“Nej Cia Li Txiav Txim Siab Saib Nej Yuav Pehawm Tus Twg”

1. Yuav ua li cas peb thiaj tau txoj tseem kev zoo siab, thiab yog vim li cas? (Yaxayas 48:17, 18)

PEB Leej Txiv Yehauvas hlub peb kawg nkaus li thiab nws xav kom peb ua neej sov siab so tam sim no thiab mus ib txhis yav tom ntej. (Tej Lus Qhia 3:12, 13) Nws yeej tsim peb kom txawj ua ub ua no tiam sis nws tsis tau tsim kom peb txawj kav peb tus kheej los sis ua tus txiav txim siab seb qhov twg yog thiab tsis yog. (Tej Lus Qhia 8:9; Yelemis 10:23) Nws paub tias yuav kom peb tau txoj tseem kev zoo siab tiag, peb yuav tau teev tiam nws thiab coj raws li nws tej kev cai.​—Nyeem Yaxayas 48:17, 18.

2. Xatas xav kom peb ntseeg li cas, thiab Yehauvas tau ua dab tsi?

² Xatas xav kom peb ntseeg tias tsis muaj Yehauvas hauv peb lub neej los peb yeej muaj kev zoo siab, thiab tib neeg yeej kav tau tib neeg kawg li. (Chivkeeb 3:4, 5) Yuav kom qhia tau tias Xatas dag xwb, Yehauvas thiaj cia tib neeg kav tib neeg ib ntus seb zoo li cas. Peb yeej pom ntsoov hais tias tib neeg yeej kav tsis tau tib neeg. Nyob hauv phau Vajlugkub qhia tias muaj coob leej ntau tus txiv neej thiab poj niam uas teev tiam Yehauvas yeej muaj kev kaj siab. Ib tug uas hais ntawm no yog Yexus Khetos. Nyob rau hauv zaj kawm no peb yuav kawm seb vim li cas Yexus ho xaiv qhov uas teev tiam Yehauvas. Tom qab ntawd peb yuav tham ntxiv seb vim li cas peb Leej Txiv Yehauvas ho tsim nyog tau peb txoj kev teev tiam. Ntxiv ntawd, peb yuav saib seb vim li cas peb ho xaiv teev tiam Yehauvas.

VIM LI CAS YEXUS HO XAIV QHOV UAS TEEV TIAM YEHAUVAS?

3. Xatas muab dab tsi los rau Yexus, thiab Yexus ho ua li cas?

³ Thaum Yexus tseem nyob hauv ntiaj teb, nws yeej yuav tau txiav txim seb nws yuav pe hawm leej twg. Tsis ntev tom qab Yexus ua kev cai raus dej, Xatas hais tias yog Yexus pe nws ib pes ces nws yuav muab tag nrho tej teb chaws hauv ntiaj teb rau Yexus. Yexus teb li no tias: “Xatas, khiav mus! Vajtswv Txoj Lus twb hais tias, ‘Koj yuav tsum pe hawm Yehauvas uas yog koj tus Vajtswv thiab teev tiam nws tib leeg xwb.’” (Mathais 4:8-10) Vim li cas Yexus ho txiav txim siab li no? Cia peb mam mus tham txog tej yam uas nws xav.

4-5. Vim li cas Yexus ho xaiv qhov uas teev tiam Yehauvas?

⁴ Qhov tseem ceeb uas Yexus xaiv qhov uas teev tiam Yehauvas yog vim nws hlub Yehauvas thiab nws tsis cia ib yam dab tsi los mus rhuav tau. (Yauhas 14:31) Ntxiv ntawd, Yexus pe hawm Yehauvas vim yog yam uas tsim nyog rau nws ua. (Yauhas 8:28, 29; Tshwmsim 4:11) Yexus paub hais tias Yehauvas yog tus uas rhawv txoj sia, peb tso siab tau rau Nws, thiab Nws muab txhua yam zoo rau peb. (Phau Ntawv Nkauj 33:4; 36:9; Yakaunpaus 1:17) Yehauvas ib txwm qhia qhov tseeb rau Yexus thiab muab txhua yam uas Yexus muaj rau Yexus. (Yauhas 1:14) Hos Xatas tsuas yog tsub kev ploj kev tuag rau sawv daws. Xatas nyiam dag vim nws xav txog nws tus kheej thiab tau ntau los yim xav kom tau ntau. (Yauhas 8:44) Yexus twb paub txog tej no nws thiaj li tsis caum Xatas qab sawv tawm tsam Yehauvas.​—Filipis 2:5-8.

