October

Nega haida hereva oi badinaia be auka, a? King Davida be unai bamona ia mamia dainai, ia guriguri: “Oi lau badinaia urana be lau dekenai oi havaraia.” (Sal. 51:12) Davida be Iehova ia lalokau henia. To, nega haida ia hekwarahi hereva ia badinaia totona, bona ita danu be unai bamona. Dahaka dainai? Badina ginigunana be, Adamu amo kamonai lasi karana ita abia. Badina iharuana be, Satani ia karaia bamona, ia ura Dirava ita gwau-edeede henia. (2 Kor. 11:3) Bona badina ihatoina be, ita be inai tanobada ena gwau-edeede taudia huanai ita noho, unai “lalohadai be hari kamonai lasi taudia edia lalona dekenai ia gaukara.” (Efe. 2:2) Namona be ita gaukara goada ura dikadia ita dadaraia sibona lasi, to danu Satani bona inai tanobada ena hahetoho ita dadaraia. Danu, namona be ita gaukara goada Iehova bona siahu taudia edia hereva ita badinaia totona. w23.10 rau 6 par. 1

Iesu ese ranu be wain ai ia halaoa karana amo, dahaka ita dibaia? Ita ese manau karana ita dibaia. Iesu be unai hoa karana dainai ia heagi lasi, oibe ia karaia gaudia ibounai dainai ia heagi diba lasi. To, mai manau ida nega ibounai hanamoa ibounai be iena Tamana dekenai ia henia. (Ioa. 5:​19, 30; 8:28) Iesu ena manau karana ita tohotohoa neganai, ita karaia gaudia do ita heagilaia lasi. Namo lasi ita sibona dainai ita heagi, to ita hesiai henia Dirava hereadaena totona ita heagi. (Ier. 9:​23, 24) Namona be ia sibona ita hanamoa, badina Iehova ena heduru amo gaukara namodia ita karaia diba. (1 Kor. 1:​26-31) Ita manau neganai, haida totona ita karaia kara namodia dainai, do ita heagi lasi. Ita moale badina ita diba Iehova ese ita karaia gaudia ibounai ia itaia bona ia laloa bada. (Mataio 6:​2-4 hahegeregerea; Heb. 13:16) Oibe, Iesu ita tohotohoa bona manau karana ita hahedinaraia neganai, Iehova do ita hamoalea.—1 Pet. 5:6. w23.04 rau 4 par. 9; rau 5 par. 11-12

Aposetolo Paulo ese Keristani taudia ia hagoadaia ma haida edia namo do idia laloa. Edena dala ai unai sisiba be hebou ai ita badinaia diba? Ma haida ita laloa idia danu be ita hegeregerena, idia ura haere idia henia. Mani inai ita laloa. Emu turadia ida oi kiki neganai, oi sibona oi hereva bona nega do oi henia lasi idia hereva totona, a? Unai do oi karaia lasi, ani? Oi ura idia danu do idia herevahereva. Unai hegeregerena, hebou dekenai, ita ura momo idia haere. Iseda tadikaka taihu ita hagoadaia dalana ta be, idia dekenai nega ita henia edia haere amo edia abidadama idia hahedinaraia totona. (1 Kor. 10:24) Unai dainai, iseda haere do ia kwadogi, unai amo nega ita henia haida idia haere totona. Ena be haere kwadogina oi henia, to namo lasi point momo oi herevalaia. Point haida oi rakatania ma haida ese idia haerelaia totona. w23.04 rau 22-23 par. 11-13

Namona be haroro gaukara ai ma haida durua karana do ita laloa bada. Haroro gaukara ai dala idauidau ita tohoa be namo. Bese idauidau taudia ita davaria bona edia lalohadai Dirava dekenai be idauidau danu. Aposetolo Paulo ena haheitalai ita tohotohoa diba, ia be haroro daladia idauidau ia gaukaralaia. Iesu ese Paulo ia abia hidi “idau bese taudia edia aposetolo tauna” ai ia lao totona. (Roma 11:13) Unai dainai, Paulo be Iuda taudia, Grik taudia, diba bada taudia, hanua taudia, gavamani taudia bona lohia taudia ia haroro henidia. Paulo be ‘gau ibounai ia karaia’ edia lalona ia veria totona. (1 Kor. 9:​19-22) Ia haroro henia taudia edia hanua, noho dalana bona idia abidadama henia gaudia ia laloa. Unai amo idia ta ta edia lalona ia veria dalana ai ia haroro henidia. Ita danu ese iseda haroro dalana ita hanamoa diba, bema taunimanima edia noho dalana ita laloa bona ita durua diba dalana ai ita haroro henidia. w23.07 rau 23 par. 11-12

