Baibel Ena Haere

Daika Idia Lao Guba?

PELEINI ia roho noho lalonai, taunimanima dikadia ese idia atoa bomu ia pou, bona ibounai ia hamasedia. Mase taudia edia varavara bona turadia idia hamaorodia edia lalokau taudia be hari guba dekenai idia noho, unai be hegeregere edia mase dalana dikana ena davana bamona.

Miusik ia gadaralaia tauna ia mase neganai, idia gwau ia be ‘guba dekenai aneru ida kibi ia hiriria noho.’

Gorere, doe, eiava aksiden dainai natu maragidia edia mauri ia kwadogi neganai, haroro taudia idia gwau, idia be hari guba mauri namona idia moalelaia, bona reana aneru ai idia lao!

Matamata bona buruka taudia idia mase bona guba dekenai Dirava ese ia abidia dae dainai, hahemaoro kererena ta ia hamaoromaoroa, a? Kara namo taudia bona ia hanamoa taudia be guba dekenai idia lao ena badina tamona be Dirava ia ura ia hamauridia noho, a? Baibel ena haere be dahaka?

Guba ai Idia Noho Lasi Taudia

Baibel ena hereva ia hedinaraia goevagoeva: “Umui diba lasi, a, kara dika taudia be Dirava ena Basileia do idia davaria lasi?” (1 Korinto 6:9) To, guba dekenai do idia lao lasi kara maoromaoro taudia bona kara dika dainai idia hisihisi taudia be Baibel ese ia herevalaidia.

Iesu be, kahirakahira do idia hamasea Ioane Bapatiso, inai bamona ia herevalaia: “Umui lau hamaoroa momokani, hahine edia bogana dekena amo idia vara taudia ibounai be ta ese Ioane ia hereaia lasi, to Guba Basileia lalonai, tau maragina sibona ese Ioane ia hereaia.” (Mataio 11:11) Iesu be mero maragina neganai, Pavapava Heroda ia ura ia hamasea dainai, Betelehema bona ena distrik lalonai, mauri lagani toi idia do abia lasi memero maragidia ibounai ia hamasedia. (Mataio 2:16) To, Iesu ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna [Iesu] unai, iena noho gabuna be guba.” (Ioane 3:13) Dahaka dainai Iesu ia hereva lasi, unai kara dikana dainai idia mase memero be guba dekenai idia noho?

Iesu ese Dala Ia Kehoa

Iesu be sibona ia gwauraia, “dala be lau, hereva momokani be lau, mauri danu lau” bona aposetolo Paulo ese ia gwauraia “toreisi lou taudia be ia ese idia ia gunalaia.” (Ioane 14:6; 1 Korinto 15:20) Unai dainai ta be ia vairanai guba dekenai ia lao guna lasi. To, Iesu ia toreisi lou bona dina 40 murinai guba dekenai ia daekau neganai, idia mase vadaeni abidadama taudia haida be ia murinai idia daekau, a? Dina 10 idia ore murinai, aposetolo Petero be Pavapava Davida ia herevalaia, ia gwau, “Ia mase, idia guria, bona hari inai nega, iena guria gabuna ia noho ita dekenai. . . . Davida ia daekau lasi guba dekenai.”​—Kara 2:​29, 34.

Unai dainai, guba dekenai daekau be kara dika ena hisihisi davana eiava abidadama ena davana sibona lasi. Lasi, to guba dekenai daekau karana ese dala ia kehoa, lauma helaga ese ia horoa orea taudia be guba dekenai Keriso henunai do idia lohia diba totona.​—Roma 8:​15-17; Apokalupo 14:​1-3.

