Xyaum Kub Siab Tshaj Tawm Li Yexus

1. Muaj ib yam uas Yehauvas cov tib neeg txawv ntawm lwm txoj kev ntseeg yog li cas?

MUAJ ib yam uas Yehauvas cov tib neeg coj txawv ntawm lwm txoj kev ntseeg yog lawv kub siab mus tshaj tawm txoj xov zoo. (Titus 2:14) Tiam sis muaj tej lub sij hawm koj yuav tsis kub siab mus tshaj tawm txoj xov zoo. Tej zaud koj yuav xav ib yam ib tug txwj laus uas sib zog pab lub koom txoos xav. Nws hais tias, “Muaj qee lub sij hawm kuv tsis tuaj siab mus qhia txoj xov zoo li.”

2. Vim li cas ho nyuaj rau peb kub siab lug mus tshaj tawm txoj xov zoo?

² Tej zaud peb yuav nyiam ua lwm yam rau Yehauvas dua li mus tshaj tawm txoj xov zoo. Vim li cas peb ho xav li ntawd? Rau qhov yog peb mus ua lwm yam ces peb yuav pom tias peb pab kiag tau tam sid xws li tsa vaj tsa tsev, pab thaum muaj xwm txheej los sis txhawb cov kwv tij nkauj muam. Tsis tas li ntawd, peb kuj pom tias ib leeg hlub ib leeg, sawv daws nyob sib haum xeeb, thiab tej peb ua los lawv yeej ris peb txiaj ntsig. Hos qhov uas peb mus tshaj tawm txoj xov zoo ces mus npaum twg los tsis muaj neeg xav kawm, peb txawm ntsib tej tug tsis nyiam, thiab lub sim ceeb no yuav kawg ces tej peb tshaj tawm los twb tsis muaj leej twg xav hnov. (Mathais 10:22) Peb yuav ua li cas peb thiaj li kub siab mus tshaj tawm txoj xov zoo?

3. Peb khaws tau dab tsi txog Yexus ntawm zaj lus piv txwv hauv Lukas 13:6-9?

³ Cia peb xyaum Yexus tus yam ntxwv kom peb thiaj kub siab lug tshaj tawm txoj xov zoo. Thaum Yexus tseem nyob hauv ntiaj teb no tsis muaj ib lub sij hawm uas nws yuav nyob twj ywm es tsis qhia tib neeg txog txoj xov zoo. Thaum nws qhia ntev zuj zus los nws huab yam qhia tsis tseg tsis tu. (Nyeem Lukas 13:6-9.) Yexus siv ib zaj lus piv txwv txog tus tu lub vaj txiv hmab. Nws tu tsob ntoo txiv cev tau peb xyoos tiam sis tsis txi ib lub txiv li. Txawm li ntawd los nws haj tseem tu tsob txiv quj qees. Zoo ib yam li ntawd, Yexus siv peb xyoos los mus qhia rau cov Yudais tiam sis feem coob tsis kam los ua nws cov thwj tim. Txawm li ntawd los nws tsis tag kev cia siab tiam sis nws sib zog ntsos qhia rau lawv seb puas muaj ib hnub twg lawv thim xav.

4. Muaj plaub yam uas peb kawm tau ntawm Yexus yog dab tsi?

⁴ Nyob rau hauv zaj kawm no peb yuav tham seb Yexus ho kub siab lug tshaj tawm li cas rau li cas, thiab ua li cas nws yim huab mob siab tshaj tawm rau lub hlis ua ntej nws tuag. (Lukas 10:1) Peb yuav kub siab lug tshaj tawm yog hais tias peb kawm txog tej nws qhia thiab tej nws ua. Peb yuav mus kawm plaub yam uas Yexus tau ua: (1) Nws ua raws nkaus li Yehauvas lub siab nyiam, (2) nws paub tej faj lem hauv phau Vajlugkub, (3) nws tso siab plhuav rau Yehauvas, thiab (4) nws tso siab tias yuav muaj ib tug twg mloog nws hais.

