Yehauvas Nrog Nraim Peb

1-2. (1) Ua cas peb ho paub tias thaum peb raug kev sim siab ho tsis yog peb ib leeg xwb? (2) Nyob rau hauv zaj kawm no yuav tham txog dab tsi?

THAUM peb raug ib yam kev sim siab twg, tej zaud peb yuav saib zoo yam li peb nyob ib leeg rau hauv ib koog hav zoov nuj txeeg thiab nrhiav tsis tau kev tawm. Tiam sis nco ntsoov tias Yehauvas yeej nrog nraim peb, nws paub peb tej kev ntxhov siab, thiab nws cog lus tias nws yuav pab peb. Yehauvas nplig peb li no tias: “Kuv yuav pab nej.”​—Yaxayas 41:10.

² Nyob rau hauv zaj kawm no yuav qhia seb Yehauvas pab peb li cas rau li cas xws li (1) nws coj peb txoj hau kev, (2) nws yuav pub kom peb muaj txawm peem, (3) nws yuav tiv thaiv peb, thiab (4) nws yuav nplig peb. Yehauvas qhia tseeb tseeb rau peb tias txawm peb yuav raug li cas los nws yuav tsis tso peb tseg. Nws yuav nrog nraim peb mus li.

YEHAUVAS COJ PEB TXOJ HAU KEV

3-4. Yehauvas coj peb txoj hau kev li cas? (Phau Ntawv Nkauj 48:14)

³ Nyeem Phau Ntawv Nkauj 48:14. Yehauvas paub tias peb yeej coj tsis tau peb tshais kauj ruam. Ua li nws ho coj nws cov tib neeg li cas niaj hnub nim no? Ib qho uas nws coj nws cov tib neeg yog phau Vajlugkub. (Phau Ntawv Nkauj 119:105) Yehauvas siv phau Vajlugkub los pab peb kom txawj txiav txim ua qhov zoo thiab coj ib yam li nws coj thiab xav ib yam li nws xav. Yog peb mloog nws tej lus qhia ces peb yuav tau ib lub neej zoo siab heev tam sim no thiab yav tom ntej. Xws li nws qhia kom peb zam lwm tus lub txim, tsis txhob khaws chim mus li, ua siab ncaj rau txhua fab, thiab hlub txhua tus tawm plaws hauv nruab siab tuaj. (Phau Ntawv Nkauj 37:8; Henplais 13:18; 1 Petus 1:22) Yog peb coj yam li no ces peb yuav txawj ua niam ua txiv, txawj ua txij ua nkawm, thiab txawj ua phooj ywg.

⁴ Nyob hauv phau Vajlugkub, Yehauvas kuj qhia rau peb txog tej tug uas xav thiab raug kev sim siab ib yam li peb. (1 Kauleethaus 10:13; Yakaunpaus 5:17) Thaum peb nyeem txog tej zaj zoo li no thiab muab coj los txhawb peb lub neej ces yuav pab tau peb rau ob txoj hau kev. Qhov ib, peb yuav xam pom tias kuj muaj lwm tus raug ib yam li peb raug thiab lawv kuj thev dhau txhua yam vim muaj Yehauvas pab lawv. (1 Petus 5:9) Qhov ob, peb yuav paub thev kom dhau tej kev sim siab uas peb raug kom peb muaj kev kaj siab.​—Loos 15:4.

5. Yehauvas kuj siv leej twg los pab peb?

⁵ Yehauvas kuj siv cov kwv tij nkauj muam los pab peb.a Xws cov saib xyuas thaj tsam yeej ncig xyuas tej koom txoos kom txhawb tau peb sawv daws. Lawv kuj tham tej zaj lus qhuab qhia los tsav peb txoj kev ntseeg thiab pab kom peb sib koom siab. (Tes Hauj Lwm 15:40–16:5) Cov txwj laus kuj pab kom peb rau siab ntso teev tiam Yehauvas. (1 Petus 5:2, 3) Cov niam txiv kuj pab lawv cov me nyuam kom hlub Yehauvas, txawj txiav txim siab rau qhov zoo, thiab coj cwj pwm zoo. (Pajlug 22:6) Thiab cov muam uas paub tab coj yam ntxwv zoo, hais lus los pab thiab txhawb cov muam hluas.​—Titus 2:3-5.

