Samuela Ginigunana

30 Dina ihatoina ai, Davida bona ena tatau be Sikilaga+ dekenai idia ginidae neganai, Amaleka taudia+ ese saut kahana* bona Sikilaga hanuana idia hadikaia, bona Sikilaga taudia idia tuari henia bona hanua be lahi amo idia gabua vadaeni. 2 Idia ese hahine ibounai idia abia mauri,+ oibe, unai hanua dekenai idia noho taudia ibounai, matamata bona buruka, idia abia mauri. Idia ese tau ta idia alaia lasi, to idia abidia mauri bona idia lao. 3 Davida bona ena tatau be siti dekenai idia ginidae neganai, idia itaia siti be lahi ese ia gabua ore, bona edia adavadia, edia natudia memero bona edia natudia kekeni idia abia mauri. 4 Vadaeni Davida bona ia ida idia noho tatau idia taitai badabada matamaia, ela bona edia goada ia ore, bona idia tai noho diba lasi. 5 Davida ena adavana ruaosi danu idia abia mauri, unai be Ieserele hahinena Ahinoama, bona Abigaila, Karamele tauna Nabala ena vabu.+ 6 Davida ia lalometau bada, badina tatau idia ura nadi amo ia idia hodoa, oibe, idia ibounai idia badu dikadika, badina edia natudia memero bona kekeni idia noho lasi. To Davida be ena Dirava Iehova amo goada ia abia.+

7 Bena Davida be hahelaga tauna Abiatara,+ Ahimeleka ena natuna, dekenai ia gwau: “Mani epodi* be iniseni oi mailaia.”+ Vadaeni Abiatara ese epodi be Davida dekenai ia mailaia. 8 Davida ese Iehova ia noia,+ ia gwau: “Inai dadidadi tuari oreana murinai do lau lao, a? Idia do lau dogoatao, a?” Unai neganai Davida dekenai Ia gwau: “Idia murinai oi lao, badina oi ese idia do oi dogoatao, bona emui taunimanima do oi hamauria.”+

9 Davida be maoromaoro ia ida idia noho tatau 600 ida ia lao,+ bona idia lao ela bona Besoro Koura, bona idia haida be unuseni idia noho. 10 Bona Davida be tatau 400 ida ia lao noho, to tatau 200 be idia hesiku bada dainai Besoro Koura idia hanaia lasi.+

11 Idia lao noho lalonai, idia ese Aigupito tauna ta idia itaia, bona Davida dekenai ia idia abia lao. Bona ia dekenai aniani bona ranu idia henia. 12 Danu, fig kakoro amo idia karaia keke sisina bona greips huahua keke rua be ia dekenai idia abia mai. Ia aniani murinai, iena goada ia abia lou, badina dina toi bona hanuaboi toi lalonai gau ta ia ania bona inua lasi. 13 Vadaeni Davida ese ia nanadaia: “Oi be daika ena hesiai tauna, bona edeseni amo oi mai?” Ia haere, ia gwau: “Lau be Aigupito tauna, Amaleka tauna ta ena igui hesiai tauna, to dina toi gunanai lau gorere dainai, egu biaguna ese lau ia rakatania. 14 Ai ese Kereti taudia+ edia saut kahana bona Iuda taudia edia tano bona Kaleba+ ena saut kahana ai hadikaia, bona Sikilaga be lahi amo ai gabua.” 15 Unai neganai Davida be ia dekenai ia gwau: “Inai dadidadi tuari oreana dekenai lau oi hakaua lao diba, a?” Ia haere: “Bema Dirava ena vairanai lau dekenai oi gwauhamata, oi ese lau do oi hamasea lasi bona egu biaguna dekenai lau do oi henia hanai lasi, lau ese inai dadidadi tuari oreana dekenai oi do lau hakaua lao.”

16 Vadaeni dadidadi tuari oreana idia noho gabudia dekenai Davida ia hakaua lao, idia be tano kahana ibounai dekenai idia noho, idia aniani bona inuinu bona moale noho, badina Filistia tano bona Iuda tano amo gau momo idia abia. 17 Bena daba momokani amo ela bona dina ia diho neganai, Davida ese ia aladia mase. Tau ta ia heau mauri lasi,+ to tatau 400 sibona, idia be kamelo edia latanai idia guia bona idia heau. 18 Amaleka taudia ese idia abia gaudia ibounai be Davida ese ia abia lou,+ bona ena adavana ruaosi ia hamauria. 19 Edia gau ta ia boio lasi, maragina amo ela bona badana. Idia ese edia natudia memero bona kekeni idia abia lou, bona tuari amo idia abia gaudia danu.+ Oibe, Amaleka taudia ese idia abia gaudia ibounai be Davida ese ia abia lou. 20 Vadaeni Davida ese Amaleka taudia amo mamoe bona boromakau ibounai ia abidia, bona edia animal be murinai idia raka bona idia abidia animal be vaira kahanai idia hakaudia. Idia gwau: “Inai be Davida ese tuari amo ia abia gaudia.”

21 Bena Davida be Besoro Koura ai ia rakatanidia tatau 200 dekenai ia giroa lou, idia be idia hesiku bada dainai Davida ida idia lao lasi.+ Vadaeni idia raka-lasi bona Davida bona ia ida idia lao taudia idia hedavari henia. Bona Davida be idia kahirakahira ia lao bona idia ia hanamoa. 22 To Davida ida idia lao taudia huanai idia noho tatau dikadia idia gwau: “Idia be ita ida idia lao lasi dainai, tuari amo ita abia gaudia ta be idia dekenai do ita henia lasi, to idia ta ta ese ena adavana bona natudia sibona do ia abia bona do ia lao.” 23 To Davida ia gwau: “Lauegu tadikaka e, Iehova ese ita dekenai ia henia gaudia dainai inai bamona do umui karaia lasi. Ia ese ita ia gimaia bona iseda imana dekenai ita idia tuari henia dadidadi oreana ia atoa.+ 24 Inai hereva dekenai daika be umui ida do ia lalotamona? Tuari totona ia diho lao tauna bona kohu ia naria tauna be ahuna tamona do idia abia.+ Oibe, ibounai be ahuna tamona do idia abia.”+ 25 Bona unai dina amo, Israela ai unai taravatu idia badinaia.

26 Davida be Sikilaga dekenai ia giroa lou neganai, ia ese tuari amo ia abia gaudia haida be Iuda ena tau badadia dekenai ia siaia, ena turadia unai, bona ia gwau: “Inai be emui harihari gaudia, Iehova ena inai taudia amo lau abia gaudia unai.” 27 Bona inai harihari gaudia be Betele taudia,+ Negebe tano ai idia noho Ramoto taudia, bona Iatiri taudia dekenai ia siaia,+ 28 bona Aroere taudia, Sipimoto taudia, Esetemoa taudia,+ 29 Rakala taudia, Ierahamele+ bona Kene taudia+ edia siti ai idia noho taudia, 30 Horoma taudia,+ Borasana taudia, Ataka taudia, 31 Heberona taudia,+ bona vaia Davida bona ena tatau idia lao henia gabudia dekenai danu ia siaia.