tsis tau paub thiab vim li cas qhov uas peb tsis paub ho ua ib qho kev txhawj xeeb hauv peb lub neej. Tsis tas li ntawd, peb yuav kawm tias vim li cas zoo rau peb tsis paub qho yam. Kawm txog tej no yuav txhawb tau kom peb tso siab rau Yehauvas uas yog “tus muaj kev txawj ntse tshaj plaws” thiab cia nws ua tus qhia peb seb tsim nyog rau peb paub yam twg rau yam twg.—Yauj 37:16.
PEB TSIS PAUB THAUM TWG LUB SIM CEEB NO MAM KAWG
4. Raws li Mathais 24:36, yam uas tsis tau paub yog dab tsi?
4 Nyeem Mathais 24:36. Peb tsis paub thaum twg lub sim ceeb no mam li kawg. Thaum Yexus tseem nyob hauv ntiaj teb no los nws kuj tsis paub “txog hnub ntawd thiab teev ntawd.”b Yexus hais rau nws cov tub txib tias Yehauvas yog tus uas paub caij paub nyoog thiab yog tus “muaj cai teem tseg xwb” ces Nws yeej teem tseg tias muaj li cas rau lub sij hawm twg. (Tes Hauj Lwm 1:6, 7) Yehauvas twb teem tseg seb lub sim ceeb yuav kawg rau thaum twg ces peb tsis muaj cai yuav los mus xam caij xam nyoog seb yog thaum twg tiag.
5. Vim peb tsis paub hnub twg yog hnub kawg, tej no ho ua rau peb coj li cas?
5 Peb tsis paub tias peb yuav tau tos hov ntev lub sim ceeb no mam kawg. Yog li ntawd, tej zaud yuav ua rau peb tos tsis taus los sis qaug zog tag. Xws li peb twb tos Yehauvas hnub los lawm ntev los sis peb raug peb tsev neeg thiab lwm tus thuam ua rau peb thev tsis taus ntxiv li lawm. (2 Petus 3:3, 4) Tej zaud peb yuav xav hais tias kheev lam peb lam paub tias yog hnub twg mas peb yuav ua siab ntev thiab thev txhua yam.
6. Vim li cas ho zoo rau peb tsis paub tias thaum twg lub sim ceeb no mam kawg?
6 Qhov uas Yehauvas tsis qhia rau peb tias thaum twg lub sim ceeb no mam kawg, peb thiaj li muaj qhov cij fim qhia tias peb xav teev tiam nws vim peb hlub thiab tso siab rau nws. Tsis tas li ntawd, peb xav teev tiam Yehauvas mus ib txhis, tsis yog teev tiam txog thaum lub sim ceeb no kawg xwb. Ntxiv ntawd, peb tsis txhob txhawj txog “hnub uas Vajtswv yuav los” seb yuav yog thaum twg tiam sis cia peb xav seb thaum hnub ntawd los txog yuav muaj tej yam zoo twg tshwm sim. Yog peb ua li no yuav pab tau kom peb yim huab nrog Yehauvas sib raug zoo, tso siab rau nws, thiab ua kom kawg peb lub dag lub zog yam li nws lub siab nyiam.—2 Petus 3:11, 12.
7. Peb paub dab tsi?
7 Cia peb xav txog tej yam uas peb twb paub lawm, xws li tiam kawg pib rau thaum xyoo 1914. Yehauvas twb tau ua ntau qhov faj lem qhia tias xyoo 1914 yog xyoo uas tiam kawg pib. Tsis tas li ntawd, nws kuj qhia tias yuav muaj dab tsi tshwm sim hauv ntiaj teb no tom qab xyoo ntawd. Vim tej faj lem no twb muaj tshwm sim, peb thiaj paub tseeb tias “hnub tseemceeb uas yog [Yehauvas] hnub twb los ze lawm.” (Xefaniyas 1:14) Peb kuj paub tias Yehauvas xav kom mus tshaj tawm “txoj xov zoo txog Vajtswv txoj kev kav” rau tib neeg coob li coob tau paub. (Mathais 24:14) Txoj xov zoo no kuj muab tshaj tawm mus thoob kwv lam li 240 lub teb chaws thiab tshaj li 1,000 tawm yam lus. Peb tsis tas yuav paub “hnub ntawd thiab teev ntawd” es peb mam li kub siab tshaj tawm txoj xov zoo.