Manau karana idia hahedinaraia taudia be idia goada, idia manoka lasi. Hekwakwanai ita davaria neganai, lalogoada karana ese ita ia durua ita manau noho totona. Manau karana be “lauma helaga ena huahua” ta. (Gal. 5:​22, 23) Greek gado herevana idia hahanaia, “manau” be idia gaukaralaia dagedage hosi ta idia hamanaua karana idia herevalaia totona. Mani dagedage hosi ta ia manau oi laloa. Ia be manau, to mai ena goada. To edena dala ai ita taunimanima be manau karana ita hahedinaraia, bona ita goada noho diba? Sibona iseda goada amo ita karaia diba lasi. Mai anina bada gauna be Dirava ena lauma helaga totona ita guriguri, ita ia durua manau karana ita hahedinaraia totona. Ekspiriens ese idia hahedinaraia unai ita karaia diba. Hegeregere iseda tadikaka taihu momo be haida ese idia dagedage henia neganai, mai manau ida idia kara, unai amo haida ese Witnes taudia dekenai lalohadai maorona idia abia.—2 Tim. 2:​24, 25. w23.09 rau 15 par. 3

Matahanai ta lalonai, aposetolo Ioane ia itaia guba ai tau badadia 24 be Iehova idia tomadiho henia noho. Ia idia hanamoa, idia gwau, ia be hegeregere momokani ‘hairai, hemataurai, bona siahu ia abia totona.’ (Apok. 4:​10, 11) Abidadama aneru danu be badina momo dainai Iehova idia hanamoa. Idia be guba ai ia ida idia noho dainai, ia idia diba namonamo. Ia karaia karadia amo iena kara namodia idia itaia. Iehova ena kara idia itaia neganai, idia ura ia idia hanamoa. (Iobu 38:​4-7) Ita danu ita ura iseda guriguri lalonai Iehova ita hanamoa, bona ia ita lalokau henia bona matauraia ena badina ita gwauraia hedinarai. Baibel oi duahia bona stadilaia neganai, oi tahua edena kara namodia Iehova amo moalelaia. (Iobu 37:23; Roma 11:33) Bena unai kara namodia dainai emu hemami be Iehova dekenai oi gwauraia hedinarai. Danu, Iehova do ita hanamoa badina ita bona iseda Keristani tadikaka taihu ibounai ia durua.—1 Sam. 2:​1, 2. w23.05 rau 3-4 par. 6-7

Lagani 1919 ai, Babulonia Badana ena siahu Dirava ena taunimanima dekenai ia ore. Unai lagani ai, “hesiai tauna mai ena kamonai bona mai ena aonega” be ena gaukara ia hamatamaia, bona unai amo kudou maoro taudia be “Helaga Dalana” matamatana ai idia raka diba. (Mat. 24:​45-47; Isa. 35:8) Ita moale, guna haida be unai dala hegaegaelaia gaukarana idia karaia, unai amo haiwei dalana idia badinaia matamaia taudia ese Iehova ena ura dibaia karana idia habadaia. (Aon. 4:18) Danu edia mauri lalonai Iehova ena taravatu idia badinaia diba. Iehova ese ena taunimanima ia doria lasi, maoromaoro edia mauri idia haidaua totona. To metairametaira ia durudia edia mauri idia hanamoa totona. Ita karaia gaudia ibounai lalonai, Dirava ita hamoalea neganai, ita danu do ita moale! Dala ibounai dekenai hanaihanai hanamoa gaukara idia karaia be namo. Lagani 1919 amo “Helaga Dalana” ena hanamoa gaukara idia karaia noho, unai amo taunimanima momo idia durua Babulonia Badana idia rakatania totona. w23.05 rau 17 par. 15; rau 19 par. 16

Hakaua Oreana be ena durua taudia dekenai treinini ia henia. Hari unai durua taudia be mai abidadama ida orea lalonai maduna momo idia huaia noho. Unai taudia be idia hegaegae namonamo Keriso ena mamoe idia naria noho totona. Hisihisi badana ena dokonai horoa orena taudia be guba dekenai idia daekau neganai, Iesu ena hakaua henunai tanobada ai Iehova ena taunimanima be mai abidadama ida tomadiho momokanina do idia badinaia noho. Ita diba unai nega ai, Magoga tauna Goga, idia haboua tanobada besedia unai, be ita do idia tuari henia. (Ese. 38:​18-20) To unai tuari kwadogina be do ia kwalimu lasi, bona Dirava ena taunimanima do ia koua lasi Iehova idia tomadiho henia totona. Bona idia do ia hamauria! Matahanai ta lalonai, aposetolo Ioane ese Keriso ena mamoe ma haida, “hutuma bada” taudia ia itaia. Aneru ta ese Ioane ia hamaoroa, inai “hutuma bada” be “hisihisi badana amo idia hanaia mai” taudia. (Apok. 7:​9, 14) Unai dainai ita diba Iehova ese ena taunimanima do ia naria! w24.02 rau 5-6 par. 13-14