NWS UA RAWS NKAUS LI YEHAUVAS LUB SIAB NYIAM

5. Yexus ua qhia li cas tias Vajtswv tes hauj lwm yog yam tseem ceeb tshaj hauv nws lub neej?

⁵ Yexus kub siab lug “tshaj tawm txog Vajtswv txoj kev kav” vim nws paub tias tes hauj lwm no yog tes Vajtswv xav kom nws ua. (Lukas 4:43) Yexus saib txoj kev tshaj tawm yog yam uas tseem ceeb tshaj nyob rau hauv nws lub neej. Txawm tshuav ob peb lub hlis ua ntej nws tuag xwb los nws haj tseem mus “ib lub nroog rau ib lub thiab ib lub zos rau ib lub” mus tshaj tawm rau tib neeg. (Lukas 13:22) Nws kuj cob qhia nws cov thwj tim kom txawj mus qhia txoj xov zoo ib yam li nws.​—Lukas 10:1.

6. Txawm muaj ntau yam hauj lwm uas peb ua tau rau Yehauvas los nws xav li cas txog qhov uas mus tshaj tawm txoj xov zoo? (Saib daim duab.)

⁶ Tes hauj lwm uas tshaj tawm txoj xov zoo niaj hnub nim no yog tes hauj lwm tseem ceeb tshaj uas Yehauvas thiab Yexus nkawd xav kom peb ua. (Mathais 24:14; 28:19, 20) Txhua tes hauj lwm uas peb ua rau Yehauvas yeej sib chab sib chaws nrog qhov uas mus tshaj tawm txoj xov zoo. Xws li thaum peb tsa tej Tsev Nceeg Vaj, twb yog kom cov tib neeg uas peb mus qhia txoj xov zoo rau muaj chaw tuaj sib txoos teev tiam Yehauvas. Tsis tas li ntawd, tes hauj lwm hauv Npe-ee kuj yog los mus pab tes hauj lwm tshaj tawm txoj xov zoo. Thaum muaj xwm txheej, peb yeej pab tej uas cov kwv tij nkauj muam cheem tsum xwv lawv thiaj tau rov qab mus kev sib txoos thiab mus tshaj tawm txoj xov zoo. Yog peb nco ntsoov tias tes hauj lwm uas tshaj tawm txoj xov zoo yog tes hauj lwm tseem ceeb uas Yehauvas xav kom peb ua ces peb yeej yuav muaj siab zim ua tes hauj lwm ntawd tsis tu ncua. Hanos (János) uas yog ib tug txwj laus nyob teb chaws Hankalis (Hungary) hais tias, “Kuv pheej hais rau kuv tus kheej tias tsis muaj ib tes hauj lwm rau Yehauvas twg uas tseem ceeb tshaj tes mus tshaj tawm txoj xov zoo.”

7. Vim li cas Yehauvas ho xav kom peb mus tshaj tawm txoj xov zoo kam tiag? (1 Timautes 2:3, 4)

⁷ Peb yuav muaj siab zim mus tshaj tawm txoj xov zoo yog peb xam pom tib neeg ib yam li Yehauvas xam pom. Nws xav kom tib neeg hnov txoj xov zoo coob li coob tau thiab xav kom lawv los ntseeg. (Nyeem 1 Timautes 2:3, 4.) Yog li ntawd, Yehauvas thiaj li cob qhia peb heev kawg nkaus li kom txawj mus qhia rau lwm leej lwm tus. Xws li phau Hlub Tib Neeg​—Coj Lawv Los Ntseeg pab kom peb txawj pib nrog tib neeg sib txuas lus xwv peb thiaj li coj tau lawv los ua Yexus cov thwj tim. Txawm lawv tsis kam teev tiam Yehauvas tam sim no los tej zaud lawv muaj lub cij fim los ntseeg nws ua ntej txoj kev txom nyem loj kawg nkaus xaus. Tej uas peb hais rau lawv tam sim no tej zaud yuav pab tau lawv yav tom ntej. Yuav kom peb qhia tau rau lawv, peb yuav tsum mus qhia txoj xov zoo kam tiag.

NWS PAUB TEJ FAJ LEM HAUV PHAU VAJLUGKUB

8. Tej lus faj lem twg pab Yexus siv nws lub sij hawm kom muaj nuj nqis?

⁸ Yexus paub tias tej lus faj lem hauv phau Vajlugkub yuav xaus li cas rau li cas. Nws paub hais tias nws tsuas qhia txoj xov zoo peb xyoos thiab rau lub hlis xwb. (Daniyees 9:26, 27) Tsis tas li ntawd, nws kuj paub lub caij twg nws yuav tuag thiab nws yuav tuag li cas rau li cas. (Lukas 18:31-34) Vim Yexus paub txog tej lus faj lem no nws thiaj li siv nws lub sij hawm kom muaj nuj nqis. Nws thiaj li mob siab tshaj tawm txoj xov zoo kom tiav raws li tes hauj lwm Vajtswv muab tso rau nws ua.

