Mose Ia Ura Iehova Ia Tomadiho Henia

Aigupito ai, Iakobo ena famili idia gwauraia Israela besena. Iakobo bona Iosepa idia mase murinai, Farao matamata ia lohia matamaia. Ia gari badina Israela taudia be idia hutuma idia lao, Aigupito taudia edia namba ia hereaia. Unai dainai Farao ese Israela taudia be igui hesiai taudia ai ia halaoa. Idia ia doria biriki idia karaia bona uma gabu ai idia gaukara totona. Ena be Aigupito taudia ese Israela taudia dekenai gaukara metaudia idia henia, to edia namba ia bada daekau noho. Unai dainai Farao ia moale lasi bona oda ia henia Israela beibi memero idia vara neganai, do idia hamasea. Mani Israela taudia edia hemami oi laloa.

Israela hahine ladana Iokebeda be beibi mero hairaina ta ia havaraia. Beibi ia gimaia totona, bosea lalonai ia udaia bena Naila Sinavai badinai ia tubu siriho huanai ia atoa. Beibi ena taihuna Miriama be daudau ai ia gini beibi dekenai do ia vara gauna ia itaia totona.

Farao ena natuna kekeni be digu totona sinavai dekenai ia lao neganai, bosea ia itaia. Unai bosea lalonai beibi ta ia davaria, ia tai noho, bona ia hebogahisi henia. Miriama ia henanadai: ‘Ia namo lau lao bona hahine ta lau hakaua mai oi totona inai beibi ia naria, a?’ Farao ena natuna kekeni be gwaumaoro ia henia neganai, Miriama be ena sinana Iokebeda ida ia mai. Farao ena natuna kekeni ia gwau: ‘Inai beibi oi abia, bona lau totona oi naria, bona emu gaukara davana do lau henia.’

Unai natuna ia bada neganai, Iokebeda ese Farao ena natuna kekeni dekenai ia abia mai, bona ena ladana ia hatoa Mose, bona ena natuna bamona ia naria. Mose be king ena natuna dainai ia ura gaudia be ia abia diba. To Mose ese Iehova ia laloaboio lasi. Ia diba ia be Israela tauna, Aigupito tauna lasi. Bona ia ura Iehova do ia hesiai henia.

Mose ena mauri lagani be 40 neganai, ena lalona ia hadaia ena taunimanima ia durua totona. Ia itaia Aigupito tauna ese Israela igui hesiai tauna ia botaia noho neganai, ia ese mai goada ida unai Aigupito tauna ia botaia dainai, ia mase. Bona tauanina be miri lalonai ia hunia. Farao be unai ia diba neganai, ia ura Mose ia hamasea. To Mose ia heau lao Midiana tanona dekenai. Unuseniai Iehova ese ia naria.