Hamatamaia Herevana

1, 2. Sekit naria tauna ta ese edena dala ai Baibel sivarai ai idia noho abidadama taudia ia laloa, bona dahaka dainai idia be tura namodia ai ita halaoa diba?

KERISTANI taihu ta be sekit naria tauna ena tok ia kamonai murinai, ia gwau: “Ia ese Baibel sivarai ai idia noho taudia ia herevalaia neganai idia be ena tura gunadia bamona.” Unai taihu ena hereva be maoro, badina tadikaka be lagani momo lalonai Baibel ia stadilaia bona Baibel ese ia sivarailaia abidadama tatau bona hahine ia herevalaia neganai, idia be iena mauri ibounai lalonai ia dibaia tura gunadia bamona.

² Baibel sivarai ai idia noho taudia momo be iseda turadia ai idia lao be namo herea. Idia be taunimanima korikori bamona oi laloa, a? Mani oi laloa nega oi atoa Noa, Aberahamo, Ruta, Elia, bona Eseta ida oi raka bona herevahereva, unai amo idia oi dibaia namonamo. Do idia henia sisiba bona hagoadaia hereva namodia oi laloa, unai ese emu mauri ai namo ia havaraia diba!​—Aonega Herevadia 13:20 duahia.

3. (a) Edena dala ai Baibel lalonai idia noho abidadama tatau bona hahine ita dibaia karana amo namo ita abia diba? (b) Edena henanadai haida do ita herevalaia?

³ Oibe, ‘kara maoromaoro taudia do idia toreisi lou’ neganai, unai bamona hetura namona be do ia vara momokani. (Kara 24:15) To, hari danu Baibel ai idia noho abidadama tatau bona hahine ita dibaia karana amo namo do ita abia. Edena dala ai? Aposetolo Paulo ese unai ia haerelaia: “Abidadama bona haheauka karana amo Dirava ese ia gwauhamatalaia gaudia idia abia taudia do umui tohotohoa.” (Heb. 6:12) Unai abidadama tatau bona hahine edia sivarai ita stadilaia lalonai, mani Paulo ese ia gwauraia herevana dekenai henanadai haida do ita laloa: Abidadama be dahaka, bona dahaka dainai unai kara ita hahedinaraia be mai anina bada? Edena dala ai abidadama taudia ita tohotohoa diba?

Abidadama be Dahaka Bona Ita Hahedinaraia Ena Badina

4. Taunimanima edia lalohadai abidadama dekenai be dahaka, bona dahaka dainai edia lalohadai be kerere?

⁴ Abidadama be mai anina bada karana ta, inai buka ai do ita stadilaia tatau bona hahine ibounai ese unai kara idia laloa bada. Hari taunimanima momo be abidadama ena anina korikori idia diba lasi, idia laloa abidadama karana be gau ta idia abia dae sibona, ena be hamomokania gaudia be lasi. To, unai be maoro lasi. Abidadama momokanina be gau ta ita abia dae kava lasi eiava hemami ta sibona lasi. Gau ta abia dae kava karana be mai ena dika. Hemami be ia mai bona do ia boio, bona Dirava ita abia dae, to unai sibona be hegeregere lasi, badina “demoni danu be unai idia abia dae bona idia heudeheude.”​—Iam. 2:19.

5, 6. (a) Iseda abidadama be dahaka gau rua latanai ita haginia? (b) Namona be iseda abidadama ena goada be edena bamona? Haheitalai gwauraia.

⁵ Abidadama momokanina be gau ta oi abia dae kava sibona lasi. Baibel ese abidadama ena anina ia herevalaia dalana mani ita itaia. (Heberu 11:1 duahia.) Paulo ia gwau iseda abidadama be gau rua latanai ita haginia. Ginigunana, ita abia dae gaudia be momokani, “ena be unai gaudia oi itaia lasi.” Iseda matana korikorina amo guba ai idia noho gaudia, hegeregere Iehova Dirava, ena Natuna, o hari ia lohia noho Basileiana ita itaia lasi. Iharuana be, ‘oi naria noho gaudia,’ ena be unai gaudia idia do vara lasi. Hegeregere, hari Dirava ena Basileia ese kahirakahira do ia havaraia tanobada matamatana ita do itaia lasi. Unai ena anina be ita abidadama henia gaudia dekenai hamomokania gaudia be lasi, a?