9. Vim li cas tej lus faj lem hauv phau Vajlugkub pab kom peb mob siab qhia txoj xov zoo?

⁹ Qhov uas peb to taub tej lus faj lem hauv phau Vajlugkub yuav pab kom peb mob siab qhia txoj xov zoo. Peb paub tias tshuav tsis ntev lub sim ceeb no yuav kawg. Nyob hauv phau Vajlugkub faj lem tias tib neeg yuav coj li cas rau tiam kawg, thiab dab tsi yuav muaj tshwm sim ces peb twb pom ntsoov tej ntawd ntawm peb ob lub qhov muag lawm tiag. Txuas ntxiv ntawd, peb nkag siab tias tus vaj ntxwv qab teb uas yog Askiv thiab Yunaithim Xatej (United States) yuav nrog tus vaj ntxwv qaum teb uas yog teb chaws Lav Xias thiab tej teb chaws uas koom tes nrog nws sib tawm tsam nyob rau “lub sijhawm kawg.” (Daniyees 11:40) Peb kuj nkag siab tias ob txhais ko taw uas hais hauv Daniyees 2:43-45 piv txwv txog Askiv thiab Yunaithim Xatej. Raws li peb kawm hauv tej lus faj lem, tshuav tsis ntev Vajtswv lub Nceeg Vaj yuav los muab tib neeg tej nom tswv rhuav tshem huv tib si mus. Tej lus faj lem no qhia tias peb nyob rau lub sij hawm twg thiab peb yuav tau mob siab qhia txoj xov zoo.

10. Tej lus faj lem txhawb tau kom koj mus tshaj tawm txoj xov zoo li cas?

¹⁰ Tej lus faj lem hauv phau Vajlugkub kuj muaj tej yam zoo zoo ua rau peb tos tsis hnyu yuav muab qhia rau lwm tus. Khelis (Carrie) uas nyob teb chaws Domunis Lephanplis (Dominican Republic) hais tias: “Thaum Yehauvas cog lus tias peb yuav tau ib lub neej zoo zoo yav tom ntej mas ua rau kuv lub siab kub lug xav muab qhia rau lwm tus. Kuv pom tej uas tib neeg raug niaj hnub nim no mas ua rau kuv xam pom tias tej uas Vajtswv cog tseg tsis yog pab tau kuv xwb tiam sis yuav pab tau lawv thiab.” Tej lus faj lem pab tau peb kom tsis txhob nyob twj ywm vim thaum peb mus qhia, Yehauvas yuav pab peb. Lelas (Leila) uas nyob teb chaws Hankalis hais tias: “Yaxayas 11:6-9 txhawb kom kuv mus tshaj tawm txoj xov zoo tab txawm zoo yam li lawv tsis xav mloog. Kuv paub tias yog muaj Yehauvas pab lawm, leej twg los yeej hloov tau.” Khixafaws (Christopher) uas nyob teb chaws Xanpiam (Zambia) hais tias: “Malakaus 13:10 faj lem tias txoj xov zoo yuav muab tshaj tawm mus puv nkaus lub ntiaj teb. Kuv zoo siab tias kuv muaj ib feem los pab kom muaj tau raws li tej lus faj lem no.” Ua li tej lus faj lem twg uas hais hauv phau Vajlugkub pab tau kom koj mus tshaj tawm txoj xov zoo?