⁵ Muaj dua ib txoj kev uas Yexus teev tiam Yehauvas yog nws tos rawv tej yam zoo uas yuav muaj tshwm vim nws mloog Yehauvas lus. (Henplais 12:2) Nws paub ntsoov tias yog nws tuav rawv nws txoj kev ntseeg, nws yuav daws tau Yehauvas lub npe kom dawb huv thiab yuav rhuav tshem tau txoj kev txhaum thiab kev tuag mus ib txhis.

VIM LI CAS YEHAUVAS HO TSIM NYOG TAU PEB TXOJ KEV TEEV TIAM?

6-7. Vim li cas niaj hnub nim no coob leej ntau tus tsis kam teev tiam Yehauvas, tiam sis vim li cas tsim nyog peb txhua tus pe hawm nws?

⁶ Niaj hnub nim no muaj coob leej ntau tus tsis teev tiam Yehauvas vim lawv tsis paub Yehauvas zoo li cas tiag thiab lawv tsis paub tej uas nws tau ua pub rau lawv. Lawv kuj zoo ib yam li cov tib neeg uas tus tub txib Povlauj qhia rau hauv Athees.​—Tes Hauj Lwm 17:19, 20, 30, 34.

⁷ Povlauj piav qhia rau cov tib neeg uas mloog ntawd tias tus tseem Vajtswv “yog tus rau siav rau pa rau txhua leej txhua tus thiab ib puas tsav yam.” Povlauj hais ntxiv tias: “Twb yog muaj Vajtswv peb thiaj txawj mus txawj los, muaj txoj sia nyob li no.” Vajtswv yog tus tsim ib puas tsav yam thiab nws yog tus “tsim txhua haiv neeg hauv qab ntuj no tawm hauv ib tug txiv neej los xwb” ces tsim nyog peb txhua tus pe hawm nws.​—Tes Hauj Lwm 17:25, 26, 28.

8. Piav seb Yehauvas yeej yuav tsis ua dab tsi.

⁸ Vim Yehauvas yog tus tsim ib puas tsav yam, yog nws xav yuam tib neeg pe hawm nws los nws yeej yuam tau. Tiam sis Yehauvas tsis kam yuam ib tug twg. Nws yeej tsim tau ub tau no los qhia tias yeej muaj nws tiag tiag thiab nws hlub peb ib tug dhau ib tug kawg nkaus li. Nws xav kom tib neeg coob li coob tau los nrog nws sib raug zoo mus ib txhis. (1 Timautes 2:3, 4) Nws thiaj li cob qhia peb kom mus qhia lwm tus txog nws lub ntsiab thiab qhia lawv txog tej yam zoo uas nws yuav ua rau noob neej. (Mathais 10:11-13; 28:19, 20) Nws muab peb faib ua tej pawg tej pawg koom txoos thiab pub kom muaj cov txwj laus los saib xyuas peb sawv daws.​—Tes Hauj Lwm 20:28.

