Revareva Ginigunana Tesalonika Taudia Dekenai
3 Vadaeni emui sivarai kamonai totona ai naria daudau dainai, ai laloa namona be Atena dekenai do ai noho,+ 2 bona umui dekenai iseda tadikaka, Timoteo,+ Dirava ena hesiai tauna* bona Keriso ena sivarai namona ia harorolaia tauna do ai siaia. Ia ese emui abidadama ia hagoadaia bona durua totona, 3 dika hisihisi idauidau ese umui ta ena abidadama ia hamanokaia.* Badina umui diba, unai gaudia be ita dekenai do idia vara.+ 4 Badina guna umui ida ai noho neganai, umui ai hamaoroa ita be hisihisi do ita davaria, bona umui diba, unai gaudia be ita dekenai idia vara vadaeni.+ 5 Unai dainai umui amo sivarai ta lau kamonai lasi neganai, Timoteo be umui dekenai lau siaia, Dirava umui badinaia noho karana ena sivarai lau kamonai totona.+ Badina dika Hedibagani Tauna+ ese dala haida ai umui ia hamorua, bena emai gaukara be anina lasi.
6 To harihari Timoteo be umui amo ia giroa mai,+ bona emui Dirava badinaia karana bona lalokau ena sivarai namona ia gwauraia. Ia gwau umui be hanaihanai mai moale ida ai umui laloa, bona umui ura dikadika ai umui itaia, ai ura dikadika umui ai itaia hegeregerena. 7 Unai dainai tadikaka e, ena be ai dabu bona dagedage ai davaria, to emui Dirava badinaia karana ese ai ia hagoadaia,+ 8 hari ai kamonai umui be Lohiabada dekenai umui gini goada noho dainai, ai danu ai goada lou.* 9 Dirava vairanai umui dainai ai moale noho, vadaeni edena bamona umui totona Dirava ai tanikiu henia diba? 10 Dina bona hanuaboi ai guriguri goadagoada umui* do ai itaia bona emui abidadama ena manoka gaudia ai hagoadaia totona.+
11 Mani Dirava iseda Tamana bona iseda Lohiabada Iesu ese dala idia kehoa umui dekenai ai mai totona. 12 Ma danu, mani Lohiabada ese emui lalokau, umui ta ta dekenai bona taunimanima ibounai dekenai do ia habadaia,+ oibe do ia habadaia, ai ese umui ai lalokau henia bada hegeregerena. 13 Unai amo ia ese emui kudouna do ia hagoadaia bona iseda Lohiabada Iesu be ena helaga taudia ibounai ida do ia mai negana ai,+ umui be Dirava iseda Tamana vairanai do umui helaga bona kerere lasi.+