Koj Puas Tau Npaj Ua Kev Cai Raus Dej?

Thaum koj kawm phau Vajlugkub, koj kawm tau ntau tsav ntau yam txog Yehauvas thiab tej zaum koj twb muab yam puav coj los siv rau hauv koj lub neej lawm. Tiam sis yog hais tias tseem muaj tej yam uas ua rau koj ua xyem xyav tias xyov koj yuav ua kev cai raus dej los tsis ua, ces zaj kawm no yuav tham txog tej ntawd thiab tham seb koj yuav ua li cas.

1. Koj yuav tsum paub npaum li cas koj mam li ua tau kev cai raus dej?

Ua ntej koj ua kev cai raus dej, koj yuav tsum “paub qhov tseeb” tso. (1 Timautes 2:4) Koj tsis tas yuav paub txhua tsav txhua yam txog phau Vajlugkub koj mam li ua tau kev cai raus dej. Rau qhov cov uas twb ua kev cai raus dej ntev lawm, los lawv yeej tseem niaj hnub kawm quj qees. (Kaulauxais 1:9, 10) Tiam sis ua ntej koj ua kev cai raus dej, koj yuav tsum paub tej ntsiab lus tseem ceeb uas phau Vajlugkub qhia. Yog koj xav paub seb koj puas tau paub txaus ces mus nrog cov txwj laus hauv koj lub koom txoos tham lawv mam li pab koj.

2. Puas tshuav dab tsi ntxiv uas koj yuav tau ua, ua ntej koj ua kev cai raus dej?

Ua ntej koj ua tau kev cai raus dej, koj yuav tsum ‘tso koj tej kev txhaum tseg thiab tig los cuag Vajtswv.’ (Nyeem Tes Haujlwm 3:19.) Qhov uas koj ua li no qhia tias koj yeej tu siab tiag tiag rau koj tej kev txhaum yav tas los thiab koj thov Yehauvas zam txim rau koj. Koj txiav txim siab tuag nthi tias koj yeej yuav tsis ua tej uas Yehauvas hais tias phem thiab koj yuav rau siab ntso ua koj lub neej kom haum Yehauvas siab. Tsis tas li ntawd, koj mus koom tej kev sib txoos thiab nrog lub koom txoos mus tshaj tawm.

3. Vim li cas koj yuav tsum tsis txhob ntshai ua kev cai raus dej?

Muaj ib txhia ntshai tsam lawv ua tsis tau li lawv cog lus rau Yehauvas. Yeej muaj tiag li lawv hais, vim peb txhua tus yeej yuav ua yuam kev, phau Vajlugkub hais tias txawm Vajtswv cov tub qhe thaum ub los yeej ua yuam kev thiab. Yehauvas paub tias peb yog neeg xwb ces peb yuav ua tsis tau zoo tas mus li. (Nyeem Phau Ntawv Nkauj 103:13, 14.) Tiam sis yog hais tias peb twb ua npaum li peb ua tau lawm ces nws yeej txaus siab rau peb thiab yuav pab peb. Yehauvas cog lus tias “tsis muaj ib yam dab tsi yuav cais tau peb ntawm [nws] txoj kev hlub.”​—Nyeem Loos 8:38, 39.

KAWM NTXIV

4. Kawm kom koj paub Yehauvas zoo

Koj yuav tsum paub Yehauvas zoo npaum li cas koj mam li ua tau kev cai raus dej? Koj yuav tsum paub Yehauvas kom zoo, koj thiaj xav hlub nws thiab xav ua haum nws siab. Saib zaj YEEB YAJ KIAB seb cov uas kawm Vajlugkub ib txhia ua li cas lawv thiaj li los paub Yehauvas zoo zuj zus. Ces tham txog lo lus no:

YEEB YAJ KIAB: Thaum Xav Ua Kev Cai Raus Dej (3:56)

• Cov neeg hauv zaj yeeb yaj kiab no ua li cas kom lawv thiaj li ua tau kev cai raus dej?

Nyeem Loos 12:2 thiab tham txog ob lo lus no:

• Puas muaj tej yam hauv phau Vajlugkub uas nyuaj rau koj ntseeg? Los sis koj tseem ua xyem xyav tias xyov tej uas Yehauvas Cov Tim Khawv qhia puas yog qhov tseeb?

• Yog hais tias muaj, koj yuav ua li cas?

5. Kov yeej tej uas ua rau koj ntshai ua kev cai raus dej

Thaum peb txiav txim siab tias peb yuav muab peb lub neej cob rau Yehauvas thiab ua kev cai raus dej, peb yuav ntsib ntau yam teeb meem thiab kev sim siab. Saib zaj YEEB YAJ KIAB thiab tham txog ob lo lus no:

YEEB YAJ KIAB: Txoj Kev Hlub Rau Yehauvas Kov Yeej Txhua Yam (5:22)

• Hauv zaj yeeb yaj kiab no, Nalankeles (Narangerel) ua li cas nws thiaj teev tiam tau Yehauvas?