Guba Basileiana

Iesu ese unai lohia dalana o gavamani ia gwauraia, “Guba Basileia” eiava “Dirava ena Basileia.” (Mataio 5:​3, 20; Luka 7:28) Idia laloa lasi, taunimanima momo herea be unai gavamani lalonai do idia vareai. Unai dainai, Iesu ese ia gwauraia “orea maragi.” (Luka 12:32) Baibel idia torea gado ginigunana ai, unuseniai idia gaukaralaia herevana “maragi” (mi·krosʹ) ena anina be bada (meʹgas) amo ia idau, bona Luka 12:32 dekenai idia gaukaralaia herevana be gau ta ena namba​—ia bada eiava ia maragi ia gwauraia. Unai dainai, “guba basileia” dekenai idia lao taudia edia namba be bada herea lasi. Haheitalai be: Bema oi idia noia galasi dekenai ranu sisina oi bubua totona, do oi naria namonamo, ia honu masemase bona ia bubua diho garina. Vadaeni, unai hegeregerena, “orea maragi” be taunimanima amo do ia honu masemase ela bona ia bubua diho lasi. Dirava ena Basileia lalonai do idia lohia taudia edia namba (“maragina”) be ia gwauraia hidi vadaeni.

Aposetolo Ioane dekenai unai lohia taudia edia namba korikorina, 144,000, idia hahedinaraia. (Apokalupo 14:​1, 4) Apokalupo bukana matamanai, ia gwau unai taudia be ‘bese ibounai, gado ibounai, hanua ibounai, bona kopina idauidau taudia ibounai, idia be bese ta, bona Dirava ena hahelaga taudia ai oi halaodia vadaeni, bona idia ese tanobada do idia gunalaia.’ (Apokalupo 5:​9, 10) Unai gavamani, Iesu ida do idia gaukara oreana, be Iesu ese ena hadibaia taudia ia hadibaia idia gurigurilaia Basileiana. Ia ese inai tanobada ena lohia dalana gagevana do ia hadokoa, bena unai amo hahemaoro maoromaoro bona maino do ia mailaia taunimanima edia noho gabuna, tanobada, dekenai, bona idia noholaia taudia dekenai mauri hanaihanai do ia henidia.​—Salamo 37:29; Mataio 6:​9, 10.

Abia Hidi Lohia Oreana

Unai Basileia ese tanobada gavamanidia edia gabu do ia abia, edia kara be dika momokani, unai dainai guba gavamani lalonai do idia lohia taudia be Dirava ese ia abia hidi, bona ia tohoa ena namo ita lalo-pararalaia, a? Hari inai negai, taunimanima edia mauri be hegeregere, ena ensini ia dika bona medu bada negana lalonai ia roho peleini bamona. Unai bamona nega dikana lalonai, oi ura peleini ena gaukara taudia be aonega lasi matamata taudia, a? Lasi momokani! Gaukara taudia do idia abidia edia diba hegeregerena, unai nega lalonai idia gaukara totona.

Ita moale badina Iesu Keriso danu guba dekenai do idia lohia taudia be “Dirava ese kahana ta ta tauanina lalonai ia atoa vadaeni, iena ura hegeregerena.” (1 Korinto 12:18) Tau ta be sibona ia abia hidi eiava ia ura bada Basileia lalonai dagi ta do ia abia, be hegeregere lasi. (Mataio 20:​20-23) Dirava ese abidadama bona kara haida ia abia hidi taravatu bamona, unai dala amo idia hegeregere lasi taudia do idia vareai lasi. (Ioane 6:44; Efeso 5:5) Ororo dekenai Iesu ena haroro ia hamatamaia herevadia ese idia hahedinaraia Keriso danu do idia lohia taudia ese do idia hahedinaraia idia be lauma gaudia idia laloa bada, idia dagedage lasi, kara maoromaoro idia lalokau henia, idia hebogahisi, edia lalona ia goeva, bona maino idia karaia taudia.​—Mataio 5:​3-9; Apokalupo 2:10 itaia danu.

Ena be Dirava ese taunimanima momo herea ia abia hidi lasi guba dekenai idia lohia totona, to ita moale badina idia be mai edia helaro. Idia ese inai tanobada hairaina do idia noholaia bona ena lohia dalana ena hahenamo do idia moalelaia. Gunaguna, kara maoromaoro lasi dainai idia mase taudia do idia mauri lou, bona idia roho mauri taudia ida, Dirava ena Basileia do ia “mai” ena anina momokani do idia itaia. Inai gwauhamata do ia momokani: “Kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani.”​—Mataio 6:​9, 10; Aonega Herevadia 2:21; Kara 24:15.