6. Peb yuav tau ua dab tsi xwv tej uas Yehauvas qhia thiaj pab tau peb?

⁶ Yehauvas tau muab txhua yam kev pab los mus coj peb txoj hau kev kom peb txawj txiav txim siab rau peb lub neej. Yuav ua li cas thiaj qhia tau tias peb yeej ris nws txiaj ntsig rau tej uas nws tau ua? Nyob hauv Pajlug 3:5, 6 hais tias: “Cia siab rau [Yehauvas] kom kawg koj lub siab lub ntsws. Tsis txhob cia siab rau koj tej kev txawj ntse.” Thaum peb ua li no ces nws “yuav coj [peb] taug txojkev uas yog txoj tseeb,” uas txhais tias nws yuav pab kom peb zam dhau teeb meem thiab ua neej nyob sov siab so. Peb ua Yehauvas tsaug kawg li uas nws haj tseem hlub peb thiab nws tseem tsav tswv yim rau peb lub neej!​—Phau Ntawv Nkauj 32:8.

YEHAUVAS YUAV PUB KOM PEB MUAJ TXAWM PEEM

7. Tej yam uas Yehauvas pub rau peb yog dab tsi? (Filipis 4:19)

⁷ Nyeem Filipis 4:19. Txuas ntxiv rau qhov uas Yehauvas pab coj peb txoj hau kev, nws kuj foom koob hmoov kom peb muaj zaub mov noj, khaub ncaws hnav, thiab chaw los nkaum tshav nkaum nag. (Mathais 6:33; 2 Thexalaunikes 3:12) Tej thaud peb yeej muaj kev txhawj xeeb txog tej yam uas hais tas los no tiam sis Yehauvas tsis xav kom peb ho muab txhawj heev dhau tsam tsis muaj tej ub tej no. (Mathais 6:25) Vim li cas Yehauvas ho tsis xav kom peb txhawj heev dhau? Rau qhov nws yog peb Leej Txiv saum ntuj thiab nws yeej yuav tsis tso cov uas teev tiam nws pov tseg. (Mathais 6:8; Henplais 13:5) Peb yeej tso siab tau rau nws tej lus tag nrho thaum nws hais tias nws yuav pub kom peb muaj txawm peem.

8. Yehauvas tau ua dab tsi rau Daviv?

⁸ Cia peb tham seb Yehauvas ho tau pab Daviv li cas. Lub caij uas Daviv tab tom khiav Vaj Ntxwv Xa-ules, Yehauvas yeej muab ub muab no rau nws thiab cov txiv neej uas nrog nws ua ke kom muaj txaus noj txaus haus. Thaum Daviv xav txog tej ntwb ntu uas Yehauvas tau saib xyuas lawv ntawd, nws thiaj hais li no tias: “Nimno kuv yog ib tug neeg laus, kuv ua neej nyob los tau ntev lawm, tiamsis kuv tsis pom [Yehauvas] muab ib tug neeg zoo tso povtseg rau qhov twg, lossis cia nws tej menyuam mus thov khawv noj.” (Phau Ntawv Nkauj 37:25) Zoo ib yam li Daviv, tej zaud koj kuj tau pom Yehauvas cev tes pab cov uas teev tiam nws.

