Andrew Ena amo Ai Dibaia Gaudia

GAUKARA dekenai lau lao neganai, dina gabedia haida lalonai idia vara gaudia lau laloa dainai egu mamina ia namo. Lauegu natuna iharuana, mero ta, be ia vara vadaeni. Unai dina ai, egu adavana Betty Jane bona emai natuna maragina Andrew be hospital amo do idia mai ruma dekenai.

To, hospital amo idia do siaia lasi neganai, egu adavana ese lau ia rini henia. Lau kamonai ia lalo-hekwarahi bada. Karaharaga lau lao hospital dekenai. Ia lau davaria neganai ia gwau: “Kerere ta ia vara!” Bena ai helai hebou; ai naria ela bona doketa ia giroa bona natudia edia gorere ia diba namonamo bona heduru herevadia ia henia hahinena ia mailaia.

Unai hahine ena hereva ginigunana ese emai lalona ia hahisia bada. Ia gwau: “Ai laloa emui natuna be Down’s syndrome gorerena ia abia.” Ia gwau emai natuna ena kwara harana be reana do ia gaukara namonamo lasi. Iena hereva ma haida lau lalo-pararalaia lasi. Egu darana ia doko dainai, lau kamonai herevadia lau laloa diba lasi. To lau itaia gaudia edia mamina lau abia noho.

Ia ese Andrew ia abia isi bona gau ta ia hahedinaraia ai dekenai, unai gau dainai ia diba dika ta ia vara. Beibi ese ena kwarana ia abia isi diba lasi. Down’s syndrome gorerena idia abia taudia idia vara matamata neganai idia momo edia masolo be unai bamona idia manoka. Gabeai, metairametaira ai lalo-parara lou neganai, henanadai momo idia vara, bena unai hahine danu ai herevahereva neganai ai nanadaia. Emai natuna be dahaka do ia karaia diba lasi? Dahaka do ia vara? Dahaka do ai hadibaia diba? Ia be diba hida do ia abia diba? Hahine ese ia hahedinaraia, emai henanadai momo edia haere be beibi ena noho bona iena diba hegeregerena.

Unai nega ema bona hari, lagani 20 mai kahana idia ore; unai nega lalonai, Andrew ai lalokau henia bona emai diba hegeregerena ia ai hadibaia toho. To, unai lagani ai lalodia neganai, ai diba gau ai henia sibona lasi to gau momo ai abia danu.

Sisiba Namodia

Andrew ai do manadalaia lasi neganai, emai lalokau turadia ese hekwakwanai idia haheaukalaia karadia amo idia abia sisiba idauidau be ai idia henia. Edia ura be namo, to ai diba hegeregerena, edia sisiba haida be mai aonega lasi bona ai gaukaralaia diba lasi. To, lagani momo lalonai edia sisiba idauidau ai tohoa murinai, unai ibounai be aonega lalohadai rua lalonai ai haboua diba.

Haida be emai lalohisihisi hamaragia totona idia gwau Andrew ena kwara harana ia dika momokani lasi. To nega ta emai turana namona ta ia gwau: “Ia gorere herevana umui gorea toho lasi! Bema umui abia dae haraga ia hegeregere lasi, emui helaro ia totona do umui haidaua haraga danu, bena do umui durua matamaia iena diba hegeregerena.”

Unai hekwakwanai ai haheaukalaia lalonai ai dibaia gaudia lalonai, unai lalohadai be mai anina bada. Iseda lalo-hekwarahi ia ore diba lasi, ela bona ia idia havaraia gaudia ita abia dae. Nega momo, ena be iseda ura korikori ta do ita dadaraia, to bema nega daudau ita dadaraia, nega daudau ita hanamoa diba lasi, bena nega dikana lalonai ita kwalimu lasi; unai bamona negadia be ‘ibounai ese idia davaria noho, bona inai dika ia vara kava noho.’—Hadibaia Tauna 9:11.

