Muaj Tej Pov Thawj Twg Qhia Txog “Hnub Kawg” los sis “Lub Sij Hawm Kawg?”
Phau Vajlugkub qhia li no
Phau Vajlugkub qhia tias thaum lub sim ceeb no yuav xaus los sis lub qab ntuj no yuav kawg, yuav muaj ntau yam xwm txheej, tej ub tej no yuav tsis zoo li qub, thiab tib neeg tus cwj pwm feem ntau yuav hloov mus rau qhov phem. (Mathais 24:3) Phau Vajlugkub muab lub sim ceeb no hu ua “lub sijhawm uas ntiajteb yuav kawg” thiab “lub sijhawm uas ib puas tsav yam kawg” los sis lub caij lub nyoog kawg.—2 Timautes 3:1; Daniyees 8:19.
Puas muaj cov lus faj lem qhia txog “tiam kawg”?
Phau Vajlugkub qhia tias yuav muaj ntau yam thooj txhij tshwm sim ua ke los ua “pov thawj” qhia tias txog lub sij hawm kawg lawm tiag. (Lukas 21:7) Cia peb tham txog qho me ntsis:
Kev tsov rog thoob ntiaj teb. Yexus tau hais ua ntej lawm tias: “Yuav muaj ib haiv neeg sawv tawm tsam ib haiv neeg thiab ib lub teb chaws sawv tawm tsam ib lub teb chaws.” (Mathais 24:7) Ib yam li ntawd, phau Tshwmsim kuj tau ua lus piv txwv hais txog ib tug uas caij tus txiv nees liab ploog uas piv txwv txog kev tsov kev rog. Nqe no hais tias “nws muaj hwjchim ua rau lub ntiajteb ua tsov ua rog thiab sib ntaus sib tua.”—Tshwmsim 6:4.
Kev tshaib kev nqhis. Yexus twb hais lawm tias: “Yuav muaj kev tshaib kev nqhis.” (Mathais 24:7) Phau Tshwmsim kuj hais ntxiv tias muaj dua ib tug caij tus txiv nees dub uas piv txwv txog kev tshaib nqhis thoob ntiaj teb.—Tshwmsim 6:5, 6.
Av qeeg loj heev. Yexus hais tias yuav muaj “av qeeg ib qho rau ib qho.” (Mathais 24:7; Lukas 21:11) Cov av qeeg uas muaj nyob thoob plaws ntiaj teb no ua rau coob tus raug kev txom nyem thiab ntsib kev ploj kev tuag ntau heev.
Kab mob kis ntau qhov. Raws li Yexus tau hais, yuav muaj kab mob kis, los sis muaj kab mob phem heev thooj txhij kis ib qho rau ib qho.—Lukas 21:11.
Teeb meem txhaum cai lij choj. Txawm tib neeg twb ua kev phem kev txhaum caij tau ntau txhia xyoo los lawm, los Yexus kuj hais tias tseem yuav muaj “kev phem loj zuj zus tuaj” nyob rau tiam kawg.—Mathais 24:12.
Ua rau lub ntiaj teb puas tsuaj. Tshwmsim 11:18 qhia tias noob neeg yuav “ua rau lub ntiajteb no puastsuaj.” Lawv yuav uas puas tsuaj xws li tsis yog lawv yuav ua nruj ua tsiv thiab ua phem xwb tiam sis tseem yuav ua rau txhua yam tsis hais tej huab cua thiab tej dej puas tsuaj mus thiab.
Tib neeg coj phem zuj zus tuaj. Nyob hauv 2 Timautes 3:1-4, phau Vajlugkub tau hais tias coob tus “yuav tsis ris luag txiaj ntsig, thiab yuav saib tsis taus Vajtswv txoj kevcai, . . . tsis zam txim rau lwm tus, nyiam taug xaiv, tsis tswj lawv lub siab, ua neeg tsivtsaim thiab tsis nyiam ua zoo; lawv yuav ua neeg ntxeev siab, ua neeg siab heev, thiab lawv saib lawv tsimtxiaj dua lwm tus.” Cov cwj pwm no yuav phem zuj zus mus txog thaum uas phem heev dhau lawm uas qhia tau tias yog lub sij hawm “muaj kev ntxhov siab heev.”
Lub cuab lub yig tsis ruaj kho. Nyob hauv 2 Timautes 3:2, 3, phau Vajlugkub hais tias muaj coob tus “yuav tsis sib hlub” hauv lawv tsev neeg thiab cov me nyuam los “yuav tsis mloog niam txiv lus.”