9. Niaj hnub nim no Yehauvas pab nws cov tib neeg thaum raug xwm txheej li cas? (Saib cov duab.)

⁹ Yehauvas kuj pab nws cov tib neeg rau lub caij uas muaj xwm txheej. Xws li thaum muaj kev tshaib nqhis los raug cov Khixatias uas nyob thawj 100 xyoo hauv lub nroog Yeluxalees, cov Khixatias uas nyob lwm qhov chaw kuj xa tej ub tej no tuaj pab lawv. (Tes Hauj Lwm 11:27-30; Loos 15:25, 26) Niaj hnub nim no Vajtswv cov tib neeg haj tseem coj tib tug yam ntxwv zoo li no. Thaum muaj xwm txheej rau ib qho chaw twg, Yehauvas kuj tshoov nws cov tib neeg lub siab kom xa zaub xa mov, dej, khaub ncaws hnav, thiab tshuaj mus pab. Kuj muaj cov kwv tij nkauj muam mus pab kho vaj kho tsev thiab tej Tsev Nceeg Vaj. Tsis tas li ntawd, Yehauvas cov tib neeg kuj maj nrawm nroos mus nplig cov uas raug tej xwm txheej no lub siab lub ntsws thiab txhawb lawv txoj kev ntseeg.

10-11. Koj kawm tau dab tsi los ntawm zaj uas hais txog Npolis?

¹⁰ Yehauvas kuj pab cov uas tseem tsis tau los teev tiam nws. Zoo ib yam li ntawd, peb yuav tau ua zoo rau cov uas haj tseem tsis tau nrog peb teev tiam Yehauvas. (Kalatias 6:10) Yog peb ua li no tej zaum yuav pab tau kom lawv xav paub Yehauvas. Xws li muaj ib tug thawj xib hwb npe hu ua Npolis (Borys) nyob rau teb chaws Yus Khees (Ukraine). Txawm nws tsis yog ib tug Tim Khawv los nws yeej ua zoo rau cov tub ntxhais kawm ntawv uas yog Yehauvas Cov Tim Khawv. Thaum Npolis txiav txim siab khiav tsov rog, peb cov kwv tij kuj tau pab nws. Tom qab ntawd, nws kuj tuaj koom ua kev cai nco txog Yexus. Thaum nws xav txog txhua yam uas cov kwv tij tau ua rau nws, nws hais tias: “Cov Tim Khawv ua zoo kawg li rau kuv thiab lawv saib xyuas kuv zoo heev. Kuv ris lawv txiaj ntsig kawg li.”

¹¹ Peb kuj xyaum tau peb Leej Txiv saum ntuj ceeb tsheej es pab cov uas xav tau kev pab, tab txawm lawv yuav ntseeg thiab tsis ntseeg ib yam li peb. (Lukas 6:31, 36) Peb cia siab tias qhov uas peb hlub lawv yuav pab tau kom lawv los ua Khetos cov thwj tim. (1 Petus 2:12) Txawm lawv yuav los thiab tsis los ntseeg Yehauvas los qhov uas peb pab lawv ntawd ua rau peb muaj kev zoo siab.​—Tes Hauj Lwm 20:35.

YEHAUVAS YUAV TIV THAIV PEB

12. Yehauvas cog lus yuav tiv thaiv nws cov tib neeg li cas? (Phau Ntawv Nkauj 91:1, 2, 14)

¹² Nyeem Phau Ntawv Nkauj 91:1, 2, 14. Niaj hnub no Yehauvas yeej cog lus tias nws yuav tiv thaiv nws cov tib neeg txoj kev sib raug zoo nrog nws. Nws yuav tsis cia Xatas rhuav tau txoj kev teev tiam Nws. (Yauhas 17:15) Thaum muaj txoj kev txom nyem loj kawg nkaus, peb tso siab plhuav tau tias Yehauvas yuav pab kom peb tuav rawv peb txoj kev ntseeg thiab nws yuav cawm peb dim.​—Tshwmsim 7:9, 14.

13. Yehauvas ho tiv thaiv peb ib leeg zuj zus li cas?

¹³ Yehauvas muab phau Vajlugkub coj los qhia kom peb paub qhov twg zoo qhov twg phem xwv thiaj li pab tiv thaiv peb ib tug dhau ib tug. (Henplais 5:14) Thaum peb coj raws li tej peb kawm hauv phau Vajlugkub ces yuav pab tiv thaiv peb txoj kev sib raug zoo nrog Yehauvas thiab peb yuav txawj txiav txim siab rau qhov zoo. (Phau Ntawv Nkauj 91:4) Ntxiv ntawd, Yehauvas kuj siv lub koom txoos los tiv thaiv peb. (Yaxayas 32:1, 2) Yog peb nrog nraim cov uas hlub Yehauvas thiab coj lawv lub neej raws li phau Vajlugkub tej hauv paus ntsiab lus ces yuav txhawb tau peb thiab yuav pab kom peb zam tau tej yam phem.​—Pajlug 13:20.

