ZAJ KAWM 11

Kub Siab Lug Qhia

Loos 12:11

LUB NTSIAB LUS: Kub siab lug qhia thiaj rub tau tibneeg lub siab los coj raws li Vajtswv lub siab nyiam.

Yuav tsum raug koj lub siab ua ntej. Thaum koj npaj ib zaj lus qhuab qhia twg, ua tib zoo xav seb lub ntsiab koj qhia tseem ceeb npaum li cas tiag. Lub ntsiab ntawd yuav tsum cog ruaj rau koj lub siab ua ntej. Thaum koj paub lub ntsiab zoo lawm ces koj yuav qhia tau tawm hauv nruab siab tuaj.
Paub cov uas koj qhia. Ua tib zoo xav li no: Cov nqe Vajlugkub uas kuv yuav nyeem pab tau lwm tus li cas? Zaj uas kuv qhia yuav txhawb tau lawv li cas? Tom qab ntawd, nrhiav tswvyim los qhia, lawv thiaj pom tias tej uas koj qhia muaj nuj nqes rau lawv.
Muaj siab zim qhia. Kub siab lug qhia, ua ntsej muag luag ntxhi lawv thiaj paub tias koj xav pab lawv tiag. Piav tes kom hauj sim xwb, txhob piav tes heev heev.

Xav txog cov neeg uas koj qhia. Nyob rau tej koog yog yus piav tes heev dhau ces yuav siab lwm tus, yuav ua rau lawv xav luag lossis saib yus txhais tes lawm xwb. Hauv tej koog no, hloov suab thiab ua lub ntsej muag luag ntxhi kom lawv pom tias koj kub siab lug qhia. Piav tes kom zoo saib xwb. Piv txwv li no, yog koj tham txog Yehauvas ces tsa tes rau saum ntuj. Thaum koj yuav tham tej ntsiab lus tseem ceeb, qhia kom muaj ceem zog thiaj rub tau lawv lub siab xav khaws coj mus siv. Tiamsis yog tag nrho koj zaj lus qhia ho muaj ceem dhau lawm, ntshe lawv yuav nkees mloog.