Hoa Karadia—daika Ena Siahu Amo?

Farisea tauna Simona ena ruma ai, Iesu be gwauatao karana ia herevalaia murinai, Galilea ai iena haroro laolao iharuana ia hamatamaia. Inai be iena lagani iharuana bona ia be sibona ia laolao lasi. Aposetolo 12 ese ia idia bamoa, bona hahine ma haida danu, idia amo “demoni ia lulua bona edia gorere ia hanamoa.” (Luka 8:2) Idia huanai be Maria Magadala, Susana, bona Ioana, ena adavana be King Heroda Antipa ena ofesa tauna.

Taunimanima momo be Iesu ia karaia gaudia idia itaia, bona ia dekenai lalohadai idauidau idia abia. Demoni ese ia biagua tauna be matakepulu bona mu, ia be Iesu dekenai idia mailaia bona ia hanamoa negana ai edia lalohadai ia hedinarai. Hari unai tauna be demoni ese ia biagua lasi bona ia hereva bona itaia diba. Taunimanima idia hoa bada, idia gwau: “Inai be Davida ena Natuna, a?”​—Mataio 12:23.

Iesu ia noho rumana dekenai hutuma idia haboua dainai, ia bona ena hahediba taudia idia aniani diba lasi. To haida sibona idia abia dae Iesu be “Davida ena Natuna.” Taravatu hadibaia taudia bona Farisea taudia haida be Ierusalema amo idia mai—to Iesu amo diba idia abia eiava ia durua totona lasi. Taunimanima idia hamaoroa: “Ia be Belesebulo ese ia biagua,” unai dainai ia be “demoni edia lohia” ida ia gaukara. (Mareko 3:22) Iesu ena varavara be ia vara gauna idia kamonai neganai, idia mai Iesu abia totona. Dahaka dainai?

Badina unai nega ai, Iesu ena tadidia idia abia dae lasi ia be Dirava ena Natuna. (Ioane 7:5) Iesu ese ia karaia gaudia dainai hutuma huanai heiriheiri ia vara. To iena tadidia idia diba Nasareta ai idia tubu daekau neganai, Iesu be unai bamona lasi. Unai dainai idia laloa Iesu ena kwarana ia dika, idia gwau: “Ia be ia kavakava vadaeni.”​—Mareko 3:21.

To Iesu ese ia karaia karadia ese dahaka idia hamomokania? Iesu be demoni ese ia biagua tauna ta ia hanamoa, bona hari ia hereva bona itaia diba. Ta be unai ia hakoikoia diba lasi. Unai dainai taravatu hadibaia taudia bona Farisea taudia idia ura Iesu idia samania koikoi. Idia gwau: “Inai tauna be demoni edia lohia, Belesebulo, ena siahu amo demoni ia luludia.”​—Mataio 12:24.

Iesu be edia lalohadai ia diba dainai, ia gwau: “Bema Basileia ta ia parara, dika do ia davaria, bona bema siti eiava ruma bese ta ia parara, do ia moru. Unai hegeregerena, bema Satani ese Satani ia lulua, ia be sibona ia heatu henia, vadaeni ena basileia be edena bamona do ia gini?”​—Mataio 12:25, 26.

Unai be momokani! Farisea taudia idia diba Iuda taudia haida be taunimanima amo demoni idia luludia. (Kara 19:13) Unai dainai Iesu ia henanadai: “Bema lau ese Belesebulo ena siahu amo demoni lau luludia, vadaeni emui natudia be daika ena siahu amo demoni idia luludia?” Anina be Iesu dekenai idia gwauraia herevana be idia dekenai ia vara danu. Iesu ma ia gwau: “To bema lau be Dirava ena lauma helaga amo demoni lau luludia, anina be Dirava ena Basileia be ia mai vadaeni, to umui itaia lasi.”​—Mataio 12:27, 28.

Iesu ia ura hahedinaraia, demoni ia luludia karana ese ia hamomokania iena siahu ese Satani ena siahu ia hereaia, unai dainai ia gwau: “Tau ta be edena bamona goada tauna ena ruma lalonai ia vareai bona ena kohu ia dadia diba? To ia ese goada tauna do ia kwatua guna, vadaeni unai nega sibona ai, goada tauna ena kohu ia henaoa diba. Lauegu kahanai ia noho lasi tauna be lau ia inai henia, bona lau ida taunimanima ia haboua lasi tauna be lau amo taunimanima ia lulua noho.” (Mataio 12:29, 30) Taravatu hadibaia taudia bona Farisea taudia be Iesu idia inai henia, unai ese ia hamomokania idia be Satani ena hesiai taudia. Idia ese Dirava ena Natuna amo taunimanima idia lulua noho, ia be Iehova ena siahu amo hoa karadia ia karaia.

Iesu ese idia ia sisiba henia: “Taunimanima edia kara dika ibounai be Dirava ese do ia gwauatao, herevana dahaka kara dikadia idia karaia bona hadikaia herevadia idia gwauraia. To lauma helaga ia gwauraia dika tauna be Dirava ese do ia gwauatao lasi momokani, to ena kerere be do ia noho ela bona hanaihanai.” (Mareko 3:28, 29) Iesu be Dirava ena lauma ena siahu amo hoa karadia ia karaia, to idia gwau ia be Satani ena siahu amo unai ia karaia. Unai dainai idia dekenai do ia vara gauna mani oi laloa!