Dahaka ita karaia diba lauma helaga ita abia totona? Ita guriguri, Dirava ena Hereva ita stadilaia, bona ena lauma helaga amo ia hakaua oreana ita bamoa. Unai ita ia karaia neganai, “lauma helaga ena huahua” do ita hahedinaraia. (Gal. 5:​22, 23) Dirava ese ena lauma helaga be edia lalohadai bona kara ia goeva noho taudia dekenai ia henia. To, ita dekenai lauma helaga do ia henia lasi bema iseda lalohadai bona kara be goeva lasi. (1 Tes. 4:​7, 8) Danu, lauma helaga ita abia noho totona, namo lasi ita laloa “peroveta herevadia be anina lasi.” (1 Tes. 5:20) Inai siri ai, “peroveta herevadia” ena anina be Dirava ena lauma helaga ese ia havaraia herevadia, bona idia be Iehova ena dina laloa bada karana bona nega dokona be ia kahirakahira ia herevalaia danu. Namo lasi unai dina ita laloaboio, bona ita gwau Aramagedono be iseda nega ai do ia vara lasi. To, ita diba kahirakahira unai dina do ia ginidae dainai ‘Dirava badinaia karadia ita hahedinaraia’ noho.—2 Pet. 3:​11, 12. w23.06 rau 12 par.13-14

Ita Keristani taudia ese dahaka ita karaia be namo, bema ponografi laulau be iseda elektronik divais ai ia hedinarai? Karaharaga unai laulau ita dadaraia. Unai ita karaia diba bema iseda hetura karana Iehova ida ita laloa bada. Momokani, ena be ita laloa laulau ese ponografi ia hahedinaraia lasi, to mahuta hebou urana ia havaraia diba. Dahaka dainai ita dadaraia? Badina ita ura lasi iseda kudouna ai matabodaga karana ta ita havaraia. (Mat. 5:​28, 29) Thailand ai, elda ta ladana Davida be sibona ia henanadai, ia gwau: ‘Ena be inai laulau be ponografi lasi to, Iehova do ia moale bema lau itaia noho, a?’ Unai bamona lalohadai ese lau ia durua mai aonega ida lau kara.” Iehova gari henia karana ese ita ia durua mai aonega ida ita kara totona. Unai amo Iehova ita hahisia lasi. Dirava gari henia karana be “aonega ena matamana.” w23.06 rau 23 par. 12-13

“Lalona daiutu” be kongrigeisen ia laulaulaia. Hisihisi badana lalonai bema tadikaka taihu ida Iehova ita hesiai henia hebou, ia gwauhamata ita do ia gimaia. Unai dainai, namona be hari iseda tadikaka taihu ita diba sibona be hegeregere lasi, to ita gaukara goada idia ita lalokau henia totona. Oibe, ita roho mauri totona, iseda tadikaka taihu ita lalokau henidia be gau badana! “Iehova ena dina badana” ese taunimanima dekenai lalohekwarahi do ia mailaia. (Sef. 1:​14, 15) Iehova ena taunimanima be hisihisi do idia davaria danu. To bema hari ita hegaegae, do ita lalohekwarahi lasi bona ma haida do ita durua diba. Ita davaria hekwakwanai do ita haheaukalaia diba. Iseda tadikaka taihu be hisihisi idia davaria neganai, hebogahisi do ita hahedinaraia bona dala do ita tahua idia ita durua totona. Bona, bema hari iseda tadikaka taihu ita lalokau henidia, vaira nega ai idia dekenai lalokau ita hahedinaraia diba. Iehova ese tanobada matamatana ai ita dekenai mauri hanaihanai do ia henia bona unuseniai disasta bona hisihisi ibounai do ita lalodia lou lasi.—Isa. 65:17. w23.07 rau 7 par. 16-17