14. (1) Vim li cas Vajtswv ho tsis tiv thaiv peb ntawm txhua yam kev sim siab? (2) Phau Ntawv Nkauj 9:10 txhawb peb li cas? (Saib cov taw ntawv.)

¹⁴ Yav tag los lawd, tej thaud Yehauvas kuj tiv thaiv nws cov tib neeg kom tsis txhob raug mob los sis raug tua. Tiam sis nws kuj tsis ua li no txhua txhua zaus. Nyob hauv phau Vajlugkub qhia tias tej thaud muaj tej yam los raug nthawv nthav uas peb tsis ras txog. (Tej Lus Qhia 9:12) Hos muaj tej thaud Yehauvas kuj cia nws cov tib neeg raug kev tsim txom thiab kev tuag kom qhia tau tias Xatas yog tus dag. (Yauj 2:4-6; Mathais 23:34) Niaj hnub nim no los yeej zoo tib yam li ntawd tib yam nkaus. Txawm Yehauvas tsis muab peb tej kev sim siab tsaws hlo mus los nws yeej tsis tso peb tseg.b​—Phau Ntawv Nkauj 9:10.

YEHAUVAS YUAV NPLIG PEB

15. Yehauvas nplig tau koj li cas thaum koj thov nws, nyeem nws Txoj Lus, thiab nrog cov kwv tij nkauj muam? (2 Kauleethaus 1:3, 4)

¹⁵ Nyeem 2 Kauleethaus 1:3, 4. Muaj tej lub sij hawm peb raug kev quaj ntsuag, ntxhov siab los sis nyuaj siab. Tej zaud koj tab tom raug ib qho kev ntxhov siab heev uas zoo li tsis muaj neeg pab tau koj. Txawm koj tau xav li ntawd los Yehauvas yeej nkag siab koj. Nws yeej paub tias mob koj siab npaum cas thiab nws “txhawb [koj] lub zog thaum [koj] raug txhua yam kev nyuaj siab.” Nws ho txhawb li cas? Thaum koj thov Yehauvas ces nws “yuav pub [koj] muaj lub siab tus.” (Filipis 4:6, 7) Thaum koj nyeem phau Vajlugkub, koj yuav hnov Yehauvas cov lus nplig koj lub siab. Nyob rau hauv qhia tias nws hlub koj npaum li cas, nws yuav tsav tswv yim rau koj, thiab pab kom koj nco ntsoov txog txoj kev vam kev cia siab yav tom ntej. Thaum mus kev sib txoos koj yuav kawm tau tej yam hauv phau Vajlugkub los txhawb koj thiab yuav nrog cov kwv tij nkauj muam uas hlub koj.

16. Koj kawm tau dab tsi los ntawm tej uas Nethees thiab Pexilas raug?

¹⁶ Cia peb mus tham txog ib khub niam txiv npe hu ua Nethees (Nathan) thiab Pexilas (Priscilla) uas nyob hauv teb chaws Yunaithim Xatej (United States) seb Yehauvas tau siv nws Txoj Lus los nplig thiab txhawb nkawd lub zog li cas rau li cas. Tau ob peb xyoos dhau los lawm, nkawd txiav txim siab khiav mus pab tej thaj tsam uas tsis muaj Yehauvas Cov Tim Khawv coob pes tsawg. Nethees hais tias: “Wb tso siab plhuav tias Yehauvas yuav foom koob hmoov rau wb.” Tiam sis thaum nkawd mus nyob rau ntawd, nkawd txawm muaj mob thiab tsis muaj nyiaj siv. Nkawd thiaj tsiv rov qab mus tsev los nkawd haj tseem tsis muaj nyiaj txiag siv quj qees. Nethees hais tias: “Kuv tsis paub vim li cas Vajtswv ho tsis foom koob hmoov rau wb. Xyov puas yog kuv ua tau ib yam twg yuam kev lawm.” Ntev mus ntev tuaj nkawd mam xam pom tias Vajtswv tsis tau tso nkawd tseg. Nethees hais tias: “Lub sij hawm wb muaj kev nyuaj siab ntawd, tej yam hauv phau Vajlugkub txhawb wb thiab pab wb kom txawj ua neej. Wb thiaj xav txog tej uas Yehauvas tau pab wb xwb es tsis txhob xav ntau ntau txog tej yam wb raug xwv thiaj pab tau wb rau yav tom ntej.”

