Tiokratik Haroro Sikuli Dekenai Oi Ai Welkam Henia

TANOBADA hegegemadai, tano 200 ia hanaia lalonai, pura ta ta ibounai stiuden taudia milioni momo be Tiokratik Haroro Sikuli amo heduru idia abia. Haida be stiuden matamata. Ma haida be lagani momo sikuli lalonai idia noho. Gabu tausen momo dekenai idia karaia. Herevana edeseniai oi noho, inai program tamona amo diba do oi abia. Mauri lagani, bese, bona edukeisen idauidau taudia ese inai tiokratik dalana ai diba idia abia, davana lasi.

Lagani 1943 ai, Iehova ena Witnes taudia edia kongregesen lalodiai inai sikuli idia hamatamaia neganai, idia haginia ena badina be inai bamona idia gwauraia: “‘Kamonai taudia’ ibounai, Dirava ena Hereva idia kamonai bona idia abidadama henia taudia, ia hegaegaelaia ‘ma haida idia hadibaia diba totona’ . . . ela bona tahua gauna tamona be idia ta ta . . . ese edia lalonai ia noho helarona be taunimanima dekenai do idia harorolaia namonamo diba.” (Course in Theocratic Ministry, rau 4) Unai sikuli ena badina be ia do noho ema bona hari.

Momokani, Dirava amo ita abia harihari gauna, iseda hereva, ita gaukaralaia dalana hereadaena be dahaka? Baibel ia haere: “Umui mauri noho gaudia ibounai e, Lohiabada ena ladana do umui hanamoa!” (Sal. 150:⁠6) Unai ita karaia neganai, iseda guba Tamana ena kudouna ita hamoalea. Ita hahedinaraia iena kara namo bona lalokau dainai mai eda kudouna ibounai ida ia ita tanikiu henia. Ita hoa lasi ita Keristani taudia idia hagoadaia “nega ibounai hahenamo herevadia boubouna be Dirava do ita henia, ena ladana idia gwauraia hedinarai bibinadia edia huahua be unai”! (Heb. 13:15, NW) Emai ura be oi ai durua Dirava ese oi dekenai ia henia harihari gaudia oi gaukaralaia namonamo Iehova oi hanamoa totona, unai dainai Tiokratik Haroro Sikuli dekenai oi ai welkam henia.

Ena be sikuli lalonai taunimanima vairanai duahiduahi bona hereva henia bona hadibaia karadia ita laloa bada, to Tiokratik Haroro Sikuli ese unai sibona dekenai heduru ia henia lasi. Sikuli lalonai emu duahiduahi, kamonai bona laloatao, stadi, hereva tahua namonamo, laloa bona hegaegae, herevahereva, henanadai haerelaia, bona lalohadai oi torea karadia dekenai heduru do oi abia. Sikuli lalonai stadi, haere, bona hereva henia karadia be Baibel bona Baibel idia herevalaia bukadia amo do ita karaia. Dirava ena Hereva ena hereva momokani namodia amo emu lalona oi hahonua neganai, Dirava ena lalohadai laloa dalana do oi dibaia. Mauri ibounai lalonai unai be mai anina bada! Lagani 1943 ai ia mase iunivesiti hadibaia tauna William Lyon Phelps ese Dirava ena Hereva ena namo ia herevalaia, ia gwau: “Momokani ita gwau diba, Baibel idia diba namonamo taudia ibounai be diba bada taudia. . . . Lau laloa ta be koledi dekenai ia lao lasi to Baibel ia diba ena namo ese koledi dekenai ia lao to Baibel ia diba lasi ena namo ia hereaia.”

Heduru Bada Oi Abia Dalana

Momokani, Tiokratik Haroro Sikuli amo heduru bada oi abia totona, oi, stiuden tauna, oi gaukara goada be gau badana. Aposetolo Paulo ese ena Keristani bamoa tauna, Timoteo, ia hagoadaia: “Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.” (1 Tim. 4:15, NW) Edena dala namodia ai oi gaukara goada diba?

Namona be pura ta ta ibounai Tiokratik Haroro Sikuli dekenai oi mai. Inai stadi bukana, Tiokratik Haroro Sikuli amo Heduru Oi Abia, be mai aonega ida oi gaukaralaia. Hereva kwarana ia noho rauna dekenai ia noho laini ai emu ladana oi torea. Sikuli dekenai oi mai neganai, hanaihanai emu buka oi mailaia. Inai stadi bukana be eksasais bukana danu. Bema oi do idia durua diba gaudia be ia lalonai oi itaia neganai, idia oi makaia. Rau ta ta ai, toretore be lasi kahana badadia oi gaukaralaia, sikuli lalonai oi dibaia bona oi idia durua herevadia oi torea totona.

Tiokratik Haroro Sikuli lalonai do ita badinaia program be pepa ma ta dekenai ai halasia. Unai sediual ese sikuli do ita karaia dalana do ia hahedinaraia. Reana unai sediual be inai buka lalonai oi udaia be namo, do oi davaria haraga totona.

Pura ibounai sikuli totona oi hegaegae neganai, namona be oi laloatao Baibel be iseda stadi bukana badana. Namona be sediual ese pura ta ta totona ia hahedinaraia Baibel siridia oi duahia. Bema program ena hereva idauidau totona ai makaia kahadia oi duahia danu, unai ese oi do ia durua bada.

