Iesu ena Mauri bona Gaukara

Ioane Ia Abidadama Lasi A?

IOANE Bapatiso be lagani tamona lalonai dibura ai ia noho bena sivarai ia kamonai Iesu ese vabu ta ena natuna Nain dekenai ia hamauria lou. To Ioane ia ura Iesu do ia mai ia dekenai bena iena kara ena anina do ia gwauraia hedinarai, unai dainai ena hahediba taudia rua ia siaidia, Iesu do idia nanadaia, do idia gwau: “Do ia mai tauna be oi, o idau tauna ta do ita naria?”

Reana Ioane ena henanadai oi daradaralaia badina lagani rua bamona gunanai, Iesu ia bapatisoa neganai, Dirava ena lauma helaga ia itaia Iesu dekenai ia diho bona Dirava ena gadona ia kamonai Iesu ia hamaoroa ia lalo-namo henia neganai. Reana haida idia laloa Ioane ena abidadama ia manoka ia lao, unai dainai unai bamona ia henanadai. To ia be unai bamona lasi. Bema Ioane ena abidadama ia goada lasi, Iesu ese Ioane do ia gwauraia namo lasi, to ia gwauraia namo. Vadaeni, dahaka dainai Ioane be unai bamona ia henanadai?

Reana Ioane ia ura Iesu be sibona ena uduna amo ia hamaoroa Ia be Mesia. Bema Iesu unai bamona ia karaia, Ioane be dibura rumana ai ia noho neganai unai ese ena lalona do ia hagoadaia. To Ioane ena henanadai be mai ena badina ma ta. Ia ura diba, Iesu murinai ma ta do ia mai, iena gabu abia tauna bamona, bena ia ese idia perovetalaia gaudia, Mesia ese do ia karaia karadia, do ia hagugurudia.

Bible ena peroveta herevadia hegeregeredia, Dirava ese ia horoa Tauna be pavapava ai do ia lao, ia be taunimanima hamauria tauna ai do ia lao. Ioane be unai peroveta herevadia ia diba. Iesu be hua momo gunanai ia bapatiso, to Ioane be dibura ai ia do noho. Unai dainai Ioane ese Iesu na inai bamona ia nanadaia: ‘Oi ese Dirava ena Basileia do oi haginia, eiava oi murinai ma ta, Mesia ena hairai idia perovetalaia herevadia do ia hagugurudia tauna, do ia mai, bona ia ai naria be namo, a?’

Iesu ese Ioane ena hahediba taudia ia hamaorodia lasi, ‘Oibe, idia peroveta do ia mai tauna be lau!’ To idau, unai neganai Iesu ese hutuma ia hamauridia, herevana edia gorere be dahaka. Bena hahediba taudia ia hamaorodia, ia gwau: “Umui lao, umui itaia bona umui kamonai karadia Ioane dekenai do umui hamaoroa. Matakepulu taudia edia matana idia kehoa, aena dika taudia idia raka namonamo, lepera taudia idia goeva, taia kudima taudia idia kamonai, mase taudia idia toreisi, bona ogogami taudia Sivarai Namo idia kamonai henia. Lau dekenai ia laloa daradara lasi tauna be do ia namo.”

Reana Ioane ia laloa namona be Iesu ia mai bona dibura amo do ia ruhaia nege, to unai hereva amo Iesu ese Ioane ia hamaoroa hoa karadia momo ia karaia vadaeni, namo lasi ia laloa ma haida do ia karaia be namo.

Ioane ena hahediba taudia idia raka oho neganai, Iesu ese taunimanima momo herea ia hamaorodia, Ioane be Iehova ena “hereva siaia tauna,” Malaki 3⁠:1 ese ia perovetalaia tauna, bona danu ia be peroveta tauna Elia, Malaki 4⁠:​5, 6 ese ia perovetalaia tauna. Unai hereva amo ia ese Ioane ia hanamoa, ia gwau peroveta taudia gunadia ese Ioane idia hereaia lasi; ia gwau:

“Umui lau hamaoroa momokani, hahine edia bogana dekena amo idia vara taudia ibounai be ta ese Ioane ia hanaia lasi, to Guba Basileia lalonai, tau maragina ese Ioane ia hanaia. Ioane Bapatiso ena haroro nega ia mai bona harihari Guba Basileia be taunimanima ese idia heatu henia noho, bona heatu taudia ese idia ura dogoatao momokani.”

Unai hereva amo Iesu ia hahedinaraia Ioane be guba Basileiana lalonai do ia noho lasi, badina be Basileia lalonai gabe tauna ese Ioane ia hereaia. Ioane ese Iesu ena dala ia lailaia, to Ioane ia mase guna, bena gabeai Keriso be ena hahediba taudia ida gwauhamata ia karaia, idia be ia ida Basileia lalonai do idia lohia hebou. Unai dainai Iesu ia gwau Ioane be guba Basileiana lalonai do ia noho lasi. To idau, Ioane be tanobada ai do ia mauri noho Dirava ena Basileia ena siahu henunai. Luka 7:​18-30; Mataio 11:​2-15.

◆ Dahaka dainai Ioane ia henanadai, Iesu be do ia mai Tauna eiava ma ta do ia naria be namo?

◆ Iesu ia gwau Ioane ese edena peroveta herevadia ia hagugurudia?

◆ Dahaka dainai Ioane Bapatiso be guba dekenai ia lao lasi Iesu ida do idia noho hebou totona?