Revareva ta Hakaua Oreana Amo

Emai Tadikaka Bona Taihu E:

January 1, 2008 Gima Kohorona pablik gauna ginigunana ai, kahana matamata ta ladana “Edia Abidadama Tohotohoa” ena atikol idauidau idia halasia. Unai nega amo, nega ta ta ai atikol matamatadia idia halasia, unai be moale bada gauna!

Unai kahana idia duahia taudia edia hemami be edena bamona? Mareta ena sivarai ia duahia hahine ta, ia gwau: “Lau duahia neganai lau kiri badina lau be ia bamona—hanaihanai lau ura lau boiria taudia totona gau momo lau karaia bona lau bisi, to nega haida laga-ani bona turadia bamoa karana lau laloaboio.” Kekeni matamata ta be Eseta ena sivarai amo ia dibaia gauna ia herevalaia, ia gwau: “Momokani, dabua bona sitaelo matamatadia do ita lalohadailaia momo. Namona be dabua namodia ita hahedokilaia bona iseda toana ia namo, to namo lasi unai sibona ita laloa bada.” Ma ia gwau: “Iehova be iseda lalona ai ia noho gauna ia laloa bada.” Bona Keristani taihu ta be aposetolo Petero ena sivarai ia duahia neganai, ia gwau: “Unai sivarai lalonai idia vara gaudia lau piksaia. Bona lau mamia unuseniai lau noho bamona! Lau duahia gaudia lau kamonai, itaia, bonaia, mamia, dogoatao bona tohoa bamona.”

Unai taudia bona momo ese revareva amo edia tanikiu karana idia hahedinaraia. Idia be aposetolo Paulo ese ia torea herevana idia hamomokania, ia gwau: “Guna Toretore Helagadia dekenai idia torea herevadia ibounai be ita hadibaia totona idia torea.” (Roma 15:4) Oibe, Iehova ese inai sivarai be Baibel ai ia toredia, unai amo ita be mai anina bada leseni ita dibaia. Ita ibounai, ena be lagani momo lalonai hereva momokani ita dibaia, to unai bamona sivarai amo diba do ita abia.

Umui ai hagoadaia inai buka umui abia neganai maoromaoro umui duahia. Namona be emui Ruma Bese Tomadiho totona umui gaukaralaia—natudia ese do idia moalelaia! Kongrigeisen taudia ese Kongrigeisen Baibel Stadi lalonai unai buka idia gaukaralaia neganai, namona be wiki ta oi reaia lasi! Inai buka oi duahia namonamo bona oi laloa dobu. Bona sibona oi piksaia, oi be unai sivarai lalonai oi noho bamona. Mani Baibel ena sivarai ai idia noho taudia ese idia abia hemami oi mamia, idia itaia gaudia oi itaia. Hekwakwanai idia davaria neganai, idia hanaia dalana be reana do oi hanaia dalana ida oi hahegeregerea.

Ai moale bada inai buka umui abia. Unai buka ese oi bona emu ruma bese ia durua be namo. Emai lalokau bona hanamoa herevadia ai siaia,

Iehova Ena Witnes Taudia Edia Hakaua Oreana