• Nws txoj kev hlub rau Yehauvas pab nws kov yeej nws tej teeb meem li cas?

Nyeem Pajlug 29:25 thiab 2 Timautes 1:7 ces tham txog lo lus no:

• Dab tsi yuav pab tau peb muaj lub siab tawv thiab kov yeej peb tej teeb meem thiab tej kev sim siab?

6. Tso siab rau Yehauvas tias nws yeej yuav pab koj

Vajtswv Yehauvas yuav pab kom koj ua tau haum nws siab. Saib zaj YEEB YAJ KIAB thiab tham txog ob lo lus no:

YEEB YAJ KIAB: Vajtswv Yehauvas Yuav Pab Koj (2:50)

• Hauv zaj yeeb yaj kiab no, vim li cas tus kawm Vajlugkub thiaj ntshai ua kev cai raus dej?

• Nws paub li cas txog Yehauvas es thiaj ua rau nws tso siab rau Yehauvas lawm?

Nyeem Yaxayas 41:10, 13 thiab tham txog lo lus no:

• Thaum koj muab koj lub neej cob rau Yehauvas, vim li cas koj thiaj li ntseeg tau tias koj yuav ua tau li koj cog lus rau nws?

7. Ris txiaj rau Yehauvas txoj kev hlub

Thaum koj yim huab xav txog Yehauvas txoj kev hlub uas nws muaj rau koj ces koj yim huab yuav nco nws txiaj ntsig thiab xav teev tiam nws mus ib txhis. Nyeem Phau Ntawv Nkauj 40:5 thiab tham txog lo lus no:

• Tej uas Yehauvas pub rau koj, yam twg ua rau koj ris nws txiaj ntsim tshaj?

Yelemis yog ib tug cev Vajtswv lus uas hlub Yehauvas thiab nyiam Nws txoj lus heev. Yelemis zoo siab heev tias nws txhawb nqa Yehauvas lub npe. Nws hais tias, “Kuv mloog tej lus uas koj hais rau kuv, koj tej lus nyob hauv kuv lub siab, ua rau kuv kaj siab thiab zoo siab kawg.” (Yelemis 15:16) Tham txog cov lus no:

• Vim li cas thiaj li yog ib qho koob hmoov zoo thaum ib tug tau los ua Yehauvas ib tug Tim Khawv?

• Koj puas xav ua kev cai raus dej los ua Yehauvas ib tug Tim Khawv?

• Puas muaj dab tsi khuam cheem kom koj ua tsis tau kev cai raus dej?

• Koj yuav tau ua li cas, koj thiaj li ua tau kev cai raus dej?

KOJ KAWM TAU DAB TSI

Yog Yehauvas pab koj lawm ces yeej tsis muaj ib yam dab tsi yuav cheem tau kom koj tsis ua kev cai raus dej.

Rov Tham Dua

• Koj yuav tsum paub Vajlugkub ntau npaum li cas koj mam li ua tau kev cai raus dej?

• Ua ntej koj ua tau kev cai raus dej, koj yuav tau hloov koj lub neej li cas?

• Vim li cas koj yuav tsum tsis txhob cia tej uas koj ntshai ua rau koj tsis kam ua kev cai raus dej?

TSHAWB NTXIV

Ua zoo xav seb yog vim li cas koj thiaj li xav ua kev cai raus dej.

“Koj Puas Tau Xav Ua Kev Cai Raus Dej?” (Phau Tsom Faj lub 3 Hlis Xyoo 2020)

Koj yuav ua li cas yog tias muaj dab tsi ua rau koj ua tsis tau kev cai raus dej?

“Muaj Dab Tsi Khuam Cheem Kuv Ua Tsis Tau Kev Cai Raus Dej?” (Phau Tsom Faj lub 3 Hlis Xyoo 2019)

Ib tug txiv neej ua li cas, nws thiaj li kov yeej nws tej teeb meem thiab ua kev cai raus dej?

‘Koj Tseem Yuav Tos Ua Kev Cai Raus Dej Ua Dab Tsi?’ (1:10)

Thaum xub thawj, ib tug txiv neej hu ua Atas (Ataa) ntshai ua kev cai raus dej. Mus saib seb ua li cas tom qab no nws thiaj xav tias nws yuav tsum ua kev cai raus dej.

Kuv Tsis Tsim Nyog Tau Tej Koob Hmoov No (7:21)