Tej Tswvyim Hauv Phau Vajlugkub Kav Txhua Tiam Neeg

MUAB XAV LI NO: Thaum koj mus ncig xyuas ib lub tsev puav pheej, tej yam uas koj pom, ib txhia twb khis tas lawm lossis tsuas pom ib sab xwb. Koj saib mus ho pom ib tug ncej zeb uas tsis khis li. Tej zaum koj nug tus coj kev tias: “Ntshe tus ncej zeb no tshiab dua lwm yam pob?” Tus coj kev teb tias: “Tsis yog. Tus ncej zeb no nyob ntev tshaj ntau yam hauv lub tsev no, kuj tsis tau muab ua dua tshiab li thiab.” Koj nug ntxiv tias, “Yog li ntawd, tej zaum luag tiv thaiv tus ncej zeb no zoo heev kom txhob muaj dabtsi raug pob?” Tus coj kev teb tias, “Tus ncej zeb no mas raug ntau tsav ntau yam xwm. Raug tshav ntuj ziab tsau dej tsau nag thiab raug nag xob nag cua ntsawj. Tseem muaj coob tus xav muab tsoo kom puas mus thiab.” Thaum koj hnov li ntawd ntshe koj xav tsis thoob thiab xav paub seb luag xuas dabtsi los ua tus ncej zeb ntawd es thiaj thev taus ua luaj los tiv dhau tej xwm phem.

Phau Vajlugkub zoo ib yam li tus ncej zeb ntawd. Phau Vajlugkub yog ib phau ntawv qub qub. Yeej muaj lwm phau ntawv qub qub thiab, tiamsis feem ntau twb puas tas lawm. Tej phau cov npe ntawv twb thim tas ib nrab lossis ploj puas tas lawm. Tsis tas li ntawd xwb, luag twb muab tej phau ntawv qub ntsig txog kev tshawb txujci hloov dua tshiab lawm thiab. Tej phau uas qhia ntsig txog kev kho mob los tsis zoo rau peb siv lub caij no lawm.

Tiamsis phau Vajlugkub tsis zoo li lwm phau ntawv. Txawm cov lus sau rau hauv twb ntev tshaj 3,500 xyoo dhau lawm los, tsis poob ib nqes li. Tau ntau pua xyoo, muaj tibneeg uas saib phau Vajlugkub tsis muaj nqes, ib txhia txwv phau Vajlugkub, thiab muaj dua ib txhia xav muab phau Vajlugkub hlawv pov tseg. Txawm lawv ua npaum cas los, lawv rhuav tsis tau phau Vajlugkub li. Txawm tias tej kev kawm txawj kawm ntse hloov dua tshiab tas zog los, phau Vajlugkub tsuas tsav tswvyim ntau ntxiv rau tibneeg xwb. Tej uas nyob hauv phau Vajlugkub los tseem muaj nqes heev thiab tseem zoo rau peb siv niaj hnub nimno.​—Saib lub ntsiab me “Puas Yog Phau Vajlugkub Qub Dhau Lawd?”

TEJ YAM UAS TIBNEEG CHEEM TSUM NIAJ HNUB NO

Tej zaum koj twb xav lawm tias, ‘Niaj hnub no phau Vajlugkub puas tseem pab tau peb tiag?’ Xav txog 2 lo lus nug no: ‘Niaj hnub no tibneeg raug teeb meem dabtsi xwb? Tibneeg ntshai tej teeb meem twg tshaj?’ Tej zaum koj xav tias ntshe yog kev tsov kev rog, tej kev paug qias hauv ntiajteb uas ua rau tej huab cua tsis huv, kev tub sab tub nyiag, lossis dag noj dag haus. Nyeem mus ntxiv txog phau Vajlugkub tej haus paus ntsiab lus thiab ua tib zoo xav seb yog tibneeg coj raws li tej uas phau Vajlugkub hais, lub ntiajteb yuav zoo npaum li cas.

KEV THAJ YEEB

“Cov uas tsim kev haum xeeb tau nyob kaj siab lug, rau qhov lawv yuav raug hu ua Vajtswv cov tub.” (Mathai 5:9) “Yog ua tau mas koj yuav siv zog nrog luag nyob sib haum xeeb npaum li uas koj tus kheej ua tau.”​—Loos 12:18.

MUAJ KEV KHUVLEEJ, KEV SIB ZAM TXIM

“Cov uas muaj lub siab khuvleej tau nyob kaj siab lug, rau qhov lawv yuav tau txais kev khuvleej.” (Mathai 5:7) “Ib leeg ua siab ntev rau ib leeg thiab yog leejtwg muaj xaiv muaj lus ib leeg kuj zam ib leeg. [Yehauvas] zam txim rau nej li cas nej yuav tsum zam txim ib yam li ntawd.”​—Khaulauxi 3:13.

TSIS XAIV NTSEJ MUAG

Vajtswv “tsim txhua haiv neeg los ntawm tib tug los xwb kom nyob mus thoob plaws hauv qab ntuj.” (Tubtxib Tes Haujlwm 17:26) “Vajtswv tsis saib leejtwg ntsej muag, thiab hauv txhua haiv neeg tus uas paub ntshai Vajtswv thiab xyaum ncaj ncees kuj yog txaus Vajtswv lub siab.”​—Tubtxib Tes Haujlwm 10:34, 35.

