Tej Twj Siv Is Taws Nej Muaj Peevxwm Hloov Tau Peb Txojkev Xav
Txojkev kawm yeej tsis muaj hnub xaus vim peb yuav tau kawm ntawv, kawm ua haujlwm lossis kawm ua lwm yam. Tej koos pis tawj thiab tej twj siv Is Taws Nej yeej pab tau peb heev. Niaj hnub no, yog peb xav paub txog yam twg los yoojyim dua yav tas los. Peb nyob hauv tsev kawm xwb los yeej tau.
Tiamsis yog peb siv tej twj no heev dhau lawm yuav ua rau peb . . .
tsis nyiam nyeem ntawv.
ua tsis tsheej ib txoj haujlwm twg.
laj nyob heev thaum peb nyob ib leeg.
TEJ UAS KOJ YUAV TSUM PAUB
NYEEM NTAWV
Cov uas niaj hnub kov lawv tej twj ntawm tes yuav ua tsis tau siab ntev nyeem ntaub nyeem ntawv. Lawv tsuas muab tej uas lawv nyeem saib ib muag tsuag tsuag kom tau lub ntsiab xwb.
Yog peb xav nyeem ntawv kom tau lub ntsiab xwb ces peb saib kiag ib muag xwb los yeej tau. Tiamsis yog peb ua li no tas li ces peb yuav khaws tsis tau ib yam dabtsi tseem ceeb los pab peb.
MUAB XAV LI NO: Thaum koj nyeem ntawv, koj puas ua siab ntev nyeem kom tag ib zaj?—PAJLUG 18:15.
UA TSIS TSHEEJ
Ib txhia xav tias yog lawv muaj tej twj ntawm tes ces yuav ua rau lawv thooj txhij ua tau ob peb yam. Zoo li thaum ib tug ke kawm ntawv ke tham xov tooj. Qhov tseeb tiag peb ua tsis tau ob peb yam ua ke li ntawd. Yog peb ua ob peb yam ua ke ces peb yuav ua tsis tau ib yam zoo hlo li.
Ib tug ntxhais hluas hu ua Kales (Grace) tau hais tias: “Yog peb ua ib yam tag mam ua ib yam, peb thiaj yuav tsis ua yam ub yam no yuam kev. Thiab thaum kawg peb thiaj li yuav kaj siab. Yog peb ua txoj haujlwm twg xav txog txoj ntawd xwb, txhob mus xav txog lwm txoj.”
MUAB XAV LI NO: Yog peb ke kawm ntawv ke ua lwm yam peb puas yuav nco tej uas peb kawm?—PAJLUG 17:24.
LAJ NYOB
Ib txhia thaum lawv nyob lawv ib leeg lawv tsis pom qab nyob, lawv thiaj kov lawv tej twj ntawm tes. Ib tug pojniam hu ua Aulivia (Olivia) hais tias: “Kuv twb nyob tsis taus li 15 feeb kuv twb mus kov xov tooj lossis tso TV saib lawm.”
Tiamsis thaum yus nyob yus ib leeg yus thiaj yuav muaj sijhawm muab txhua yam los ua tib zoo xav. Ua li ntawd, yus thiaj li yuav nkag siab zoo txog yam ub yam no. Qhov no tsis yog zoo rau cov laus xwb, yeej zoo rau cov hluas thiab.
MUAB XAV LI NO: Thaum koj nyob koj ib leeg koj puas siv lub sijhawm ntawd los ua tib zoo xav?—1 TIMAUTES 4:15.
KOJ YUAV TAU UA LI CAS
TSHUAJ KOJ TUS KHEEJ
Tej twj ntawm tes pab tau koj li cas? Tej twj ntawd yuav cuam tshuam tau koj txojkev kawm li cas?
VAJLUGKUB TEJ HAUV PAUS NTSIAB LUS: “Tuav rawv koj lub tswvyim thiab kev txawj ntse cia.”—PAJLUG 3:21.