9. Yehauvas qhia nws txoj kev hlub li cas rau txhua leej txhua tus?

⁹ Yehauvas qhia nws txoj kev hlub thaum nws muab tej yam zoo zoo pub rau cov uas tsis ntseeg hais tias muaj nws. Tau txhiab txhiab xyoo, tib neeg ua tus txiav txim rau lawv tus kheej seb qhov twg yog thiab tsis yog. Txawm li ntawd los Yehauvas haj tseem ua siab ntev muab tej yam uas yuav cawm tau lawv txoj sia nyob thiab txaus siab ua neej. (Mathais 5:44, 45; Tes Hauj Lwm 14:16, 17) Vim muaj Yehauvas, lawv thiaj muaj phooj ywg thiab tsev neeg los hlub lawv, lawv muaj taus tub ki, hauj lwm, thiab ua neej sov siab so. (Phau Ntawv Nkauj 127:3; Tej Lus Qhia 2:24) Tag nrho tej hais no puav leej qhia tseeb tseeb tias peb Leej Txiv Yehauvas hlub noob neej heev. (Khiav Dim 34:6) Txuas ntxiv no cia peb mus tham txog ob peb yam seb vim li cas peb ho xaiv qhov uas teev tiam Yehauvas thiab seb nws foom koob hmoov li cas rau peb.

VIM LI CAS PEB HO XAIV QHOV UAS TEEV TIAM YEHAUVAS?

10. (1) Qhov uas peb teev tiam Yehauvas yog vim li cas tiag? (Mathais 22:37) (2) Yehauvas ua siab ntev ho pab tau koj li cas? (Phau Ntawv Nkauj 103:13, 14)

¹⁰ Zoo ib yam li Yexus, qhov uas peb teev tiam Yehauvas yog vim peb hlub nws. (Nyeem Mathais 22:37.) Thaum peb kawm txog nws yuav rub tau peb los cuag nws. Xws li Yehauvas muaj lub siab ntev rau peb. Thaum cov Ixayees tsis mloog Yehauvas lus, Yehauvas hais li no rau lawv: “Cia li tso [nej] tej kev txhaum tseg.” (Yelemis 18:11) Yehauvas yeej nco ntsoov tias peb yog noob txaug neeg txhaum thiab nws muab av puab peb. (Nyeem Phau Ntawv Nkauj 103:13, 14.) Thaum koj xav txog Yehauvas txoj kev siab ntev, puas ua rau koj xav teev tiam nws mus ib txhis?

11. Tej twg pab tau peb xaiv qhov uas teev tiam Yehauvas?

¹¹ Peb kuj teev tiam Yehauvas vim yeej tsim nyog rau peb ua li ntawd. (Mathais 4:10) Peb paub tias yog peb npuab siab nraim rau Yehauvas ces thaum kawg yeej yuav muaj tej zoo tshwm sim. Xws li qhov uas peb teev tiam Yehauvas ruaj nreeg yuav ua kom Yehauvas lub npe dawb huv, ua rau nws zoo siab, thiab qhia tias Dab Ntxwg Nyoog yog ib tug dag. Yog peb xaiv los teev tiam Yehauvas tam sim no ces peb yuav muaj rab peev xwm teev tiam nws mus ib txhis!​—Yauhas 17:3.

12-13. Zaj uas hais txog Ntshiab thiab Paj qhia tau li cas rau peb?

¹² Txawm peb yog me nyuam yaus los peb yeej kawm tau kom hlub Yehauvas thiab txoj kev hlub ntawd yeej yuav sawv nraim hauv peb nruab siab thaum peb loj tuaj. Muaj ob tug viv ncaus uas yog niam txiv ib plab yug hu ua Ntshiab thiab Paj.a Ntshiab muaj 11 xyoos hos Paj muaj 10 xyoo thaum nkawd pib kawm Vajlugkub. Nkawd niam thiab nkawd txiv tsis kam kawm Vajlugkub tiam sis ob tug kuj pub nkawd ob tug me ntxhais nrog Yehauvas Cov Tim Khawv kawm Vajlugkub, tsuav nkawd ob tug ntxhais tseem nrog nkawd mus tsev teev ntuj. Ntshiab hais tias: “Tej uas Yehauvas Cov Tim Khawv qhia kuv hauv phau Vajlugkub pab tau kom kuv tsis txhob mus quav yeeb quav tshuaj thiab ua kev nkauj kev nraug thaum raug luag yuam.”