Baibel ia gwau abidadama taudia be goada taudia. To idia goada bada taudia be nega haida idia lalogoada lasi. Hegeregere, King Davida be nega haida ia mamia ia ‘goada bada, ororo bamona,’ to nega haida ia “gari bada” danu. (Sal 30:7) Dirava ena lauma helaga ese Samson dekenai goada bada ia henia, to Samson ia laloparara bema Dirava ese ia hagoadaia lasi, ‘do ia manoka bona taunimanima ibounai bamona do ia lao.’ (Hah. 14:​5, 6; 16:17) Oibe, unai abidadama tatau idia goada, badina Iehova ese idia dekenai goada ia henia. Aposetolo Paulo ia laloparara Iehova amo goada ia abia be namo. (2 Kor. 12:​9, 10) Ia danu be mai ena gorere. (Gal. 4:​13, 14) Nega haida, kara maoromaoro ia karaia totona ia hekwarahi. (Roma 7:​18, 19) Bona nega haida ia lalohekwarahi bona ia diba lasi ia dekenai dahaka do ia vara. (2 Kor. 1:​8, 9) To, Paulo ia manoka neganai ia goada. Edena dala ai? Iehova ese Paulo dekenai goada ia henia ena hekwakwanai ia haheaukalaia totona. w23.10 rau 12 par. 1-2

Bema nega haida ita mamia ita be anina lasi, namona be ita laloatao Iehova ese ita ia veria mai ia dekenai. (Ioa. 6:44) Ita sibona dekenai ita itaia lasi kara namodia ia itaia bona iseda kudouna ia diba. 2 Siv. 6:30) Unai dainai, ita abia dae Iehova be ita ia laloa bada. (1 Ioa. 3:​19, 20) Ita momo be hereva momokani ita do dibaia lasi neganai, ita karaia gaudia dainai ita hemarai. (1 Pet. 4:3) Iehova ena abidadama hesiai taudia haida be reana edia manoka gaudia idia haheaukalaia noho. Oi be edena bamona? Emu kudouna ese oi ia kota henia, a? Bema oibe, namona be oi diba Iehova ena abidadama hesiai taudia haida be unai bamona idia mamia danu. Hegeregere, aposetolo Paulo be ena kara gunadia ia laloa neganai ia lalohisihisi. (Roma 7:24) Oibe, Paulo be ena kara dikadia amo ia helalo-kerehai bona ia bapatiso. To sibona ia gwauraia, ‘aposetolo taudia ibounai huanai ia be maragi herea’ bona kara dika taudia amo ia be “dika momokani.”—1 Kor. 15:9; 1 Tim. 1:15. w24.03 rau 27 par. 5-6

King Iehoasa ena abia hidi kererena amo ita diba, tura namodia do ita abia hidi, idia ese ita do idia hagoadaia—unai bamona turadia be Iehova idia lalokau henia bona idia ura ia idia hamoalea. Namo lasi mauri lagani tamona taudia sibona ita bamoa. Laloatao, Iehoasa ena turana Iehoiada ena mauri lagani be bada. Turadia oi abia hidi neganai sibona oi nanadaia: ‘Lau idia hagoadaia egu abidadama Iehova dekenai ia goada totona, a? Lau idia durua Dirava ena taravatu lau badinaia totona, a? Iehova bona Baibel ena hereva momokani idia ura herevalaia, a? Dirava ena taravatu idia matauraia, a? Lau idia durua totona sisiba idia henia, a?’ (Aon. 27:​5, 6, 17) Bema Iehova idia lalokau henia lasi, oi tura henidia lasi. To bema emu turadia be Iehova idia lalokau henia taudia, hanaihanai oi do idia durua.—Aon. 13:20. w23.09 rau 9-10 par. 6-7

Grik gado ena alfabet ai Alepa be leta ginigunana, bona Omega be leta ginigabena. Iehova ia gwau ia be “Alepa bona Omega,” unai amo Ia hahedinaraia ia ese gau ta ia hamatamaia neganai, unai gauna do ia hagugurua momokani. Iehova be Adamu bona Heva ia karaia murinai, idia dekenai ia gwau: “Natudia umui havaraia bona do umui momo herea bona tanobada umui hahonua bona umui biagua.” (Gen. 1:28) Unai nega ai Iehova ia gwau, “Alepa.” Iena ura ia gwauraia hedinarai: Nega ta do ia mai Adamu bona Heva edia goevadae natudia ese tanobada do idia noholaia bona paradaiso ai do idia halaoa. Unai nega ai, Iehova be do ia gwau “Omega.” Iehova ese “guba bona tanobada bona idia lalonai idia noho gaudia ibounai ia karaia haorea” murinai, iena ura do ia hagugurua herevana ta ia gwauraia, ia gwauhamata iena ura taunimanima bona tanobada totona be do ia hagugurua momokani. Bona unai be dina namba 7 dokonai do ia vara.—Gen. 2:​1-3. w23.11 rau 5 par. 13-14