PEB TSIS PAUB XYOV YEHAUVAS YUAV PAB PEB LI CAS
8. Piav seb “tej uas Vajtswv ua” yog hais txog dab tsi. (Tej Lus Qhia 11:5)
8 Peb yeej paub tsis tshab “tej uas Vajtswv ua.” (Nyeem Tej Lus Qhia 11:5.) Peb yuav paub tsis txhij tsis txhua tej uas Yehauvas ua kom muaj los sis tej uas nws cia kom muaj xwv thiaj li muaj tiav li nws lub ntsiab. Peb kuj tsis paub meej tias Yehauvas yuav ua li cas kiag los pab peb. (Phau Ntawv Nkauj 37:5) Nyob hauv phau Vajlugkub muab qhov uas peb tsis paub tej uas Vajtswv ua piv rau tus me nyuam uas tab tom xeeb hauv leej niam plab. Txawm cov neeg tshawb txuj ci los twb tsis paub tseeb hais tias tus me nyuam loj hlob li cas hauv leej niam plab. Yog li ntawd, peb yuav tsis paub txhua yam uas Yehauvas ua.
9. Vim peb tsis paub tias Yehauvas yuav pab peb li cas, thiaj li ua rau peb txhawj xeeb txog dab tsi?
9 Thaum peb tsis paub tias Yehauvas yuav ua li cas los pab peb ces tej zaud peb yuav muaj ntau yam kev txhawj xeeb. Xws li tej zaud peb kuj tsis kam hloov tej yam hauv peb lub neej kom thiaj tau tshaj tawm txoj xov zoo ntau ntxiv. Muab piv tias peb puas kam tsiv mus nyob tej thaj chaw uas tsis muaj cov tshaj tawm coob pes tsawg los sis ua peb lub neej kom yooj yim. Los sis peb xav hais tias yog peb ncav tsis cuag peb lub hom phiaj ua Yehauvas tes hauj lwm ces nws yuav tsis txaus siab. Tej zaud peb ho kub siab lug tshaj tawm tiam sis qhia tsis tau ib tug li. Los sis peb ho ua hauj lwm rau Yehauvas lub koom haum tiam sis ho raug tej yam kev nyuaj siab ntxhov plawv. Vim peb raug li no, tej zaud yuav ua rau peb xav tias Yehauvas tsis pab peb.
10. Qhov uas peb tsis paub tias Yehauvas yuav pab peb li cas ho pab kom peb coj cwj pwm li cas?
10 Qhov uas peb tsis paub tias Yehauvas yuav pab peb li cas yuav pab kom peb ua neeg txo hwj chim. Tsis tas li ntawd, yuav pab kom peb to taub tias Yehauvas yeej ib txwm paub tias qhov twg yog qhov zoo rau peb. (Yaxayas 55:8, 9) Peb kuj xyaum kom tso siab tag nrho rau Yehauvas. Thaum peb mus qhia txoj xov zoo los sis ua tau ib yam dab tsi rau Yehauvas lub koom haum es mus tau zoo, peb tsis qhuas peb tus kheej tiam sis peb qhuas Yehauvas. (Phau Ntawv Nkauj 127:1; 1 Kauleethaus 3:7) Txawm ib yam twg tsis mus raws li peb lub siab nyiam los nco ntsoov tias Yehauvas yeej pom txhua yam. (Yaxayas 26:12) Cia peb rau siab ntso ua peb feem thiab tso siab tias Yehauvas yeej yuav pab peb. Peb yeej paub tseeb tias Yehauvas yuav coj peb txoj hau kev tab txawm nws tsis ua txuj ci rau peb ib yam li cov nyob txheej thaum ub.—Tes Hauj Lwm 16:6-10.
11. Peb paub txog dab tsi?
11 Peb paub tias Yehauvas yeej ib txwm muaj kev hlub, coj ncaj ncees, thiab muaj tswv yim. Peb paub tias Yehauvas yeej saib tej yam peb ua rau nws thiab cov kwv tij nkauj muam rau nqi. Tsis tas li ntawd, peb kuj paub tias Yehauvas yeej muab nqi zog rau cov uas muab siab npuab nraim nws.—Henplais 11:6.
PEB TSIS PAUB XYOV TAG KIS YUAV ZOO LI CAS
12. Raws li Yakaunpaus 4:13, 14, peb tsis paub txog dab tsi?
12 Nyeem Yakaunpaus 4:13, 14. Peb tsuas paub txog hnub no xwb peb tsis paub xyov tag kis yuav zoo li cas rau peb. Nyob rau lub sim ceeb no “tsis muaj leejtwg paub hais tias kev puastsuaj yuav los raug nws thaum twg.” (Tej Lus Qhia 9:12) Tsis tas li ntawd, tej uas peb twb npaj tseg tias yuav ua los peb twb tsis paub tias xyov tej peb ua ntawd puas yuav tiav los sis xyov peb puas tseem muaj sia nyob pom.
