Edena Dala ai Sivarai Namona Idia Harorolaia?

Iehova ese ena Basileia amo hekwakwanai ibounai do ia haorea. Unai be sivarai namona bona ibounai ese idia kamonai henia be namo. Iesu ia ura ena murinai idia raka taudia ese taunimanima ibounai dekenai unai sivarai do idia hadibaia. (Mataio 28:​19, 20) Edena dala ai Iehova ena Witnes taudia ese Iesu ena hahegani idia badinaia?

1. Edena dala ai Mataio 24:14 be hari ia guguru noho?

Iesu ia peroveta: “Basileia ena sivarai namona be tanobada ibounai dekenai do idia harorolaia.” (Mataio 24:14) Iehova ena Witnes taudia be mai moale ida unai mai anina bada gaukarana idia karaia. Sivarai namona be gado 1,000 mai kahana lalonai ai harorolaia! Unai gaukara badana totona ai hegaegae namonamo be namo. Bona Iehova ena heduru dainai ai karaia diba.

2. Taunimanima ai haroro henia totona dahaka ai karaia?

Gabu idauidau dekenai ai davaria taudia ai haroro henidia. Keristani taudia ginigunadia bamona, “ruma-ta-ruma-ta ai” taunimanima ai haroro henidia. (Kara 5:42) Unai bamona ai karaia dainai lagani ta ta lalonai taunimanima milioni momo ai hereva henia diba. Nega haida taunimanima be ruma dekenai idia noho lasi dainai, pablik gabudia dekenai ai haroro danu. Dala idauidau ai tahua taunimanima dekenai Iehova bona ena ura ai herevalaia totona.

3. Sivarai namona harorolaia gaukarana be daika ena maduna?

Keristani taudia korikoridia ibounai be mai edia maduna ma haida dekenai sivarai namona idia harorolaia totona. Ai dekenai unai maduna be mai anina bada. Emai noho dalana hegeregerena haroro gaukara ai karaia badina ai diba unai dala amo taunimanima do idia mauri diba. (1 Timoteo 4:16 duahia.) Unai gaukara totona davana ai abia lasi, badina Baibel ia gwau: “Umui abia davana lasi, umui henia davana lasi.” (Mataio 10:​7, 8) Ai gwauraia sivaraina be momo ese idia abia dae lasi. To ai haroro noho, badina unai be emai tomadiho ena kahana ta, bona unai ese Iehova ia hamoalea.

DIBA MA HAIDA ABIA

4. Ai gaukara goada taunimanima ibounai ai durua totona

VIDIO: “Tanobada Ena Daudau Momokani Gabudia Dekenai” Idia Haroro (7:​33)

• Iehova ena Witnes taudia edia haroro gaukara dekenai dahaka oi moalelaia?

Mataio 22:39 bona Roma 10:​13-15 duahia, bena inai henanadai herevalaia:

• Edena dala ai iseda haroro gaukara ese ia hahedinaraia iseda dekena taudia ita lalokau henia?

• Iehova ese sivarai namona idia harorolaia taudia be edena bamona ia laloa?—Siri 15 itaia.

5. Ai be Dirava ida ai gaukara hebou taudia

Ekspiriens momo ese idia hahedinaraia Iehova ese ita karaia gaukarana ia hakaua noho. Hegeregere, New Zealand ai, tadikaka ta ladana Paul ese adorahi ta ai, ruma-ta-ruma-ta haroro gaukara lalonai hahine ta ia hedavari henia. Unai daba ai unai hahine be ia guriguri bona Dirava ena ladana Iehova ia gaukaralaia bona ia noia ta ese ia vadivadi henia totona. Paul ia gwau, “hora toi murinai, lau be unai hahine ena iduara badinai lau ginidae.”

Korinto Ginigunana 3:9 duahia, bena inai henanadai herevalaia:

• Edena dala ai New Zealand ai ia vara ekspiriens ese ia hahedinaraia, Iehova be haroro gaukara ia gunalaia noho?

Kara 1:8 duahia, bena inai henanadai herevalaia:

• Dahaka dainai haroro gaukara ita hagugurua totona Iehova ena heduru ita abia be namo?

Inai oi diba, a?

Wiki ta ta ena hebou ai haroro gaukara totona treinini ai abia. Bema unai hebou ta dekenai oi lao vadaeni, unai treinini be edena bamona oi laloa?

6. Dirava ena hahegani haroro gaukara totona ai badinaia

Keristani ginigunadia edia nega ai, haida idia ura Iesu murinai idia raka taudia idia koua haroro gaukara idia karaia lasi totona. Unai dainai Keristani ginigunadia ese haroro gaukara idia karaia noho totona, “kota vairanai sivarai namona” harorolaia ena maoro idia gwauraia hedinarai. (Filipi 1:7) Hari danu, Iehova ena Witnes taudia be unai bamona idia karaia noho.a

VIDIO: Taravatu Hegeregerena Sivarai Namona Ena Maoro Gwauraia Hedinarai (2:​28)

Kara 5:​27-42 duahia, bena inai henanadai herevalaia:

• Dahaka dainai haroro gaukara do ita hadokoa lasi?—Siri 29, 38, bona 39 itaia.

POINT BADANA

Iesu ese ia murinai idia raka taudia ia hadibaia bese ibounai dekenai sivarai namona idia harorolaia totona. Iehova ese ena taunimanima ia durua noho inai gaukara idia karaia totona.

Riviu

• Edena dala ai tanobada ibounai dekenai sivarai namona idia harorolaia noho?

• Edena dala ai iseda haroro gaukara ese ia hahedinaraia iseda dekena taudia ita lalokau henia?

• Oi laloa haroro gaukara amo moale ita abia diba, a? Dahaka dainai?

REFERENS ITAIA

Iehova ena Witnes taudia ese siti badadia dekenai idia karaia haroro dalana itaia.

Paris ai Spesel Pablik Haroro Gaukara (5:​11)

Edena dala ai Iehova ena Witnes taudia ese refiuji taudia idia durua noho?

Refiuji Taudia Idia Durua Dirava Idia Dibaia Totona (5:​59)

Hahine ta be ena mauri ibounai lalonai haroro gaukara ia moalelaia ena sivarai mani oi kamonai.

Inai Gaukara Lau Abia Hidi Dainai Lau Moale (6:​29)

Kota ai idia karaia mai anina bada disisen ese sivarai namona harorolaia gaukarana ia durua dalana oi dibaia.

“Basileia Harorolaia Taudia ese Kota Dekenai Edia Keis Idia Abia Lao” (Dirava Ena Basileia Ia Lohia!, karoa 13)