¹³ Thaum nkawd tiav me nyuam ntxhais hluas nkauj, nkawd kuj yog ob tug tshaj tawm. Tau ib ntus tom qab ntawd, nkawd kuj ua ob tug tho kev thiab tu nkawd niam nkawd txiv. Thaum Ntshiab xav txog nkawd lub neej, Ntshiab hais tias: “Kuv kawm tau tias Yehauvas yeej saib xyuas nws cov phooj ywg tsis tseg thiab zoo li 2 Timautes 2:19 hais tias, ‘Vajtswv yeej paub txhua tus uas yog Vajtswv menyuam.’” Yehauvas yeej ib txwm saib xyuas cov uas xaiv qhov hlub thiab teev tiam nws!

14. Peb yuav tiv thaiv Yehauvas lub npe li cas los ntawm tej peb hais thiab ua? (Saib cov duab.)

¹⁴ Peb xav kom lwm tus paub qhov tseeb txog Yehauvas. Muab ua piv txwv tias koj muaj ib tug phooj ywg siab dawb siab zoo, nyiam pub rau luag, thiab zam txim rau lwm tus. Muaj ib hnub koj txawm hnov ib tug hais tias koj tus phooj ywg yog ib tug phem thiab coj tsis ncaj. Koj yuav ua li cas xwb? Koj yuav tau daws koj tus phooj ywg zaj. Zoo ib yam li ntawd Xatas thiab cov uas nws txw xav rhuav Yehauvas lub koob lub npe, lawv thiaj pib dag txog Yehauvas. Peb thiaj li kub siab lug mus tshaj tawm qhov tseeb txog Yehauvas. (Phau Ntawv Nkauj 34:1; Yaxayas 43:10) Tej uas peb ua thiab tej uas peb hais yuav qhia tias peb hlub Yehauvas kawg siab kawg ntsws thiab xav teev tiam nws tib leeg.

15. Vim Povlauj hloov tej yam hauv nws lub neej, nws tau tej yam zoo twg? (Filipis 3:7, 8)

¹⁵ Peb yeej txaus siab hlo hloov tej yam hauv peb lub neej xwv peb thiaj ua tau haum Yehauvas siab thiab ua tau ntau yam pub rau nws. Xws li tus tub txib Povlauj yeem tso nws tes hauj lwm uas muaj koob nto npe los ua Khetos ib tug thwj tim thiab teev tiam Yehauvas. (Kalatias 1:14) Qhov uas Povlauj ua li no nws kuj tau ib lub neej zoo thiab tau nrog Khetos kav saum ntuj ceeb tsheej. Yog Povlauj twb tsis khuv xim nws lub neej uas teev tiam Yehauvas ces peb los yuav tsis khuv xim thiab.​—Nyeem Filipis 3:7, 8.

16. Peb khaws tau li cas los ntawm Dawb tus yam ntxwv? (Saib cov duab.)

¹⁶ Yog peb muab qhov uas teev tiam Yehauvas ua yam tseem ceeb tshaj hauv peb lub neej ces Yehauvas yuav foom koob hmoov rau peb tam sim no thiab yav tom ntej. Thaum Dawb tseem yau, nws yog ib tug hu nkauj hauv tsev teev ntuj. Muaj ib tug uas txawj txawj hu nkauj hnov Dawb hu nkauj ces nws thiaj li xav cob kom Dawb yim huab txawj hu nkauj. Ntev mus ntev tuaj Dawb txawm keej keej hu nkauj ces nws thiaj li mus hu rau qhov txhia qhov chaw. Thaum Dawb tseem tab tom mus lub tsev kawm ntawv qhia hu nkauj uas nto moo heev, muaj ib tug uas tuaj nrog nws kawm ntawd txawm pib qhia txog Vajtswv thiab qhia hais tias Vajtswv lub npe hu ua Yehauvas. Tsis ntev ntawd xwb, Dawb txawm pib kawm Vajlugkub ib lub lim tiam ob zaug. Ntev mus ntev tuaj Dawb txawm txiav txim siab muab nws lub neej los teev tiam Yehauvas es tsis mus caum txoj kev hu nkauj ntxiv lawm. Qhov uas Dawb txiav txim siab li no nyuaj rau nws heev. Nws hais tias: “Muaj coob leej ntau tus qhia rau kuv tias kuv muab qhov uas kuv txawj hu nkauj ntawd cuam pov tseg lawm. Tiam sis qhov tseeb tiag kuv xav muab tag nrho kuv lub neej los teev tiam Yehauvas.” Ua li niaj hnub nim no Dawb ho xav li cas txog nws txoj kev txiav txim siab 30 xyoo dhau los lawm? Nws hais tias: “Kuv nyob kaj siab lug thiab tso siab plhuav tias yav tom ntej Yehauvas yuav pub tej yam uas kuv lub siab ntshaw rau kuv.”​—Phau Ntawv Nkauj 145:16.

