Gwauatao Karana Ia Hadibaia

Taunimanima idia ura Iesu ena hereva bona ia karaia karadia idia abia dae eiava lasi be edia abia hidi. Galilea ai, ruma ta dekenai unai ia hedinarai. Farisea tauna ladana Simona ese Iesu ia boiria idia aniani hebou totona, reana ia ura hoa karadia ia karaia tauna ia diba namonamo. Bona reana Iesu ia laloa unai be nega namona idia mai taudia ia haroro henia totona, unai dainai unai boiboi hereva ia abia dae. Guna takisi gogoa taudia bona kara dika taudia edia boiboi hereva ia abia dae bona idia ida ia aniani.

Simona ena ruma ai, Iesu dekenai heabidae karana idia hahedinaraia lasi. Palestine ena dala momo be kahu sibona, bona bema ta be sandolo ia karaia bona unai dala ai ia raka, iena aena be do ia siahu bona miro. Unai dainai, vaia idia karaia heabidae karana be vadivadi tauna ena aena be ranu kerumana amo idia huria. To, Iesu dekenai unai idia karaia lasi, bona ia idia kisi henia lasi. Danu, iena huina dekenai dehoro idia bubua lasi, hemataurai bona heabidae karana hahedinaraia totona. Vadaeni Simona be mai lalona ibounai ida Iesu ia boiria, a?

Vadivadi taudia be pata dekenai idia helai bona idia aniani matamaia. Idia aniani noho lalonai, idia boiria lasi hahine ta ia vareai. Siti taudia “idia diba ia be kara dika hahinena.” (Luka 7:37) Goevadae lasi taudia ibounai be mai edia kara dika, to inai hahine be matabodaga karadia ia karaia, reana ia be ariara hahinena. To reana Iesu ena hahediba herevadia ia kamonai, bona inai boiboi herevana danu, ‘metau bada idia huaia taudia ibounai be ia dekenai do idia mai bona idia dekenai goada matamata do ia henia.’ (Mataio 11:28, 29) Iesu ena hereva bona kara ia laloa bada dainai, Iesu ia tahua.

Iesu ena murina amo ia mai, bona iena aena badinai ia tui diho. Iena mata ranu be Iesu ena aena latanai idia moru, bona ena huina amo ia dahua. Iesu ena aena ia kisi henia bona ia mailaia bonana namo dehorona amo ia dahua. Simona be unai ia itaia neganai, ia moale lasi, bona ena lalona ai ia gwau: “Bema inai tauna be peroveta tauna, do ia diba daika ese ia dogoatao bona ia be edena bamona hahine, badina ia be kara dika hahinena.”​—Luka 7:39.

Iesu be Simona ena lalohadai ia diba dainai, ia gwau: “Simona e, lau ura oi dekenai gau ta lau gwauraia.” Ia haere: “Hadibaia Tauna e, oi hereva!” Iesu ia gwau: “Tatau rua be tau ta amo moni idia abitorehai. Ta be denario 500 ia abia bona ma ta be denario 50 ia abia. To idia hegeregere lasi edia abitorehai davana idia henia neganai, ia ese mai kudouna ibounai ida idia ruaosi edia abitorehai ia gwauatao. Unai dainai, daika ese ia do ia lalokau henia bada?” Simona be ia moale lasi, to ia gwau: “Lau laloa unai be abitorehai badana ia abia tauna.”​—Luka 7:40-43.

Iesu ia lalotamona. Bena hahine ia itaia, to Simona dekenai ia gwau: “Inai hahine oi itaia, a? Lau be emu ruma lalonai lau vareai, to ranu oi henia lasi egu aena huria totona. To inai hahine be ena mata ranu amo egu aena ia haparia bona ena huina amo ia dahua. Lau oi kisi henia lasi. To lau vareai negana amo inai hahine ese egu aena ia kisi henia. Oi ese egu kwarana dekenai dehoro oi bubua lasi. To inai hahine ese bonana namo dehoro be egu aena dekenai ia bubua.” Iesu ia itaia unai hahine be ia karaia matabodaga karadia dainai ia helalo-kerehai. Unai dainai ia gwau: “Oi lau hamaoroa, ena be unai hahine be kara dika momo ia karaia, to unai ibounai lau gwauatao. Badina lalokau bada ia hahedinaraia. To bema tau ta ena kara dika be momo lasi bona lau gwauatao, iena lalokau be maragi.”​—Luka 7:44-47.

Iesu ia gwau lasi matabodaga karadia be kerere lasi. To, iena hereva amo ia hahedinaraia, kerere badadia idia karaia to idia helalo-kerehai bona Keriso ena heduru idia tahua taudia ia hebogahisi henia. Unai hahine be goada matamata ia abia, badina Iesu ese ia hamaoroa: “Emu kara dika lau gwauatao vadaeni. . . . Emu abidadama ese oi ia hamauria vadaeni, mai maino ida oi lao.”​—Luka 7:48,50.