Saib Koj Tus Kheej Rau Nqi

VIM LI CAS HO TSEEM CEEB?

Cov uas saib lawv tus kheej rau nqi, ua taus siab loj thaum ntsib teeb meem. Lawv tsis tsum yooj yim.

Cov neeg tshawb fawb pom tias cov uas saib lawv tus kheej tsis rau nqi, nquag muaj kev txhawj xeeb, kev nyuaj siab, thiab muaj qhov uas tsis nqhis zaub mov los sis noj ntau dhau. Kuj yooj yim rau lawv quav yeeb, quav tshuaj, quav cawv thiab.
Cov uas saib lawv tus kheej rau nqi tsis muab lawv piv rau lwm tus. Qhov no pab tau lawv muaj kev haum xeeb thiab ntaus tau phooj ywg. Hos cov uas saib lawv tus kheej qis qis, ua nyuaj rau luag lwm tus cog phooj ywg nrog lawv.
Txawm yuav nyuaj npaum twg los, cov uas saib lawv tus kheej rau nqi yeej ua tau lub siab tus yees. Lawv tsis cia tej lawv ua yuam kev tav tau lawv txoj hau kev kom lawv ncav tsis cuag lawv lub hom phiaj. Tiam sis cov uas muab lawv tus kheej tso qis qis, thaum muaj ib yam teeb meem me me xwb los cuag li loj heev. Qhov no yuav ua rau lawv tsum, tsis kam peem tiag.

KOJ UA TAU LI CAS?

Cog phooj ywg nrog cov uas txhawb tau koj. Nrog cov neeg uas saib taus koj, muaj lub siab hmov tshua txog koj, thiab xav pab txhawb nqa koj.

‘Tej phooj ywg twb txawj sib hlub txhua lub sij hawm. Yog kwv tij tsis paub sib pab thaum muaj kev txom nyem yuav zoo dab tsi?’—Pajlug 17:17.

Pab lwm tus. Yog tias koj ua lub siab mos siab muag pab luag lwm tus, txawm luag pauj tsis tau rov rau koj thiab tsis pom koj tes hauj lwm los yeej ua rau koj muaj kev zoo siab.

“Thaum yus pub rau luag, yus zoo siab dua li thaum luag pub rau yus.”—Tes Hauj Lwm 20:35.

Pab koj cov me nyuam kom lawv saib lawv tus kheej rau nqi. Ib qho uas pab tau koj cov me nyuam kom lawv saib lawv tus kheej rau nqi, yog thaum koj cia lawv sim daws lawv li teeb meem. Qhov uas cia me nyuam ua li ntawd, yuav pab tau lawv xyaum thev taus thiab txawj daws teeb meem. Thaum lawv xyaum ua li no, yuav pab tau lawv saib lawv tus kheej rau nqi, thiab pab tau lawv thaum lawv loj tiav niam tiav txiv.

‘Qhia me nyuam kom paub ua nws lub neej, nws yuav nco ntsoov tej lus ntawd mus tas nws sim neej.’—Pajlug 22:6.

Yehauvas ib tug Tim Khawv qhia Vajlugkub rau ib tug poj niam hauv chaw haus kas fes.

YEHAUVAS COV TIM KHAWV UA LI CAS LOS PAB?

Peb tej kev sib txoos thiab kev kawm Vajlugkub pab tau tib neeg lub neej, thiab pab kom lawv saib lawv tus kheej muaj nqis.

KEV SIB TXOOS

Peb muaj kev sib txoos txhua lub lim tiam. Peb tuaj mloog tej lus qhuab qhia thiab kawm tej lus cob qhia hauv phau Vajlugkub. Peb tej kev sib txoos yog tuaj koom dawb xwb, leej twg xav tuaj koom los tau huv tib si. Tom peb tej kev sib txoos koj yuav kawm tias . . .

vim li cas koj muaj nqis rau Vajtswv
lub neej yeej muaj qab hau
yuav cog kev phooj ywg kom ruaj khov li cas

Koj yeej nrhiav tau cov phooj ywg tseeb uas ‘mob siab’ txog koj.—1 Kauleethaus 12:25, 26.

Yog xav paub ntxiv txog peb cov kev sib txoos, mus saib zaj yeeb yaj kiab luv luv hauv jw.org/hmn hu ua Mus Ua Dabtsi Tom Tsev Nceeg Vaj?

KEV KAWM VAJLUGKUB

Peb qhia Vajlugkub dawb xwb. Peb muab phau ntawv Nyob Kaj Siab Lug Mus Ib Txhis los qhia, tus qhia thiab tus kawm yeej sib tham mus mus los los. Phau ntawv no muaj tej nqe Vajlugkub qhia tsi ntsees txog lub ntsiab, muaj pov thawj, muaj lus nug, muaj yeeb yaj kiab, thiab muaj duab. Txoj kev kawm Vajlugkub pab tau tib neeg lub neej thiab pab lawv pom tias lawv muaj nqis.

Yuav kom koj paub tias kev kawm Vajlugkub nrog Yehauvas Cov Tim Khawv yeej pab tau koj lub neej tiag, mus saib zaj yeeb yaj kiab luv luv hauv jw.org/hmn hu ua Kawm Vajlugkub Ua Dabtsi?