Babulonia amo do idia raka lao Israela tanona ena daudau be hua foa bamona, bona unai be mai ena hekwarahi to Iehova ia gwauhamata edia dala ia koua gaudia do ia kokia. Abidadama Iuda taudia idia diba Israela dekenai do idia giroa lou ena hahenamo ese do idia rakatania gaudia ia hereaia. Unai hahenamo badana be edia tomadiho karana. Babulonia ai Iehova ena dubu helaga ia noho lasi. Mose ena Taravatu hegeregerena Israela taudia be boubou gaudia gabua totona, boubou patana ta ia noho lasi. Bona hahelaga taudia idia noho lasi unai gaukara idia karaia totona. Danu, dirava koikoidia idia tomadiho henia taudia be momo herea, to Iehova bona ena kara maoromaoro taravatudia idia badinaia taudia be momo lasi. Unai dainai Dirava idia gari henia Iuda taudia tausen momo be idia moale bada, badina edia tano dekenai do idia giroa bona tomadiho momokanina do idia haginia lou. w23.05 rau 14-15 par. 3-4

Dirava ena lauma helaga ena heduru ita abia be namo, unai amo “diari natudia bamona” do ita raka. Dahaka dainai? Badina inai matabodaga tanobadana lalonai ita goeva noho be mai ena hekwarahi. (1 Tes. 4:​3-5, 7, 8) Lauma helaga ese ita do ia durua Dirava ena lalohadai idia badinaia lasi taudia edia lalohadai ita dadaraia. Danu ita do ia durua “namo gaudia idauidau bona kara maoromaoro” ita hahedinaraia totona. (Efe. 5:9) Lauma helaga ita abia dalana ta be ita guriguri. Iesu ia gwau, Iehova ese “lauma helaga be idia noinoi taudia dekenai do ia henia.” (Luka 11:13) Bona Keristani heboudia dekenai Iehova ita hanamoa hebou neganai, lauma helaga ita abia. (Efe. 5:​19, 20) Iehova ena lauma helaga ese ita do ia durua Ia moalelaia dalana ita badinaia totona. w24.03 rau 23-24 par 13-15

Emu haheauka karana oi habadaia be namo, a? Bema oibe, unai totona oi guriguri. Haheauka karana be lauma helaga ena huahua ta. (Gal. 5:​22, 23) Unai dainai, lauma helaga totona ita guriguri bona Iehova ita noia ita ia durua unai kara ita habadaia totona. Bema hekwakwanai ta ese iseda haheauka karana ia tohoa, namona be lauma helaga totona ita “noinoi noho” bona ita ia durua do ita haheauka. (Luka 11:13) Danu, Iehova ena heduru do ita noia unai amo unai hekwakwanai be ia ese ia itaia dalanai do ita itaia. Ita guriguri murinai, namona be ita gaukara goada dina ta ta ai haheauka karana ita hahedinaraia totona. Bema hanaihanai ita guriguri, bona haheauka karana ita hahedinaraia noho, iseda kudouna ai do ia noho bona do ita manadalaia. Danu Baibel lalonai idia noho haheitalai ita laloa dobu karana ese ita do ia durua. Baibel lalonai idia haheauka taudia momo edia sivarai idia noho. Unai sivarai ita lalodia dobu neganai, haheauka ita hahedinaraia daladia do ita diba. w23.08 rau 22 par. 10-11

Iesu ese aposetolo Petero ia hamaoroa, Iehova be ia do ia durua. Iesu ia toreisi lou murinai, Petero bona aposetolo taudia ma haida ia durua bona hoa dalanai gwarume momo idia veria. (Ioa. 21:​4-6) Unai ese ia hamomokania Iehova be Petero ena dabu gaudia do ia henia. Reana, aposetolo taudia be Iesu ena hereva idia laloatao, ia gwau Iehova ena ‘Basileia idia tahua guna’ taudia edia dabu gaudia do ia henia. (Mat. 6:33) Unai hereva hegeregerena, Petero be haroro gaukara ia atoa guna, to haoda gaukarana lasi. Pentekoste 33 C.E. ai, mai gari lasi ida ia haroro bona taunimanima tausen momo ia durua sivarai namona idia abia dae totona. (Kara 2:​14, 37-41) Gabeai, ia ese Samaria bona Iuda lasi taudia ia durua Keriso idia abia dae totona. (Kara 8:​14-17; 10:​44-48) Oibe, Iehova ese dala idauna ai Petero ia gaukaralaia taunimanima idauidau ia durua bona kongrigeisen lalonai ia abia vareai. w23.09 rau 20 par. 1; rau 23 par. 11

