Davara Kakakakana ai ia Vara Hoa Karana

Farao ia kamonai Israela taudia be Aigupito idia rakatania neganai, ena lalona ia haidaua. Iena tuari taudia dekenai ia gwau: ‘Emui kariota umui hegaegae, bona idia murinai ita lao! Idia lao lasi be namo.’ Ia bona ena tuari taudia be Israela taudia murinai idia lao.

Iehova ese ena taunimanima ia gunalaia, dina ai ori ia gaukaralaia, bona hanuaboi ai lahi ia gaukaralaia. Davara Kakakakana dekenai idia ia hakaua lao, bona ia hadibaia kamepa do idia haginia.

Bena Israela taudia idia itaia Farao bona ena tuari taudia be idia heau mai noho. Israela taudia be dala lasi badina idia be davara bona Aigupito tuari taudia huanai idia noho. Idia boiboi Mose dekenai: ‘Ai be do ai mase! Aigupito dekenai ai oi rakatania be namo.’ To Mose ia gwau: ‘Umui gari lasi. Umui naria bona Iehova ese ita ia hamauria dalana do umui itaia.’ Mose be Iehova ia abidadama henia momokani, ani?

Iehova ese Israela taudia ia hamaoroa edia kamepa do idia kokia. Unai hanuaboi ai, Iehova ese Israela taudia bona Aigupito taudia edia huanai ori ia atoa. Aigupito taudia edia kahanai be dibura. To Israela taudia edia kahanai be diari.

Iehova ese Mose ia hamaoroa ena imana be davara latanai do ia abia isi. Bena Iehova ese hanuaboi ibounai lalonai lai goadana ia havaraia. Davara be huanai ia parara, bona dala ia kehoa. Israela taudia milioni be tano kaukauna ai idia raka diba, bona davara ena ranu be haba bamona edia kahana kahana ai ia gini.

Farao ena tuari orea be Israela taudia idia lulua lao davara ena tano kaukauna dekenai. Bena Iehova ese unai tuari orea dekenai daradara ia havaraia. Edia kariota ena wili idia moru matamaia. Tuari taudia idia boiboi: ‘Inai gabu ita rakatania! Iehova be idia totona ia tuari noho.’

Iehova ese Mose ia hamaoroa: ‘Emu imana be davara latanai oi abia isi.’ Bena haba bamona ia gini ranu ese Aigupito tuari orea ia koua. Farao bona ena tatau ibounai idia mase. Idia ta ia roho mauri lasi.

Kone kahana ai, hutuma be ane amo Dirava idia hanamoa: “Iehova dekenai ane abia, badina ia be mai hairai ida ia kwalimu. Hosi bona ena guia tauna be davara lalonai ia negea diho.” Taunimanima be idia ane, hahine taudia idia mavaru bona tambarin idia gadaralaia. Ibounai idia moale bada, badina idia roho mauri.