13. Qhov uas peb tsis paub txog yav tom ntej ho ua rau peb txhawj xeeb txog dab tsi?
13 Tej zaud yuav nyuaj rau peb ua siab ntev thev vim peb tsis paub tias yav tom ntej yuav zoo li cas. Xws li peb pheej txhawj tias lub neej tom ntej yuav zoo li cas ces tej zaud peb yuav tsis muaj siab ua dab tsi. Tej zaud ib sij huam muaj xwm txheej los sis kev nyuaj siab los raug peb ua rau peb quaj ntsuag thiab ntxhov siab hnyo. Los sis tej thaud muaj tej yam tsis mus raws li peb lub siab xav ces peb cia li tag kev cia siab thiab qaug zog.—Pajlug 13:12.
14. Ua li cas peb thiaj muaj taus kev zoo siab? (Saib cov duab.)
14 Txawm yuav muaj li cas los raug peb lub neej los xij peem, peb qhia tau tias peb teev tiam Yehauvas vim peb hlub nws. Nyob rau hauv phau Vajlugkub yeej qhia tseeb tseeb tias Yehauvas tsis cuam tshuam txhua yam uas peb raug thiab nws tsis teem tias peb lub neej yuav zoo li cas rau li cas ua ntej. Yehauvas paub hais tias peb lub neej kaj siab tsis yog nyob ntawm qhov peb paub txog yav tom ntej tiam sis yog qhov uas peb mloog nws lus thiab cia nws ua tus coj peb txoj hau kev. (Yelemis 10:23) Yog peb tos Yehauvas ua tus pab peb txiav txim siab ces twb yog peb hais tias: “Yog haum Vajtswv siab, peb yuav ua yam ub yam no.”—Yakaunpaus 4:15.
Yog peb mloog Yehauvas lus thiab cia nws ua tus coj peb txoj hau kev ces yuav tiv thaiv tau peb (Saib nqe 14-15)c
15. Peb paub li cas txog yav tom ntej?
15 Peb tsis paub tias txhua hnub yuav zoo li cas tiam sis peb paub tias Yehauvas cog lus tias nws yuav pub txoj sia ib txhis tsis kawg rau peb, tsis hais nyob saum ntuj los sis nyob hauv ntiaj teb no. Peb paub tias nws yeej tsis dag thiab yeej tsis muaj ib yam tav tau kom nws tej lus cog tseg ntawd tsis txhob muaj tshwm sim li. (Titus 1:2) Tsuas yog nws tib leeg xwb thiaj “qhia tej uas yuav muaj tshwm . . . thiab yav thaum ub [nws] twb qhia tej uas tseem tsis tau ua.” Yog tej uas nws qhia yav tag los lawm twb muaj tshwm sim ces yav tom ntej los yeej muaj xwb thiaj tag. (Yaxayas 46:10) Peb paub tias yeej tsis muaj ib yam txwv tau kom Yehauvas tsis txhob hlub peb. (Loos 8:35-39) Nws yuav tsav tswv yim, nplig peb, thiab ntxiv dag ntxiv zog kom peb thev taus tej yam uas yuav los raug peb. Nco ntsoov tias Yehauvas yeej yuav pab peb thiab foom koob hmoov rau peb.—Yelemis 17:7, 8.
YEHAUVAS PAUB PEB ZOO TSHAJ LI PEB XAV TAU
16. Yehauvas paub peb zoo npaum li cas, thiab koj ho xav li cas? (Phau Ntawv Nkauj 139:1-6)
16 Nyeem Phau Ntawv Nkauj 139:1-6. Yehauvas paub txhua yam txog peb. Nws paub vim li cas peb ho xav li peb xav thiab peb ho ua li peb ua. Nws paub tej yam peb hais thiab nws paub tej uas nyob nraim nkoos hauv peb nruab siab. Nws paub txhua yam peb ua thiab vim li cas peb ho ua li ntawd. Vaj Ntxwv Daviv hais tias Yehauvas yeej saib ntsoov peb thiab tos rawv yuav pab peb. Yog ib qho koob hmoov zoo kawg li uas tus tsim lub ntuj, lub ntiaj teb thiab lub qab ntuj khwb haj tseem saib peb rau nqi. Daviv thiaj hais tias nws qhuas qhov uas Yehauvas paub nws zoo npaum li cas thiab ua rau nws xav tsis thoob li.—Phau Ntawv Nkauj 139:6.