⁶ Lasi! Paulo ese ia hahedinaraia abidadama momokanina be mai ena hamomokania gaudia. Ia ese abidadama ia herevalaia neganai ia gwau, “oi daradara lasi to oi diba oi naria noho gauna be do ia vara,” ia gaukaralaia hereva be “taitol pepana” bamona ita gwauraia diba. Mani oi laloa, ta ia ura oi dekenai ruma ta ia henia. Oi dekenai taitol pepana ia henia neganai, unai ese ia hamomokania oi be unai ruma ena biaguna. Unai hegeregerena, iseda abidadama be mai ena hamomokania gaudia dainai, ita abia dae Dirava ese ia gwauhamatalaia gaudia ibounai be idia vara vadaeni bamona.

7. Abidadama momokanina ena anina be dahaka?

⁷ Abidadama momokanina be Iehova Dirava amo ita dibaia gaudia ibounai amo ia vara. Abidadama dainai ita abia dae ia be iseda lalokau Tamana bona ena gwauhamata ibounai be do idia guguru. To abidadama momokanina be unai sibona lasi. Ia be mauri gauna ta bamona ita ubua be namo, ia mauri noho totona. Namona be iseda abidadama be kara amo ita hahedinaraia, unai amo do ia mase lasi.​—Iam. 2:26.

8. Dahaka dainai abidadama be mai anina bada?

⁸ Dahaka dainai abidadama be mai anina bada? Paulo be haere namona ia henia. (Heberu 11:6 duahia.) Bema ita dekenai abidadama be lasi Iehova ita hereva henia eiava hamoalea diba lasi. Bema ita ura iseda guba Tamana, Iehova, kahirakahira ita lao bona ia ita hanamoa, abidadama be mai anina bada.

9. Edena dala ai Iehova ia hahedinaraia ia diba abidadama ita hagoadaia be gau badana?

⁹ Iehova ia diba iseda abidadama ita hagoadaia be mai anina bada, unai dainai haheitalai haida amo abidadama ita hagoadaia bona hahedinaraia dalana ia hadibaia. Ia ese Keristani kongrigeisen dekenai abidadama tatau ia henia ita idia hakaua totona. Baibel ia gwau: “Edia abidadama umui tohotohoa.” (Heb. 13:7) Bona ita dekenai heduru ma haida ia henia. Paulo ese “witnes orea badana” ia herevalaia, idia be idaunegai abidadama goada idia hahedinaraia tatau bona hahine. (Heb. 12:1) Heberu karoa 11 ai Paulo ese abidadama taudia haida sibona ia herevalaia. Baibel ai abidadama taudia momo edia sivarai ia noho, idia be mauri dala idauidau amo idia mai tatau bona hahine, matamata bona buruka, bona inai abidadama lasi negana ai edia haheitalai ese ita do ia durua.

Edena Dala ai Ma Haida Edia Abidadama Ita Tohotohoa Diba?

10. Sibona iseda stadi karana ese edena dala ai ita ia durua, Baibel ai idia noho abidadama tatau bona hahine ita tohotohoa totona?

¹⁰ Ta oi tohotohoa diba lasi bema iena kara oi diba namonamo lasi. Inai buka oi duahia lalonai, do oi itaia tadikaka be tahua gaukara badana idia karaia oi idia durua inai abidadama tatau bona hahine oi diba namonamo totona. Unai hegeregerena, oi danu be sibona emu tahua gaukarana oi karaia be namo, ani? Emu stadi lalonai, Baibel ena sivarai oi diba namonamo totona, research tulu idauidau oi gaukaralaia. Unai sivarai ta oi laloa-dobu neganai, ia vara gabuna bona taunimanima edia noho dalana oi piksaia. Unai abidadama taudia edia hanua oi itaia, gau idauidau edia bonana oi bonaia, bona unuseniai idia vara regerege oi kamonai. Mai anina bada gauna be, unai sivarai lalonai idia noho taudia edia hemami oi laloa. Unai bamona oi karaia neganai, unai abidadama tatau bona hahine be oi badinai idia noho momokani bamona, idia dekenai oi manada, hegeregere idia be emu tura namodia bamona.

