Iosua

9 Ioridane ena west kahana+ ena ororo gabudia bona Sepala bona Davara Badana* ena kone kahana ibounai+ bona Lebanona ena vairanai idia noho king ibounai, unai be Hiti taudia, Amoro taudia, Kanana taudia, Perisi taudia, Hivi taudia, bona Iebusu taudia edia king, ese unai sivarai idia kamonai neganai,+ 2 idia ibounai idia haboua, Iosua bona Israela taudia idia tuari henia totona.+

3 Gibeona ai idia noho taudia+ danu be Iosua ese Ieriko+ bona Ai+ dekenai ia karaia gaudia edia sivarai idia kamonai. 4 Vadaeni aonega karana ta idia karaia, edia puse dikadia lalonai aniani idia udaia bona doniki latanai idia atoa bona edia wain puse gunadia danu, idia pou bona idia turia vadaeni gaudia unai. 5 Danu idia ese idia turia lou sandolo gunadia be edia aena dekenai idia karaia, bona dabua gunadia idia karaia. Idia abia paraoa ibounai be kakoro bona makohi gaudia. 6 Bena Gilegala ena kamepa ai Iosua dekenai idia lao+ bona ia bona Israela taudia dekenai idia gwau: “Ai be daudau tanona amo ai mai. Mani ai ida gwaubou ta umui karaia.” 7 To Israela taudia be Hivi taudia dekenai idia gwau:+ “Reana umui be ai kahirakahira umui noho. Unai dainai edena bamona umui ida gwaubou ta ai karaia diba?”+ 8 Idia be Iosua dekenai idia gwau: “Ai be emu hesiai taudia.”*

Bena Iosua be idia dekenai ia gwau: “Umui be daidia, bona edeseni amo umui mai?” 9 Unai neganai ia dekenai idia gwau: “Ai, emu hesiai taudia, be Iehova emu Dirava ena ladana dainai daudau momokani tanona amo ai mai,+ badina iena ladana bada bona Aigupito ai ia karaia gaudia ibounai edia sivarai ai kamonai vadaeni.+ 10 Bona Ioridane ena kahana ma ta* ai idia noho Amoro taudia edia king rua, Hesebona ena king Sihona+ bona Basana ena king Oga,+ Asataroto ai ia noho king unai, dekenai ia karaia gaudia edia sivarai ai kamonai danu. 11 Bena emai tau badadia bona emai tano taudia ibounai ese ai idia hamaoroa, ‘Inai laolao totona aniani umui abia bona idia hedavari henia totona umui lao. Idia umui hamaoroa: “Ai be emui hesiai taudia ai do ai lao.+ Mani ai ida gwaubou ta umui karaia.”’+ 12 Umui dekenai ai mai totona emai ruma ai rakatania neganai, ai abia paraoa be idia siahu. To hari umui itaia, inai paraoa be idia kakoro bona makohi vadaeni.+ 13 Bona inai wain puse ai hahonua neganai idia be matamata, to hari idia pou vadaeni.+ Bona inai laolao daudauna dainai, emai dabua bona sandolo idia dika.”

14 Bena Israela tatau ese edia aniani haida idia abia idia sekea totona, to Iehova ena lalohadai idia tahua lasi.+ 15 Vadaeni Iosua be idia ida maino ia karaia+ bona idia ida gwaubou ta ia karaia, idia ia hamasea lasi totona, bona iduhu gunalaia taudia be idia gwauhamata unai idia badinaia totona.+

16 Idia ida gwaubou ta idia karaia bona dina toi murinai idia kamonai, unai tatau be idia kahirakahira idia noho. 17 Bena Israela taudia idia lao bona dina ihatoina ai edia siti dekenai idia ginidae. Edia siti be Gibeona,+ Kepira, Beroto, bona Kiriata-iearimi.+ 18 To Israela taudia ese idia tuari henidia lasi, badina edia iduhu gunalaia taudia be idia dekenai Iehova, Israela ena Dirava ena ladana ai gwauhamata metauna idia karaia.+ Vadaeni Israela taudia ibounai be iduhu gunalaia taudia dekenai idia maumau matamaia. 19 Bena iduhu gunalaia taudia ibounai be Israela taudia ibounai dekenai idia gwau: “Ita be Iehova, Israela ena Dirava ena ladana ai idia dekenai ita gwauhamata, unai dainai ita be maoro lasi idia ita tuari henia totona. 20 Ita be inai bamona do ita karaia: Unai gwauhamata dainai, idia do ita hamasea lasi, unai amo Dirava ena badu be ita latanai do ia diho lasi.”+ 21 Bona iduhu gunalaia taudia be ma idia gwau: “Idia umui hamasea lasi, to idia be Israela taudia ibounai totona au do idia gogoa bona ranu do idia utua.” Iduhu gunalaia taudia be idia dekenai unai gwauhamata idia karaia vadaeni.

22 Iosua ese idia ia boiria bona ia gwau: “Dahaka dainai ai umui koia bona umui gwau, ‘Ai be tano daudau amo ai mai,’ to umui be ai kahirakahira umui noho?+ 23 Hari lau ese umui lau gwauraia dika,+ bona umui be hanaihanai igui hesiai gaukara do umui karaia, bona egu Dirava ena ruma totona au do umui gogoa bona ranu do umui utua.” 24 Iosua dekenai idia gwau: “Unai bamona ai karaia, badina ai, emu hesiai taudia, ai kamonai Iehova emui Dirava ese ena hesiai tauna Mose ia oda henia, umui dekenai inai tano ibounai do ia henia bona inai tano taudia ibounai be emui vairanai do idia hadikaia ore.+ Vadaeni ai be umui dainai ai gari,+ dika ai umui hamasea.+ 25 Hari ai be emu siahu henunai ai noho. Edena kara oi laloa ia namo bona maoro, unai hegeregerena ai dekenai do oi karaia.” 26 Bona Iosua ese idia dekenai unai bamona ia karaia. Ia ese Israela taudia edia imana amo idia ia hamauria, bona Israela taudia ese idia hamasea lasi. 27 To unai dina ai Iosua ese idia be au gogoa taudia bona ranu utua taudia ai ia halaoa,+ Israela taudia totona bona Iehova ena boubou patana totona, unai be Dirava ese ia abia hidi gabuna ai,+ bona unai idia karaia ema bona hari.+