NWS TSO SIAB PLHUAV RAU YEHAUVAS

11. Vim li cas Yexus ho vam khom Yehauvas pab nws tshaj tawm txoj xov zoo tsis tseg tsis tu? (Lukas 12:49, 53)

¹¹ Yexus vam khom Yehauvas ua tus pab nws kom muaj siab kub lug tshaj tawm txoj xov zoo. Txawm Yexus ua tib zoo xaiv nws cov lus thaum nws tshaj tawm los nws paub hais tias luag tej yuav npau taws vim lawv tsis nyiam txoj xov zoo txog lub Nceeg Vaj. (Nyeem Lukas 12:49, 53.) Cov thawj coj tsis nyiam tej Yexus qhia, lawv thiaj li nrhiav txoj hau kev los tua kom tau nws. (Yauhas 8:59; 10:31, 39) Tiam sis Yexus paub tias Yehauvas yeej nrog nraim nws ces nws thiaj li qhia txoj xov zoo tsis tseg tsis tu. Nws hais tias: “Tsis yog kuv tib leeg xwb tiam sis Leej Txiv tus uas txib kuv los yeej nrog nraim kuv. . . . Nws tsis tso kuv tseg rau qhov kuv ua txhua yam raws li nws pom zoo.”​—Yauhas 8:16, 29.

12. Yexus npaj nws cov thwj tim li cas kom paub mus qhia txoj xov zoo rau tej thaj chaw uas muaj cov neeg tsis nyiam lawv?

¹² Yexus qhia rau nws cov thwj tim kom nco ntsoov tso siab rau Yehauvas ua tus pab lawv. Nws kuj qhia ntau zaus rau lawv tias Yehauvas yuav pab lawv thaum lawv raug tsim txom. (Mathais 10:18-20; Lukas 12:11, 12) Nws txhawb kom lawv ua zoo xyuam xim. (Mathais 10:16; Lukas 10:3) Nws qhia rau lawv kom tsis txhob yuam txoj xov zoo rau cov uas tsis xav mloog. (Lukas 10:10, 11) Tsis tas li ntawd, nws qhia rau lawv kom khiav mus rau lwm qhov yog luag tsim txom lawv. (Mathais 10:23) Txawm Yexus tso siab rau Yehauvas thiab muab siab rau ntso qhia txoj xov zoo los nws tsis ua tej yam uas phom sij rau nws tus kheej.​—Yauhas 11:53, 54.

13. Ua cas koj ho paub tseeb tias Yehauvas yuav pab koj?

¹³ Niaj hnub nim no yuav kom peb kub siab mus tshaj tawm txoj xov zoo, peb yuav tsum muaj Yehauvas pab. (Tshwmsim 12:17) Vim li cas peb ho paub tseeb tias Yehauvas yuav pab peb? Nyob hauv Yauhas tshooj 17 sau tseg tias Yexus thov kom Yehauvas pab cov tub txib ces Yehauvas kuj ua li ntawd. Nyob rau hauv Tes Hauj Lwm sau tseg tias Yehauvas pab cov tub txib mus tshaj tawm txoj xov zoo tab txawm lawv raug tsim txom. Nyob rau hauv Yexus cov lus thov, nws hais kom Yehauvas saib xyuas cov uas ntseeg tej cov tub txib qhia. Koj kuj yog ib tug ntawd thiab. Yehauvas haj tseem niaj hnub teb Yexus cov lus thov. Nws yeej yuav pab koj ib yam li nws tau pab cov tub txib thaum ub.​—Yauhas 17:11, 15, 20.

14. Ua li cas peb ho paub tias peb yuav muaj siab kub lug mus tshaj tawm mus li? (Saib daim duab.)

¹⁴ Thaum lub sim ceeb no kawg zuj zus, tej zaum yuav tsis yooj yim rau peb tshaj tawm txoj xov zoo tiam sis Yexus txhawb peb tias peb yuav tau kev pab. (Lukas 21:12-15) Zoo ib yam li Yexus thiab nws cov thwj tim, peb cia tib neeg txiav txim siab seb lawv yuav xav mloog los sis tsis xav mloog tej peb qhia thiab peb tsis xav nrog lawv cam yeej cam swb. Txawm nyob rau tej lub teb chaws uas nom tswv txwv Yehauvas tes hauj lwm los peb cov kwv tij nkauj muam haj tseem qhia tau txoj xov zoo rau tib neeg vim lawv tso siab rau Yehauvas. Yehauvas yeej yuav pub dag pub zog rau peb “mus qhia Vajtswv Txojlus” kom tiav tiav ib yam li nws cov tib neeg nyob thawj 100 xyoo. (2 Timautes 4:17) Cia li tso siab plhuav rau Yehauvas, nws yeej yuav pab koj muaj siab kub lug mus tshaj tawm txoj xov zoo.

