Duahia Taudia Edia Henanadai

Mataio 11:11 ena hereva dainai ita gwau diba Iesu ia diba Ioane Bapatiso be ia vairanai do ia mase, a?

Oibe, Iesu ia diba Ioane do ia mase bona horoa Keristen tauna ta ai do ia lao diba lasi, badina Iesu ia gwau: “Umui lau hamaoroa momokani, hahine edia bogana dekena amo idia vara taudia ibounai be ta ese Ioane ia hanaia lasi, to Guba Basileia lalonai, tau maragina ese Ioane ia hanaia.”​—Mataio 11:11.

Aneru Gabriel ese Ioane do ia vara sivaraina ia herevalaia neganai, ia peroveta, ia gwau Ioane be “mai goadana bona mai siahuna, Elia peroveta tauna ena kara hegeregerena. . . . [Iehova] ena bese taudia do ia abidia hegaegae.” Ioane be ia mai guna, bona taunimanima ia hegaegaelaidia Iehova ena Mesia tauna idia naria totona. To, Dirava ese ia henia peroveta herevana lalonai, hereva ta lasi ia gwau Ioane be do ia mai Mesiana ena hahediba tauna ta ai do ia lao, bona Ioane ena tamana, Sekaria, ese ia gwauraia peroveta herevana lalonai unai hereva ia gwauraia lasi danu.​—Luka 1:​17, 67-79.

Unai dainai, Iesu ia hapabatisoa murinai, Ioane ese ena haroro gaukara, ena bapatiso gaukara, bona taunimanima hegaegaelaidia gaukarana ia karaia noho. Hoa dalana dekenai Ioane ia diba Iesu be lauma helaga ena bapatiso do ia karaia, to Ioane ia gwau lasi ia ese unai lauma helaga do ia abia, bona horoa Keristen tauna ta ai do ia lao. (Mataio 3:11) Danu, Ioane ia diba iena gaukara do ia maragi ia lao, to Iesu ena gaukara do ia bada ia lao.​—Ioane 3:​22-30.

Ita duahia vadaeni herevana, Mataio 11:11 dekenai, be Iesu ese ia herevalaia neganai, Ioane be dibura rumana dekenai idia atoa vadaeni. Iesu ia gwau guna, dibura dekenai idia atoa peroveta tauna, Ioane unai, be pavapava bona kohena gaukara guba dekenai do idia abia taudia amo tau maragina do ia hanaia diba lasi. To, Iesu ia diba danu Ioane do ia mase negana be ia kahirakahira, bona guba mauri abia ena dala “matamatana” ia do kehoa lasi neganai, do ia mase. (Heberu 10:​19, 20) Unai anina be Pentekoste 33 C.E. dinanai, lauma helaga ese Iesu ena hahediba taudia ia horodia hamatamaia neganai, Ioane be tanobada dekenai ia boio vadaeni. Unai dainai, Iesu ena hereva Mataio 11:11 dekenai ena anina be Iesu ia diba Ioane be guba dekenai do ia lao lasi.