17. Yehauvas ho nplig tus muam Henkas li cas? (Saib daim duab.)

¹⁷ Cia peb ho mus tham dua ib tug yam ntxwv txog Henkas (Helga) uas nyob teb chaws Hankalis (Hungary) seb Yehauvas siv cov kwv tij nkauj muam los pab nws li cas rau li cas. Tau ntau ntau xyoo nws raug ntau tsav ntau yam hauv nws lub neej ua rau nws ntsoos ntsoos thiab saib nws tus kheej tsis muaj nuj nqis. Thaum nws xav txog mas Yehauvas kuj tau siv cov kwv tij nkauj muam hauv nws lub koom txoos los pab nws kawg nkaus li. Nws hais tias: “Yehauvas yeej cev tes los pab kuv thaum nws pom kuv ntxhov siab hnyo vim yuav tau mus ua hauj lwm, tu kuv tus me tub uas muaj mob, thiab lwm yam kev sim siab uas kuv raug. Tau 30 lub xyoos nkaus, txhua txhua hnub nws yeej ua li nws cog lus es nrhiav kev los nplig kuv siab. Nws siv ib txhia ntaus ntawv, xa ntawv, los sis hais lus nplig thaum kuv ntxhov siab.”

18. Peb yuav nplig lwm tus li cas?

¹⁸ Peb kuj muaj rab peev xwm xyaum tau Vajtswv es mus nplig lwm tus siab. Xws li peb ua siab ntev mloog lawv piav lawv zaj, hais lus txhawb zog, thiab pab lawv ua ub ua no. (Pajlug 3:27) Peb kuj pab tau cov uas tsis tau teev tiam tib yam nkaus thiab. Xws li thaum tej kwv tij zej zog quaj ntsuag, muaj mob los sis ntxhov siab, peb kuj mus saib tau lawv, mloog lawv tham thiab siv tej nqe Vajlugkub los txhawb lawv lub zog. Thaum peb xyaum coj li Yehauvas, tsis yog peb pab tau cov ntseeg li peb tiv dhau lawv tej kev sim siab xwb tiam sis peb kuj pab tau cov tsis tau los ntseeg kom lawv lub siab muag thiab xav los paub txog Yehauvas.​—Mathais 5:16.

YEHAUVAS YUAV NROG NRAIM PEB MUS LI

19. Yehauvas ua dab tsi rau peb, thiab peb yuav xyaum nws li cas?

¹⁹ Yehauvas yeej txhawj xeeb txog cov uas hlub nws. Nws yeej tsis muab peb tso tseg rau lub sij hawm uas peb tab tom raug kev nyuaj siab. Zoo ib yam li leej niam leej txiv saib xyuas nkawd cov me nyuam, Yehauvas yeej saib xyuas cov uas teev tiam nws tib yam nkaus. Nws coj peb txoj hau kev, pub kom peb muaj txawm peem, tiv thaiv peb, thiab nplig peb siab. Thaum peb pab thiab txhawb lwm tus uas raug kev nyuaj siab, twb yog peb tab tom xyaum peb Leej Txiv tus uas nyob saum ntuj ceeb tsheej. Txawm yuav muaj kev nyuaj siab ntxhov siab los raug peb los nco ntsoov tias Yehauvas yeej yuav nrog nraim peb. Nws tau cog lus tias: “Nej tsis txhob ntshai, rau qhov kuv nrog nraim nej.” (Yaxayas 41:10) Cov lus no txhawb tau peb lub zog tias Yehauvas yeej yuav tsis tso peb tseg.