Edia Toana Idia Idau

IDIA laloa tanobada taudia edia hutuma ena namba do ia bada daekau bona lagani 1990 ia lao 1999 lalonai China taudia edia namba hegeregerena amo do ia bada. Tanobada ena hanua badadia dekenai unai hekwakwanai ia bada. Gabeai lagani 15 lalodiai, idia laloa tanobada ena hanua badadia taudia edia namba be nega ginigunana ai uma bona uda gabu taudia edia namba do idia hanaia. Magasin ta, International Wildlife, ia gwau tanobada ena hanua badadia idia bada idia lao neganai, idia be “hodahoda bona ranu idia hamiroa, hanua edia isedia ai idia noho uma tano namodia idia hadikaia, idia nadunadu totona bona au idia abia totona uda idia utua, bona idia lalonai taravatu utua karadia, gorere bona lalo-hesiku idia bada idia lao.”

Danu, uma bona uda gabudia amo taunimanima idia lao siri. Hegeregere, United States dekenai, daudau hanuadia handred momo be taunimanima momo idia noholaidia lasi. United States ena west kahana dekenai ia noho Great Plains gabuna ai, gabu haida edia hanua haida sibona be mai edia taunimanima, hanua momo be taunimanima lasi bamona. North Dakota ena gabu 10 dekenai, sikoea kilomita tamona tamona lalonai taunimanima 1.5 1.5 sibona idia noholaia; ena gabu 18 dekenai, lagani 1930 murinai unai gabu idia noholaia taudia edia namba be 50 pesen amo ia maragi. Haida idia laloa, The Wall Street Journal ese sivarai ia torea bamona, Great Plains gabuna be “guna ia noho reirei toana dekenai ia giroa lao.” Badina be dahaka? Diba momo taudia idia gwau kerere be taunimanima ese tano idia naria namonamo lasi, taunimanima be edia ranu bada lasi idia gaukaralaia kava, medu be lasi, bona moni bisinesi momo dekenai moni be hegeregere lasi dainai.

Hanua badadia edia taunimanima idia hutuma noho bona edia noho gabudia be hegeregere lasi. Taora gabudia dekenai taunimanima ese idia rakatania hanuadia idia noho. Edia toana idia idau dainai ia hamomokania taunimanima be idia hegeregere lasi hanua badadia eiava uma bona uda gabudia o taunimanima o tanobada idia naria namonamo totona. Hegeregerena, Bible ia gwau: “Taunimanima ena dala be sibona dekenai ia noho lasi, bona taunimanima edia raka be idia sibodia idia gwauraia hidi diba lasi.” (Ieremia 10⁠:23) To taunimanima Ia Havaraia Tauna ia diba edena dala ai gavamani namona ia karaia. Ia gwauhamata nega kahirakahira tanobada ibounai ese huahua do ia havaraia, maino taudia ese do idia naria; sibodia edia dika idia koua diba lasi taudia ese tanobada do idia hadikaia noho diba lasi.​—⁠Salamo 67⁠:6; 72⁠:16; Isaia 65⁠:​21-23.