Salamo

6 Iehova e, oi badu neganai, lau oi sisiba henia lasi,

Bona oi badu dikadika neganai, egu kara oi hamaoromaoroa lasi.+

 2 Iehova e, lau oi hebogahisi henia, badina lau manoka noho.

Iehova e, lau dekenai goada oi henia,+ badina egu turia idia hisihisi noho.

 3 Oibe, lau be lau laloa momo,+

Bona Iehova e, oi lau nanadaia, egu hisihisi be edena negai do ia ore?+

 4 Iehova e, oi giroa mai bona lau oi hamauria,+

Emu lalokau* dainai lau oi hamauria.+

 5 Badina mase taudia be oi idia herevalaia* lasi,

Mase Gurina* lalonai+ daika ese oi do ia hanamoa?

 6 Lau lalohisihisi noho dainai lau manoka vadaeni,+

Hanuaboi ibounai lalonai lau taitai dainai, egu bedi be mata ranu amo ia paripari,

Bona lau taitai dainai egu helai gauna ia paripari momokani.+

 7 Lau davaria metau gaudia idauidau dainai lau lalometau bada,+

Lau idia hahisia taudia dainai egu matana ena goada ia ore.

 8 Kara dika umui karaia taudia ibounai e, lau amo umui raka siri,

Badina Iehova ese egu taitai do ia kamonai.+

 9 Iehova ena lalonamo abia totona lau noinoi neganai, do ia kamonai,+

Iehova ese egu guriguri do ia abia dae.

10 Egu inai taudia ibounai be do idia hemarai bona lalomanoka,

Idia be dika bada do idia davaria haraga.+