Iosaia ese Dirava Ena Taravatu Ia Lalokau Henia

Iosaia ena mauri lagani be 8 neganai, Iuda ena king ai ia lao. Unai nega ai, taunimanima be meamea karadia idia karaia bona kaivakuku idia tomadiho henia. Iosaia be 16 neganai, ia gaukara goada Iehova tomadiho henia dala maorona ia dibaia totona. Bona ia be 20 neganai, kaivakuku bona boubou patadia ibounai ia hadikaia ore matamaia. Bona ena lagani be 26 neganai, Iehova ena dubu helaga hanamoa lou gaukarana ia hegaegaelaia.

Dubu helaga ai, hahelaga tauna badana Hilekaia ese Iehova ena Taravatu, reana Mose ese ia torea lokua toretore ia davaria. King ena seketere Sapana ese Iosaia dekenai lokua toretore ia abia mai bona ia duahia badabada. Iosaia ia kamonai bona ia laloparara, taunimanima be lagani momo lalonai Iehova idia gwau-edeede henia. King Iosaia ese Hilekaia ia hamaoroa: ‘Iehova be ita dekenai ia badu momokani. Oi lao bona Iehova dekenai oi hereva. Unai amo do ita karaia gauna do ia hadibaia.’ Iehova ese peroveta hahine Hulida amo ia haere: ‘Iuda taudia be lau idia rakatania. Idia be panisi do idia abia, to king Iosaia ena lohia negana lalonai lasi, badina be sibona ia hamanaua.’

King Iosaia be unai hereva ia kamonai neganai, dubu helaga dekenai ia lao bona Iuda taudia ia boiridia mai. Bena bese ibounai dekenai Iehova ena Taravatu ia duahia badabada. Iosaia bona taunimanima idia gwauhamata mai kudouna ibounai ida Iehova do idia badinaia.

Lagani momo lalonai Iuda besena be Pasova aria idia karaia lasi. To Iosaia ese Taravatu ia duahia neganai, idia laloparara Pasova aria be lagani ta ta ai idia karaia be namo. Iosaia ese Iuda besena ia hamaoroa: ‘Iehova totona Pasova do ita karaia.’ Bena boubou gaudia momo herea bona dubu helaga ai ane do idia abia taudia ia hegaegaelaia. Bena Pasova idia karaia, unai murinai dina 7 lalonai Hatubua Lasi Paraoa Ena Aria idia karaia. Samuela ena nega amo unai bamona aria idia karaia lasi. Iosaia be Dirava ena Taravatu ia lalokau henia bada. Oi danu be Iehova dibaia karana oi moalelaia, a?