11, 12. (a) Edena dala ai Aberamo bona Sarai do oi diba namonamo? (b) Edena dala ai Hana, Elia, o Samuela edia haheitalai amo namo oi abia diba?

¹¹ Idia oi diba namonamo neganai, do oi ura idia oi tohotohoa. Mani inai haheitalai ita laloa, asainmen matamata ta oi lalohadailaia noho. Iehova ena orea ese oi ia boiria, dala ma ta ai emu hesiai gaukara oi habadaia totona. Reana oi idia noia pablisa momo lasi gabuna ta dekenai oi lao totona, eiava oi manada lasi haroro daladia haida oi tohoa. Unai asainmen oi lalohadailaia bona gurigurilaia. Aberamo ena haheitalai oi laloa dobu karana ese oi do ia durua, a? Ia bona Sarai be mai ura ida Uru hanua ena mauri namona idia rakatania bona hahenamo badana idia abia. Edia kara oi tohotohoa neganai, do oi mamia idia oi diba namonamo.

¹² Danu, bema emu tura namona ta ese oi ia hahisia bona oi lalomanoka dainai hebou dekenai oi lao lasi, be edena bamona? Mani Hana ena haheitalai oi laloa, ena be Penina ese ena lalona ia hahisia, to unai ese Hana ia koua lasi Iehova ia tomadiho henia totona. Unai sivarai oi lalohadailaia karana ese oi do ia durua abia hidi maorona oi karaia totona, bona do oi mamia Hana be emu turana namona. Bema oi mamia oi be anina lasi bona unai ese emu lalona ia hamanokaia, Iehova ese Elia ia hagoadaia dalana ena sivarai oi stadilaia lalonai do oi mamia ia be emu turana namona. Bona umui matamata taudia e, reana sikuli turadia ese umui idia doria kara mirodia umui karaia totona. To, palai dubu ai Samuela ese Eli ena natudia edia matabodaga karadia ia dadaraia ena sivarai umui stadilaia neganai, do umui mamia Samuela be emui turana namona.

13. Baibel ese ia sivarailaia tauna ena abidadama oi tohotohoa dainai oi mamia emu abidadama ia goada lasi, a? Herevalaia.

¹³ Baibel ese ia sivarailaia tauna ena abidadama oi tohotohoa dainai oi mamia emu abidadama be ia goada lasi, a? Lasi! Laloatao, Iehova ena Hereva ese ita ia hagoadaia abidadama idia hahedinaraia taudia do ita tohotohoa. (1 Kor. 4:16; 11:1; 2 Tes. 3:7, 9) Inai buka ai do ita stadilaia taudia haida danu be idaunega abidadama taudia idia tohotohoa. Hegeregere, Karoa 17 ai, Maria ena hereva lalonai ia ese Hana ena hereva ia gwauraia, ia hahedinaraia Hana be haheitalai namona. Unai ese ia hahedinaraia Maria ena abidadama be ia goada lasi, a? Lasi! To, Hana ena haheitalai ese Maria ia durua ena abidadama ia hagoadaia totona, unai amo Iehova Dirava ena vairanai ladana namona do ia abia.

14, 15. Inai buka ena kahana haida be dahaka, bona edena dala ai ita gaukaralaia namonamo diba?

¹⁴ Inai buka ese oi do ia durua emu abidadama oi hagoadaia totona. Inai buka ena karoa ta ta be 2008 ia lao 2013 ena Gima Kohorona ai ia hedinarai “Edia Abidadama Tohotohoa” kahana amo idia abia. To, atikol matamatadia ma haida idia atoa danu. Karoa ta ta be mai edia henanadai unai sivarai ita herevalaia bona badinaia totona. Inai buka totona laulau mai edia kala momo idia torea, bona gunadia idia habadaia bona hanamoa. Heduru gaudia ma haida, hegeregere taim lain bona mapu idia noho. Edia Abidadama Tohotohoa bukana be tulu namona ruma bese, kongrigeisen, bona sibona emu stadi karaia totona. Ruma bese momo ese sivarai ta ta idia duahia hebou karana do idia moalelaia danu.

¹⁵ Inai buka ese oi do ia durua idaunegai Iehova ena hesiai taudia edia abidadama oi tohotohoa totona. Bona emu guba Tamana, Iehova kahirakahira oi lao lalonai, oi do ia durua emu abidadama oi hagoadaia totona!