Babulonia besena ese Ierusalema ia hadikaia, bena lagani rua bamona murinai Daniela be gari lasi karana ia hahedinaraia. Babulonia ena King Nebukanesa be ia nihi bona kaivakuku badana ta ia itaia dainai ia gari. Ena aonega taudia, Daniela danu, ia oda henidia ena nihi do idia herevalaia bona ena anina do idia gwauraia hedinarai, bema lasi, ia ese idia ibounai do ia alaia. (Dan. 2:​3-5) Daniela ia karaharaga be namo, bema lasi, idia momo do idia mase. Unai dainai, Daniela be “king dekenai ia lao bona ia noia ia dekenai nega ia henia, unai amo Daniela ese king dekenai nihi ena anina do ia gwauraia.” (Dan. 2:16) Unai ia karaia totona, abidadama bona gari lasi karana ia hahedinaraia. Baibel ia hahedinaraia lasi Daniela be guna nihi edia anina ia gwauraia hedinarai. Iena turadia “ia hamaoroa guba ena Dirava do idia noia idia ia hebogahisi henia totona, bona unai hehuni gauna be idia dekenai do ia hahedinaraia.” (Dan. 2:18) Iehova ese edia guriguri ia haerelaia, bona iena heduru amo Daniela be Nebukanesa ena nihi ia gwauraia hedinarai. Daniela ese ia bona iena turadia ia hamauria. w23.08 rau 3 par. 4

Haheauka karana ena namo haida ita laloa. Haheauka ita hahedinaraia neganai maino ai ita noho bona ita moale. Oibe, haheauka karana ese iseda lalohadai bona tauanina ia hanamoa diba. Ma haida dekenai haheauka karana ita hahedinaraia neganai, eda tura namodia ai do idia lao bona ita moale. Kongrigeisen lalonai mai lalotamona ida do ita noho. Ta ese iseda lalona ia hahisia neganai, iseda badu haraga lasi karana ese hekwakwanai do ia habadaia lasi. (Sal. 37:8; Aon. 14:29) To hahenamo badana be, iseda guba Tamana ita tohotohoa bona ia kahirakahira ita lao. Haheauka karana be ita ibounai dekenai namo ia havaraia kara hereadaena! Ena be haheauka karana ita hahedinaraia be auka, to Iehova ena heduru amo unai kara ita habadaia diba. Bona tanobada matamatana ita naria noho lalonai, ita diba momokani “Iehova be ia dekenai idia gari taudia ia itaia noho. Bona iena lalokau dekenai idia naria noho taudia ia itaia danu.” (Sal. 33:18) Namona be ita ibounai ese iseda lalona ita hadaia haheauka karana ita hahedinaraia noho. w23.08 rau 22 par. 7; rau 25 par. 16-17

Iamesi ia gwau ena be tau ta ia laloa ia be mai ena abidadama, to ena kara amo ia hahedinaraia ia be abidadama lasi tauna. (Iam. 2:​1-5, 9) Danu, Iamesi ia gwau tau ta be ia itaia ena ‘tadikaka eiava taihu ta be dabua lasi bona unai dina ena aniani totona ia hegeregere lasi,’ to heduru ia henia lasi. Ena be unai tauna ia gwau ia be mai ena abidadama, to ena kara amo ia hahedinaraia lasi, unai dainai ena abidadama be anina lasi. (Iam. 2:​14-16) Iamesi ia gwau Rahaba be ena kara amo ia hahedinaraia ia be abidadama hahinena. (Iam. 2:​25, 26) Rahaba be Iehova ese Israela taudia ia durua sivaraina ia kamonai bona ia laloparara Iehova be idia ida. (Ios. 2:​9-11) Rahaba ena abidadama be ena kara amo ia hahedinaraia, ia ese Israela spai taudia rua ia durua idia heau mauri totona. Unai dainai, ena be Rahaba be goevadae lasi bona Israela hahinena lasi, to Dirava ese ia gwauraia maoromaoro, Aberahamo ia gwauraia hegeregerena. Rahaba amo ita dibaia gauna be, iseda abidadama be eda kara amo ita hahedinaraia be gau badana. w23.12 rau 5-6 par. 12-13

Ita Keristani taudia be Baibel ena hahediba hereva badadia sibona ita lalopararalaia be hegeregere lasi. Dirava ena lauma helaga ena heduru amo, ita ura “Dirava ena dobu gaudia danu” do ita diba. (1 Kor. 2:​9, 10) Iehova kahirakahira oi lao totona, sibona emu stadi projek ta oi karaia diba, a? Hegeregere, ia ese idaunegai iena hesiai taudia dekenai lalokau ia hahedinaraia, bona oi dekenai danu unai lalokau ia hamomokania dalana oi stadilaia. Eiava emu stadi lalonai, Israela taudia ese Iehova idia tomadiho henia dalana be hari Keristani taudia ese idia tomadiho henia dalana ida oi hahegeregerea diba. Eiava tanobada ai Iesu ena mauri bona hesiai gaukara ai ia hagugurua peroveta herevadia oi stadilaia diba. Watch Tower Publications Index eiava Research Guide for Jehovah’s Witnesses oi gaukaralaia diba mai moale ida unai topik idauidau oi stadilaia totona. Baibel ena dobu gaudia stadilaia karana ese emu abidadama ia hagoadaia diba bona oi ia durua “Dirava do oi diba.”—Aon. 2:​4, 5. w23.10 rau 18-19 par. 3-5

