Aonega Herevadia
27 Kerukeru totona oi heagi lasi,
Badina oi diba lasi unai dina ai dahaka do ia vara.+
2 Ta* ese oi ia hanamoa be namo, to oi sibona oi hanamoa lasi,
Ma haida* ese oi idia hanamoa be namo, to oi sibona emu uduna amo lasi.+
3 Nadi bona miri be idia metau,
To kavakava tauna ese ia havaraia hisihisi ese unai gaudia rua edia metau ia hereaia.+
4 Badu dikadika be dika bona badu be abata bamona,
To daika ese mama karana ia haheaukalaia diba?+
5 Ta ena kerere hamaoromaoroa totona oi sisiba henia be namo, to lalokau dainai ta oi sisiba henia lasi be kerere.+
6 Turana namona ese oi ia sisiba henia neganai be mai ena hisihisi to unai ia karaia badina oi ia lalokau henia.+
To oi ia inai henia tauna ese nega momo* oi ia kisi henia.
7 Ia bogakunu tauna be hani namo hereana ia ura henia lasi,
To hitolo tauna dekenai mamina dika gauna ena mamina be namo herea.
8 Manu ta be ena noho gabuna amo ia roho boio bamona,
Tau ta be ena ruma ia rakatania.
9 Dehoro bona bonana namo muramura ese ta ena kudouna ia hamoalea,
Unai hegeregerena mai momokani ida sisiba henia karana ese hetura karana namona ia havaraia.+
10 Namo lasi emu turana eiava emu tamana ena turana oi laloaboio,
Bona dika oi davaria negana ai namo lasi emu tadikaka korikori ena ruma oi lao,
Oi kahirakahira ia noho dekena tauna dekenai oi lao, to namo lasi daudau ai ia noho tadikaka dekenai oi lao.+
11 Egu natuna e, oi aonega bona egu kudouna oi hamoalea,+
Unai amo lau ia gwauraia dika tauna do lau haere henia.+
12 Aonega tauna ese dika ia itaia bona ia raka siri,+
To diba bada lasi tauna be ia lao noho bona dika ia davaria.
13 Bema tau ta be idau tauna ena abitorehai totona gwauhamata ia karaia, unai tau ena dabua oi abia,
Bema ia ese idau hahine totona gwauhamata ia karaia, unai tau ia gwauhamatalaia gauna oi abia.+
14 Bema tau ta be daba momokani ai mai gado bada ida ena turana dekenai hanamoa ia henia,
Ia gwauraia hereva amo ia be sibona ia hadikaia noho.
15 Hepapahuahu momo* hahine be medu negana ai guhi ena matu amo ia diho ranu bamona, ia doko diba lasi.+
16 Unai hahine be ta ese ia koua diba lasi, tau ta ese lai ia koua diba lasi hegeregerena,
Bona ta ese ena imana idibana amo dehoro ia dogoatao diba lasi bamona.
17 Auri ese auri ma ta ia segea bamona,
Tau ta ese ena turana ia segea.+
18 Fig auna ia naria namonamo tauna ese ena huahua do ia ania,+
Bona ena biaguna ia laloa bada tauna be hanamoa do ia abia.+
19 Ranu ai ta ese ena vairana toana ia itaia hegeregerena,
Ma haida ese emu kudouna ai ia noho gauna idia hahedinaraia.
20 Mase Gurina* bona hadikaia gabuna be idia honu diba lasi,+
Tau ta ena matana ese ia ura henia gaudia be momo, doko diba lasi.
21 Siliva bona golo be lahi badana lalonai idia havevea, idia goeva totona, unai hegeregerena+
Tau ta ese haida amo ia abia hanamoa karana be ia ia tohoa.
22 Ena be kavakava tauna oi kwadia dikadika,
Witi moia nadi amo witi idia hapatakaia bamona,
To ena kavakava karana do ia rakatania lasi.
23 Emu mamoe oreana do oi diba namonamo.
Emu mamoe oi naria namonamo.+
24 Taga be do ia noho daudau lasi,+
Bona korona be do ia noho hanaihanai lasi.
25 Rei idia mase, bona matamatadia idia tubu,
Bona ororo ai idia tubu aniani be idia haboua.
26 Mamoe natudia edia wulu amo emu dabua oi karaia,
Bona nanigosi tau haida amo tano oi hoia diba.
27 Nanigosi ena milika be do ia hegeregere, oi,
Emu ruma bese, bona emu hesiai kekenidia totona.