Yehauvas Txhais Tes Tsis Luv

1. Thaum Mauxes coj cov Ixayees tawm hauv Iyiv, nws tso siab li cas rau Yehauvas?

PHAU Henplais hais txog cov uas muaj kev ntseeg rau Yehauvas. Ib tug ntawd yog Mauxes. (Henplais 3:2-5; 11:23-25) Nws muaj kev ntseeg heev thaum nws coj cov Ixayees tawm hauv teb chaws Iyiv mus. Nws tsis ntshai Falaus thiab Falaus tej tub rog li. Nws tso siab rau Yehauvas, nws thiaj li coj cov tib neeg hla tus Dej Liab thiab tom qab no nws kuj coj lawv hla roob moj sab qhua. (Henplais 11:27-29) Txawm ntev mus ntev tuaj cov Ixayees feem coob tsis tso siab rau Yehauvas ua tus saib xyuas lawv los Mauxes yeej tso siab rau Yehauvas tas zaj tas zog. Ces Yehauvas txawm ua txuj ci pub zaub pub mov thiab dej rau lawv haus kom cawm tau lawv txoj sia ntawm roob moj sab qhua.a​—Khiav Dim 15:22-25; Phau Ntawv Nkauj 78:23-25.

2. Vim li cas Yehauvas ho nug Mauxes tias: “[Yehauvas] txhais tes luv dhau lawm lov”? (Teev Npe 11:21-23)

² Txawm Mauxes muaj kev ntseeg heev rau Yehauvas los ib xyoos tom qab thaum Yehauvas cawm cov Ixayees tawm tim Iyiv, Mauxes txawm pib xav tias ua li Yehauvas puas muab tau nqaij rau cov Ixayees noj. Mauxes ras tsis txog tias Yehauvas yuav muab tau nqaij los mus pub rau cov Ixayees coob tag npaum ntawd noj ntawm roob moj sab qhua. Yehauvas thiaj li nug Mauxes tias: “[Yehauvas] txhais tes luv dhau lawm lov?” (Nyeem Teev Npe 11:21-23.)b Thaum hais txog ‘Yehauvas txhais tes’ yog hais txog Yehauvas lub hwj huam dawb huv los sis thaum nws tab tom siv nws lub zog ua hauj lwm. Thaum Yehauvas nug Mauxes li no twb yog nws nug tias, ‘Koj xav tias kuv ua tsis tau li kuv hais no lov?’

3. Vim li cas ho tseem ceeb rau peb kawm txog tej yam uas Mauxes thiab cov Ixayees tau ua?

³ Puas muaj ib zaug koj txhawj nyob tsam Yehauvas ho pab tsis tau koj los sis koj tsev neeg thaum tsis muaj txaus noj txaus haus txaus siv? Txawm koj yuav txhawj thiab tsis txhawj los peb yuav mus kawm txog Mauxes thiab cov Ixayees uas tsis tso siab tias Yehauvas yuav saib xyuas tau lawv. Peb yuav mus nyeem ib co nqe Vajlugkub los pab kom peb tso siab tias Yehauvas yeej pab tau peb.

KAWM LOS NTAWM MAUXES THIAB COV IXAYEES

4. Vim li cas muaj coob leej Ixayees ho xav tias Yehauvas pub tsis tau rau lawv noj?

⁴ Cov Ixayees thiab “lwm haivneeg” uas nrog lawv mus mus los los ntawm roob moj sab qhua tau ib ntus ntev loo ua ntej lawv mus txog rau lub teb chaws uas Vajtswv cog tseg. (Khiav Dim 12:38; 2 Kevcai 8:15) Lwm haiv neeg txawm pib yws daws dom tias lawv tsis xav noj manas ces coob leej Ixayees txawm koom tes nrog lawv yws thiab. (Teev Npe 11:4-6) Cov tib neeg no txawm pib tshua txog tej zaub mov uas lawv ib txwm tau noj hauv Iyiv. Vim cov tib neeg no yws Mauxes dhau, Mauxes thiaj li xav tias nws yuav tau nrhiav nqaij rau lawv noj.​—Teev Npe 11:13, 14.

5-6. Peb khaws tau li cas los ntawm qhov uas lwm haiv neeg txw tau cov Ixayees?