Lagani momo lalonai tama sina ai davaria, edia natudia haida ese sikuli ena sediual idia badinaia diba lasi eiava spesel sikuli dekenai idia lao. Unai neganai emai lalona dekenai ai nanadaia, unai natudia hida edia kwara harana idia dika eiava ma gau ta dainai idia hegeregere lasi? Reana idia haida be “ita itaia diba lasi dalanai idia dika”—Andrew bamona lasi, to edia tauanina be idau lasi bona edia toana be natudia oredia edia toana bamona, a? Down’s syndrome gorerena idia abia taudia edia gorere ena toana be maoromaoro ita itaia diba. To, gorere ma haida edia toana idia hedinarai lasi. Tama sina hida idia ura edia natudia idia karaia diba lasi karadia be do idia karaia, bena unai dainai idia ibounai idia badu kava?—Kolose 3:21 itaia.

Ai hamomokania sisiba iharuana be inai: Taunimanima ese emui natuna idia kara henia dalana be UMUI ese umui haheitalaia guna dalana hegeregerena. Umui kara henia hegeregerena, idia danu be unai bamona do idia kara henia.

Idia hanai laganidia 30 o 40 bamona lalonai, taunimanima ese edia lalohadai, edia tauanina eiava edia kwara harana idia dika taudia dekenai be idia haidaua. To, nega momo idia haidaua, badina be gorere taudia sibodia, o edia varavara, o unai gorere idia diba momo lasi taudia, o idia diba momo taudia edia kara dainai. Tama sina momo, ena be haida ese idia sisiba henia, idia gwau edia natudia be gorere taudia edia gabudia dekenai do idia atoa be namo, to unai sisiba idia dadaraia mai edia boga auka ida. Unai amo idia ese taunimanima edia lalohadai idia haidaua. Lagani 50 gunanai, Down’s syndrome gorerena idia herevalaia medikal bukadia edia hereva be gorere taudia edia gabudia amo idia abia diba hegeregerena. To hari, edia lalohadai idia haidaua vadaeni, badina tama sina bona ma haida be dala idaudia idia badinaia matamaia.

Hebogahisi Habadaia

Ita be sibona ita koia diba haraga, bena ita laloa ita be hebogahisi momokani taudia. To, hekwakwanai momo ita lalo-pararalaia sisina sibona, ela bona iseda mauri lalonai ita davaridia.

Andrew ena mauri dainai ai diba, mai edia dika taudia ese edia mauri idia haidaua diba lasi. Unai dainai emai lalona ai inai bamona ai henanadai, Lauegu lalohadai korikorina manoka taudia dekenai, diba idia abia haraga lasi taudia dekenai, bona buruka taudia dekenai be edena bamona?

Taunimanima vairanai Andrew ida ai loaloa neganai, idau taudia ese ai idia itaia, Andrew dainai ai hemarai lasi, to ia ai abia dae, emai famili tauna korikorina ta. Unai dainai nega momo ai dekenai idia mai bona edia lalohisihisi hehuni gaudia be ai dekenai idia hahedinaraia. Toana be, Andrew be ai danu ia noho dainai, idia laloa ai ese edia hekwakwanai do ai lalo-pararalaidia.

Lalokau Ena Siahu

Andrew dainai ai dibalaia gauna hereadaena be inai: Lalokau be diba amo ia vara gauna sibona lasi. Mani unai ena anina do lau gwauraia. Ai Iehova ena Witness taudia emai tomadiho ena lalohadai badana ta be inai: Keristani korikoridia ese idau bese taudia, eiava edia mauri dalana idia idau taudia, eiava politikol dalanai edia tano idia idau taudia idia dadaraia lasi. Unai dainai ai diba emai lauma tadikakadia bona taihudia be Andrew do idia abia dae. Gorere idia diba momo taudia idia gwau, hebou negadiai Andrew be do ia helai namonamo diba lasi, to unai hereva ai dadaraia, bona iena vara negana amo hebou iboudiai dekenai bona ruma-ta-ruma-ta gaukara dekenai danu, ai ese ia ai abia lao. Ai laloa hegeregerena, kongregesen taudia ese ia idia kara henia mai edia hebogahisi ida.

To haida edia kara ese unai ia hanaia. Ia idia lalokau henia bada. Ena be iena kwara harana ia gaukara namonamo lasi, to Andrew ese edia lalokau ena mamina ia abia. Idia danu ia noho neganai ia hemarai lasi, bona hebou ia ore murinai idia dekenai maoromaoro ia lao. Ai itaia loulou, ena be taunimanima be hutuma, to idia bogaraginai ia idia lalokau henia bada taudia ia diba.

