Kahana 8

Dirava Ia Hamoalea Ruma Bese Maurina

Tau ena dagi ruma bese lalonai be dahaka? (1)

Tau ese ena adavana be edena bamona do ia kara henia be namo? (2)

Tama ena maduna be dahaka dahaka? (3)

Hahine ena gaukara ruma bese lalonai be dahaka? (4)

Iehova ena ura tama sina bona natu dekenai be dahaka? (5)

Baibel ena hereva headava hapararaia karana bona hamakohia karana dekenai be dahaka? (6, 7)

1. Baibel ia gwau tau be iena ruma bese ena kwarana. (1 Korinto 11:⁠3) Namona be tau ese adavana tamona ia abia. Namona be taravatu hegeregerena ai idia headava.​—⁠1 Timoteo 3:2; Tito 3:⁠1.

2. Namona be tau ese ena adavana ia lalokau henia, ia sibona ia lalokau henia bamona. Iesu ese ena murinai idia raka taudia be ia kara henia hegeregerena ia kara henia be namo. (Efeso 5:​25, 28, 29) Namona be ena adavana ia botaia lasi eiava dala ta ai do ia kara dika henia lasi. To, namona be iena namo do ia laloa bona ia matauraia.​—⁠Kolose 3:19; 1 Petero 3:⁠7.

3. Namona be tama ia gaukara goada iena bese ubua totona. Namona be ena adavana bona ena natudia edia aniani, dabua, bona noho gabuna ia henia. Namona be tama ese ena ruma bese ese lauma dalanai idia abia be namo gaudia ia henia danu. (1 Timoteo 5:⁠8) Ia ese ena ruma bese ia gunalaia Dirava bona ena palani dibaia karana dekenai.​—⁠Deuteronomi 6:​4-9; Efeso 6:⁠4.

4. Namona be hahine ese ena adavana ia durua namonamo. (Genese 2:18) Edia natudia hadibadia gaukarana ai, ena adavana ia durua be namo. (Aonega Herevadia 1:⁠8) Iehova ia ura hahine ese ena ruma bese taudia ia naria mai ena lalokau ida. (Aonega Herevadia 31:​10, 15, 26, 27; Tito 2:​4, 5) Namona be ena adavana ia matauraia bada.​—⁠Efeso 5:​22, 23, 33.

5. Dirava ia ura natu ese edia tama sina idia kamonai henia. (Efeso 6:​1-3) Ia ura tama sina ese edia natudia idia hadibaia bona hamaoromaoroa. Namona be tama sina be edia natudia ida edia nega idia gaukaralaia bona Baibel idia stadilaia hebou, unai amo lauma dalana ai idia durudia bona edia hemami idia hanamoa. (Deuteronomi 11:​18, 19; Aonega Herevadia 22:​6, 15) Tama sina ese edia natudia idia matahakani henidia lalonai, namona be idia dagedage lasi.​—⁠Kolose 3:⁠21.

6. Headava taudia idia noho hebou namonamo lasi neganai, namona be Baibel ena sisiba idia badinaia toho. Baibel ese ita ia hamaoroa lalokau ita hahedinaraia bona dika ita gwauatao be namo. (Kolose 3:​12-14) Dirava ena Hereva ia gwau lasi headava hapararaia karana be hekwakwanai maragidia haorea dalana namona. To reana hahine do ia ura ena adavana ia rakatania, bema ena tau (1) be mai ena dala ruma bese do ia durua to ia durua lasi, (2) ia dagedage bada herea dainai ena tauanina ia hadikaia diba eiava ia hamasea diba, eiava (3) ena dagedage bada karana ese Iehova ia tomadiho henia dalana ia koua momokani.​—⁠1 Korinto 7:​12, 13.

7. Headava tau bona hahine idia abidadama heheni be namo. Heudahanai amo ta ese ena adavana bona Dirava ia kara dika henia. (Heberu 13:⁠4) Headava murimurina ai mahuta hebou karana be Baibel ese ia gwauraia headava hadokoa ena badina tamona; unai neganai headava lou dalana ia noho. (Mataio 19:​6-9; Roma 7:​2, 3) Bema taunimanima ese headava idia hadokoa bena ma ta idia adavaia ena badina be Baibel ese ia gwauraia hegeregerena lasi, Iehova ese unai kara ia inai henia.​—⁠Malaki 2:​14-16.

[Pictures on page 16, 17]

Mai ena lalokau tama ese lauma dalanai bona tauanina dalanai ena ruma bese ia ubua

[Pictures on page 17]

Dirava ia ura tama sina ese edia natudia idia hadibaia bona sisiba henia