Sivarai Iharuana

2 Vadaeni Solomona ese oda ia henia Iehova ena ladana totona+ bona ia sibona ena basileia totona ruma ta do idia haginia.+ 2 Solomona ese nadi utua taudia 80,000 ia abidia bona ororo amo unai nadi do idia huaia diho taudia 70,000 danu.+ Bona gaukara naria taudia be 3,600.+ 3 Danu, Solomona ese Turo ena king Hirama dekenai hereva ia siaia,+ ia gwau: “Guna egu tamana Davida ese ruma ia haginia totona, ia dekenai sida audia oi siaia hegeregerena, lau dekenai danu oi karaia.+ 4 Unai dainai lau ura Iehova egu Dirava ena ladana totona ruma ta lau haginia, ia dekenai do lau hahelagaia, iena vairanai bonana namo muramura do lau gabua,+ bona paraoa helagana*+ bona gabua bouboudia do lau henia, daba ai bona adorahi momokani ai,+ Sabati dinadia ai,+ hua matamata ta ta ai,+ bona Iehova Dirava ena aria negadia ai.+ Inai be Israela taudia ese do idia karaia ela bona hanaihanai. 5 Lau haginia rumana be do ia bada herea, badina iseda Dirava be dirava ibounai ia hereaia. 6 Bona daika ia hegeregere Dirava totona ruma ta ia haginia? Badina guba bona guba ena ataiai momokani gabuna be hegeregere lasi Dirava ia noho totona,+ bona lau be daika ia totona ruma ta do lau haginia? Lau karaia diba gauna be, ruma ta do lau haginia iena vairana ai gabua bouboudia lau henia totona. 7 Vadaeni lau dekenai gaukara diba momo tauna ta oi siaia mai, ia be golo, siliva, kopa,+ auri, wulu pepol, kotini varo kakakaka, bona wulu varo bulu gaukaralaia daladia bona herahera gaudia idauidau koroa daladia ia diba. Bona Iuda bona Ierusalema ai gaukara idia diba namonamo taudia ida do ia gaukara, egu tamana ese idia ia abia hidi vadaeni.+ 8 Bona lau dekenai Lebanona ena sida timba, iunipa timba,+ sendolwud timba+ mani oi siaia mai, badina lau diba emu hesiai taudia be Lebanona ena au utua daladia idia diba namonamo.+ Lauegu hesiai taudia be emu hesiai taudia ida do idia gaukara,+ 9 unai amo timba momo herea do idia hegaegaelaia, badina do lau haginia rumana be do ia bada herea. 10 Kamonai, emu hesiai taudia, au utua taudia unai, dekenai aniani do lau henia:+ Witi 20,000 kor,* bali 20,000 kor, wain 20,000 bat,* bona oela 20,000 bat do lau henia.”

11 Vadaeni Turo ena king Hirama be Solomona ia tore henia, ia gwau: “Iehova ese oi ia lalokau henia dainai, oi be edia king ai ia halaoa.” 12 Bena Hirama ia gwau: “Israela ena Dirava Iehova, guba bona tanobada ia karaia Diravana, ita hanamoa, badina King Davida dekenai aonega natuna ta ia henia,+ ia be mai ena diba bona laloparara.+ Ia ese Iehova totona bona ia sibona ena basileia totona ruma ta do ia haginia. 13 Lau be gaukara diba momo tauna ta lau siaia, ena ladana be Hurama-abi,+ 14 ia be Dano hahinena ena natuna mero, to ena tamana be Turo tauna. Ia be golo, siliva, kopa, auri, nadi, bona timba gaukaralaia daladia ia diba, bona wulu pepol, wulu varo bulu, dabua namo herea, bona kotini varo kakakaka gaukaralaia daladia ia diba danu.+ Ia be gau idauidau ia koroa diba bona laulau idauidau torea daladia ia diba.+ Ia be emu gaukara diba momo taudia bona egu lohia Davida, emu tamana unai, ena gaukara diba momo taudia ida do ia gaukara. 15 Mani emu hesiai taudia totona oi gwauhamatalaia witi, bali, oela, bona wain oi siaia mai.+ 16 Bona Lebanona ai au momo herea do ai utudia,+ oi gwauraia hegeregerena, bona do ai kwatudia hebou bona davara amo do ai abia mai Iopa dekenai,+ bona oi ese Ierusalema dekenai do oi abidia lao.”+

17 Vadaeni Solomona ese Israela ai idia noho idau tano tatau ibounai ia duahia,+ ena tamana Davida ia karaia bamona,+ unai tatau ibounai be 153,600. 18 Bena nadi utua taudia 80,000,+ ororo amo nadi do idia huaia diho taudia 70,000, bona gaukara naria taudia 3,600 ia abia hidi, idia ese taunimanima dekenai gaukara idia henia.+