TU LUB NTIAJTEB

“Vajtswv [Yehauvas] muab tus neeg ntawd tso nyob hauv lub vaj Edee kom tu thiab saib lub vaj ntawd.” (Chiv Keeb 2:15) Vajtswv “yuav rhuav tshem cov uas rhuav tshem lub ntiajteb.”​—Qhia Tshwm 11:18.

NTXUB KEV UA SIAB HLOB THIAB KEV PLEES KEV YI

“Tsis txhob ua siab hlob rau txhua yam, rau qhov neeg txojsia tsis yog nyob ntawm qhov uas muaj nplua mias.” (Luka 12:15) “Kev ua nkauj ua nraug, ua kev phem kev qias thiab qhov uas xav yuav luag tug, nej tsis txhob hais txog tej no rau hauv nej cov li, thiaj li tsim nyog yog Vajtswv cov xov dawb.”​—Efexau 5:3.

UA SIAB NCAJ NCEES, SIV ZOG UA HAUJLWM

Peb “xav xyaum zoo rau txhua fab.” (Henplais 13:18) “Tus uas txeev ua tub sab kuj tsis txhob ua dua li lawm, cia nws siv nws txhais tes ua tej haujlwm zoo.”​—Efexau 4:28.

PAB COV UAS CHEEM TSUM

“Txhawb cov uas siab yau lub zog, pab cov uas qaug zog, thiab ua siab ntev rau txhua tus.” (1 Thexalaunika 5:14) “Saib xyuas tej menyuam ntsuag thiab tej poj ntsuam uas raug kev txom nyem.”​—Yakaunpau 1:27.

Phau Vajlugkub tsis yog qhia txog tej hauv paus ntsiab lus no xwb, tiamsis kuj qhia kom peb txawj siv rau hauv peb lub neej txhua hnub thiab. Yeej tsim nyog peb coj raws li phau Vajlugkub tej hauv paus ntsiab lus los pab peb lub neej. Yog tibneeg coj raws li no, ntshe twb tsis muaj teeb meem ntau npaum li peb pom niaj hnub no. Yog li ntawd, tej uas phau Vajlugkub qhia pab tau koj li cas xwb?

PHAU VAJLUGKUB PAB TAU KOJ LI CAS

“Tswvyim tes haujlwm qhia tias tswvyim ua raug cai lawm.” (Mathai 11:19) Puas muaj li no tiag? Yuav kom peb paub mas peb yuav tsum nyeem thiab kawm Vajlugkub seb puas pab tau peb lub neej tiag. Koj kuj xav li no: ‘Yog phau Vajlugkub pab tau peb tiag, ces kuj pab tau kuv hloov kuv lub neej thiab. Yog li phau Vajlugkub yuav pab kuv daws kuv tej teeb meem li cas?’

Diava (Saib cov lus hauv qab taw qhia.) yog ib tug uas khwv heev muaj txhua yam. Ua cas tib ntsais muag xwb nws ntsib ntau yam kev ntxhov siab. Nws tus me ntxhais txawm tuag kiag, nws lub neej tawg kiag, thiab nws tej nyiaj txiag vaj tse poob tag. Nws hais tias: “Kuv tsis muaj txiv, tsis muaj ntxhais, tsis muaj vaj muaj tse lawm. Kuv saib zoo li kuv tsis tsim txiaj dabtsi li lawm. Lub neej tsis muaj nqes, kuv qaug zog zis tsis muaj hom phiaj li lawm.”

Diav mam pom tias Ntawv Nkauj 90:10 muaj tseeb tiag. Nqe ntawd hais tias: “Peb hnub nyoog tsuas yog xya caum xyoo xwb, lossis nyob ntawm peb lub zog kuj txog yim caum xyoo. Tiamsis sim neej nyob ntawd tsuas yog muaj haujlwm khwv thiab kev ceeblaj, tsis ntev kuj ploj tag thiab peb kuj dua lawm.”​—Ntawv Nkauj 90:10.

Diav nyeem phau Vajlugkub los nplig nws siab. Qhov uas nws ua li no pab tau nws heev. Zaj tom ntej yuav tham txog ib txhia uas tau muab phau Vajlugkub tej hauv paus ntsiab lus coj los siv hauv lawv lub neej. Lawv pom tias phau Vajlugkub yeej pab tau lawv tiag, tsis zoo li tej phau ntawv qub qub uas siv tsis tau lawm. Yog li ntawd, phau Vajlugkub los qhovtwg los tiag? Puas yog Vajtswv lub tswvyim los yog neeg lub?​—1 Thexalaunika 2:13.

Tej zaum koj kuj xav lawm tias neeg ua neej nyob ib vuag nrog tej kev ntxhov siab xwb. Thaum koj raug kev ntxhov siab, koj yuav nrhiav kev pab, kev txhawb, thiab kev nplig siab qhov twg?

Muaj 3 yam uas phau Vajlugkub pab tau koj:

1. zam dhau teeb meem.

2. kho tau teeb meem.

3. nyiaj dhau tej kev ntxhov siab.

Peb zaj tom ntej yuav tham txog qhov no.