Dahaka Sivarai Idia Kamonai Noho?
OI URA edena bamona tanobada lalonai do oi noho? Oi ura nega vairai emu natudia edia mauri be edena bamona? Bema oi be mai emu dala nega ta do oi gorere lasi bona do oi mase lasi, unai dala do oi abia hidi, a?
Oi ese unai henanadai edena bamona do oi haerelaia? Herevana edia tomadiho o politikol lalohadai be dahaka, taunimanima momo edia ura be maino bona aniani momo tanobadana lalonai do idia noho. Idia ura hahemaoro maoromaoro tanobadana do ia mai, ia lalonai taunimanima be bese tamona bamona idia noho, bona kara gagevagageva be lasi; danu unai tanobada lalonai dala do idia badinaia lasi hegeregere taga taudia edia taravatu be idau bona ogogami taudia edia taravatu be ma idau.
Momokani, oi ura oi ese aniani momo, ruma namona, bona edukeisini namona be emu natudia oi henidia. Anina be, oi ura oi bona emu natudia be nega vairai mauri namona do umui abia. Bona bema mai emu dala, oi ura do oi gorere lasi bona emu mauri nega ena daudau do ia hegeregere emu ura gaudia bona oi tahua gaudia iboudiai do oi abia totona, bona mauri hanaihanai maino paradaisona lalonai do oi moalelaia totona.
Unai gaudia iboudiai oi abia diba. Tanobada ibounai lalonai, East Europe tanodia dekenai danu, Iehova ena Witness taudia ese unai Bible sivaraina idia harorolaia noho.
Bible ese Ia Gwauraia Helaro Namona Nega Vairai Totona
Lagani handred handred gunanai Bible ena peroveta herevadia momokanidia idia torea, bona hari iseda negai idia vara gaudia idia perovetalaia: iseda ‘tuari bona tuari sivaraidia’; iseda ‘tanobada mareremarere bona hitolo, gabu idauidau dekenai’; ‘tanobada besedia idia hisihisi, bona edia kudouna dekenai idia gari dikadika, bona taunimanima idia dara doko, tanobada dekenai idia vara gaudia dainai’; bona iseda ‘tanobada ita hadikaia bona ita hamiroa.’—Luka 21:10-33; Apokalupo 11:18.
To, unai kara iboudiai bona ma kara momo danu idia hahedinaraia goevagoeva, Dirava ese ia gwauhamatalaia tanobada matamatana be kahirakahira do ia mai. Unai ena anina be “guba matamata bona tanobada matamata,” tanobada lohiaia dalana matamatana, guba gavamanina unai, bona tanobada besena idauna ta, ‘idia dekenai kara maoromaoro sibona do ia noho.’ Anina be tanobada matamatana, ia lalonai ‘hisihisi, mase, bona taitai do idia ore momokani.’—Isaia 65:17-25; 2 Petero 3:13; Apokalupo 21:1-4.
Ia hedinarai goevagoeva, herevana mai ena ura momokani ia gaukara goadagoada, to politikol oreana ta be hegeregere lasi unai gaukara ia karaia guguru totona. Atai Herea Lohiabada Iehova Dirava sibona be mai ena ura bona mai ena siahu unai do ia karaia guguru totona. Unai badina dainai iena Natuna, Iesu Keriso, ese ia murinai idia raka taudia ia hadibadia inai bamona do idia guriguri totona: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:9, 10.
Dirava ia ura tanobada be davana bada nadi hairaina ta bamona guba ena gabu ibounai lalonai, bona ia ura maino idia ura henia tanobada besedia ese do idia noholaia. Kahirakahira, kara do ia karaia iena ura gaudia do ia havaraia totona. Unai kara ia karaia neganai, tanobada do ia hagoevaia gau mirodia bona miro havaraia gaudia iboudiai do ia kokidia totona. Miro gaudia bona tanobada idia hamiroa taudia iboudiai be tanobada amo do ia kokia. Unai murinai, daidia sibodia do idia noho? Iesu ia gwau: “Dagedage lasi taudia be idia namo, badina tanobada do idia abia.”—Mataio 5:5; Apokalupo 16:14-16.
Oi ura unai lalo-manau taudia, Dirava ena hahenamo do idia abia taudia unai, edia huanai do oi noho, a? Bema oibe, emu gabu ai idia noho Iehova ena Witness taudia oi tahudia bona oi noidia emu ruma ai oi do idia Bible stadi henia, davana lasi. Unai negai idia dekenai gwauhamata ta do oi karaia lasi bona maduna ta oi dekenai do idia henia lasi. Oi sibona dekenai “Dirava ena ura” oi hamomokania bena do oi diba “edena kara be namo, edena kara Dirava ia ura henia, bona edena kara be goeva momokani.” Bena, Dirava ena ura oi karaia.—Roma 12:2.