Nega haida sikuli lalonai helai taudia be haere do idia henia. Haere oi henia. Unai bamona henanadai bona haere kahadia ai haere oi henia be dala namona, oi kamonai gaudia oi laloatao bona emu mauri lalonai oi badinaia totona.

To momokani, stiuden ibounai ese kongregesen vairanai hereva eiava haheitalai do idia henia. Unai negadia ta ta oi gaukaralaia namonamo. Oiemu hereva hanamoa totona idia makaia karana dekenai oi gaukara goada. Oi dekenai sisiba do idia henia, emu hereva oi hanamoa noho totona. Mani unai heduru oi abia dae. Oiemu buka ai, emu hereva oi hanamoa totona idia gwauraia gaudia oi torea. Tau ta ese ia sibona ia itaia ma haida ese ia idia itaia hegeregerena be auka, unai dainai mai lalokau ida Baibel amo idia henia sisiba ese oiemu hereva oi hanamoa lalonai oi do idia durua bada. Unai be momokani, herevana lagani momo lalonai sikuli dekenai oi noho vadaeni.—⁠Aon. 1:⁠5.

Oi ura emu hereva oi hanamoa haraga, a? Bema oi gaukara goadagoada, unai do ia vara diba. Stiuden herevadia ta ta lalonai do idia herevalaia gaudia oi stadilaia. Bema hereva henia tauna ia noho lasi, reana oi ese unai hereva oi henia diba, bona unai ese oiemu diba do ia habadaia. Ma haida ese hereva idia henia neganai, edia hereva dalana oi kamonai namonamo. Ita ese ta ta amo diba ita abia.

Danu, emu hereva do oi hanamoa haraga bema oi sibona ese inai stadi bukana oi stadilaia. Kahana ginigunadia 15 oi dibaia namonamo murinai, rau 78 ai ia matamaia kahana “Hereva Henia Bona Hadibaia Karadia Hanamoa Program” do oi matamaia. Kahana ta oi stadilaia guna, bena ia gwauraia gaudia oi tohoa. Oi dibaia gaudia be emu haroro gaukara lalonai oi badinaia. Unai ese oi ia durua, hereva henia bona Dirava ena Hereva hadibaia karadia oi hanamoa haraga totona.

Tiokratik Haroro Sikuli lalonai oi abia dibana dainai, mauri lalonai mai anina bada gauna do oi karaia diba. Badina be Dirava ena ura dainai ita mauri noho, ia ita hanamoa be ita mauri noho ena badina ita hagugurua karana. Dala hereadaena amo Iehova Dirava do ita hanamoa be maoro. (Apok. 4:11) Inai sikuli ai ita abia dibana ese ita ia durua, unai do ita karaia bona ita laloa namonamo, ita aonega, bona Dirava ena lauma amo ia havaraia Herevana ena hereva momokani hereadaena ita hahedinaraia namonamo totona.

INAI BADINA LATANAI HEDURU ABIA

Herevahereva amo anina namona havaraia karana be diba gaukaralaia karana ta. Momo ese unai idia karaia namonamo lasi. Buka momo idia karaia unai kara dekenai taunimanima idia durua totona. To Havaraia Tauna, taunimanima idia hereva diba dalana ia henia Diravana, ena diba hereva henia bona hadibaia karadia dekenai ese tanobada ena hadibaia taudia edia diba ia hanaia. Taunimanima edia harana, uduna bona hereva halasia kahadia, bona hoa gaudia ma haida ia havaraia neganai, ena Natuna tamona be ia ida ia gaukara hebou Gaukara Tauna namona.

Dirava ese aneru bona taunimanima ia havaraia neganai, unai Natuna be Dirava ena Hereva, ia amo idia dekenai Iena hereva ia halasia. (Aon. 8:30; Ioa. 1:1-3) Unai Natuna be tanobada dekenai ia noho neganai, ia be Lohiabada Iesu Keriso. Dirava ena lauma amo idia vara toretoredia ese ia idia herevalaia, idia gwau: “Taunimanima ese iena hadibaia hereva dekenai idia hoa bada.” Bona ena hereva idia kamonai taudia idia gwau: “Tau ta ia hereva lasi inai tau ia hereva bamona.” (Mat. 7:28; Ioa. 7:46) Evanelia Bukadia lalonai nega 40 bamona Iesu idia gwauraia Hadibaia Tauna, bona unai be mai badina namona. Hereva henia bona hadibaia karadia dekenai gau momo be ia amo ita dibaia diba.

Danu, Baibel ese ia hahedinaraia Iehova Dirava ese ena ura ia hagugurua lalonai, mauri dala idauidau tatau bona hahine ia gaukaralaia. Idia haida ese hereva kwadogi mai siahu bada idia halasia. Idia momo ese taunimanima hutuma idia hereva henia lasi, to mai kamonai ida Dirava momokani bona ena ura idia harorolaia. Ia hedinarai, idia momo be hereva idia henia namo herea taudia lasi, to Dirava ese edia hekwarahi ia hanamoa. Edia hesiai gaukara idia karaia dalana ena sivarai be Baibel dekenai ia noho bona ia amo gau momo ita dibaia diba.—⁠Sal. 68:⁠11.

Momokani, Baibel be hereva henia dalana ia hadibaia stadi bukana lasi. To mai laloa kehoa ida idia duahia taudia be ia amo diba namona idia abia, hereva henia bona hadibaia namonamo karadia durua totona. Tiokratik Haroro Sikuli amo Heduru Oi Abia bukana be unai badina latanai heduru ia henia.