Megapode Manu Bona Ena Mikisi Gatoi

NOGA! TORETORE TAUNA SOLOMON ISLANDS AI ESE IA TOREA

HONIARA, Solomon Islands ena taoni badana Guadalcanal dekenai, vanagi amo hora rua bamona oi lao bena motumotu maragina ladana Savo, mai ena lahi ororona bona megapode manu, ena ladana ta be Australian scrub fowl, do oi itaia. Hanua taudia ese nadi siahudia bona tano ena matu amo idia daekau varahu siahuna idia gaukaralaia edia aniani nadua totona, bona ranu idia hasiahua totona. Megapode manu ese unai sibona ia vara gauna namona ia gaukaralaia danu.

Ena be ia maragi, to ena toana be kokoroku bamona, ena tauanina be bada, ena apena be idia kwadogi, ia be mai ena aena badadia bona goadadia, bona ena aena kwakikwaki be hani. Ena uduna ia kwadogi bona ia diho sisina. Megapode ia roho haraga diba, to nega kwadogi sibona lalonai.

Megapode (anina be “aena badana”) be kokoroku edia bese ladana Galliformes manuna ta. Ia be gatoi ia guria manuna. Ena gatoi be ia bodaga tubutubu gaudia edia momoru, ena siahu be 32 degree celcius lalonai ia guridia. Unai motumotu dekenai megapode manudia be ma gau idauna lalonai edia gatoi idia guridia. Lahi ororona ese Savo ena kone miri ia hasiahudia dainai, dahaka gau ese unai miri ia hereaia diba?

Hanua taudia ese miri palaka gabu badana dekenai magu idia karaia niu raudia amo. Unai gabu be megapode “umana.” Lalonai, toana be au umana bamona. Au maragidia be laini dekenai idia hadoa, unai amo idia mai manu be do idia gari lasi. Unai gabu ibounai ai, guri maragidia idia noho, edia bada be sentimita 60 bamona. Idia hahedinaraia hanuaboi bona daba kahanai, unai manu idia mai bona sentimita 90 guri idia geia edia gatoi idia guridia totona.

Bona unai gatoi be bada herea! Gatoi edia lata be sentimita 8 ia lao 9 bamona bona lababa be sentimita 6 bamona, unai be hoa gauna manu maragina amo. Gatoi ia makohi neganai, kokoroku maragina mai huina danu be miri ia geia daekau bona kone dekenai sibona ia heau loaloa. Hora 24 idia do orea lasi neganai ia roho diba.

Dina ta ta lalonai, hanua taudia idia diho mai megapode “umana” dekenai gatoi idia geia totona; gatoi be edia aniani badana ta. Edia mikisi gatoi idia nadua dalana be idau momokani. Megapode edia gatoi be mai aonega ida baubau matamatana dekenai idia gwadaia kehoa bena baubau lalonai idia bubua vareai. Baubau ena lalona be gatoi amo ia honu neganai, lahi gida dekenai idia atoa namonamo. Daudau lasi murinai, gatoi be baubau lalonai idia boila bona baubau matamatana ena vasiahu danu idia mikisi. Ia maeda neganai, baubau idia utua kehoa bona ta be mai ena mikisi gatoi latana, bona ena mamina be namo herea bona idau momokani. Oi mai Solomon Islands dekenai bona ta oi mamia toho!