⁵ Lwm haiv neeg tsis ris txiaj ntsig rau tej yam uas Yehauvas muab rau lawv ces qhov ntawd kuj ua puas tsuas rau cov Ixayees kom xav ib yam li lawv xav thiab. Tej yam zoo li no kuj yuav raug rau peb ib yam nkaus. Thaum muaj tej tug tsis ris Yehauvas txiaj ntsig, yog peb tsis ceev faj ces peb yuav xav tib yam li lawv xav. Tej zaud peb yuav nco txog tej yam uas peb muaj yav thaum ub los sis khib lwm tus uas muaj ub muaj no. Nco ntsoov tias peb yuav muaj kev zoo siab dua yog peb txaus siab rau tej yam uas peb muaj tam sim no.

⁶ Cov Ixayees tsis nco qab tej yam uas Yehauvas tau cog lus rau lawv. Nws cog lus tias nws yuav muaj ntau yam zoo rau lawv thaum lawv mus txog hauv lub teb chaws uas nws cog tseg rau lawv. Nws tsis tau kam muab dab tsi rau lawv thaum lawv tseem tab tom txog tog kev. Zoo ib yam li ntawd, peb yuav tau tsis txhob xav tias ua cas peb tsis muaj ub muaj no tiam sis peb yuav tau xav ntsoov txog tej yam zoo uas Yehauvas cog lus yuav muab rau peb hauv lub ntiaj teb tshiab. Cia peb xav ntsoov txog cov nqe Vajlugkub uas yuav pab peb tso siab rau Yehauvas.

7. Vim li cas peb ho tso siab plhuav tias Yehauvas txhais tes tsis luv?

⁷ Txawm li ntawd los tej zaum koj yuav xav vim li cas Yehauvas ho nug Mauxes tias: “[Yehauvas] txhais tes luv dhau lawm lov?” Thaum Yehauvas nug Mauxes li ntawd, nws kom Mauxes xav txog ob yam no: (1) Yehauvas lub hwj chim yeej tsis txawj tas, thiab (2) nws siv tau nws lub hwj chim rau txhua txhia qhov chaw. Txawm cov Ixayees nyob rau ntawm roob moj sab qhua xwb los Yehauvas yeej muab tau nqaij rau lawv noj. Hos thaum nws lub “hwjchim [los sis thaum nws tsa hlo nws txhais npab]” kuj qhia tias txawm nws cov tib neeg nyob qhov twg los nws yeej pab tau lawv. (Phau Ntawv Nkauj 136:11, 12) Yog li ntawd thaum peb tab tom raug ib yam kev sim siab twg, peb tsis txhob ua xyem xyav tias xyov Yehauvas puas yuav pab peb.​—Phau Ntawv Nkauj 138:6, 7.

8. Ua li cas peb thiaj li tsis ua ib yam li coob leej ntawm roob moj sab qhua ua? (Saib daim duab.)

⁸ Tsis ntev ntawd Yehauvas txawm tso cua ntsawj noog ncuab ya ua npoj ntws los coob heev. Tiam sis cov Ixayees tsis ris Yehauvas txiaj ntsig rau qhov txuj ci ntawd. Lawv txawm mus sib huas khaws nquab ib hnub ib hmos tsis so li vim lawv yog neeg siab hlob. Yehauvas chim heev rau cov neeg siab hlob uas “nqhis nqaij” ces nws thiaj li rau txim rau lawv. (Teev Npe 11:31-34) Lawv tus yam ntxwv no qhia tau rau peb kom ceev faj tsis txhob ua neeg siab hlob. Txawm peb muaj thiab pluag los peb yuav tau nco ntsoov “khaws yam uas muaj nqis rau saum ntuj ceeb tsheej” uas yog nrog Yehauvas thiab Yexus nkawd sib raug zoo. (Mathais 6:19, 20; Lukas 16:9) Yog peb ua li no ces peb yuav tso siab tias Yehauvas yuav muab txhua yam tshab ntxiv rau peb.

9. Peb tso siab tau tag nrho li cas?

⁹ Niaj hnub nim no Yehauvas yeej cev tes los pab nws cov tib neeg. Qhov no tsis yog txhais hais tias peb yuav muaj nyiaj muaj txiaj los sis zaub mov noj.c Tiam sis Yehauvas yeej tsis muab peb tso pov tseg ib zaug li. Nws yeej yuav pab peb thaum muaj ib yam dab tsi twg los raug peb. Peb yuav mus tham txog ob yam uas yuav pab kom peb tso siab rau Yehauvas ua tus pab peb: (1) thaum peb tsis muaj nyiaj muaj txiaj siv, thiab (2) npaj seb yuav ua li cas rau yav laus.