NWS TSO SIAB TIAS YUAV MUAJ IB TUG TWG MLOOG NWS HAIS

15. Ua cas peb paub tias Yexus ho tso siab tias tib neeg yuav mloog?

¹⁵ Yexus tso siab hlo tias yeej yuav muaj tib neeg mloog txoj xov zoo. Qhov no pab tau kom nws muaj siab kub lug mus tshaj tawm txoj xov zoo tas zaj tas zog. Xws li ib xyoos tom qab Yexus pib mus tshaj tawm txoj xov zoo, nws pom tias tib neeg kuj mloog nws qhia coob zuj zus. Nws thiaj muab qhov no piv rau ib daim teb uas siav daj rhuv zoo sau lawm. (Yauhas 4:35) Ib xyoos ntxiv tom qab ntawd, nws hais rau nws cov thwj tim tias: “Tej qoob twb siav zoo hlais lawm.” (Mathais 9:37, 38) Tom qab ntawd ntxiv nws rov hais tias: “Tej qoob twb siav zoo hlais lawm . . . Cia li thov tus Tswv teb txib neeg mus sau nws tej qoob loo.” (Lukas 10:2) Yexus tso siab plhuav tias yuav muaj ib txhia tib neeg mloog txoj xov zoo. Thaum nws pom lawv mloog, ua rau nws zoo siab heev.​—Lukas 10:21.

16. Yexus ob zaj lus piv txwv pab tau kom peb tso siab tias yeej yuav muaj tib neeg mloog txoj xov zoo li cas? (Lukas 13:18-21) (Saib daim duab.)

¹⁶ Yexus pab kom nws cov thwj tim tso siab tias yeej yuav muaj tib neeg mloog txoj xov zoo. Nws txhawb lawv li no xwv lawv thiaj kub siab mus tshaj tawm tsis tseg tsis tu. Xws li Yexus ob zaj lus piv txwv. (Nyeem Lukas 13:18-21.) Muaj ib zaj Yexus siv ib lub noob me me uas txawj loj zuj zus los ua ib tsob ntoo. Nws muab qhov ntawd los piv rau txoj xov txog Vajtswv txoj kev kav tias muaj coob leej ntau tus yuav mloog txoj xov ntawd thiab yuav tsis muaj ib yam dab tsi yuav tav los sis txwv tau. Ntxiv ntawd, Yexus kuj siv dua ib qho lus piv txwv tias cov keeb zoo ib yam li txoj xov txog Vajtswv txoj kev kav. Txoj xov ntawd yuav nrov mus rau txhua qhov rau tib neeg hnov thiab yuav ua rau tib neeg hloov lawv lub neej tiam sis yuav maj mam hloov. Yexus pab kom nws cov thwj tim pom tias tej uas lawv qhia yeej pab tau coob leej tib neeg.

17. Vim li cas peb ho tso siab tias tib neeg yuav mloog txoj xov zoo?

¹⁷ Thaum peb xav txog txoj xov zoo uas peb qhia pab tau tib neeg thoob plaws ntiaj teb npaum li cas mas ua rau peb tuaj zog heev thiab ua rau peb yim huab kub siab tshaj tawm. Txhua txhua xyoo muaj tsheej plhom leej tuaj ua kev cai nco txog Yexus thiab kawm Vajlugkub nrog peb. Qas txhiab leej kuj ua kev cai raus dej thiab nrog peb mus tshaj tawm txoj xov zoo. Peb tsis paub hais tias tseem tshuav pes tsawg leej yuav los ntseeg ntxiv tiam sis peb paub hais tias Yehauvas tab tom sau ib co neeg coob coob suav tsis txheeb uas yuav dim txoj kev txom nyem loj kawg nkaus. (Tshwmsim 7:9, 14) Yehauvas uas yog tus Tswv teb tso siab tias tib neeg yuav los ntseeg coob heev, yog li ntawd peb yuav tau qhia kam tiag.

18. Peb xav kom tib neeg pom peb li cas?

¹⁸ Tib neeg ib txwm paub hais tias Yexus cov thwj tim mas kub siab tshaj tawm txoj xov zoo heev. Thaum tib neeg pom tias ib nkawg tub txib muaj siab tawv tshaj tawm mas “lawv mam nco dheev tias nkawd twb nrog Yexus ua ke ntag.” (Tes Hauj Lwm 4:13) Peb los yeej xav kom tib neeg pom tias peb kub siab lug tshaj tawm txoj xov zoo ib yam li Yexus.