Salamo

52 Goada tauna e, dahaka dainai oi be emu kara dikadia dainai oi heagi?+

Dirava ena lalokau* be nega ibounai ia noho.+

 2 Emu malana be reisa mai matana bamona,+

Dika ia palanilaia bona ia koikoi.+

 3 Dika oi ura henia bada, to namo oi ura henia lasi,

Oi koikoi momo, to hereva momokani oi gwauraia lasi. (Sela)

 4 Koikoi momo malana e,

Oi be hadikaia herevadia ibounai oi ura henia bada!

 5 Unai dainai Dirava ese oi do ia hadikaia ela bona hanaihanai.+

Ia ese oi do ia veria siri haraga bona emu palai rumana amo oi do ia kokia.+

Ia ese mauri taudia edia tano amo oi do ia kokia momokani.+ (Sela)

 6 Kara maoromaoro taudia ese do idia itaia bona do idia hoa bada,+

Bona oi dekenai do idia kiri, do idia gwau:+

 7 “Inai tauna ese Dirava be ena heau mauri gabuna* ai ia halaoa lasi,+

To ia be ena taga bada dekenai ia abidadama+

Bona ena palani dikadia dekenai ia tabekau.”

 8 To Dirava ena ruma lalonai lau be olive au namona ta bamona do lau noho.

Lau be Dirava ena lalokau* dekenai lau abidadama,+ ela bona hanaihanai.

 9 Lau ese oi do lau hanamoa hanaihanai, badina oi ese kara ta oi karaia vadaeni.+

Oi idia badinaia taudia vairanai,

Lau be emu ladana dekenai do lau abidadama,+ badina unai kara be namo.