THAUM PEB TSIS MUAJ NYIAJ MUAJ TXIAJ SIV

10. Tej zaud peb yuav muaj teeb meem li cas txog nyiaj txiag?

¹⁰ Thaum lub sim ceeb no yuav kawg zuj zus, tej kam noj kev haus yeej yuav tsis zoo zuj zus. Xws li thaum tej nom tswv pheej hloov mus mus los los, muaj tsov rog, muaj tej xwm txheej los sis muaj kab mob kis, tej zaud kuj yuav ua rau peb tiv nuj tiv nqi ntau heev, poob hauj lwm, poob tej yam peb muaj los sis poob tsev. Tej zaud peb yuav tau nrhiav dua ib txoj hauj lwm los sis tsiv mus rau ib qho chaw tshiab xwv peb thiaj nrhiav tau hauj lwm los koob ncauj. Muaj dab tsi pab tau kom peb txawj txiav txim siab thiab qhia tias peb tso siab rau Yehauvas?

11. Muaj dab tsi pab tau koj yog koj muaj teeb meem txog nyiaj txiag? (Lukas 12:29-31)

¹¹ Qhov tseem ceeb tshaj yog thov Yehauvas txog koj tej kev txhawj xeeb. (Pajlug 16:3) Thov kom nws tsav tswv yim rau koj xwv koj thiaj paub txiav txim siab tau qhov zoo thiab pab kom koj muaj lub siab tus es “tsis txhob txhawj dhau.” (Nyeem Lukas 12:29-31.) Nco ntsoov thov nws tas zaj tas zog kom pab koj txaus siab rau tej yam uas koj muaj hauv koj lub neej. (1 Timautes 6:7, 8) Tshawb nrhiav tej ntaub ntawv uas Yehauvas lub koom haum luam tawm seb yuav siv nyiaj txiag li cas thiaj tsis muaj teeb meem. Muaj coob leej ntau tus hais tias tej ntaub ntawv thiab yeeb yaj kiab hauv lub vej xaij jw.org pab tau lawv kho lawv tej teeb meem txog nyiaj txiag.

12. Cov lus nug twg yuav pab tau ib tug Khixatias txawj txiav txim siab rau nws tsev neeg?

¹² Muaj ib txhia mus ua hauj lwm nyob rau kev deb kom thiaj pab tau lawv tsev neeg tiam sis tom qab no lawv mam xam pom tias ua li ntawd tsis zoo. Ua ntej koj yuav txais ib txoj hauj lwm tshiab, tsis txhob xav hais tias yuav tau nyiaj npaum ub npaum no tiam sis yuav tau xav seb koj thiab koj tsev neeg txoj kev sib raug zoo nrog Yehauvas yuav zoo li cas. (Lukas 14:28) Rov tshuaj koj tus kheej li no: ‘Yog kuv mus kev deb lawm, yuav muaj li cas rau wb txoj kev txij nkawm? Kuv puas tseem mus tau tej kev sib txoos, mus tshaj tawm txoj xov zoo, thiab muaj sij hawm nrog cov kwv tij nkauj muam ua ke?’ Yog koj muaj me nyuam mas tseem ceeb rau koj zaum tsaws xav li no: ‘Yog kuv twb tsis nrog lawv nyob, kuv yuav cob qhia kuv cov me nyuam kom coj “raws li Vajtswv Txojlus” tau li cas?’ (Efexus 6:4) Thaum koj yuav txiav txim siab mus kev deb, koj yuav tau xav ib yam li Vajtswv xav, tsis yog raws tej nruab ze los sis phooj ywg uas tsis coj raws li phau Vajlugkub tej hauv paus ntsiab lus.d Thoonis (Tony) uas nyob rau Axias sab hnub poob kuj tau ob peb txoj hauj lwm uas lawv yuav txais nws mus ua nyob rau kev deb. Tom qab nws thov Yehauvas thiab nrog nws tus poj niam tham tas, nws txiav txim siab tsis kam mus ua cov hauj lwm ntawd. Tiam sis nws kuj hloov qho yam kom lawv cov nuj nqis thiaj tsis ntau ua luaj twg. Niaj hnub nim no Thoonis hais tias: “Kuv tau qhov txiaj ntsig uas pab lwm tus los mus paub Yehauvas, thiab wb cov me nyuam los kuj muab siab teev tiam Yehauvas. Peb tsev neeg xam pom tau tias yog peb coj raws li Mathais 6:33 ces Yehauvas yeej yuav saib xyuas peb.”