Iena lalokau ia hahedinaraia dalana be unai hegeregerena. Andrew ese beibi, buruka taudia, bona ubua animal be manada dalanai ia kara henia. Nega haida, ai diba lasi taudia edia beibi dekenai ia lao neganai, ia kahirakahira dekenai ai noho, dala aukana ai ia gadara henia garina. To, nega momo, emai gari dainai ai hemarai, badina be ai itaia, beibi be metairametaira ia daua toho, ena natuna ia ubua hahinena hegeregerena!

Hari Ai Diba Gaudia

Down’s syndrome gorerena idia abia natudia ibounai edia toana be hegeregere dainai, ai laloa edia kara danu be hegeregere. To, nega daudau lasi ai diba, edia kara be edia ruma bese taudia edia kara hegeregerena, to idia ta ta edia kara hegeregeredia sisina sibona. Idia ibounai ta ta edia kara be idauidau.

Matamata taudia momo bamona, Andrew ese gaukara aukana ia moalelaia lasi. To ai davaria, bema gaukara ta be ia ai hadibaia loulou mai emai haheauka ida ela bona ia manada momokani, ia laloa lasi unai be gaukara ta. Iena maduna idauidau ruma dekenai ia manadalaia vadaeni, bona ia laloa ai henia gaukara ma haida sibona be gaukara momokani.

Andrew ena mauri negana lalonai ai dibaia gaudia ai laloa neganai, lalohadai badana ai davaria. Andrew naria gaukarana amo ai dibaia hakaua herevadia kahirakahira ibounai be ai gaukaralaia diba, emai natudia oredia bona taunimanima ibounai ai kara henia neganai.

Haheitalai be inai, lalokau korikori dainai ita ibounai ita moale, ani? Bema tau ta ena diba o ena mauri dalana be oiemu amo idia idau vaitani neganai, bema haida ese oiemu kara be iena ida idia hahegeregerea bona idia gwau ia ese oi ia hereaia, oi laloa unai be maoro lasi bona oi badu, ani? Bona, ena be hamatamaia neganai gaukara ta ita moalelaia lasi, to bema ita rakatania lasi to mai eda haheauka ida ita karaia sibona, gabeai ia ese namo bona moale danu ia havaraia, ani?

Ena be emai goevadae lasi maurina lalonai Andrew dainai ai taitai momo, to moale gaudia maragidia bona badadia ai abia danu. Ai davaria, Andrew dainai gau idaudia momo dekenai emai kara ai hanamoa. Hari ai diba, mauri lalonai ita davaria gaudia ibounai, lalo-hekwarahi bada gaudia danu, be mai edia siahu, ita be maumau taudia ai do idia halaoa lasi, to iseda kara namo do idia habadaia.

Ai laloa bada gauna ma ta ia noho. Ai laloa, Andrew ena gorere do ia namo negana do ai itaia, bona hari unai nega ai naria dainai ai moale bada. Baibel ena gwauhamata be inai: Dirava ena kara maoromaoro tanobada matamatana lalonai matakepulu taudia, taia kudima taudia, aena dika taudia, bona hereva diba lasi taudia ibounai do idia namo momokani. (Isaia 35:5, 6; Mataio 15:30, 31) Unai gauna do idia itaia taudia edia moale mani oi laloa, do idia itaia taunimanima edia kwara harana bona edia tauanina be dala maorona dekenai do idia gaukara! (Salamo 37:11, 29)​—Ta ese ia siaia gauna.

[Box on page 13]

Gorere Ena Bada Idauidau

Idia diba momo taudia ese Down’s syndrome gorerena idia abia taudia idia hapararaia orea toi dekenai. (1) Educable (Gorere ia maragi): Diba sisina bada idia abia diba taudia. Idia haida be drama gadara taudia eiava hadibaia taudia ai idia lao. Haida be sibodia idia noho bona ta ese ia naria sisina be hegeregere. (2) Trainable (Gorere sisina ia bada): Gaukara haida idia karaia diba taudia. Ena be sibona naria karadia haida idia hadibaia diba, to ta ese ia naria be namo. (3) Profound (Gorere ia dika momokani): Orea toi amo idia dika momokani taudia, nega ibounai ta ese ia naria be gau badana.

Andrew be edena bamona? Hari ai diba ia be gaukara haida idia hadibaia diba taudia edia orea lalonai.