Samuela Ginigunana

24 Saulo ese Filistia taudia ia tuari henia bona ia giroa lou murinai, haida ese ia idia hamaoroa: “Itaia, Davida be Ene-gedi ena taunimanima lasi gabuna dekenai ia noho.”+

2 Vadaeni Saulo ese Israela ibounai amo tatau 3,000 ia abia hidi bona idia lao Davida bona ena tatau idia tahua totona, unai be nanigosi idia noho nadi gabuna dekenai. 3 Saulo be dala badinai idia noho mamoe magudia* dekenai ia mai, unuseniai kohua ta ia noho, bona ia be unuseni ia vareai ia mei totona, to Davida bona ena tatau be kohua ena murina kahana ai idia helai noho.+ 4 Bona Davida ena tatau be ia dekenai idia gwau: “Iehova be inai dina ai oi dekenai ia hereva noho, ‘Itaia, lau ese emu inai tauna be emu imana ai lau atoa,+ bona oi ura ia dekenai dahaka oi karaia be oi karaia diba.’” Vadaeni Davida ia toreisi bona hehuni dalanai Saulo ena kouti latana ena rimuna ia utua oho. 5 To unai murinai Davida ena lalomamina ese ia ia kota henia noho,+ badina ia ese Saulo ena kouti latana ena rimuna ia utua oho. 6 Ia be ena tatau dekenai ia gwau: “Egu lohia dekenai inai bamona kara lau karaia be namo lasi, badina ia be Iehova ena horoa tauna. Bema Iehova ena horoa tauna lau tuari henia, Iehova ese unai do ia abia dae lasi.”+ 7 Vadaeni Davida ese unai hereva amo ena tatau ia koudia, bona idia dekenai maoro ia henia lasi Saulo idia tuari henia totona. To Saulo be kohua amo ia raka-lasi bona ia lao.

8 Bena Davida ia toreisi bona kohua amo ia raka-lasi bona Saulo ena murina amo ia boiboi: “Lauegu lohia bona king e!”+ Saulo ia giroa neganai, Davida ia tui diho bona ena vairana be tano dekenai ia atoa. 9 Davida be Saulo dekenai ia gwau: “Haida idia gwau, ‘Davida be dala ia tahua oi ia hamasea totona.’ Dahaka dainai unai taudia edia hereva oi kamonai henia?+ 10 Hari dina emu matana amo oi itaia, kohua lalonai Iehova ese oi be egu imana dekenai ia henia. To ta be oi alaia totona ia hereva neganai,+ lau ese oi lau hebogahisi henia bona lau gwau, ‘Egu lohia lau tuari henia lasi, badina ia be Iehova ena horoa tauna.’+ 11 Bona tamagu e, itaia, egu imana dekenai emu kouti latana ena rimuna ia noho. Emu kouti ena rimuna lau utua oho neganai, oi lau hamasea diba, to unai lau karaia lasi. Hari oi itaia bona oi laloparara, lau ura lasi oi lau hamasea eiava lau gwau-edeede henia, bona oi dekenai lau kara dika lasi,+ to oi be lau oi tahua noho oi hamasea totona.+ 12 Mani Iehova ese oi bona lau ia hahemaoro henia,+ bona lau dainai Iehova ese emu dika davana ia henia,+ to lau ese oi do lau tuari henia lasi.+ 13 Idaunegai aonega herevana ta ia gwau, ‘Kara dika tauna amo kara dika ia vara,’ to lau ese oi dekenai dika ta do lau havaraia lasi. 14 Israela ena king be lau murinai ia heau mai, a? To lau be daika? Lau be ia mase vadaeni sisia bamona bona lau be sei ta bamona, ani?+ 15 Mani Iehova be iseda hahemaoro tauna, ia ese oi bona lau huanai hahemaoro do ia karaia, bona ia be lau totona do ia hereva,+ bona lau do ia hahemaoro henia bona emu imana amo lau do ia hamauria.”

16 Davida ese Saulo dekenai unai hereva ia gwauraia murinai, Saulo ia gwau: “Egu natuna Davida e, unai be oiemu gadona, a?”+ Bona Saulo ia taitai bada matamaia. 17 Bona Davida dekenai ia gwau: “Oi be kara maoromaoro tauna, to lau be lasi, badina oi ese lau oi kara namo henia, to lau be oi dekenai kara dika lau karaia.+ 18 Oibe, Iehova ese lau be emu imana dekenai ia atoa neganai, lau oi hamasea lasi, unai kara namona be hari dina lau dekenai oi gwauraia.+ 19 Badina edena tauna ese ena inai tauna ia davaria bona mai bero lasi ida ia siaia lao? Hari dina lau dekenai oi karaia karana dainai, Iehova ese oi do ia hanamoa.+ 20 Bona lau diba momokani oi be king ai do oi lao,+ bona Israela basileia be emu imana ai do ia gini goada noho. 21 Vadaeni Iehova ena ladanai lau oi gwauhamata henia,+ oi ese lau amo idia vara bese taudia do oi hadikaia ore lasi bona egu tamana ena bese lalonai egu ladana do oi kokia lasi.”+ 22 Vadaeni Davida be Saulo ia gwauhamata henia, unai murinai Saulo be ena ruma dekenai ia lao.+ To Davida bona ena tatau be taunimanima idia lao lasi gabuna dekenai idia daekau lao.+