Tsis hlub Vajtswv. Yexus tau hais lawm tias: “coob tus txoj kev hlub yuav tsuag zuj zus mus.” (Mathais 24:12) Qhov uas Yexus hais ntawd yog nws hais tias tib neeg txoj kev hlub rau Vajtswv yuav tsuag zuj zus mus. Vim li ntawd, 2 Timautes 3:4 thiaj hais tias nyob rau lub sij hawm kawg, cov neeg no yuav “nyiam kev lomzem heev dua nyiam Vajtswv.”
Ua txuj ntseeg Vajtswv. Nyob hauv 2 Timautes 3:5, phau Vajlugkub qhia tias coob tus yuav lees tias lawv teev tiam Vajtswv tiam sis lawv tsis ua lub neej raws li Vajtswv tej kev cai tiag tiag.
Yuav nkag siab phau Vajlugkub tej lus faj lem zuj zus. Phau ntawv Daniyees tau hais tias nyob rau “lub sijhawm ntiajteb kawg,” coob tus yuav los paub qhov tseeb hauv phau Vajlugkub zuj zus. Qhov no kuj yog hais txog qhov uas nkag siab txog cov lus faj lem no thiab.—Daniyees 12:4.
Tshaj tawm txoj xov zoo thoob ntiaj teb. Yexus hais tias: “txoj xov zoo txog Vajtswv txoj kev kav yuav raug muab tshaj tawm mus thoob plaws lub ntiaj teb.”—Mathais 24:14.
Neeg tsis quav ntsej. Yexus twb hais lawm tias coob tus yuav tsis quav ntsej txog tej pov thawj uas qhia tias lub sij hawm kawg los ze zuj zus lawm. (Mathais 24:37-39) Tsis tag li ntawd, 2 Petus 3:3, 4 kuj hais tias yuav muaj ib txhia thuam thiab tsis quav ntsej txog tej pov thawj uas tshwm sim rau lub sij hawm kawg.
Txhua zaj lus faj lem muaj tiav tag nrho. Yexus hais tias thaum cov lus faj lem thooj txhij muaj tiav tag nrho ua ke es tsis yog ob peb qho muaj tiav xwb ces qhia tias txog tiam kawg lawm tiag.—Mathais 24:33.
Peb puas yog nyob rau “tiam kawg” lawm?
Peb yeej nyob rau tiam kawg lawm tiag. Tej uas muaj tshwm sim hauv lub qab ntuj thiab tej uas phau Vajlugkub hais tias yuav muaj tshwm sim raws caij raws nyoog qhia tias tiam kawg pib rau xyoo 1914, uas yog xyoo muaj Ntsuj Rog Thoob Qab Ntuj Zaum 1. Yuav kom peb pom tias peb yeej nyob rau tiam kawg lawm tiag, thov mus siab zaj yeej yaj kiab hauv qab no:
Nyob rau xyoo 1914, Vajtswv lub Nceeg Vaj pib kav sau ntuj ceeb tsheej lawm. Thawj qho uas Vajtswv lub Nceeg Vaj ua yog muab Xatas thiab nws cov dab ncaws tawm saum ntuj ceeb tsheej los thiab tsuas pub lawv nyob rau hauv ntiaj teb lawm xwb. (Tshwmsim 12:7-12) Thaum peb pom tib neeg tej cwj pwm phem thiab tej kev phem uas lawv ua, peb pom Xatas tej kev hau ntxias rau noob neej ntag. Tej no thiaj ua tau pov thawj qhia tias tiam kawg “yuav muaj kev ntxhov siab heev.”—2 Timautes 3:1.
Tej kev ntxhov siab heev no ua rau cooj tus nyuaj siab kawg li. Lawv txhawj tias ib tsoom neeg yuav nyob tsis muaj kev sib haum xeeb thiab sib hlub lawm. Ib txhia los tseem ntshai tias tom ntej no ntshe tib neeg yuav sib tua kom tu noob tas mus.
Muaj ib txhia kuj muaj kev txhawj xeeb txog tej uas tshwm sim hauv lub qab ntuj no thiab, tiam sis lawv muaj kev vam kev cia siab rau yam tom hauv ntej. Lawv ntseeg tias tshuav tsis ntev xwb Vajtswv lub Nceeg Vaj yuav los rhuav tshem tej teeb meem hauv ntiaj teb no tag nrho mus huv tib si. (Daniyees 2:44; Tshwmsim 21:3, 4) Lawv uas siab ntev tos mus txog thaum Vajtswv tej lus cog tseg muaj tiav, thiab lawv pom tias Yexus cov lus uas hais tias “tus uas thev mus txog thaum kawg yuav dim” yeej nplig tau lawv lub siab kawg li.—Mathais 24:13; Mikhas 7:7.