Petero ese inai hereva “bada” ia gaukaralaia anina be “habadaia lao.” Siri ena kahana iharuana ai ta ta do ita lalokau henia bada neganai, do ita karaia gauna ia herevalaia. Unai be iseda tadikaka taihu edia dika do ita gwauatao. Reana inai bamona ita laloa diba: Iseda lalokau be eda imana rua amo ita dogoatao dabua ta bamona, bona ita veria lao ela bona kahana ibounai eiava “kara dika momo ia koua.” Inai hereva koua anina be kara dika gwauatao karana. Dabua ese miro ia koua hegeregerena, lalokau ese ta ena manoka gaudia bona ena kerere maragidia ia koua diba. Namona be iseda lalokau ia goada, unai amo iseda tadikaka taihu edia kerere idauidau ita gwauatao diba, ena be unai ita karaia be mai ena hekwarahi. (Kol. 3:13) Ma haida edia kerere ita gwauatao neganai, ita hahedinaraia iseda lalokau be ia goada bona ita ura Iehova ita hamoalea. w23.11 rau 11-12 par. 13-15

King Iosaia, ena mauri lagani be 26 neganai, dubu helaga ia hanamoa matamaia. Unai gaukara idia karaia lalonai, Hahelaga tauna Hilekaia ese “Iehova ena Taravatu bukana ia davaria, unai buka be Dirava ese Mose dekenai ia henia.” Bona taravatu idia duahia bona King ese ia kamonai neganai, unai hegeregerena ia badinaia. (2 Siv. 34:​14, 19-21) Hanaihanai oi ura Baibel oi duahia, a? Oi moalelaia noho, a? Oi do ia durua Baibel siridia oi laloatao noho, a? Iosaia ena mauri lagani be 39 neganai, kara dika ia karaia bona ia mase. Iehova ena heduru ia noia lasi to sibona dekenai ia tabekau. (2 Siv. 35:​20-25) Ita dibaia gauna be inai. Herevana iseda mauri lagani be bada o maragi, eiava nega daudau Baibel ita stadilaia, to namona be Iehova kahirakahira ita lao noho. Anina be iena heduru totona do ita guriguri, iena Hereva ita stadilaia, bona lo Keristani taudia edia sisiba ita abia dae. Unai amo kerere do ita hanaia bona do ita moale.—Iam. 1:25. w23.09 rau 12 par. 15-16

Baibel ese Iehova idia lalokau bona hesiai henia hahine namodia haida edia sivarai ia gwauraia. Idia be “edia kara idia biagua, bona gau ibounai idia karaia namonamo.” (1 Tim. 3:11) Ma danu, taihu matamata be edia kongrigeisen lalonai idia noho lo Keristani taihu edia haheitalai idia tohotohoa diba. Taihu matamata e, umui be umui tohotohoa diba lo Keristani taihu haida umui diba, a? Namona be edia kara namodia umui itaia, bena do umui tohotohoa dalana umui laloa. Manau karana be lo Keristani hahinena ena kara badana ta. Bema hahine ta be ia manau, ia be Iehova bona ma haida do ia tura henidia namonamo. Hegeregere, Iehova ia lalokau henia hahinena be 1 Korinto 11:3 ese ia herevalaia kwara dagina ena hakaua herevana do ia badinaia. Kongrigeisen bona ruma bese lalonai unai hakaua herevana be mai anina bada. w23.12 rau 18-19 par. 3-5

Iehova ia ura headava tauna be iena adavana do ia lalokau henia bona tauanina dalanai ena dabu gaudia ia henia, ia tura henia namonamo, bona ia durua Iehova kahirakahira ia noho totona. Laloa namonamo karana, hahine matauraidia karana, bona maduna huaia namonamo karana ese emu headava lalonai oi do idia durua. Oi headava murinai, reana tama ta ai do oi lao. Tama namona ai oi lao totona, Iehova amo gau momo do oi dibaia. (Efe. 6:4) Iehova be iena Natuna, Iesu, ia hamaoroa ia lalokau bona lalonamo henia. (Mat. 3:17) Bema tama ta ai do oi lao, namona be hanaihanai emu natudia oi hamaoroa idia oi lalokau henia. Nega momo idia karaia gau namodia dainai oi hanamodia. Iehova ena haheitalai idia tohotoho tama ese edia natudia idia durua lo Keristani tau bona hahine ai idia lao totona. Tama namona ai oi lao totona, namona be mai lalokau ida emu ruma bese bona kongrigeisen taudia oi naria, bona oi hamaorodia idia oi lalokau henidia bada.—Ioa. 15:9. w23.12 rau 28-29 par. 17-18