RAU SIAB NTSO TEEV TIAM YEHAUVAS

17. Qhov uas lub sim ceeb no yuav kawg raug rau cov uas teev tiam Yehauvas thiab cov tsis teev tiam li cas?

¹⁷ Peb nyob ze ze rau qhov uas lub sim ceeb no yuav kawg. Tus tub txib Povlauj sau tias: “Tshuav tsis ntev tus uas yuav los nws yuav los, thiab nws yuav tsis ncua sijhawm lawm.” (Henplais 10:37) Hnov cov lus no ua rau peb xav li cas? Qhov no qhia tau tias tsis tshuav sij hawm ntev rau tib neeg los teev tiam Yehauvas lawm. (1 Kauleethaus 7:29) Yog tias peb twb teev tiam Yehauvas lawm, peb paub tias peb yuav tau tiv tej kev sim siab tiam sis tej kev sim siab ntawd tsuas nyob ib nyuag ntu xwb, yuav dua mus tas.

18. Yehauvas thiab Yexus nkawd xav kom peb ua dab tsi tam sim no?

¹⁸ Yexus tsis yog txhawb kom nws cov thwj tim pib raws nws qab tiam sis kom raws nws qab kam tiag. (Mathais 16:24) Yog peb twb teev tiam Yehauvas tau ntau ntau xyoo lawm, peb yuav tau peem tiag teev tiam Yehauvas, tsis txhob tso tseg. Yeej tsis yooj yim tiam sis peb yuav tau txais ntau yam koob hmoov thiab kev zoo siab tam sim no!​—Phau Ntawv Nkauj 35:27.

19. Peb kawm tau li cas los ntawm Xob tus yam ntxwv?

¹⁹ Muaj ib txhia xav hais tias teev tiam Yehauvas mas lawv tsis tau ua ywj siab. Yog tias koj yog ib tug hluas, koj puas xav tias qhov uas koj teev tiam Yehauvas koj ua tsis tau dab tsi? Muaj ib tug kwv tij hluas npe hu ua Xob hais tias: “Kuv xav tias ua Yehauvas ib tug Tim Khawv mas kuv tsis muaj kev lom zem dab tsi li. Ib txhia me nyuam uas nrog kuv loj hlob tau mus ua kev lom zem, muaj hluas nkauj los sis tua tej nkees (games) tsis zoo. Tiam sis kuv yuav tau mus kev sib txoos thiab mus tshaj tawm txoj xov zoo xwb.” Thaum Xob pib xav li no ho raug rau nws li cas? Nws hais tias: “Kuv txawm pib mus ua tej yam phem uas lwm cov me nyuam ua. Thaum thawj kuj lom zem kawg li tiam sis ntev mus ntev tuaj kuv kuj tsis muaj kev zoo siab dab tsi. Kuv thiaj li pib xav txog tej yam kuv kawm hauv phau Vajlugkub thiab tig rov qab los teev tiam Yehauvas. Txij thaum ntawd los Yehauvas kuj teb kuv cov lus thov txhua zaus.”

20. Peb yuav tau ua dab tsi kam tiag?

²⁰ Tus sau phau ntawv nkauj hu nkauj rau Yehauvas tias: “Cov neeg uas koj xaiv tseg yuav zoo siab heev, lawv yog cov uas koj coj los nyob hauv lub tsev uas neeg tuaj pehawm koj.” (Phau Ntawv Nkauj 65:4) Cia peb txhua tus xav ib yam li Yausuas xav tias: “Kuv thiab kuv tsevneeg, peb yuav pehawm [Yehauvas] tib leeg xwb.”​—Yausuas 24:15.