17. Vim li cas ho nyuaj rau peb ntseeg tias Yehauvas paub peb zoo heev?
17 Tej zaud yuav nyuaj rau peb xam pom tias Yehauvas yog ib Leej Txiv uas muaj kev hlub tshua txog peb vim peb tsev neeg tsis txawj sib hlub, peb los ntawm ib haiv neeg uas txaj muag qhia tias lawv hlub lawv tsev neeg los sis tej yam uas peb ntseeg ua ntej peb los paub Yehauvas. Tej zaud peb xav tias peb lub neej yav tag los lawm phem dhau ces Yehauvas tsis yuav peb li. Muaj qee lub sij hawm Daviv los kuj xav ib yam li ntawd thiab. (Phau Ntawv Nkauj 38:18, 21) Muaj tej tug tib neeg sib zog hloov nws lub neej thiab ua nws lub neej kom haum Vajtswv siab tej zaud yuav xav hais tias, ‘Yog Vajtswv paub kuv tiag, vim li cas nws ho tsis nyiam tej yam uas kuv ib txwm ua hauv kuv lub neej?’
18. Vim li cas zoo rau peb lees tias Yehauvas paub peb zoo dua li peb paub peb tus kheej? (Saib cov duab.)
18 Tsis txhob ua siab deb, cia li lees yuav tias Yehauvas paub peb zoo dua li peb paub peb tus kheej, thiab txawm peb tsis pom peb ua qhov zoo los Yehauvas yeej pom. Txawm peb ua yuam kev los nws paub tias peb yog tus neeg uas zoo li cas thiab nws hlub peb heev. (Loos 7:15) Thaum peb ras txog tias Yehauvas tsuas pom qhov zoo uas peb ua xwb ces peb yuav kaj siab lug teev tiam nws kom kawg siab kawg ntsws mus li.
Yehauvas pab kom peb nco ntsoov lub neej yav tom ntej xwv peb thiaj thev tau lub neej uas muaj kev nyuaj siab ntxhov plawv no (Saib nqe 18-19)d
19. Peb paub tseeb tseeb li cas txog Yehauvas?
19 Peb paub tseeb tseeb tias Yehauvas yog txoj kev hlub. (1 Yauhas 4:8) Peb paub tias txhua txoj cai nws tsa tsuas yog nws hlub peb thiab nws xav kom peb tau lub neej zoo xwb. Tsis tas li ntawd, peb paub tias nws xav kom peb tau txoj sia ib txhis tsis kawg vim nws pub kom muaj tus nqi txhiv los txhiv peb lub txim. Tab txawm peb yog noob txaug neeg txhaum los tus nqi txhiv pab tau kom peb teev tiam Yehauvas raws li nws lub siab nyiam. (Loos 7:24, 25) Ntxiv ntawd, peb paub tias “Vajtswv yog tus loj dua peb lub siab thiab paub txhua yam huvsi.” (1 Yauhas 3:19, 20) Yehauvas paub txhua yam txog peb thiab nws tso siab tias peb yeej ua tau raws li nws lub siab nyiam.
20. Dab tsi yuav pab tau kom peb tsis txhob txhawj heev dhau?
20 Yehauvas yeej qhia txhua yam uas tsim nyog rau peb paub lawm. Peb yuav tau tsis txhob txhawj heev dhau txog tej yam uas peb tsis paub tiam sis peb yuav tau xav ntsoov seb yam twg yog yam tseem ceeb tshaj. Yog peb coj yam li no ces yuav qhia tau tias peb txo hwj chim thiab cia siab rau Yehauvas uas yog tus “ntse heev.” (Yauj 36:4) Txawm tam sim no peb tseem tsis tau paub txhua yam los peb yuav muaj ib txhiab ib txhis yav tom ntej kawm ntau yam txog Yehauvas thiab Yehauvas yuav qhia ntau yam tshiab rau peb.—Tej Lus Qhia 3:11.
ZAJ NKAUJ 104 Vajtswv Pub Lub Hwj Huam Dawb Huv
a Yauj 37:23, 24 (NWT): “Tus uas muaj hwj chim loj kawg nkaus mas peb yeej paub nws tsis tag. Nws muaj hwj chim loj heev, thiab nws txiav txim ncaj thiab nws txoj kev ncaj ncees yeej zoo rau txhua fab. Yog li ntawd, yeej tsim nyog rau neeg hwm nws. Nws tsis quav ntsej cov uas khav hais tias lawv yog neeg ntse.”
b Yexus yuav yog tus coj thaum ua rog rau Xatas lub qab ntuj phem. Yog li ntawd, tam sim no Yexus yeej paub lawm tias thaum twg yuav txog Amankedoos thiab thaum twg nws yuav “tawmtsam kom yeej.”—Tshwmsim 6:2; 19:11-16.
c COV DUAB: Tus txiv thiab tus tub npaj lub hnab rau thaum muaj xwm txheej.
d DAIM DUAB: Ib tug kwv tij uas muaj kev nyuaj siab tos ntsoov lub neej kaj siab uas nws yuav tau hauv lub qab ntuj tshiab.