Ena be mai abidadama ida Iehova ita hesiai henia, to momo dekenai ia vara bamona, hekwakwanai ita davaria bona ita gorere. Danu, Dirava ena taunimanima idia inai henia taudia amo hisihisi bona dagedage ita haheaukalaia. Ena be Iehova ese unai hekwakwanai ia koua lasi, to ia gwauhamata ita do ia durua. (Isa. 41:10) Unai dainai, ita moale noho, abia hidi maorodia ita karaia, bona Iehova do ita badinaia noho. Iehova ia gwauhamata ita dekenai “Dirava ena maino” do ia henia. (Fili. 4:​6, 7) Iehova ita tura henia dainai, ia ese unai maino ia henia. Unai maino be “laloparara ibounai ia hereaia gauna,” bona ena hemami be namo herea. Hegeregere, oi guriguri goadagoada murinai, lalomaino oi abia, a? Unai bamona oi mamia badina Dirava ese “ena maino” ia henia. w24.01 rau 20 par. 2; rau 21 par. 4

Dirava idia lalokau henia taudia be mai kudouna ibounai ida iena ladana idia hanamoa. King Davida ia laloparara Iehova ena ladana ita hanamoa neganai, ita be Iehova ita hanamoa. Iehova ena ladana ita kamonai neganai, ia bona ena kara namodia ita laloa. Davida ia ura ena Tamana ena ladana ia hahelagaia bona hanamoa. Danu ia ura mai “lalona ibounai” ida unai ia karaia. Unai hegeregerena, Levi taudia be Iehova hanamoa karana idia laloa bada. Mai manau ida idia gwau edia hereva sibona amo Iehova ena ladana idia hanamoa be hegeregere lasi. (Neh. 9:5) Momokani, mai manau bona lalona ibounai ida Iehova idia hanamoa dainai Ia moale. w24.02 rau 9 par. 6

Iehova be oi do ia laloa maragi lasi, bema oi hegeregere lasi emu tahua gauna oi hagugurua totona. (2 Kor. 8:12) Koua gaudia amo diba oi abia. Oi hagugurua vadaeni gauna oi laloatao. Baibel ia gwau, “Dirava ena kara be ia gageva lasi, Ia ese emu gaukara do ia laloaboio diba lasi.” (Heb. 6:10) Namona be oi danu oi hagugurua vadaeni tahua gauna oi laloaboio lasi. Hegeregere, emu hetura karana Iehova ida ia hagoadaia, ma haida dekenai ia oi herevalaia, eiava oi bapatiso. Guna oi hagugurua tahua gaudia hegeregerena, hari oi gaukara goada emu tahua gauna oi hagugurua totona. Iehova ena heduru dainai emu tahua gauna oi hagugurua diba. Oi gaukara goada noho emu tahua gauna oi hagugurua lalonai, namona be Iehova ese oi do ia durua bona hanamoa dalana oi moalelaia danu. (2 Kor. 4:7) Bema oi hesiku lasi, hahenamo momo do oi abia.—Gal. 6:9. w23.05 rau 31 par. 16-18

Iehova be ena taunimanima dekenai lalokau ia hahedinaraia bona idia ia lalonamo henia. Siri haida ese idia hahedinaraia nega rua Iehova ese Iesu ia hamaoroa, ia be Ena lalokau Natuna bona ia lalonamo henia. (Mat. 3:17; 17:5) Oi ura kamonai Iehova be oi ia lalonamo henia, a? Iehova be guba amo ita ia hereva henia lasi, to Baibel amo. Evanelia bukadia ai Iesu ena hereva ita duahia neganai, unai be hegeregere Iehova ena gadona ita “kamonai,” bona ia gwau ita ia lalonamo henia. Iesu ese ena Tamana ena kara ia tohotohoa namonamo. Unai dainai, Iesu ese goevadae lasi abidadama hesiai taudia ia lalonamo henia ena sivarai ita duahia neganai, ita laloa diba Iehova be ita dekenai unai hereva ia gwauraia. (Ioa. 15:​9, 15) Bema hahetoho ita davaria, unai ese ia hahedinaraia lasi Dirava be ita ia lalonamo henia lasi. To, unai ese dala ia kehoa Dirava dekenai iseda lalokau ita hahedinaraia bona ia ita abidadama henia.—Iam. 1:12. w24.03 rau 28 par. 10-11