Uma Gabuna Idia Ura Itaia Tama Sina Lasi Afghan Natudia
HARI INAI NEGAI taunimanima momo be hanua lalonai idia noho dainai, natudia milion momo be uma bona unuseniai idia noho animal idia itaia lasi. Momokani, Afghanistan natudia momo be America ena uma ta do idia itaia lasi. Unai dainai, unai bamona tama sina lasi natudia, tuari ese ia hadikadia natudia haida, be Watchtower Farms idia vadivadi henia neganai idia moale bada herea; unai uma be Wallkill dekenai, New York siti ena amo north kahanai ia noho bona hora rua lalonai motuka dekenai oi lao neganai unai gabu ai do oi ginidae.
Afghan gado idia hahanaia taudia be unai memero ida idia mai unai uma idauna ena printa masini rumana gaukarana idia diba totona. Iehova ena Witness taudia be unai gabu idia naria bona ena gaukara volantia taudia edia namba be 1,000, idia be Watchtower Farms ena bese taudia.
Vadivadi negana ia hamatamaia neganai idia be ti bona bisket idia ania; unai murinai idia lao printa masini badadia idia itaia totona, unai masini be kala 4 dekenai Watchtower bona Awake! magasin idia printaia. Unai grup ia hakaua tauna ta ia gwau: “Lau hoa badina ena be idia ura bada uma ena animal idia itaia, to idia be unai gaukara ena heau namonamo dalana bona ena bada idia moalelaia.”
Ma ia hereva, ia gwau: “Bena, ai lao boromakau natudia ai itaia, unuseniai natudia be animal idia daua toho bona aniani idia henia. Unai be itaia gauna namona—natudia idia heau lao heau mai animal matamatadia dekenai raurau matamatadia idia henia totona. Kokoroku ena ruma dekenai, idia ibounai be kokoroku maragidia idia dogoatao. Hoa gauna be, idia nanadaia neganai idia ura bada America aniani be dahaka, idia haere, ‘Kentucky dalanai idia nadua kokoroku!’ ”
Dina tubua neganai, idia be aniani daiutu dekenai unai uma bese badana ida raisi bona kokoroku idia ania hebou. Unai murinai, Watchtower Farms dekenai idia gaukara taudia momo idia mai bona daudau amo idia mai natudia idia hereva henidia. Ia hedinarai momokani natudia idia ura henidia.
Adorahi neganai natudia idia moale badina trakta idia guia bona taria uilina idia dogoatao. Momokani, idia ibounai idia ura hosi idia guia, bona unai bamona idia karaia. Moalelaia gauna ma ta be dahaka? Watchtower Farms ena lahi habodoa totona rumana, bona ena ensini kakakakana badana! Unai be moalelaia gauna momokani! Edia vairana dekenai oi itaia diba idia be ensini idia guia neganai bona ena siren ena rege idia karaia. Tanobada hegegemadai natudia idia moalelaia gaudia be tamona—kala gaudia bona regerege!
Idia nanadaia dahaka idia laloa edia vadivadi dekenai, bena Ahmad, mero badana ta, ia gwau: “Lau be printa masini lau moalelaidia, aniani negana hamatamaia bona hadokoa neganai idia guriguri—bona aniani gabuna dekenai idia noho gaudia iboudiai! ” Idia iboudiai be animal bona hosi idia guia karana idia moalelaia.
Unai sivarai kwadogina ese ia hahedinaraia hebogahisi karana, tama sina lasi natudia eiava ma haida dekenai, be lalokau Diravana, Iehova, bona Keristen abidadama karana ia hamomokania. Bible ia hereva bamona, ia gwau: “ [Keristen] tauna ena ekalesia karana goevagoeva bona momokani, Tamana Dirava ena vairanai be inai: bema tamana bona sinana lasi maragidia bona vabu be mai edia hisihisi, ia ese do ia naridia. Bona tanobada ena kara mirodia dekena amo do ia raka siri.” (Iakobo 1:27)—Ta ena sivarai.