“Idia Laloa Lasi Dahaka Do Ia Vara”

HADIBAIA herevadia laloa maragi karana ese dika bada ia havaraia diba.

Lagani 1974 ai, Darwin, Australia dekenai, taunimanima be holide ariadia idia hegaegaelaia noho lalonai, alam edia regerege ese idia ia hadibaia lai gubana ta be ia mai kahirakahira noho. To lagani 30 lalodiai, lai gubana ta ese Darwin ia do hadikaia lasi. Unai dainai, reana hari unai ese dika ta do ia havaraia lasi, ani? Unai gabu taudia momo idia laloa dika ta do ia vara lasi ela bona lai gubana be taunimanima idia haboua rumadia edia guhi bona haba ia kokia matamaia. Daba ia rere neganai, unai taoni ena toana be ia dika momokani.

November 1985 ai, Colombia dekenai volkeino ta ia pou. Sinou bona aisi idia veve dainai, ranu ese kopukopu ia abia lao bona Armero ena taoni ai idia noho taudia 20,000 mai kahana ia koua. Taunimanima idia diba unai do ia vara, a? Unai ororo be hua haida lalonai ia mareremarere. To, Armero ai, taunimanima momo be volkeino badinai noho karana idia manadalaia dainai, idia laloa dika ta do ia vara lasi. Taoni naria taudia ese hadibaia hereva idia abia, dika be kahirakahira do ia vara, to idia ese taunimanima idia hadibaia lasi. Reidio ena hadibaia herevadia ese taunimanima idia hagoadaia idia laloa momo lasi be namo. Dubu ena laud-spika amo taunimanima idia hadibaia idia gari lasi totona. Hanuaboi ai, unai volkeino be nega rua ia pou. Bema unai negai oi noho, emu gau ibounai do oi rakatania bona oi heau, a? Taunimanima haida idia laloa unai bamona idia karaia be namo, to idia karaia lasi ela bona idia mase.

Nega momo jioloji taudia ese edena gabu ai tano mareremarere do ia vara be idia gwauraia hedinarai guna. To edena negai do ia vara be idia gwauraia hedinarai diba lasi. Lagani 1999 ai, tanobada hegegemadai, tano mareremarere ese taunimanima 20,000 ia hamasea. Unai taudia momo be idia do mauri neganai, idia laloa unai do ia vara lasi idia dekenai.

Dirava ese Hadibaia Herevadia Ia Henia Neganai, Edena Bamona Oi Kara?

Baibel ese nega dokona ena toana ia hahedinaraia gaudia be ia gwauraia hedinarai goevagoeva. Danu, ita ia hagoadaia “Noa ena nega” ita laloa totona. “Unai neganai, abata badana do ia ginidae lasi neganai,” taunimanima be mauri lalonai vaia idia karaia gaudia dekenai idia bisi bada, ena be idia diba dagedage karadia idia bada noho. Dirava be Noa amo hadibaia herevadia ia henia, to ‘taunimanima idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao.’ (Mataio 24:​37-39) Bema unai negai oi noho, unai hadibaia herevadia do oi kamonai henia, a? Hari danu hadibaia herevadia oi abia dae, a?

Aberahamo ena kakana ena natuna Lota ena negai, bema Mase Davarana badinai ia noho hanuana Sodoma dekenai oi noho be edena bamona? Gabu ena toana be paradaiso ta bamona. Ia be taga hanuana. Taunimanima idia lalo-hekwarahi lasi. Lota ena negai taunimanima be “idia aniani, idia inuinu, idia hoihoi, idia hadohado, ruma idia karaia.” Danu, taunimanima be matabodaga karadia idia ura henia bada. Bema unai negai oi noho bona Lota ese kara dikadia ia gwauraia dika, iena hadibaia hereva do oi abia dae, a? Bema Lota ese oi ia hadibaia Dirava ese ena lalona ia hadaia vadaeni Sodoma do ia hadikaia, iena hereva do oi kamonai henia, a? Eiava Lota ena ravana taudia bamona, do oi laloa Lota be ia hevaseha sibona, a? Eiava Lota ena adavana bamona, reana do oi heau matamaia to gabeai do oi giroa lou, a? Ena be ma haida ese Lota ena hadibaia herevadia idia abia dae lasi, to Lota be Sodoma amo ia raka-lasi neganai, “lahi bona nadi siahu, guba dekena amo idia moru, ibounai ia alaia ore.”​—Luka 17:​28, 29.

Iseda nega lalonai, taunimanima momo be idia laloa lasi. To, unai haheitalai be ita idia hadibaia totona Dirava ena Hereva dekenai idia noho, ita idia hagoadaia do ita GIMA NOHO!

[Box/Picture on page 22]

Abata Badana ta be Momokani Ia Vara, A?

Diba bada taudia momo idia gwau, Lasi. To Baibel ia gwau, Oibe.

Iesu Keriso ese unai sivarai ia herevalaia, bona unai kara ia vara neganai Iesu be ia mauri noho bona guba amo ia itaia.

[Box/Picture on page 23]

Sodoma Bona Gomora be Momokani Idia Hadikaia, A?

Akioleji taudia ese unai kara idia hamomokania.

Histori ese unai sivarai ia gwauraia.

Iesu Keriso ese unai sivarai ia hamomokania, bona Baibel ena buka idauidau 14 dekenai unai sivarai ia noho.