Kwadi-Lauma mai Ena Taiana Tamona

Lagani handred momo gunanai, Greek taudia be edia gori lalodiai hagaria taudia ladana Cyclopes idia herevalaia; idia be tatau badadia badadia mai edia matana tamona, tano daudaudia dekenai idia noho. Unai tauanina dika taudia badadia badadia be taunimanima ese idia laloa davari kava taudia sibona.

To, vanegai, saiens taudia ese manumanu momo mai edia taiana tamona idia davaria. Gaudia be kwadi-lauma.

Dahaka dainai hari sibona kwadi-lauma ena hunia gauna idia davaria? Saiens taudia be nega daudau lalonai idia laloa kwadi-lauma ena taiana idia kudima, badina be rege ia karaia lasi bona rege ia vara neganai kara ta ia karaia lasi, manumanu ma haida edia kara bamona. Daradara ia habadaia gauna ta be, ena be oi laloa kwadi-lauma ena taiana be ena kwarana dekenai, to lasi. Magasin ta, ladana Natural History, ia gwau, kwadi-lauma ena taiana be “matu dobuna hekohina, ena lata be milimita ta bamona” gauna, ena kemena dekenai.

Ia be mai ena taiana tamona sibona unai idau gabuna dekenai dainai, unai ese ia hahekwarahia, a? Ita taunimanima be iseda taiana ruaosi ita gaukaralaia, rege ia mai gabuna do ita diba totona. Ena be kwadi-lauma be unai bamona ia karaia diba lasi, to toana be unai ese ia hahekwarahia lasi. Rege ia kamonai dalana amo ia idia hamasea diba gaudia ia dibaia diba. Kwadi-lauma ena kamonai durua gauna be iena lalona dekenai ia noho.

Kwadi-lauma ena taiana be taunimanima idia kamonai diba lasi regedia, hegeregere mariboi ese kwadi-lauma bona manumanu ma haida idia tahua neganai idia karaia regedia, ia kamonaia diba. Natural History ia gwau saiens taudia idia itaia mariboi ia mai kahirakahira neganai, kwadi-lauma ese ena rege ia kamonai diba dainai, ena roho dalana ia haidaua haraga. Mariboi ena roho ena sipidi ese kwadi-lauma ena sipidi be nega toi o hani ia hanaia, unai dainai edena dala amo ia be mariboi amo ia roho mauri diba?

Kwadi-lauma ese dika ta ena regena ia kamonai neganai​—nega momo unai be ia bona mariboi edia padana be mita 10 bamona neganai​—sekeni ta ena kahana maragina ta lalonai, kwadi-lauma be ia paudobi haraga. Toana be, ena ensini ia koua bena ia moru, hari inai negai tuari peleinidia idia taria taudia be edia inai taudia amo do idia siri haraga totona idia karaia hegeregerena. Natural History ia gwau, kwadi-lauma ena kara ese “peleini edia tuari daladia namodia ia hahedinaraia.”

Kwadi-lauma ese inai diba be edena bamona ia abia? Daika ese rege ia kamonai dalana, taunimanima idia kamonai diba lasi regena idia kamonai diba dalana, ia havaraia? Momokani, haere maorona be idaunegai bese kwarana, Iobu, ese ia henia, ia gwau: “Idia ibounai idia diba, Lohiabada ena imana ese idia ia karaia vadaeni.”​—Iobu 12:9.