NPAJ SEB YUAV UA LI CAS RAU YAV LAUS

13. Peb ua tau dab tsi tam sim no los npaj rau thaum laus?

¹³ Peb yuav tau tso siab rau Yehauvas thaum peb npaj rau hnub peb laus. Nyob hauv phau Vajlugkub kuj txhawb kom peb nquag ua hauj lwm xwv peb thiaj muaj nyiaj txiag siv rau thaum laus. (Pajlug 6:6-11) Yog peb khaws tau, zoo rau peb khaws me ntsis nyiaj rau yav tom ntej. Nyiaj txiag kuj tsom kwm tau peb thaum peb xav tau kev pab. (Tej Lus Qhia 7:12) Tiam sis tsis txhob muab nyiaj ua yam uas loj tshaj hauv peb lub neej.

14. Nyob hauv Henplais 13:5 pab kom peb tsis txhob txhawj rau yav laus li cas?

¹⁴ Yexus qhia txog ib tug txiv neej uas tsis muaj tswv yim vim nws pheej khaws nyiaj cia tiam sis tsis ua li Vajtswv lub siab nyiam ces “Vajtswv tsis suav tias nws nplua nuj.” (Lukas 12:16-21) Tsis muaj leej twg paub hais tias tag kis nws txoj sia yuav zoo li cas. (Pajlug 23:4, 5; Yakaunpaus 4:13-15) Yexus hais tias txhua tus uas xav ua Yexus cov thwj tim yuav tau yeem hlo “tso nws tej qhov txhia chaw tseg.” (Lukas 14:33) Cov Khixatias uas nyob rau thawj 100 xyoo hauv Yudias yeej txaus siab tso txhua yam tseg. (Henplais 10:34) Niaj hnub nim no peb cov kwv tij nkauj muam coob leej yeem tso lawv tej qhov txhia chaw tseg vim lawv tsis kam koom tes nrog ib roog nom tswv twg. (Tshwmsim 13:16, 17) Qhov uas pab tau lawv ua li ntawd yog lawv tso siab plhuav rau Yehauvas lo lus cog tseg tias: “Kuv yuav tsis tso koj tseg lossis kuv yuav tsis muab koj povtseg ib zaug li.” (Nyeem Henplais 13:5.) Txawm peb npaj rau yav laus los yog muaj tej yam ho los raug peb nthawv nthav los cia peb tso siab plhuav tias Yehauvas yuav pab peb.

15. Cov Khixatias yuav tau saib lawv cov me nyuam zoo li cas? (Saib daim duab.)

¹⁵ Ib txhia tib neeg xav hais tias tu tub tu kiv los npaj rau yav laus. Tiam sis nyob hauv phau Vajlugkub hais tias niam txiv yuav tau saib xyuas lawv tej me nyuam. (2 Kauleethaus 12:14) Muaj tseeb tiag niam txiv yeej yuav txawj laus zuj zus thiab yuav vam khom lawv cov me nyuam pab tu thiab cov me nyuam los yeej tuaj yeem hlo pab. (1 Timautes 5:4) Tiam sis cov niam txiv uas tso siab rau Yehauvas yeej paub tias qhov uas lawv pab tau lawv cov me nyuam teev tiam Yehauvas yuav ua rau lawv zoo siab dua li qhov uas npaj kom lawv cov me nyuam tu lawv rau yav laus.​—3 Yauhas 4.

16. Cov niam txiv yuav pab kom cov me nyuam txawj saib xyuas lawv tus kheej li cas? (Efexus 4:28)

¹⁶ Thaum koj pab koj tej me nyuam kom txawj saib xyuas lawv tus kheej, koj yuav tau xub ua qhia tias koj tso siab rau Yehauvas. Thaum lawv tseem yau, qhia kom lawv nquag ua hauj lwm. (Pajlug 29:21; nyeem Efexus 4:28.) Thaum lawv hlob zuj zus tuaj, pab kom lawv rau siab kawm ntawv. Cov niam txiv yuav tau tshawb nrhiav phau Vajlugkub tej hauv paus ntsiab lus thiab pab kom lawv cov me nyuam txawj txiav txim siab txog kawm ntawv qeb siab. Cov niam txiv ua li no twb yog lawv pab kom lawv cov me nyuam txawj khwv los koob lawv tus kheej thiab muaj sij hawm mus tshaj tawm txoj xov zoo.

17. Peb tso siab plhuav tau li cas?

¹⁷ Cov uas npuab siab rau Yehauvas tso siab tias Yehauvas yeej yuav saib xyuas lawv. Thaum lub sim ceeb no kawg zuj zus, peb yim huab yuav tau tso siab rau Yehauvas. Txawm yuav zoo li cas los cia peb tso siab plhuav rau Yehauvas tias nws yuav siv nws lub hwj chim los pab kom peb muaj txawm peem. Nco ntsoov tias Yehauvas muaj hwj chim pab tau peb, tsis hais peb yuav nyob qhov twg los xij.